Maatoosa 4
4
Yesuusa paacintto
(Mar. 1:12-13; Luq. 4:1-13)
1Yeypp guye, daabuloosa Yesuusa faaccod garkk Geeshsha Ayaanay Yesuusana liizho gadha kanggeeza.#Ibr. 2:18; 4:15 2Ezayid oyttam qammannee oyttam gallas xoomeezaypp guye nayintteeza. 3Paaccizay Yesuusako yi7ii «Ne Xooss na7azako, an yha shuchchunthan boora maaqqoday garkk azazoba» yeegeeza.
4Yesuusa mahii eeko, « ‹Asii Xooss doonapp keziz qaala ubbayir yezizapp attin boora aaddar yezooya› yeeginttii Xoossa qaalayid xaafintteeza»#Nam7i. 8:3 yeegeeza.
5Ezaypp maaqqikka, daabuloosa Yesuusana geesha katama kanggii, Xooss keeth kusttel afa kessii, 6«Ne Xooss na7a maaqqiko, an sull guppii wodhdhoba.» Abis giiko,#Maz. 91:11
« ‹Ne tokay shuchchar dhubinttaamay garkk,
fa kusher nena denthoday garkk,
Xoossay fa kiitanchchita ne gishos kiittoda›
yeeginttii Xooss qaalayid xaafintteeza» yeegeeza.
7Yesuusa eeko, «Maakka, ‹Xooss qaalayid ne Goda, ne Xoossa paaccippe› yeeginttii xaafintteeza» gi maheeza.#Nam7i. 6:16
8Wurssithal daabuloosa Yesuusana pettii damma amba xeeral kessii alame kaatetitha u bonchchayir wolla beezii, 9«Ne taasi xuugunii goyiniko ta neesi yhaya ubba immada» yeegeeza.
10Yesuusa mahii eeko, «Yha xalahayyo, taapp haakkoba! ‹Ne Goda, ne Xoossayis goynnoba, eza aadda goyinnoba› yeeginttii Xooss qaalayid xaafintteeza» yeegeeza.#Nam7i. 6:13
11Yeypp guye, eza Xalahay ashshii qiteeza; kiitanchchitay yi7ii eza maaddeeza.
Yesuusa taamarsso
(Mar. 1:14-15; Luq. 4:14-15)
12Yesuusa, Waannisa accintteezana si7ii Galila biitta yhanigeeza.#Mat. 14:3; Mar. 6:17; Luq. 3:19-20 13Naazirete katama ashshii Zaabiloonannee Niftaaleme heera, abba lanqqe yez qifirnahoome katama yhanigii ezayid gam7eeza.#Wan. 2:12 14Yey haneezay nabe Isayaasa doonar,
15«Zaabiloone biitta, Nifttaaleme biitta,
Yorddanoos borkkapp seko pino,
abbako kanggiz oge gaxa yezi,
Ayihude baa asay gancce yez Galila biitta,#Isa. 9:1-2
16Dhuma yez woya,
woliqqama poo7o be7eeza.
Yhayiqo kuya betteezitayiskka,
poo7o kezeeza»
yeegii odintteez qaalay polinttod garkke.
17Ye wodepp aykkii Yesuusa, «Xooss kaatetithay ukkeez gishos yi nagarapp maaqqoytta» yeegii qaala sabbako aykkeeza.#Mat. 3:2
Yesuusa tiin xeegeez taamarita
(Mar. 1:16-20; Luq. 5:1-11)
18Yesuusa Galila Abba lanqqer aadhittar nam77ii ishita, Phixiroosa ginttinttiz Simoonarannee e isha Indiraase be7eeza. Unttii molo aykkizita maaqqeez gishos fa gitana abba gancce olizana be7eeza. 19Yesuusa unttan, «Yhana ye7oytta; tana kaaloytta! Molo aykkizay garkk, ta yinttan as aythi tamarssoda» yeegeeza. 20Unttikka, ellis fa gitana olii ashii Yesuusana kaalo aykkeeza.
21Yesuusa yeypp xiqqa gede tiinal yhanigii hara nam77ii ishita, Zabddosa na7ita, Yayqqoobara Waannisara be7eeza. Fa ada Zabddoosara wolla wogolo gancce fa gite loythizin bi7ii xeegeeza. 22Unttikka, ellisii fa wogolo gancce fa ada ashshii Yesuusana kaalleeza.
Yesuusa hariginttizita patheeza
(Luq. 6:17-19)
23Yesuusa Ayihuditay Woosa keetha tamaarssittar, salo kaatetith Wongile oditara duma duma harggepp asa pathittar Galila biitta ubba yuuyeeza.#Mat. 9:35; Mar. 1:39
24Yeypp denideezayid e waaray Soora biitta ubba si7intteeza. Duma duma harger wobbeezitannee metinttizita, tuna ayyana aykintteezita, shoccii oliz harger yezitannee, sileezita eziko kanggeeza; ezikka unttan patheeza.
25Asay Galilap, Taphphii Katamitaypp, Yerusalaamepp, Yihudappera Yorddanoosapp seko pino yez biittapp ye7eez gaame asay eza kaalleeza.
Tällä hetkellä valittuna:
Maatoosa 4: MeloNTL
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
The Word for the World Ethiopia