ยฮ 3
3
ลอง เฌา เยซู มาโนว อานีโคเดม
1แคง พึง พารีแซ อึณ ยี มึห ดูอี อู วี, อัน จืร อานีโคเดม. อัน มูห ดา ตาง เฆ ดูอี อายูดา อู วี. 2อัน ตัห โดง กอย เฌา เยซู ดอ แปร แฮะ อับ แคง หมึร. อัน วี ต็อห ดี เฌา เยซู, “อึย แม ซารา, เย แฮะ นับ, เฌาพรา แฮะ ตึย แม, แตห แม แบน ดา ซารา เย. เย นับ ปาย ตี, โกบ โบง แม นา หมึอม อาม กาเซา. เซ เฌาพรา ตู กอย รึม โดบ ดูอี, อาว มึห อาเซ นับ ดี โบง ปี ปี โบง แม.”
3เฌา เยซู วี ต็อห ดี อัน, “โอว ต็อห อาคาคัร ดี แม, เซ ดูอี ตู แบน ดูอี กามาย, อาว ปึอน ลึบ แคง มืง ปี อึบ เฌาพรา. อึณ ปี, ดูอี โลว วี ฆึอด ปอ อู เฌณ, แตห อัน แบน ดูอี กามาย.”
4อานีโคเดม วี ต็อห, “เซ ดูอี แฮะ ตาง, เหมา อัน ดี ปาย ดี วี ฆึอด ปอ อู เฌณ? อาว ปึอน วี ลึบ แคง วัต มา อัน, แตห อัน วี ฆึอด ปอ อู เฌณ.”
5เฌา เยซู วี ต็อห, “โอว ต็อห อาคัร ดี แม. อึณ โลว บอ น็อห พึอม เฌาพรา บอ อึม, แตห ดูอี แบน ดูอี กามาย. เซ อาว ปาย ตี, อาว ปึอน ลึบ แคง มืง ปี อึบ เฌาพรา. 6เซ ดูอี มึห ฆอน, ฆอน ตี มูห อาโมยว ดูอี. เซ น็อห พึอม เฌาพรา ยี ดัว อาซาก กามาย ดี อี, อึณ แตห น็อห พึอม อัน กามาย. 7โคว, แกวะ อาม โกบ ต็อห โอว ดี แม, แม โลว วี ฆึอด กามาย ปอ อู เฌณ. 8อึณ ปี คูน. คูน ตัห บูด โดง ปี อึง อัน. แม ตู นับ นา เหมา อัน ตัห, โดง เหมา อัน ฮาว. แม ยี นับ ดี โทม ฮัม อัน. น็อห พึอม เฌาพรา บอ ปาย ตี. แม ตู นับ ปี ปาย อัน ดี โบง, แตห ดูอี แบน วี แบน วี วี แบน ดูอี กามาย.”
9อานีโคเดม วี ดีหมอด ต็อห, “โอว ตู นับ เหมา อึณ ดี ปาย ดี แบน, ปี ต็อห แม.”
10เฌา เยซู วี ต็อห ดี อัน, “แม กอ บอ แฮะ มูห ดา ซารา อี มาโนว ดูอี แคง มืง อีซาเรลัะ, เหมา อึณ ปาย ปี ตู นับ แม ลอง อัน ตี? 11โอว ต็อห อาคาคัร ดี แม. เย กาลาง ดี เบ แคะ ปี นับ เย. มาเซ ปี ยึร เย, เย วี แค ดี เบ. แคะ ปี แค เย ฌึร ตี, เบ ยี ตู หณึม. 12ดอ กาลาง โอว ดี เบ แคะ ปี ปึอน ยึร เบ แดง กาดาย นี, เบ ตู โกบ หณึม. อึณ ตู ลึห ดี เบ. เซ โอว ยี ดี กาลาง ลอง ปี ปาย แบน โมยว แบน โมยว แคง มืง เฌาพรา เบ แบน แว ตู นับ. 13อาว มึห ดูอี อี แฮะ ดึอม โฮะ มืง เฌาพรา. อึณ ยี มูห มี อู วี, อี แฮะ แบน ฆอน ดูอี, อัน แฮะ ดึอม กอย แคง มืง เฌาพรา, แฮะ ตัห โลง แดง กาดาย. อัน ดี วี โฮะ นา แดง. 14ดูอี อี แฮะ แบน ฆอน ดูอี, อัน ปี ฮัณ ตึอน. ดอ กอย เฆ ดูอี อีซาเรลัะ แคง แปร กาฮ็อห, อาโมวแซ แฮะ ตา บ็อง, โบง อารึบ ฮัณ, เบลห นา แดง ร็อง, แตห อึณ คยอด ดูอี อี งึอบ อัน. ปาย ตี บอ ดูอี อี แฮะ แบน ฆอน ดูอี, อัน โลว ดึก ดี ร็อง, 15แตห ดูอี ดอน อี ปึอน ดี หณึม อัน, แตห อัน ปึอน ดี คยอด อาซาก เฆ. อาเซ หณึม ฆอน ดูอี ตี, อาซาก อัน ตู ชึม. อัน ดี บอ ปึอน ดี กอย รึม โดบ เฌาพรา เซเซ.
16เฌาพรา ร็อก กาเซา เฆ ดูอี แดง กาดาย. โคว, อัน ดัว ฆอน อัน อี มูห แคะ อู วี ตี, แตห อัน คยอด ดูอี. อาเซ หณึม ฆอน เฌาพรา ตี, อาซาก อัน ตู ชึม. อัน ดี บอ ปึอน ดี กอย รึม โดบ เฌาพรา เซเซ. 17เฌาพรา แฮะ แตห ฆอน อัน โลง แดง กาดาย แบน ดูอี, แตห อัน คยอด ดูอี, แกวะ แตห อัน ดัม หมาบ ดี เฆ. 18อาเซ หณึม ฆอน เฌาพรา ตี, อัน ตู โลว คัม หมาบ อัน. อาเซ ยี ตู หณึม, อึณ ปี เฌาพรา แฮะ ฮอต ดัม หมาบ ดี อัน, แตห อัน คัม โตต โกบ ตู หณึม อัน ฆอน เฌาพรา, อี มูห แคะ อู วี ตี. 19ลอง ดัม เฌาพรา หมาบ อี, อึณ ปาย นี. เฌาพรา แฮะ แตห บลาง อัน ตัห โลง แดง กาดาย. เฆ ดูอี อี กอย แดง กาดาย ยี ตู อึง บลาง ตี. เฆ อึง ดี กอย แคง อับ ว็อง โกบ แฮะ ฮาย แปะ แฮะ โบง เฆ. โคว, อัน โลว ดัม หมาบ เฆ. 20อาเซ โบง นา ตู หมึอม, อัน ตู อึง บลาง. อัน ตู ยัะ ตัห ฌัม แคง บลาง. อัน โยว บลาง ตี, แตห อึณ ลึห แคะ ตู หมึอม แปะ แฮะ โบง อัน. 21อาเซ ยี โบง นา หมาน, อึณ ปี, อัน กอย แคง บลาง. อึณ ดี แตห ดอน อี นับ ลอง แปะ แฮะ โบง อัน, อึณ มูห ปี อึง เฌาพรา.”
ลอง อายอฮาน วี มาโนว ลอง เฌา เยซู
22วาย อัน ตี เฌา เยซู เฆ ดีแบ อัน วี ฮาว ฌัม แคง อืง ยูดา. แคง อืง ตี อัน กอย รึม โดบ ดีแบ อัน. อัน บอ จึบ ดูอี แคง อึม. 23บอ ดา ซารา อายอฮาน ตึอน กอย ดี โคบ มืง เอโนน, อี กอย กาตัด มืง ซาลีม. โดง กอย อัน ตี, บอ อัน จึบ ดูอี แคง อึม โกบ มึห อึม กืน. เฆ ดูอี กืน บอ ตัห ฌัม โดง กอย อัน เซเซ, หมาณ แตห อัน จึบ เฆ แคง อึม. 24(ดอ อัน ตี มูห อาต คร็อง เฆ ดา ซารา อายอฮาน แคง กาปึม). 25ดอ อัน ตี เฆ ดีแบ อายอฮาน มัง อี บอ ดา ตาง ยูดา อู วี, เฆ ตู ลาย โพรม ลอง โลว บาย แบน โมยว แบน โมยว, แตห อึณ โดบ ดารา. 26ปัน ตี เฆ วี ฮาว ฌัม โดง กอย อายอฮาน ตึอน. เฆ วี ต็อห, “อึย แม ซารา, ดา ซารา ปี ดึอม แค แม ตึอน, อี แฮะ ดึอม กอย รึม โดบ แม ดอ กอย แม ดี แบลง ยอดาน, บอ อัน จึบ ดูอี แคง อึม. เฆ ดูอี บอกาเฆลียด วี ฮาว โดง กอย อัน.”
27อายอฮาน วี ต็อห, “ดูอี ดอน อี ตู ปึอน โบง มาเซ เซ เฌาพรา ตู แตห อัน โบง. 28เบ มืร นับ ปี ดึอม ต็อห โอว, โอว ตู มูห อัน เฌา ปี ร็อห ปี ตึย เฌาพรา แตห อัน คยอด ดูอี. โอว มูห อี แยต ดี อาต อัน เฌา ตี. 29ลอง อัน ตี, อึณ ปี บลอย คัด. อึณ มูห กาโณม, บอ อัน บอ ดีบยา อี โดบ อัน, ฆาย ดี ลาย คัด. อึณ ยี มูห ฆึก กาโณม ตึอน, อัน กอย ดี โคบ, โทม โฆรห ปี กาลาง กาโณม. น็อห อัน บอ ดาคึย กาเซา ดอ โทม อัน โฆรห ปี กาลาง กาโณม ตี. โอว ปี ฆึก ตี. บอ น็อห โอว แฮะ ดาคึย กาเซา. 30โคว, อัน โลว แบน ดา ซารา ตาง แตห เฆ ดูอี อี โดบ อัน แกร ดี กืน กาเซา. เฆ ดูอี อี โดบ โอว ยี โลว แกร ดี เปรต.
31ดูอี อี ตัห โลง แคง ฆางหราว, อัน แฮะ ตาง หลึอม ดอน อี. ดูอี อี กอย นา ครึม นี เซเซ, อัน นับ มี แคะ ปี มึห แดง กาดาย. อัน บอ นับ ดี กาลาง ดอน โมยว อี กอย แดง กาดาย. อาเซ ยี ตัห นา แดง, อัน มูห อี ตาง แดง ดอน อี. 32ดูอี ตี นับ ดี กาลาง ลอง ดอน โมยว แปะ แฮะ ยึร อัน, อึณ ยี ตู มึห อาเซ อี โทม หณึม โฆรห อัน ตี, แตห อึณ ลึบ แคง น็อห. 33อาเซ ยี แตห โฆรห อัน ตี ลึบ แคง น็อห, อัน นับ ซีคยา, เฌาพรา แฮะ หมาน แฮะ มูห. 34โคว, ดูอี ปี ร็อห ปี ตึย เฌาพรา, อัน กาลาง โฆรห เฌาพรา. เฌาพรา แฮะ ดัว กืน น็อห พึอม อัน ดี ดูอี อี หณึม อัน, แกวะ แตห อึณ ซี ฌูด ลูด ดอ เหมา. 35เฌาพรา ร็อก ฆอน อัน. โคว, อัน แตห ฆอน ตี อึบ โตต ดอน โมยว. 36อาเซ หณึม ฆอน เฌาพรา ตี, อัน ปึอน ดี กอย รึม โดบ เฌาพรา เซเซ. อาเซ ยี ตู แตห ฆอน เฌาพรา ตี อึบ น็อห อัน, อัน ตู ปึอน ดี กอย รึม โดบ เฌาพรา. เฌาพรา ดี รู ดี ดูอี ฌึร ตี เซเซ.”
Tällä hetkellä valittuna:
ยฮ 3: pce
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2021, Wycliffe Bible Translator, Inc. All rights reserved.
