San Juan 1
1
Itlajtol n Totajtsi Dios omochi tlakatl
1Ijkuak ayamó opewaya n tlaltíkpaktli, yokatka n Tlájtoli,
iwa non Tlájtoli okatka iwan Dios,
iwa non Tlájtoli#1:1 Tlájtoli kijtosneki Cristo Ye Dios.
2Nin Tlájtoli yokatka iwan Dios ijkuak okichijchi n tlaltíkpaktli.
3Ika nin Tlájtoli, okichijchi nochi tlan onka, iwa tla amo por Ye, amitla yetoskia. Col. 1:15-17
4Itech Ye onka Yolílistli, iwa non Yolílistli Ye n Tláwili Akin kintlawilia n tlaltikpaktlakah.
5Nin Tláwili tlawia kan tleyua, iwa n sentleyuálistli mach weleti kisewia non Tláwili.
6Okatka se tlakatl itoka Juan, non Dios okwaltítlanki. 7Juan owala otetlapowiko de nin Tláwili (Cristo), para ijkó nochteh makineltokakah. 8Juan amo ye n Tláwili, sanwel otetlapowiko de non Tláwili. 9Ye n milajka Tláwili, non kintlawilia nochteh n tlakah itech nin tlaltíkpaktli.
10Neka Tlájtoli okatka itech nin tlaltíkpaktli, iwa Ye okichijchi nochi n tlaltíkpaktli pero n tlaltikpaktlakah mach okixmatkeh akin Ye. 11Owala innawak ichanikniwah, pero yejwah mach okiselijkeh. 12Pero akimeh okiselijkeh iwa okineltokakeh, Ye okinkawili mamochiwakah ipilwah Dios. 13Ninteh amo otlakatkeh kemi tlakatih n tlaltikpaktlakah, yej otlakatkeh kemi tepilwah de Dios porke Ye ijkó okimonekilti matlakatikah inawak.
14Non Tlájtoli omókopki Tlakatl, iwa towa ochanchiwako. Tejwah otiktakeh imawistilis, iwa non mawistílistli kipia non san Ye ikone n Totajtsi Dios, porke otechititi nochi itlasojtlalis iwa nochi tlan ye milajka.
15Juan otetlapowi de non Tlájtoli. Iwa chikawak otlajto, iwa okijto:
—Ye nin tlakatl non ne onomechiliaya. N tlakatl non satepa wits, Ye okachi weyijkatitok ke ne, porke Ye yokatka ijkuak ne ayamó onitlakatia.
16Nochi tlan Ye kipia tejwah tikselijtiwitseh, nochipa topah momiakilia itlatiochiwalis. 17Moisés otechmák n tlanawátili, pero por Cristo Jesús owala n tlasojtlálistli iwa tlan milák. 18Amaka tlakatl yokitak Totajtsi Dios, pero Ikone non san Ye se Akin noiwa Dios, Akin nochipa nechonitok iwan Itajtsi, Ye Akin otechixmatiltiko.
Juan non tlakuatekia kiteixmatiltia n Cristo Jesús
(Mt. 3:11-12; Mr. 1:7-8; Lc. 3:15-17)
19Ye ni tlan Juan otlapoaya ijkuak n judíojteh de Jerusalén okintitlankeh sikimeh tiopixkeh iwa levitas makitlajtlanitih n Juan akin ye. 20Okimili tlan milák iwa okimokuiti:
—Mach ne ni Cristo.
21Ijkuakó yejwah oksepa okitlajtlanijkeh:
—¿Akin te? ¿Te n profeta Elías?
Juan okinnankili:
—Amó, mach ne.
—Techili, ¿Te n profeta?
Ye okinnankili:
—Amó.
22Ijkuakó okilijkeh:
—¿Akin te kiné? Moneki tikinmiliskeh itla akimeh otechaltitlankeh. ¿Techili, akin te?
23Juan okinnankili:
—Ne non nitetsajtsilia kan tlaltejtéyinki iwa nikijtoa: “Xikmilawakah iojwiu n Toteko” —ijkó kemi okijto n profeta Isaías. Is. 40:3
24N fariseos okintitlankeh sikimeh makitlajtlanitih n Juan
25—Tla te amo Ti Cristo, nion ti Elías, nion ti profeta, ¿tleka titlakuaatekia?
26Juan okinnankili:
—Ne nitlakuaatekia ika atl, pero nomowah kajki se Akin nomejwah amo nonkixmatih. 27Milák, Ye satepa wits, iwa ne mach nitlawelkuali kemi para nikkaktojtomas.
28Nochi ni otlamochi itech altepetl de Betania, ik nepa lado de n río Jordán, kan Juan otlakuaatekijtoka.
Jesús Ye Iichkatsi n Totajtsi Dios
29Ipan ok se tonati, Juan okitak n Jesús okinamiktiwalaya iwa okijto:
—Xikitakah, Ye Ni Iichkatsi Dios, non kitekixtilis nochi intlajtlakol n tlaltikpaktlakah. 30De Ye onitlajto: “Satepa wits se tlakatl Akin okachi weyijkatitok ke ne, porke Ye yokatka ijkuak ne ayamó onitlakatia.” 31Ne nonewia amo onikixmatia. Yika onitlakuaatekijtiwalaya ika atl para n tlakah de Israel makixmatikah Ye.
32Juan noiwa okijto:
—Ne onikitak n Espíritu owaltemok de ilwikak kemi se palomatsi, iwa omotlaliko itech Jesús. 33Ne ayamó onikixmatia. Pero Akin onechaltítlanki manitlakuaatekiki ika atl, onechili: “Ijkuak tikitas n Espíritu waltemos iwa motlaliki itech se tlakatl, Ye Akin tlakuaatekis ika n Espíritu Santo.” 34Ne yonikitak, yika, nomechilia nik Ye Ikone Dios.
Non sikinika itlamachtijkawah n Jesús
35Ijkuak owalmostlatik Juan oksepa ompa okatka iwa ome itlamachtijkawah. 36Iwa ijkuak okitak Jesús opanoaya, Juan okijto:
—Xikitakah, nin tlakatl Ye Iichkatsi n Totajtsi Dios.
37Ijkuak n ome itlamachtijkawah n Juan okikakeh tlan okijto, oyajkeh iwan Jesús. 38Ijkuakó Jesús oontláchixki ik ikuitlapa, iwa ijkuak okinmitak okiwaltokayah, okintlajtlani:
—¿Tlan nonkitemoah?
Yejwah okinankilijkeh:
—Rabí —non kijtosneki tlamachti—, ¿kan tichanti?
39Jesús okinnankili:
—Xiwikih iwa xikitakah.
Ijkuakó yejwah oyajkeh iwan Jesús iwa okitakeh kan chanti. Yokatka kemi las kuatro de tiotlak. Ompa omokajkeh iwan Jesús non tonati.
40Andrés ikni n Simón Pedro, ye seme de nonteh ome non okikakeh tlan okijto n Juan, oyajkeh iwan Jesús. 41Andrés achto okajsik ikni Simón, iwa okili:
—Yotikajsikeh n Mesías —noni kijtosneki n Cristo noso non Dios okipéjpenki.
42Andrés okiwík ikni Simón inawak Jesús, iwa ijkuak Jesús okitak okili:
—Te ti Simón ipiltsi n Jonás, axa yetos motoka Cefas —kijtosneki Pedro.#1:42 N tlájtoli ‘cefas’ itech arameo kijtosneki ‘tetl’
Jesús kinotsa n Felipe iwa Natanael
43Owalmostlatik Jesús okisentlali yas kan tlali de Galilea. Ompa okitak n Felipe, iwa okili:
—Xiwiki nowa.
44Felipe owalewatoka itech altepetl de Betsaida. Andrés iwa n Pedro noiwa de ompa. 45Felipe okitemoto n Natanael iwa okili:
—Yotikajsikeh n tlakatl non okitene Moisés iwa n profetas itech intlajkuilolwah. Ye n Jesús ipiltsi n José non walewatok de Nazaret.
46Natanael okili:
—¿Weletis kisas itla kuali de Nazaret?
Felipe okinankili:
—Xiwiki, iwa xikitaki.
47Ijkuak Jesús okitak Natanael okualajsia, okijto:
—Nika wits se tlakatl non milák Israelita, non amo kimati tlakajkayawa.
48Ijkuakó Natanael okitlajtlani:
—¿Kenomi techixmati?
Jesús okinankili:
—Ijkuak otikatka itlampa n igoskuawitl, achto de mitsonnotsaskia n Felipe, Ne yonimitsitak.
49Natanael okili:
—¡Tlamachti, Tejwatsi Ti Tekone de Dios! ¡Tejwatsi Rey de Israel!
50Jesús okinankili:
—¿Techneltoka san por onimitsili onimitsitak itlampa n igoskuawitl? Te tikitas itla okachi wejweyi ke ni.
51Jesús noiwa okijto:
—De milajka, de milajka nomechilia, nomejwah nonkitaskeh n ilwikak tlapotok, iwa iángelwah n Dios tlejkoskeh iwa temoskeh notech Akin onimochi ni tlakatl.
Tällä hetkellä valittuna:
San Juan 1: npl
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2011, Wycliffe Bible Translators, Inc. All rights reserved.
