Chhòng-sè-kì 33

Ngá-kok kap Í-sò Saⁿ-kìⁿ

1 Ngá-kok gia̍h-thâu khòaⁿ, khòaⁿ-tio̍h Í-sò lâi, koh ū sì-pah ê lâng kap i chòe-hé, chiū chiong hiah-ê gín-á pun-khui, kau hō͘ Lē-a kap Lúi-kiat, í-ki̍p nn̄g ê lú-pī. 2Ngá-kok chiong lú-pī kap in ê kiáⁿ pâi-chòe thâu-chêng, Lē-a kap i ê kiáⁿ pâi tī āu-bīn, Lúi-kiat kap Iok-sek pâi tī lō͘-bé. 3I pún-sin kiâⁿ-khì in ê thâu-chêng, liân-liân chhit piàn phak tī thô͘-kha pài, óa-kūn i ê hiaⁿ-ko. 4Í-sò cháu-lâi gêng-chiap i, kā i lám--teh, koh lám i ê ām-kún kā i chim; nn̄g ê lóng tōa-siaⁿ háu. 5Í-sò gia̍h-thâu khòaⁿ-tio̍h hiah-ê hū-jîn-lâng kap gín-á, chiū mn̄g, “Chiah-ê kap lí chòe-hé--ê sī sím-mi̍h-lâng?”

Ngá-kok kóng, “Chiah-ê gín-á sī Siōng-tè siúⁿ-sù hō͘ lí ê po̍k-jîn--ê.” 6Kóng-liáu, nn̄g ê lú-pī kap in ê gín-á chìn-chêng lâi pài. 7Lē-a kap i ê gín-á mā chìn-chêng lâi pài; lō͘-bé, Iok-sek kap Lúi-kiat mā chìn-chêng lâi pài.

8 Í-sò kóng, “Góa tú--tio̍h hit-tīn cheng-siⁿ, sī beh chòe sím-mi̍h?”

Ngá-kok kóng, “Sī ǹg-bāng tùi góa ê chú tit-tio̍h un-tián.”

9 Í-sò kóng, “Sió-tī, góa ê í-keng ū-kàu chōe ah, lí ê lí lâu--teh.”

10 Ngá-kok kóng, “M̄-thang án-ni. Góa nā tùi lí tit-tio̍h un-tián, chhiáⁿ lí tio̍h chiap-siū góa ê lé-mi̍h. Lí hoaⁿ-hí chiap-la̍p góa, góa khòaⁿ-tio̍h lí ê bīn, chhin-chhiūⁿ kìⁿ-tio̍h Siōng-tè ê bīn. 11Chhiáⁿ chiap-siū góa tòa-lâi sàng lí ê lé-mi̍h; in-ūi Siōng-tè un-thāi góa, hō͘ góa ta̍k-hāng chhiong-chiok.” Ngá-kok chài-saⁿ pài-thok, Í-sò chiū chiap-siū.

12 Í-sò kóng, “Lán lâi-khì, góa chòe thâu-chêng chhōa-lō͘.”

13 Ngá-kok tùi i kóng, “Góa ê chú, lí chai chiah-ê gín-á nńg-chiáⁿ, gû iûⁿ mā tú-á siⁿ; nā kui-ji̍t lóng teh kóaⁿ-lō͘, kui-kûn iûⁿ lóng ōe sí. 14Chhiáⁿ góa ê chú seng kiâⁿ, lí ê po̍k-jîn tè āu-bīn; cheng-siⁿ kap gín-á ōe-tàng kiâⁿ jōa kín, goán chiū kiâⁿ jōa kín. Goán ōe kàu Í-tong góa ê chú hia.”

15 Í-sò kóng, “Nā-sī án-ni, góa lâu chi̍t-kóa góa ê lâng kap lí chòe-tīn.”

Ngá-kok kóng, “Chhian-bān m̄-thang. Góa ê chú tùi góa í-keng ū-kàu hó lah.” 16Hit-ji̍t Í-sò chhut-hoat, chiàu goân-lō͘ tò-khì Í-tong. 17Ngá-kok kiâⁿ kàu So͘-kat, tī hia ūi ka-kī khí-chhù, ūi cheng-siⁿ tah chháu-liâu-á; i kā hit-ê só͘-chāi hō-miâ kiò-chòe So͘-kat#33.17 “So͘-kat” ì-sù sī “liâu-á”..

18 Ngá-kok tùi Bí-soh-put-ta̍t-bí-a pêng-an tò-lâi kàu Ka-lâm-tōe ê Sī-kiàm-siâⁿ, tī siâⁿ ê tùi-bīn tah pò͘-pîⁿ. 19I tah pò͘-pîⁿ hit-tè tōe, sī i ēng chi̍t-pah tè gûn tùi Sī-kiàm ê khai-thok-chiá Hap-boat ê hō͘-tāi bóe--ê. 20Ngá-kok tī hia khí chi̍t chō chè-tôaⁿ, kā i hō-miâ kiò-chòe I-le̍k I-lô-i Í-sek-lia̍t#33.20 “I-le̍k I-lô-i Í-sek-lia̍t” ì-sù sī “Siōng-tè sī Í-sek-lia̍t ê Siōng-tè”..

Tällä hetkellä valittuna:

Chhòng-sè-kì 33: TTVR

Korostus

Jaa

Kopioi

Haluatko, että korostuksesi tallennetaan kaikille laitteillesi? Rekisteröidy tai kirjaudu sisään

The Bible Society in Taiwan

Lisätietoja käännöksestä 現代台語譯本羅馬字版