Johani 1
1
1Kuvutengulilo kwu alikwo ULimeńu. ULimeńu uju akava nu-Nguluve, ULimeńu uju ale vi Nguluve. 2Umwene kuvutengulilo akava nu-Nguluve. 3Syoni isipelwa syu sipelilwe mmwene jujwa. Ale angajage jujwa pwu ndali nasipelilwi isinge isipelwa. 4Navwene uvwumi vukava mumwene jujwa. Uvwene uvwumi vukava lumuli lwa vanu. 5Ulwene ulumuli lukamulika muṅisi. Ijyene iṅisi lweli najikaluvona ulumuli.
6Pwu akavoneka umunu uvi Unguluve ansuṅile, vi ale vi Johani ilitavwa. 7Vi akitsa kukutsitsova itsa kusimilitsa, akitsa kukulusimilitsa lu lumuli voni avanu ukuta avagege kulwidiko. 8Umwene ukuva lumuli kwanave lumuli, bako umwene ale va kulutsova vuvule ulumuli, ale va kulusimilitsa. 9Umwene lumuli uva jilweli uvi ikuvamulika voni avanu vi ali pakwitsa nkilunga umu. 10Ukuvamwo kwu alimwo nkilunga umu, mańa nakyene ikilunga kyipelye mumwene jujwa upwu kikapelwa, lola ikilunga nakyammańe. 11Umwene akitsa mumwene jujwa mańa avene avanu va mwene vakabela ukumwupilila. 12Avene voni avamwupililaga vwu akavapa amaka aga kuvela ukuva vana va Nguluve vwu avalyidikaga ilitavwa lya mwene. 13Vwu ava nukuholwa navaholilwi namunkisa namumwa gunogwa umana, namumwa anogilwe umunu ungosi, bako avene avaholile jyu Nguluve.
14Pwu ULimeńu akipela ukuva mmana gwa vanu, akatsenga ihema mwavwe umu, tukavuvona uvuvaha vwa mwene, uvuvaha uvwavonekaga ukuva vwa ju nswambe uvi ali mpamato mwene ludiga mwa dadaje, uvi nuluhungu nuvwajilweli sidigile mumwene. 15Umwene UJohani akatsova akasimilitsa akilanga akata: Vi uvi ndantsovaga uvi ndatetsaga ikuṅonga mumbele, vi ipelile ukuva mbaha nakwane ulwakuva umwene akavakwo vwu ndikanale une. 16Mańa twivoni tukatola uluhungu mbukwile vwa mwene umwu vuvelye, tukavuja tukatolela lu luhungu. 17Mańa itsene isimilitso tsu Unguluve atusuṅye nu-Mose, lola uluhungu nuvwajilwelii syu atupye ju Jesu Kilisiti. 18Nakuli ujyunge uvi ambwene mmiho Unguluve. Unswambe mpamato ludiga uvi udadaje ampagite vi atuvulile atye mańa ali nde.
19Apene upwu ava-Juta va mu-Jelulsalemu vwu vavasuṅile kwa Johani avateketsi navańa-Levi upwu vatetsage: Nkambutsage nkatetsage: Veve veni uve? Pwu UJohani akasimilitsa, 20akaleka nukusiha akabela akata: Sinene Kilisiti. 21Pwu vakambutsa vakata: Veve veni, veve Elija? Umwene akabela akata: Mańa sinene Elija. Pwu avene vakongeletsa vakata: Veve namalago? Umwene akanda akata: Bako. 22Pwu avene vakavutsa vakata: Veve veni? Utuvulage itsa kuvavula avatusuṅile. Vwitsova liliku? 23Umwene akavavula akata: Une ndililimeńu lya mwilangi uvi ikwilanga ndukungu ita: Mugolose unsevo gwa nkuludeva vwu atsovaga uńamalago UJesaja. 24Avene avanu avagegaga itsa kuvutsa ili vwu vahumile kuvapalisai. 25Pwu vakammiga vakata: Vukuvotsa kiki avanu vwu siveve Kilisiti, siveve Elija, siveve ńamalago? 26Umwene UJohani akavanda akata: Une ndikuvotsehetsa namagasi vuvule avanu. Lola umwene ali pagati pańye uvi namummańili. 27Vi aṅongile une, uvi nandinogili ukuvopola utukova twa nsikato sya mwene. 28Tsitsitsi tsu tsikavonekela mbutsenge uvunge uvwale mwambo gulya gwa Jolitani uvwu vita mu-Betanija mulya UJohani akavotsa avanu.
29Nda kilavo pwu UJohani akavona UJesu ikwitsa upwu ale, pwu akavavula avanu akata: Lola vi Kakolo ka Nguluve akitwikile uvutulanongwa vwa kilunga kyoni. 30Vi uvi ndantsovaga ndatetsaga: Ikuṅongaga mumbele umunu, vi ipelile ukuva mbaha nakwane ulwakuva umwene akavakwo vwu ndikanale une. 31Nune nandimmańili, bako upwu nditsile, upwu avanu ndikuvotsa namagasi pwu tsu nditsile ukuta apulikikage jujwa mbańa-Isilaeli umu. 32Pwu UJohani akatsova akasimilitsa sitso akata: ndimbwene UMepo vwu ikumwikila ihuma kukyańa ukuta ngundya, Ndikavona itama pamwene. 33Nune nandimmańili, bako jujwa uvi asuṅile uvi atye ukavotse namagasi avanu vi ambulile atye: Uvi ungave umbwene UMepo ikumwikila itama pamwene, vwu vi jujwa uvi ikuvotsehetsaga nu-Mepo umbalatse avanu. 34Tsu ndikalola nune pwu ndikatsova ndikasimilitsa ndikata: Uju vi vi nswambe va Nguluve.
35Nda kilavo vwu imile baho UJohani navakongi va mwene vavili, 36pwu akavona UJesu igenda pwu akavavula akata: Kalya AKakolo ka Nguluve. 37Avene avakongi va mwene vavili vakapulika vwu itsova ili, pwu vakankonga UJesu. 38Umwene UJesu akakilivuka akavona vikunkonga mumbele pwu akavavutsa akata: Mubihaku? Avene vakanda vakata: Labi (kwukuta vi mańisi) uli ndapi? 39Umwene akata: Tuvuke nkapamańe, Pwu vakabiha nave vakatsikundola upwu alipwo. Pwu vakatama nave ilitsuva ili. Apene pale pwu pakavalilo ka kitsigo upwu vakambona. 40Avene avapulikaga itsu atsovaga UJohani vakankonga UJesu, ujyunge ale vi Andileja ununave va Simoni Petele. 41Vi akatengula ukumbona umamaje USimoni akambula akata: Tumbwene UMesija (kwukuta Kilisiti), 42akangega kwa Jesu, Umwene UJesu akandola akata: Vi Simoni vi ńa-jona uve lino vutsovwagwa ilya Kepa (kwukuta Petele).
43Nda kilavo UJesu vwu ibiha mu-Galilai pwu akaganila nu-Pilipo akambula akata: Uṅongage, 44Umwene UPilipo ahumile mu-Betisaita, vale mbutsenge vupamato nu-Andileja nu-Petele. 45Umwene UPilipo akaganila nu-Natanaeli akambula akata: Tumbwene uvi antsovaga nu-Mose musimilitso tsa mwene, uvi vantsovaga navańamalago, vi Jesu uńa-Josepu uva mu-Nasaleti. 46Umwene UNatanaeli akanda akata: Mu-Nasaleti siki sihumilemwo lusiku isinnonu? Umwene UPilipo akata: Tuvuke ukalole. 47Umwene UJesu vwu ambwene UNatanaeli ikwitsa kumwene pwu akantsovela ṅani akata: Ndegage uńa-Isilaeli jilweli uvi nali nuvuteki uvunge mwitumbu mmwene. 48Pwu nu-Natanaeli akambutsa akata: Ummańile ndaku? Akanda UJesu akata: Ndakuvwene vwu akanale nukukwilanga UPilipo vwu uli pankuju palya. 49Pwu akanda UNatanaeli akata: Vi mańisi vi nswambe va Nguluve uve, vi nkuludeva va vańa-Isilaeli. 50Pwu UJesu akanda akata: Uve utsivwene vuvule ulwakuva ndikuvulile nditye: Ndakuvwene pankuju. Uladega imbaha naku itsi. 51Pwu akatsova nave akata: Jilweli-lweli ndikukuvula ndita: Mutengula lino mwivona kukyańa kudinduka, mwivona navasuṅwa va Nguluve vita nukutoga kukyańa vita nukumwikila Uńamunu.
Tällä hetkellä valittuna:
Johani 1: Kinga
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
New Testament in Kikinga © British and Foreign Bible Society, 1961.
