Ntandiko Kwanjula
Kwanjula
Li̱i̱na Ntandiko likumani̱i̱si̱ya “ndu̱ghi̱i̱li̱lo.” Kitabo kini ki̱bu̱ghi̱yʼo kuhanguwa kwa nsi na eghulu, ndu̱ghi̱i̱li̱lo ya bantu, ntandiko ya kibhi ekyalu̱ghi̱yemu kubona-bona munsi. Ki̱bu̱ghi̱yʼo dhee ntegheka ya Luhanga ya kujuna bantu hamui na nkolangana ya Luhanga na bantu. Kitabo kini kilimu bi̱twi̱ke bibili byamaani̱.
Ki̱twi̱ke kyʼoku̱du̱bha kili mu nsuula 1—11. Ki̱twi̱ke eki ki̱bu̱ghi̱yʼo kuhanguwa kwa nsi, kughuwa kwa muntu, mulingo kibhi kyakaniiyemu munsi, kyaleeteleja Luhanga kuleka maasi ngatungeela munsi. Maasi agha ghaahwelekeeleli̱ya bu̱li̱ kintu, bantu, na bihanguwa byona. Aba ataahwelekeleei̱ye ni Nuha na baa ka yee, hamui na bihanguwa ebi Luhanga aamulaghiiye kutaaha nabiyo mu bwati̱. Ki̱bu̱ghi̱yʼo dhee Nuha na baasukulu be haanu̱ma ya kutungeela kwa maasi. Ki̱todhi̱ye kyabu̱ghʼo kuhanjaagukana kwa bantu, baaleka kukwela kibugha kya Bbabbeeli̱.
Ki̱twi̱ke kyakabili kili mu nsuula 12—50. Ki̱twi̱ke eki ki̱bu̱ghi̱yʼo byafaayo bya baataata baa Banai̱saaleeli̱. Taata wabo wʼoku̱du̱bha oghu ki̱bu̱ghi̱yʼo ni Ebbulahi̱mu̱, oghu akamanuwa haabwa ku̱hi̱ki̱li̱ja kuwe kandi na ku̱hu̱ti̱ya kuwe Luhanga. Du̱mbi̱ haalabhʼo byafaayo bya mutabani̱ wee I̱saka, na Yakobbo muusukulu wa Ebbulahi̱mu̱. Yakobbo baamughilaghamu dhee I̱saaleeli̱. Akaba ali na batabani̱ be eku̱mi̱ na babili. Batabani̱ be aba niibo baatandi̱ki̱i̱si̱ye ntu̱la eku̱mi̱ nʼebili sya I̱saaleeli̱. Kitabo kini ki̱bu̱ghi̱yʼo munu Yojeefu̱ omui mu batabani̱ baa Yakobbo, na ebyaleki̱ye Yakobbo na batabani̱ be banji na maka ghaabo baaghenda kuukala mu ehanga lya Mi̱si̱li̱.
Nankabha kitabo kini ki̱bu̱ghi̱yʼo byafaayo bya bantu, ki̱du̱bhi̱ye ku̱bu̱ghʼo munu mulimo oghu Luhanga aakoli̱ye ghwa kuhanga. Kitandi̱ki̱ye nki̱bu̱gha kwonini ngu Luhanga majima niiye akahanga nsi na eghulu kandi kyamaliilila na ndaghaano ngu Luhanga akweyongela kwoleka ngoku afu̱u̱yʼo bantu be.
Kitabo kini ni kimui haa bitabo bitaano ebi Musa aahandi̱i̱ki̱ye.
Bikulu ebili mu kitabo kini
1. Byafaayo bya kuhanguwa (1:1—2:25)
2. Kibhi kyʼoku̱du̱bha na bu̱ji̱ndi̱ (3:1—4:16)
3. Baasukulu baa Adamu kutungeela kutakabaayʼo (4:17—5:32)
4. Nuha na kutungeela kwa maasi (6:1—9:28)
5. Baasukulu baa Nuha na ngbaali ya Bbabbeeli̱ (10:1—11:32)
6. Mukama naakoma Ebbulaamu (12:1-20)
7. Ebbulaamu na Looti̱ (13:1—14:24)
8. Mukama naakola ndaghaano na Ebbulaamu (15:1-21)
9. Ebbulaamu, Hagali̱, na Sumai̱li̱ (16:1-16)
10. Luhanga naahindula li̱i̱na lya Ebbulaamu kuba Ebbulahi̱mu̱ kandi naamulaghani̱ja mwana (17:1—18:15)
11. Ebbulahi̱mu̱, Looti̱, Sodomu, na Gomola (18:16—19:38)
12. Ebbulahi̱mu̱, Saala, na I̱saka (20:1—23:20)
13. Lebbeeka, mukali̱ wa I̱saka (24:1-67)
14. Ku̱ku̱wa kwa Ebbulahi̱mu̱ (25:1-18)
15. I̱saka na ka yee (25:19—28:9)
16. Yakobbo na ka yee (28:10—35:29)
17. Esau na ka yee (36:1-43)
18. Baana baani̱na Yojeefu̱ mbamu̱ghu̱li̱ya nga mu̱syana (37:1-36)
19. Yu̱da na Tamala (38:1-30)
20. Yojeefu̱ ali Mi̱si̱li̱ (39:1—41:57)
21. Yojeefu̱ na baana baani̱na wee (42:1—45:28)
22. Yakobbo na ka yee mbaghenda Mi̱si̱li̱ (46:1—47:31)
23. Yakobbo naaha ka yee mi̱gi̱sa kandi naaku̱wa (48:1—50:14)
24. Yojeefu̱ naaku̱wa (50:15-26)
Tällä hetkellä valittuna:
Ntandiko Kwanjula: Lubwisi
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Talinga-Bwisi: New Testament and 15 Old Testament books in Lubwisi
© Wycliffe Bible Translators, Inc., 2025