Luka 22
22
Pfuundu a ndusili a Yiisu
(Mataayi 26.1-5; Malako 14.1-2; Yowani 11.45-53)
1Mukuungi a mapa ma hele liviiri wu bubaata Paaka ali bebele. 2Banguu ba bangaanga ba Nziaambi na bayiisi ba mikele basiayi buni budusu Yiisu, ka bo bali na boomo ba baata.
Yuuda ayilimi mu uyeelele Yiisu
(Mataayi 26.14-16; Malako 14.10-11)
3Ka Saatina akoti mu Yuuda wu bubaata Isikarioti, wali mosi mu miyii kuumi na mioolo. 4Yuuda ayeni mu uyuhusunu na banguu ba bangaanga ba Nziaambi, na bakuutu babakebi ba nzo a Nziaambi, mu usaa kuulu yi nde uyeelele Yissu kwaa bo. 5Bo bayaangi, na bayuhisini mu uha nde mboongo. 6Nde asiingi, na nde abaandii usaa taanga diafwaana mu uyeelele Yiisu kwaa bo kwa hele a baata ba yaaba.
Nzilimini a Paaka
(Mataayi 26.17-19; Malako 14.12-16)
7Iluumbu kia mukuungi a mapa mahele na lifunusu, ki bafwaana mu udusu baana ba mameme ma Paaka kiatoori. 8Yiisu atsindi Peetero na Yowani, wabaleeli: «Diyene diyiluu bisi biloo bia Paaka, paa di diaanani.» 9Bo bafuuli kwaa nde: «Kuni we tooni ti bisi diyiluu bio?» 10Nde avutili kwaa bo: «Diyuu: bu beni dika koto mu ngaanda, beni sa dibwaanina na muutu mosi wabiti lisaanga la maamba, diduku nde mu nzo yi nde akaayakoto ya koto, 11na dileele kwaa ngaa nzo: “Muyiisi leeli kwaa we: Mu ki itsuru kia nzo nidia biloo bia Paaka na miyii mia me?” 12Nde sa alaa beni itsuru ki inene ku etaze, ki babweeyise, ni kuu beni dika yiluu biloo bia Paaka.» 13Bo bayeni, bamoni mandaa moosi weti bu nde aleeli kwa bo, na bayilii biloo bia Paaka.
Meese ma Pfumu
(Mataayi 26.20-30; Malako 14.17-26; Yowani 13.21-26; 1 Kolito 11.23-25)
14Taanga bu dia atoori, Yiisu adiaali nha meese, na batumu ba nde. 15Nde aleeli kwaa bo: «Me aba ngo nzala udia biloo bia Paaka bi na beni, tswaamina me ni mono pasi. 16Ka me ni leeli kwa beni, me a nibwadia bio pe, natee bu tsutulu a ndaa yikaayilimi mu Ipfumu kia Nziaambi.» 17Nde aholi mbasa, avutili matoondo, na aleeli: «Diholo yiinayi, na dikaba yo nha kati a beni; 18ka me leeli kwaa beni, umata mu taanga di a nibwanywa viinyi pe natee Ipfumu kia Nziaambi iyira.» 19Tumake nde aholi lipa, bu amani uvutulu matoondo kwaa Nziaambi, nde abukili lo na ahi lo kwaa bo, na aleeli: «Yiinayi ni nyutu a me, yibahi mu beni. Diyiluu buu, mu ulibili moonyi mu me.» 20Nde asi bumosi mu mbasa, nha mbisi a udia aleeli: «Mbasa yiinayi ni lilasina lilinyatii, layilimi mu makila ma me, mamatsiaamii mu beni. 21Ka dimono, wu uyeelele me li nha meese ma, na me. 22Mwaana a muutu sa akwa, weti bu Nziaambi ayesini, ki pili a ngebe kwaa muutu wuu, wu uyeelele nde.» 23Na bo babaandii ufulusunu mu uyaaba na nha kati a bo utuu uyiluu ndaa ya pili yi.
Na avulu bunene nha kati a miyii?
24Paa diabwi nha kati a bo: «Na nha kati a bo utuu umonuu weti wavulu bunene.» 25Yiisu aleeli kwaa bo: «Mitini mia matsi mili na litumu loosi nha yulu a matsi ma bo, na babali na litumu nha yulu a matsi maa batoono ti baata bata bo “Bayilii a mamabwe.” 26Ka kwaa beni a buli buu pe. Ka, wa wavulu bunene nha kati a beni, aba weti wavulu bungebe, na wuu wu utumu afwaana uba weti musiali. 27Ka, na avulu mu bunene, wadiaala nha meese oo wuu uli mu usalila? A wa diaala nha meese pe? Ka bunu me ndi nha kati a beni weti musiali. 28Beni ni badianambiti mu me, mu taanga dia mapasi ma me. 29Ni mu bu me heeri beni Ipfumu, mbii bu Taayi a me ahi me kio. 30Me heeri beni kio, paa ti beni didia na dinywa nha meese ma me, mu Ipfumu kia me, na beni sa didiaala nha mambata ma ipfumu mu ufuundusu bifuumbu kuumi na bioolo bia Iseraeli.»
Yiisu ayaabisi ti Peetero sa atunu nde
(Mataayi 26.31-35; Malako 14.27-31; Yowani 13.36-38)
31«Simooni, Simooni! Yuu: Saatina aloombi litumu mu unyingisi beni boosi, weti bu bubaayengese looso. 32Ka me nakuundi mu we, paa ti imiini kia we a iyadiimbili; na we, bu kaakiingili mayele, hamisa baana ba nguu ba we.» 33Peetero aleeli kwaa nde: «Pfumu, me nayilimi mu uyene na we, na mu perese na mu likwa.» 34Yiisu avutili kwaa nde: «Peetero, me leele kwa we, lolo li tswaamina tsutsu ukookolo, we sa tunu me mbala tata ti we ayaaba me pe.»
Ipokolo kia mboongo, kutu na mukasa
35Nde abwileele kwaa bo: «Bu me naditsindii beni kwa hele a ipokolo kia mboongo, so kutu, so bikoori, ima kia heli na beni?» Bo bavutuli: «A iloo pe.» 36Nde aleeli kwaa bo: «Ka mu taanga di, wu li na ipokolo kia mboongo, aholo kio. Bumosi ka kwa uli na kutu, na wuu wa hele na mukasa, ayaluu ikutu kia nde, mu usuumbu mukasa. 37Me leeli kwaa beni, bwafwaana ti Mabasonuu mayilimi mu me: “Nde ka bataangi nha kati a baa bahele na mikele.” Ka, Mabasonuu mu me maka mu uyilimi.» 38Bo baleeli: «Pfumu mono mikasa mioolo.» Na nde aleeli kwaa bo: «Bu maakuu.»
Yiisu akuundi ku mulaanda a olive
(Mataayi 26.36-46; Malako 14.32-42)
39Nde apali, na ayeni ku mulaanda a olive, mbii bwali ipfu kia nde. Miyii mia nde mia muduki. 40Bu bo batoori nha mbuu yii, nde aleeli kwaa bo: «Dikuundu, paa di nyaala ubwa mu puusu.» 41Na nde atakii na bo mu mwaa iteesi hoolo, na atsukini mu ukuundu, 42aleeli: «Taata so lili litoono la we, maasa me mbasa yi. Ka a buli litoono la me pe, ka nyaala litoono la we liyilima» 43Ni mubuu tumu a Nziaambi amati ku yula, amonii kwa nde mu uhamisa nde. 44Boomo bu ba mubwiilili, nde akuundi mu ibaala kialaa, na tuumu la nde lakitii weti mabete ma makila matsoli nha tsi. 45Nha bisi a likuundu, nde atemini ayiri a uvutuu kwaa miyii, wababaasi bala tolo mu ndaa ngebe, 46Na nde aleeli kwaa bo: «Mu ima dilaari tolo? Ditemene dikuundu paa dihele ubwa mu puusu.»
Yiisu bakaangi
(Mataayi 26.47-56; Malako 14.43-50; Yowani 18.3-11)
47Bu ali kene mu utsuu, mosi mu miyii kuumi na mioolo wu bu baata Yuuda abeyi koongi, asweesii kwaa Yiisu mu unyumbutu nde. 48Yiisu aleeli kwaa nde: «Yuuda, mu unyumbutu we uyeelele Mwaana a muutu?» 49Bu bamoni mamakeni uyiri, ba bali na Yiisu baleeli kwaa nde: «Pfumu, didwaana mu mukasa?» 50Na mosi mu bo ateti booyi la nguu a ngaanga a Nziaambi, na akesi nde litswi la koo kia babaala. 51Ka Yiisu aleeli: «Dinyaala, bu maakuu.» Tumake nde abeembi litswi la booyi la nguu a ngaanga, na abeelisi nde. 52Yiisu aleeli kwaa banguu ba bangaanga ba Nziaambi, kwaa bakuutu ba bakebi ba nzo a Nziaambi na bakuutu ba baata, babayiri mu ukaanga nde: «Beni dipali na mikasa na mipaanga weti ti me ali ihaangi? 53Biluumbu bioosi me nali na beni mu nzo a Nziaambi, na beni a diakaangi me pe. Ka di taanga dia beni na lituu la pimisi.»
Peetero atuni Yiisu
(Mataayi 26.57-58,69-75; Malako 14.53-54,66-72; Yowani 18.12-18,25-27)
54Bu bakaangi Yiisu, bo babiti nde na bamuloosi mu nzo a nguu a bangaanga ba Nziaambi. Peetero aduki ku lala. 55Bo bavuuti mbaa nha kati a mbari na badiaali. Peetero ali adiaali nha kati a bo. 56Booyi limosi la mukaasa lamoni Peetero adiaala nha mukoo a mbaa, atali nde isooso, na aleeli: «Wuunawu ka aba na nde.» 57Ka nde wamutuni, aleeli: «A maama, me a nayaaba wa me nde pe.» 58Idii pe, muutu mukimi amoni nde na aleeli: «Weka, li mosi mu bo!» Na Peetero avutili: «Ngori taata, a uli ngwanya pe.» 59Nha bisi a nguungu mosi, mukimi ahami mu uleele: «Mu ngwanya, wuunawu ka aba na nde, ka nde li musi Ngalili.» 60Peetero avutili: «Me a nayaaba pe ma we tooni uleele.» Nhaa-na-tsi, bu ali keni mu utsu, tsutsu akookili. 61Ka Pfumu asieetii, na atali Peetero. Peetero alibili moonyi mu mandaa ma Pfumu aleeli kwa nde: «tswaamini tsutsu ukookolo lolo, we sa tunu me mbala tata.» 62Nde apali ku mbari, na alili mu ngebe dialaa.
Yiisu bamutuyi na bamuteti
(Mataayi 26.67-68; Malako 14.65)
63Babaala baki kebe Yiisu, bamutsori, na bamuteti. 64Bo bafuyi nde busu na bafuuli nde, baleeli: «Bili! Leele na teti we?» 65Na bo babwituu nde bituyi bia mupili na mupili.
Pfuundisi a Yiisu
(Mataayi 26.59-66; Malako 14.55-64; Yowani 18.19-24)
66Bu busu bakieeri, bakuutu ba baata, na banguu ba bangaanga ba Nziaambi na bayiisi ba mikele bakukini. Bo babiti Yiisu nha kulu a pfuundu a bakuutu ba banzioonzi ba Bayuudayo. 67Bo baleeli: «So ni we li Kristo, leele bisi.» Nde avutili kwaa bo: «So me ndeeli beni, beni a disiingi so hoolo pe, 68ka so me fuuli beni nduru, beni a divutulu so hoolo pe. 69Ka umata mu taanga di, Mwaana a muutu sa adiaala nha koo kia babaala kia Nziaambi puungu lituu.» 70Boosi baleeli: «Ka we ni mwaana a Nziaambi?» Nde avutili kwaa bo: «Beni bame dileeli ti me ni Mwaana a Nziaambi.» 71Ni mu buu bo baleeli: «Bisi a dili na nzala a imbaangi ikimi pe! Bisi bame dimaayuu mandaa mu munywa a nde.»
Tällä hetkellä valittuna:
Luka 22: iyxYAK
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2024 (Active) Wycliffe Bible Translators, Inc. All rights reserved.