Luqaasa 22
22
Yihuda Yesuusana aathii immadayis maaqqintteeza
(Mat. 26:1-5, 14, 16; Mar. 14:1-2, 10-11; Wan. 11:45-53)
1Ye wode Faaziqa yeegiz boora Baale ukkeeza.#Kes. 12:1 2Qeese halaqitaynnee higge asitamaaritay asayis yashitteez gishos wayizii Yesuusa fa ganccepp dhabisodazako oge koyiza. 3Xalahe taphpho nam7itaypp petta maaqqeez Asiqorontto Yihuda ginttinttizay gancce geleeza. 4Yihuda qeese halaqitayikkora Xoossa Kara naagizitayis halaqitayiko yhanigii Yesuusa wayizii aathii inggodazako unttar maaqqeeza. 5Unttikka yeyid ufayttii miishe ingodayis ezar tobbeeza. 6Ezikka ye zorayid giigeeza. Unttis asii erekkazin Aathii immadayis giiga wode naagttar yeza.
Wurissith kaho
(Mat. 26:17-25; Mar. 14:12-21; Wan. 13:21-30)
7Yeyppe guye, Faaziqa duray shukinttiza boora Baale helleeza. 8Yesuusa, «Faaziqa kaho maaday garkk yhanigii nuus giigisoytta» yeegii Phixiroosannee Waannisa kiiteeza. 9U, «Nu aba giigisod garkk ne koyee» yeegii oycceeza. 10E unttiko, «Yeezako yi katama gelodar haath ota tookkeez athay yinttan helloda. E yhanigii geliza kara eza kaali geloytta. 11Ye kara adayiko asitamaaray, ‹Ta ta tamaaritayira wolla Faaziqa kaho maadayis imathi shemppiza kara aba yenee? yeegeeza› goytta. 12E pooqeel afa hiixinttii giigii yez dalgge kifile yinttan beezoda, ezayid makkoytta» yeegeeza. 13U yhanigii Yesuusa geezay garkk hanin denggeeza. Faaziqa baale kaho ezayid giigiseeza.
14Saataykka helleez wode Yesuusa hawaaritayir wolla kahol afa betteeza. 15E unttiko, «Ta waaye ekkodaypp tiina yha kaha yinttar maadayis lo7ithii amotteeza. 16Yikkee, si7oytta! Xooss kaatetith yhayis birshshithay polinttod gatho yhayinopp guye yha kaha mahii maamii» yeegeeza. 17Ushsha ekkii galatii maaqqii, «Yashitte yhaya yi gancce shaginttoytta. 18Si7oytta! Xooss kaatetithay ye7od gatho yhayinopp aykkii yha woyine ushshaypp maaqqii ta uzhaamii» yeegeeza.
19Boora denthii ekkii, galatii maaqqii, «Yhay yinttis ingginttiza ta asho. Yhaya oothittar tana qoppoytta» yeegii unttis baxxii inggeeza. 20Yey garkkekka, kahopp guye ushsha ekkii, «Yha ushshay yinttis laalintteez ta suuth maaqqiz oroth caaqo.#Erim. 31:31 21Maaqqozin, tana aathii inggod athay kushay taar wolla pili7o gancce yeza.#Maz. 41:9 22As Na7ay ezis giinttintteezay garkk yhayqqodayis yeza, zin eza aathii inggiz athaya ayye» yeegeeza. 23U fa gancce, «Yhaya oonii oothodee» gi woli oyccichcheeza.
Ubbaypp aadho maaqqaday oonoo
24Ma u gancce aadho maaqqaday oonoo giz palama medhintteeza.#Mat. 18:1; Mar. 9:34; Luq. 9:46 25Yesuusa unttiko, «Gade kaatitay fa asita wolqqar mooddiza; fa gadel afa godatizttayikka fana, ‹Lo77o oothizita› yeeginttiza.#Mat. 20:25-27; Mar. 10:42-44 26Zin yi gancce yey garkk maaqqippe. Yi gancce bayratizay kaalo garkk hano;#Mat. 23:11; Mar. 9:35 kaalithizay kaallizay garkk hano. 27Hano zin, mokkizayppennee Mokinttizaypp aayi aadhee? Mokinttiza baasa? Zin taanii yi gancce mokkizay garkk.#Wan. Qon. 13:12 28Yinttikka ta metayir taapp shaakinttoowa taar miinggii eqqeezita. 29-30Yi ta leematepp maad garkk, uzhod garkkennee zufaanitayil afa bettii taphpho nam77ii Isreele sheeshitayil afa pirddod garkk ta aday tana shuumeezay garkk taakka yinttan ta kaatetitithayil shuumoda» yeegeeza.#Mat. 19:28
Pixiroosa kaddeeza
31Maaqqikka Yesuusa, «Simoona, Simoona, Xalahe yinttan gistte garkke harqqodayis woosseeza. 32Zin taanii ne ammanay dhabaam garkk nees wooseeza. Neekka maaqqeez wode ne ishita minthathob» yeegeeza.
33Simoona, «Godayyo, taanii neer accinttodayisnnee yhayqqodayis giigintteeza» yeegeeza.
34Yesuusa Phixiroosako, «Ta nees odiza; yhayino shugula uukkodaypp tiina ne tana hayidzii toke kaddoda» yeegeeza. 35Ma maaqqikka, Yesuusa unttiko, «Taanii yinttan korojjo, qurbonnee caamma baazin kiiteez wode yinttis pacceez baz yenee?» yeegii oycceeza.#Mat. 10:9-10; Mar. 6:8-9; Luq. 9:3
U mahii, «Akkokka paccekkaya» yeegeeza.
36E unttiko, «Yhatti korojjonnee qurbo yezay aykko; mashsha baazay fa afila bayizii mashsha wonggo. 37Yhana si7oytta! ‹Zhucitayir taybintteeza› ginttinttii xaafintteezay taal polinttodayis beeziza. Ee, ta gishos xaafintteezibaz polinttizay tumateeza» yeegeeza.#Isa. 53:12
38E tamaarttay, «Godayyo yhaydda nam77ii mashsha yeza» yeegeeza.
E, «Gidoda» yeegeeza.
Yesuusa Debireezeytte amibal afa woosseeza
(Mat. 26:36-46; Mar. 14:32-42)
39Yesuusa kaseesay garkk denddii Debireezeytte Amibal afa kezeeza. E tamaarttay eza kaalleeza. 40Ye aqa helleez wode yi «Paace gancce gelaamay garkk woossoytta» yeegeeza. 41Unttapp shuchchi dhogin helliza aqo garkk haakkii bunqqittii woosseeza. 42«Ta Adayyo, ne shene maaqqiko yha meto xuu7a taapp aathoba. Zin ta shene maaqqippe ne shenay hano» yeegii woosseeza. 43Minthathiza. Kiitanchchay salopp bentteeza. 44Gaame un77inttii miinthii woossiza. E cawaykka suuthii xokkizay garkk sa7a xokkeeza.
45Yesuusa woosa wurssii fa tamaaritayiko ye7eeza. U, azzanoppe dendeezayid daaburii gentteezin denggii, 46«Abis genttee? Paace gancce gelaam garkk denddii woossoytta» yeegeeza.
Yesuusa aykintteeza
(Mat. 26:47-56; Mar. 14:43-50; Wan. 18:3-11)
47E haga odal afa yezin gaame asay ye7eeza. Taphpho nam7itaypp pettay Yihuda ginttinttizay unttan kaalithiza. E Yesuusa yeerodayis lanqqe Shiiqeeza. 48Zin Yesuusa, «Yihuda, As Na7a yeerii aathii immade?» yeegeeza.
49Yesuusa tamaaritay ye hana bi7ii, «Godayyo nu mashshar gachcho?» yeegeeza. 50U ganccepp pettay qeese halaqay ayillayis shocii ushachch haytto gachchii oleeza.
51Zin Yesuusa, «Ashshoba!»#22:51 Ashshoba! Koyppate: Yesuusa yha bessayid ashshoba yeegeezay eza ashshodayis gi athay haya gachcheezana ashshoba gachchippe geezanne, hara asay eza aykkodayis ye7eezita kayppate yhatt u wode yegeezita nam7i qofita woli helthii aykkeeza. yeegeeza. Athay haya bochchii patheeza.
52Yeypp guye, Yesuusa fana aykkodayis ye7eez qeese halaqitayiko, Xooss Keeth naagizita shuumitaykonnee cimitaykko, «Paanno aykkiz as garkk mashshannee gufe aykkii ye7eenee? 53Ubba gallas Xooss Keethi gancce ta yinttar yez wode taal afa kushe gaddekkaya. Zin yhay dhuma kaatetithay mooddeez wodennee yi wode» yeegeeza.#Luq. 19:47; 21:37
Phixiroosa Yesuusana kaddeeza
(Mat. 26:57-58, 67-75; Mar. 14:53-54, 66-72; Wan. 18:12-18, 25-27)
54Yeyppe guye, Yesuusa aykkii qeese halaqay zabba kanggeeza. Phixiroosa haakor Yesuusa kaalliza. 55Asay qeese halaqay zabbayid tama eethii wolla betteezin Phixiroosa unttar wolla betteeza. 56Pettii gadhindata Phixiroosa tama lanqqe betteezana tama foo7ayir dakkii bi7ii, «Yha athay ezar yeza» yeegeeza.
57Zin Phixiroosa, «Yhan asitee ta ye atha erooya» yeegii kaddeeza.
58Xiqqa saattepp guye pettii hara athay eza bi7ii, «Neekka unttapp pettabay» yeegeeza.
Zin Phixiroosa, «Yha athayyo tana baaya» yeegeeza.
59Pettii saate garkk gam7eezaypp guye pettii hara athay tillisii, «Yha athay Galilapp maaqqiz gishos sidhe bayith ezar yeza» yeegeeza.
60Zin Phixiroosa, «Yha athayyo, ne gizana ta erooya» yeegeeza. E ye oda wurssekkazin shugula uukkeeza.
61Goday guye shirnttii eqqii Phixiroosa be7eeza. Phixiroosa, «Yhayino shugula uukkodaypp tiina ne tana hayidzii toke kaddoda» yeegii, Goday odeez qaalay ezis elqqi geeza. 62Phixiroosas bale kezii dukka suuth yeekkeeza.
Yesuusa Philaaxoosa tiinannee Herodossa tiina shiiqeeza
(Mat. 26:59-66; Mar. 14:55-64; Wan. 18:19-24)
63Yesuusa naagiz asay eza laqqasonnee yhadho aykkeeza. 64E aafa goozii «An ne Nabezako eroba; nena shoceezay oonoo?» yeegii oyiciza. 65Hara gaame cashshii cazhii kawushiseeza.
66Sa7a wonttiza wode Ayihude gade cimitay, qeese halaqitaynnee higge asitamaaritay shiiqii, Yesuusana fa tiina shiisheeza. 67U, «Ne Kiristtoosa? Ane nuus odoba?» yeegii oyiceeza.
Yesuusa, «Ta odizakon yi ammanaamii. 68Ta oycizako yi mahaamii. 69Zini As Na7ay yhaypp gede wolqqama Xooss ushachch baggar bettoda» yeegeeza.
70Ye wode ubbitay, «Yeezin, ne Xoossa na7a?» yeegeeza.
Ee, «Ta Xooss na7a maaqqeezana yi geeza» yeegeeza.
71U, «Yikkee, hara markka ab koshshee? E fa doonar ododar nu si7eeza» yeegeeza.
Tällä hetkellä valittuna:
Luqaasa 22: MeloNTL
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
The Word for the World Ethiopia