Matius 9
9
Yesus nefekaꞌosa kalu
9:1-8
Mrk 2:1-12; Luk 5:17-26
1Nopalusi anaꞌa, Yesus nosawimo ne bhangka, nolimba we sewetano maka nohato toha we liwuno. 2Ne itu deowaanemo seemie kalu, nendole-ndole ne kaodoꞌano. Nowoha kabhalano kaparasaeando maitu, Yesus nopugaumo ne kalu naꞌa ambano, “Fekatangka lalomu sabhangka, dhosamu notiꞌamponimo.” 3Dofetingke peda naꞌa pande-pande Kitabi nokodukumo we lalondo, “Mie aini nopototoꞌao wutono bhe Lahataꞌala, ingka nofekaꞌaebumo Lahataꞌala.” 4Tamaka Yesus nopandeꞌaane nefekihindo, maka ambano, “Noafa kofekihi modaiꞌaoꞌomu? 5Nomuda ae bhahaa, apugauꞌao, ‘Dhosamu notiꞌamponimo’ bhahaꞌi apugauꞌao ‘Wanumo maka kala’? 6Amotiwohaangkoomu Anano Manusia - Idimo ini - nokokuasa neꞌamponi dhosa te dhunia ini.” Maka nopugau ne kalu naꞌa, “Wanuꞌo toha, sangke kaodoꞌamu itu maka suli se lambumu.” 7Mie kalu naꞌa lasao nowanu maka nosuli se lambuno. 8Mie bhahi mohano kadhadhia aitu doteꞌi bhe dopudhi Lahataꞌala maꞌaono kuasa bhalano pedando aitu ne manusia.
Matius mealano sewa noangkafi Yesus
9:9-13
Mrk 2:13-17; Luk 5:27-32
9Hato nokala nomaiꞌao ne itu, Yesus newohamo seemie nengkoha-ngkoha weo lambu kaesaloꞌa sewa. Neano mie anaꞌa Matius. Ambano Yesus, “Angkafi kanau.” Matius lasao noehe maka noangkafie. 10Pada anaꞌa, tangasano Yesus nohumaa we lambuno Matius, dobhahi mealano sewa sigaoꞌano bhe mie kodhosa domaimo dua. Andoa ini dohumaa dopombali-mbali bhe Yesus bhe anaguhuꞌino. 11Dowoha peda naꞌa, miendo Farisi dopugaumo ne anaguhuꞌino ambado, “Noafa gahaꞌa gurumiu nohumaa nopombali-mbali bhe mealano sewa bhe mie kodhosa maitu?” 12Yesus nofetingkeda, maka ambano, “Suano mie metaano namisi mefaraluuno foagono, mpahinomo mie mosaki. 13Dadiꞌanomo kalamoomu, maꞌanakiomu wambano Kitabi aini, ⸤ Ambano Lahataꞌala⸥ ‘Kapoindaloku dopomobhela-bhelaꞌao lalo, suano kapopanga’, kapaꞌamo kahatoꞌaku miina aeꞌondofi mie mongkilo, tamaka mie kodhosa.” #Hos 6:6
Dopoasa
9:14-17
Mrk 2:18-22; Luk 5:33-39
14Palusi anaꞌa domaimo anaguhuꞌino Yohanes Fokadiuno ne Yesus, bhe dopugau ambado, “Noafa gahaꞌa insaodi bhe miendo Farisi tapoasa tamaka anaguhuꞌimu ingka miina?” 15Notobhoosi Yesus ambano, “Naembali bhahaa sabhangkaꞌino loꞌia buꞌou daguguhu tangasano nopobhaianda loꞌia buꞌou? Tantumo paise. Tamaka nahumato tempono, loꞌia buꞌou dawowoꞌoemo. Ne naꞌa kaneꞌomo damoasa.
16Ane detabha nggasi, miina bhe mepakeno kabhini buꞌou pataꞌo mokuhuno. Kapaꞌamo kabhini medano aitu nahumela nggasi maitu, sampe nadhumulu kabhensino. 17Pedamo dua naꞌa, miina nandumandooa mie mefosingiꞌino angguru buꞌou ne kaenteiꞌa katembuno, #9:17 Kaenteiꞌa katembuno, sakotuꞌuno: kadu kangkodauno maiꞌao ne bhalulano kadadi. kapaꞌamo ane nada naꞌa so kaowu naowengkaꞌao kaenteiꞌano. Angguruno nabinasa, kaenteiꞌano nahumansuru. Tamaka angguru buꞌou tetewei datumeiꞌe dua ne kaenteiꞌa buꞌou, neanomo kohaahondaꞌae sadaa-daa kataano.”
Yesus nofodadi anano Yairus bhe nefekaꞌosa seemie hobhine
9:18-26
Mrk 5:21-43; Luk 8:40-56
18Tangasano Yesus nopuga-pugau peda naꞌa bhe andoa, nomaimo seemie mandeꞌaono lambu kasambaheaꞌa. Sahatono notaohao sombano ne Yesus bhe nopugau ambano, “Anaku hobhine kaneꞌo nobhotu, mai tei limamu te wawono neanomo sumuli nadumadi.” 19Yesus noehe maka noangkafi mie anaꞌa, nopoowa-owa bhe anaguhuꞌino.
20Wakutuu aitu nandoo seemie hobhine ompulu haa taꞌumo nomaiꞌie kansuhu wulano miina bhe katiehea. Hobhine aini nomaꞌoti Yesus maiꞌao we kundo maka nodingku dhambe-dhambeno dhubano. 21Dukuno lalono, “Sumanomo taꞌadumingku kaowu dhubano aoꞌosamo.” 22Tamaka Yesus nodoli, nowohamo hobhine amaitu bhe nopugau ambano, “Fekatangka lalomu waꞌina, hampano kaparasaeamu ne Idi moꞌosamo.” Notanda aitu hobhine naꞌa noꞌosamo.
23Nohato se lambuno neangkando mandeꞌaono lambu kasambaheaꞌa saꞌituini, Yesus nowoha mie mepuntono suli ⸤ katandaino kaguguhuno lalo⸥ bhe mie sigaoꞌano dohobho sepaliꞌa. 24Ambano Yesus, “Gampiomu, kapaꞌamo anaꞌi aini miina namatea, tamaka noodo.” Tamaka tadofuta-futaaꞌi. 25Pada dogihasi mie bhahi maitu, Yesus nopesuamo nointaha limano anaꞌi anaꞌa. Anaꞌi aitu lasao nowanu. 26Bhihitano kadhadhia amaitu nokolele ne kosekaꞌewaꞌae kadie aitu.
Yesus nefowula matando kabunto dohodua
Mat 9:27-31
27Yesus nofopansuhumo kala-kalano, gahaꞌa doangkafie dohodua kabunto bhe dekei-kei ambado, “Mobhela kainsami lalo, sampuꞌano Daud!” 28Sanopesua ne seꞌonu lambu, kabunto hoduano maitu domaiꞌiemo. Yesus nofeenadamo ambano, “Parasaeaꞌomu bhahaa naembali amekaꞌosakoomu?” Ambado, “Taparasaea, Waompu.” 29Pada aitu Yesus nofedampamo matando bhe nopugau ambano, “Nokadhadhiaꞌo toha peda neparasaeamiu itu.” 30Matando lasao nentalea. Yesus nofodhagadamo ambano, “Posiꞌondoomu koise mekapuna ne laꞌae maka dua.” 31Tamaka kohoduando dokala dofolele bhihitano Yesus ne kosekaꞌewaꞌae kadie aitu.
Yesus nefekaꞌosa seemie bhea
9:32-34
32Dokala kaowu mie hoduano naꞌa, deowamo dua seemie bhea nepesuakino seetani ne Yesus. 33Pada nofolimba seetani naꞌa, bhea aitu lasao nopande nopugau. Mie bhahi tadomente, ambado, “Kadhadhia pedando ini miinaꞌo daohoohaomua ne witeno Israel inia.” 34Tamaka ambado miendo Farisi, “Anoa ini nefolimba seetani, nopake kuasano Kafeompuꞌando seetani.”
Yesus nobhela lalono ne mie bhahi
9:35-38
35Pedamo aitu, Yesus noliligi kota bhe liwu ne itu, nofofoinaꞌu weo lambu kasambaheaꞌa bhe nefolele Bhihita Metaano Kafopahintaꞌano Lahataꞌala, poowa nefekasali sabhaha saki bhe kadaino namisi. 36Nowoha mie bhahi maitu, Yesus nobhelaandamo lalono, kapaꞌamo dongawamo bhe miinamo dakototonolaloa, tapedamo dhumba tapa kodhagaꞌano. 37Nopugaumo Yesus ne anaguhuꞌino ambano, “Pehapi so netobhe nobhahi, tamaka kumahadhaano dendai. 38Dadiꞌanomo mesaloomu ne kokaampono naꞌa, naetudu mie dakumala datumobhe.”
Tällä hetkellä valittuna:
Matius 9: mnbSD
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2022, Wycliffe Bible Translators, Inc. All rights reserved.