UPUTUKILO 8
8
1Alioze Zambi yewuluka Noe ni akwa mwono eswe ni yimuna eswe apwile hamwe nenyi mu ulungu. Zambi yapalikisa fuji hashi chocho meya ahuwile. 2Mafuji a jondo nawa yaajika hamwe ni manjanela a mwilu, mba vula wa mwilu yapatuka. 3Meya akatukile hashi tangwa ha tangwa, mba ha kulakaji ni makumi atano a matangwa meya yahuwa. 4Ha tangwa kumi ni shimbiali lia kakweji wamuchishimbiali ulungu yiutula ha milundu ya Ararate. 5Meya yaya nikuhuwa tangwa ha tangwa ndo kakweji wamuchikumi. Mba ha tangwa litangu lia kakweji wamuchikumi masongo a milundu yamoneka.
6Kulutwe lia makumi awana a matangwa Noe yazulula njanela yize alingile mu ulungu. 7Yatuma chikwakwalo, yaya nikwendangana ndo meya homa hashi. 8Kulutwe yatuma katele akanyingike nyi meya hahuwa hashi. 9Alioze katele kawanyine haze mapwila ni chiliato chenyi mba yahilukila kuli iye ku ulungu mumu meya te hwali hashi heswe. Mba yazoza kwoko lienyi, yamukwata, yamunjisa kuli iye mu ulungu. 10Yashimbula matangwa akwo nawa shimbiali mba cheka nawa yatuhwisa katele mu ulungu. 11Ha chingoloshi katele yahilukila kuli iye. Kumanyi mu muvumbo wenyi lifwo lia olevwe lia wisu lia kupatula. Chocho Noe yanyingika ngwenyi, Meya hahuwa hashi. 12Yashimbula nawa matangwa akwo shimbiali, mba yatuma nawa katele alioze kahilukilile nawa kuli iye.
13Kwapwile ha mwaka makulakaji asambano ni kashi, ha kakweji mutangu, ha tangwa litangu lia kakweji meya hanomu hashi mba Noe yafukula ulungu, yatala, kumanyi ha mavu hanomu chau. 14Mba ha kakweji wamuchiali, ha tangwa makumi aali ni shimbiali a kakweji hashi homa. 15Zambi yamba kuli Noe ngwenyi, 16Tuhuka mu ulungu, ni yena, ni mukwenu-pwo, ni ané a malunga ni mapwo ja ané hamwe ni yena. 17Tuhuka ni a mwono eswe aze uli no a musunya weswe, ni tujila, ni yimuna, ni akwa kukalala aze akukalala hashi, akaseme chinji hashi, akaliokese, akalumbame hashi. 18Chocho Noe yatuhuka ni anenyi a malunga, ni mukwo-pwo, ni mapwo ja anenyi hamwe nenyi. 19Ni tushitu eswe, ni akwa kukalala eswe, ni tujila eswe, aze eswe akwenda hashi, nikulita ni mavungu jo yatuhuka mu ulungu.
20Mba Noe yatunga chilumbilo kuli Yehova. Yanda a kuli tushitu eswe akulinanga, ni a kuli tujila eswe akulinanga, yalambula milambu ya kulumba ha chilumbilo. 21Yehova yevwa lupembo mupema; Yehova yamba mu mbunge yenyi ngwenyi, Chichi kashinga nawa mavu mumu hali atu, mumu kunyonga cha mbunge jo chapiha chize ku wanuke wo. Chichi kulamba nawa akwa mwono eswe ngwe hinalinga. 22Shimbu hashi muhasala mwaka wa kukuwa ni mwaka wa kucha, ni chishika ni chivukuminya ni lwiza ni lushiho, ni mwalwa ni ufuku kuyichi kahwa.
Tällä hetkellä valittuna:
UPUTUKILO 8: Csa
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Chokwe Bible © Bible Society in Angola, 1975.