लूका 14
14
हाँठ-ग्वारा सुवाइल मनैया चोखैलक
1एक बिसैना दिनम येशू एकठो अगुवा फरिसीक घर खाना खाए गैल। फरिसीहुँक्र उहाँक गल्ती पकर्ना दाउम रलह। 2उहब्याला येशूक सामुन्नेम हाँठ-ग्वारा सुवाइल एकठो मनैया देखपरल। 3येशू फरिसीन ओ गुरुन पुछ्ल, “बिसैना दिनम मनैन चोखैना ठीक हो कि नाहीँ?” 4तर हुँक्र कुछु जवाफ नैदेल। येशू उ बेरम्मेह छुल ओ चोखाक पठैल।
5तबदोस्र येशू हुँकन कल, “बिसैना दिनम टुन्हक लर्कापर्का या गोरु-बच्छु कुवँम पर्टीकि, टुह्र नैझिँक्टो का?”#मत्ती १२:११ 6तब हुँक्र कुछु फे जवाफ देह नैसेक्ल।
नम्र हुइना बारेम आहान
7फरिसीक घर खाना खाए आइल पौह्नन् मुख्य-मुख्य ठाउँ र्वाजल देख्क येशू एकठो आहान कल, 8“केक्रो भ्वाजभत्यारम खाए जैबो त, बर मनैन्हक बैस्ना ठाउँम जिन बैठहो, काकरकि निउँता पाइल टुँहनसे बर मनै फे आइसेक्ठ।#हितो २५:६-७ 9बरा मनैया अइहीँ त, न्युता पठुइया कह्हीँ, ‘यिहाँह बैठदेओ।’ तब टुँहीन सबजन्हक छ्वारल ठाउँम जाक बैठपरी। असिक टुँ शर्मम पर्बो। 10भ्वाजभत्यारम जैबो त, बेनसे पाछ बैठहो। निउँता पठुइया टुँहीन देखहीँ त, ‘मुख्य ठाउँम आओ’ कैक बलैहीँ। तब सबजन्हक आघ टुँहार बरा इज्जत हुई, 11महान हुइखोजुइया छुटी हुई; छुटी हुइखोजुइया महान हुई।”#मत्ती २३:१२; लूक १८:१४
12येशू खाना खाए बलुइया फरिसीह कल, “खैनापिना दिनम आपन सङ्घर्यन, दादुभैयन, इष्टमित्र, ओ धनी-धनी छिमेकीन केल जिन बलाओ,#१४:१२ ग्रीक भाषक स्रोतमसे शाब्दिक अनुवाद, “खैनापिना दिनम आपन सङ्घर्यन, आपन दादुभैयन, आपन इष्टमित्र या आपन धनी-धनी छिमेकीन केल जिन बलाओ।” काकरकि हुँक्र फे टुँहीन बलैठ ओ टुँहार गुण घुमादेठ। 13बेनसे खैनापिना दिनम गरीब, लुल, नाङ्गर, ओ आँख नैदेख्ना मनैन बलाओ। 14टुँ असिक गुण घुमाई नैसेकुइयन बलाओ, त टुँ आशिष पैबो। ओ जब ठीक जीवन जिउइयन मुवलमसे फेदोस्र जिजहीँ, तब परमेश्वर टुँहीन इनाम देहहीँ।”
15येशूक बात सुन्क सँग खाइ बैठल मनैया कहल, “परमेश्वरक राज्यम खाइ पउइयन आशिष पाइल मनै हुइट।”
बराभत्यारक आहान
मत्ती २२:१-१०
16येशू कल, “एकठो मनैया बरा भ्वाजभत्यार लगाक धेर जहन निउँता देल। 17खैना ब्याला हुइल् त, मालिक आपन नोकरह निउँता देहेल मनैन ‘खैना ब्याला हुइल्’ कैक फेदोस्र बलाए पठैल।
18“तर निउँता पउइयन सक्कुजन बहाना बनैल। एकठो मनैया कहल, ‘मै भक्खर एकठो जग्गा किनरख्नु, महीह जसिक हुइलसे फे उ जग्गा ह्यार जाइपर्ना बा। माफ करी मै नैआइसेकम।’
19“द्वासर मनैया कहल, ‘मै भक्खर पाँच हर गोरु किनरख्नु, महीह आबहेँ हुँकन जोत्क जाँच करपर्ना बा। माफ करी मै नैआइसेकम।’
20“और मनैया कहल, ‘मै भक्खर भ्वाज कैरख्नु, उहओर्से मै आइनैसेकम।’
21“तबदोस्र नोकर घुम्क गैल् ओ सब बात मालिकह सुनाइल। यी सुन्क मालिक रिसैल ओ कल, ‘सहरक गल्ली-गल्लीम झट्ट जाओ, ओ गरीब, लुल, नाङ्गर ओ आँख नैदेख्ना मनैन बलाक ल्यानो।’
22“बलैना काम सेक्क नोकर मालिकह कहल, ‘अप्नक कहलअस सबजहन बलाक अन्नु, तर आम्ही खाली ठाउँ पलबा।’
23“तब मालिक नोकरह कल, ‘राजमार्ग ओ और डगर जहाँसम जाई, उहँसम जाओ ओ यी बरा भ्वाजभत्यारम आइक लाग मनैन कर लगाओ। हुँक्र अइहीँ त, म्वार घर भरिभराउ हुई।’ 24मै टुँहन कहटुँ, पैल्ह निउँता पउइयनमध्येम यी भ्वाजभत्यारम नैआइक लाग बहाना बनुइयन कुई फे यी भ्वाजभत्यारक परिकार चिख नैपाई।”
येशूक पाछ लगुइयन तिरपर्ना म्वाल
25एक दिन धेर मनै येशूक पाछपाछ जाइटलह। येशू हुँकन्हकओर घुम्क कल, 26“यदि टुह्र म्वार पाछ लाग चहठो कलसे, टुह्र आपन डाई-बाबा, गोसिन्या, छाई-छावा, दादुभैया, दिदीबहिन्या ओ अपन्हेहसे धेर महीह प्रेम करपर्ठा। अत्रा नैकर्ना मनै म्वार चेला हुइही नैसेक्ट।#मत्ती १०:३७ 27#मत्ती १०:३८; १६:२४; मर्क ८:३४; लूक ९:२३जौन मनैया आपन क्रूस बोक्क म्वार पाछ नैलागट्, ऊ म्वार चेला हुइही नैस्याकट्।#१४:२७ सम्भवत: यी पदक अर्थ हो: यदि मनै म्वारम विश्वास कर्लक कारण शरम मान या मुनासमनक दुःख सहना फे इच्छुक नैहुइट कलसे, हुँक्र म्वार चेला हुइही नैसेक्ट।
28“यदि कुई धरहरा#१४:२८ धरहरा: धरहरा भारीढ्याङ दरवार हो ओ यी बनाइक लाग बहुत खर्च लग्ठा। बनाइ चाहल कलसे, आपनठे रहल पैँसले पुगी कि नाहीँ कैक आघहेँ हिसाब नैकरट् का? 29नकि त जग बैठाक काम ओराइ नैस्याकल् कलसे, मनै ओहीह हिस्यैटी कह्हीँ, 30‘यी मनैया धरहरा बनाइ सुरु करल, बनैटी-बनैटी पैँसा ओरागैलस, ओत्रहम छोरदेहल।’
31“अथवा कौन राजा आपन दश हजार सेना और राजक बीस हजार सेनन् हराइसेक्ठ कि नाहीँ कैक पैल्हहेँ सोचविचार बिना कर्ल और राजसे लडाइँ कर जैहीँ? 32यदि जित नैसेक्नाअस लग्लसे, और राजक सेना बरा दूर पलरहल ब्यालम, ऊ मेलमिलाप करक लाग आपन मनैन पठाडरहीँ। 33असहेँक टुह्र पैल्हहेँ सोचविचार करपर्ठा कि टुह्र आपन सब चिज छ्वार नैसेक्टो कलसे, म्वार चेला हुइही नैसेक्टो।#१४:३३ चेलावँ आपन सब चिज औरजहन देडरहीँ ताकि हुँक्र गरीब हुहीँ कना येशूक चाहना नैहुइटन। बेनसे हुँकन्हक मुख्य प्राथमिकता परमेश्वर ओ उहाँक इच्छा हुइपर्ठा कना उहाँक चाहना हुइटन (मत्ती ६:३३), ताकि यदि हुँकन्हक जीवनम परमेश्वरक इच्छा जो हुइटन कलसे, हुँक्र सब चिज त्याग कर तयार हुइठ। और शब्दम कना हो कलसे, हम्र अपन्हे ओ हमारठे रहल सब चिज परमेश्वरक अधीनम रहपर्ठा। लूका ९:५७-६२; १२:३१, ३३-३४; १८:२९-३०; फिलिप्पी ३:७-९ हेरी।
34“हुइना त, न्वान एकदम मजा वस्तु हो, तर न्वानक स्वाद हेराइल कलसे, ओहीह फेदोस्र नोनार बनाइ नैसेक्जाइट्। 35स्वाद नैरहल न्वानक त, माटीक या मलक लाग मजा नैहो।#१४:३५ उ समयम जग्गह खेतियोग्यक रूपम ताजा बनैलरहक लाग कबुकाल माटीम या मलम न्वान मिलाजाए। मनै ओहीह फाँकदेठ। ज्याकर सुन्ना कान बा, यी बात उह बुझी।”
Tällä hetkellä valittuna:
लूका 14: thl
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2020, Wycliffe Bible Translators, Inc. All rights reserved.