Ruk. 23
23
Piratuí̱ Jesus jukimiu
(Mat. 27:1-2,11-14; Mar. 15:1-5; Jṉ. 18:28-38)
1Nuyá̱ ashí Uunt iruntrarmia nu wajatkiar Rúmanmaya̱ akupin Piratuí̱ Jesusan júkiarmiayi. 2Nui̱ jeawar Piratun chicharainiak “Ju̱ áishmaṉ ii shuaran awajimtikiar enentáimtikiainia nu nekaamji. Rúmanmaya̱ úunt akupin Sésaran kuit akiktinian suritramaji. Tura nu arant Niṉki akupin Kristu tutaintjiai, tawai” tiármiayi. 3Tutai Piratu Jesusan chicharuk “¿Ame Israer shuara akupniúri̱ṉkiaitiam?” tímiayi. Tutai Jesus chichaak “Ee, nuitjiai, ame támena núnisnak” tímiayi. 4Nuyá̱ Yúsnan pujurniu úuntri̱ncha tura aents nui̱ iruntrarmia nunasha Piratu chicharainiak “Ju̱ áishmaṉ yajauchin túran peṉké wáinkiachuitjiai” tímiayi. 5Túrasha nisha nú kakantar chicharainiak “Antsu nekas ashí Jutanam aentsun ni unuiniana nuja̱i̱ akajenawai. Kariréanmaya̱ naṉkaamas ímiaja̱i̱sha tayi” tímiayi. 6Piratusha nuna antuk “Nú aishmaṉ ¿Kariréanmaya̱ṉkait?” tímiayi. 7“Ee” tuíniakui Irutisan akuptúkarmiayi. Irutiska Kariréanmaya̱ aentsun akupniuyayi. Túmaitiat nu tsawantin Jerusaréṉnum ishichik tsawant pujusmiayi. 8Irutiska Jesusan íistaj tusa ti wakerimiayi. Jesusa túramuri̱n áujmatman ti antukmiayi. Tuma asa “Wi iimiai̱ aents tujintiamun túrashtimpiash” tusa Jesusan wainiak warasmiayi. 9Jesusan tí nukap aniasmiayi túramsha peṉké áimkiachmiayi. 10Nui̱sha Yúsnan pujurniu úuntri̱sha tura Israer shuara jintinniuri̱sha yajauchiti tusar charaatum awajiármiayi. 11Tura Irutissha ni suntari̱ji̱a̱i̱ Jesusan yajauch enentáimtuiniak Nin wishikiainiak tí peṉker pushin akupniu entsatái̱ri̱ya ániun áentsrarmiayi. Nuya̱sha Irutis ataksha Piratuíi̱n akupkámiayi. 12Túram nu tsawant Piratu Irutisja̱i̱ nawamnaikiarmiayi. Kame yáunchuka nemasnaikia ármiayi.
Jesusan “mantamnati” tiarma
(Mat. 27:15-26; Mar. 15:6-15; Jṉ. 18:39—19:16)
13Nuyá̱ Yúsnan pujurniu úuntri̱n aentsu úuntri̱ji̱a̱i̱ tura peṉké aentsja̱i̱ Piratu ikiaanak tímiayi 14“Ju̱ áishmaṉ aentsu awajimtikiui tusarum itiartintrume. Túrasha átum íimprumni̱ṉ anintrúsan yajauch átum tárumna nuna peṉké nekarachjai. 15Irutissha núnisaṉ yajauchin nekaachai. Warí, ju̱i̱ awaiṉkichmaka. Nuikia páantchakait jú̱ aishmaṉ jakamnia tunaanka túrichuiti” tímiayi.
16-17Túraitiat tuke túrutai̱ asamtai námper jeakui sepunmaya̱ chikichík áishmaṉkan Piratu aṉkant akupkatin ámiayi. Tuma asamtai ni chichaak “ju̱na asutián awematjai” tímiayi. 18Tura aentssha iruntrar ti untsumainiak “Atsá, ju̱cha. Ju̱ nakitiaji. Antsu Parapás akupkata” tiármiayi. 19Nu Parapássha akupniun nakitiak mesetan najana asa tura maṉkartin asa sepunam eṉkeamuyayi.
20Piratuka Jesusan akupkáttsa wakerak ataksha aentsun áujsarmiayi. 21Túrasha nú arant untsumainiak “Atsá. Krúsnum mantamnati” tiármiayi. 22Tura ataksha Piratu chicharainiak “¿Urukamtai. Warí tunaan túrait? Jakamnia tunaan túrachiash tusan aniasan peṉké nekarachjai. Asutián akupkátjai” tímiayi. 23Tura nisha kakaram untsumainiak “Jesus mantamnati” tiármiayi. Kame aentssha tura Yúsnan pujurniu úuntri̱sha tí untsumainia ásarmatai ni wakeramuri̱ tsaṉkatnakarmiayi. 24Ni wakeriarmia nuna Piratu “túrattajai” tímiayi. 25Tuma asa Parapásan mesetan najanin tura maṉkartin amia nuna akupkámiayi. Tura Jesusnaka ni wakeramun túrawarti tusa íktusarmiayi.
Jesusan krúsnum ajintrurma
(Mat. 27:32-44; Mar. 15:21-32; Jṉ. 19:17-27)
26Jesusan jukitiatsa pujuiniai̱ Serininmaya̱ Semuṉ ni pépruri̱ya̱ Jerusaréṉnum yama jeamiayi. Nin achikiar Jesusa krusri̱ ayantkar “ni úkuri̱ wetá” tiármiayi.
27Untsurí aents Jesusan nemariarmiayi. Tura untsurí nuwa̱sha tí kuntuts enentáimiainiak útkiar tura waa waa ajakiar wéarmiayi. 28Túmainiakui Jesus nin iis “Jerusaréṉnumia̱ nuwa̱tiram Winia enentáimtursarum útirap. Antsu atumniak tura atumí uchirí̱ enentáimtusrum úttiarum. 29Warí, ti itiurchat tsawant jeariártatui. Tuma asamtai ‘Uchirtichu ainia nu ajaprukchana nu tura amuntsachu ainia nu chíkich aentsja̱i̱ naṉkaamas péṉker pujuiniawai’ tiártatui. 30Nu tsawantai̱ aents chicharainiak ‘Naint iin nekentmak yuturmártai’ Isa. 2:19; Use. 10:8; Apu. 6:16; 9:6 tiártatui. 31Warí, numi sameka áinis yajauch aya náṉkamna ai̱ṉsha ju̱ itiurchat átsuk. Tura numi kukarua áinkiamtai itiurak nú yajauch túrunachatⁱ” tímiayi Jesus.
32Tura Jesusja̱i̱ krúsnum maatai tusar jímiar yajauch áishmaṉkan júkiarmiayi. 33Karawír naint tutainiam jeawar Jesusan krúsnum ajintrurarmiayi. Tura Jesusa untsuurí̱ni̱ chikichík yajauch áishmaṉkan tura ni menaari̱ni̱ chíkich yajauch áishmaṉkan núnisaṉ krúsnum ajintrurarmiayi.
34Tura Jesus krúsnum ajintraku pujuram chichaak “Apawá, tsaṉkurarta. Ni áitkiainia nuna nékainiatsui” tímiayi.
Tura suntar pujuarmiania nu, yaki Jesusa pushiri̱ jukit tusar nakurúsarmiayi. 35Péprunmaya̱ aents ii wajatiármiayi. Tura uunt armia nusha Nin wishikiainiak “Chikichnaka uwemtikniuiti. Wats, yamái nekas Yusa anaikiamuri̱ Kristu tutainkiuṉka imia Niṉki uwemprati” tiármiayi. 36Suntarsha Nin wishikrarmiayi. Tariar churuinian aartai tusar awajiármiayi. 37Tura chicharainiak “Amesha nekas Israer shuara úunt akupniuri̱nkiumka amek uwemprata” tiármiayi. 38Tura muuknumaani̱, Kriaku chichamja̱i̱, Rúmanmaya̱ apach chichamja̱i̱sha tura Israer chichamja̱i̱sha ju̱ áarar anujkamu ámiayi JU̱I̱TI ISRAER SHUARA UUNT AKUPIN.
39Chikichík yajauch áishmaṉ nui̱ ajintruamu amia nu kátsekeak chicharuk “Amesha nekas Yusa anaikiamuri̱ntkiumka amek uwemprata tura iincha uwemtikramprata” tímiayi. 40Tura chíkich ni tsaníakmari̱n kakantar chicharuk “¿Amesha Niji̱a̱i̱ métek asutniátasa pujayatam Yus ashamatsmek? 41Iikia yajauch asar wáitsatniuitji, ii yajauch túramuri̱ akikmakur wáitiaji. Antsu ju̱ áishmaṉka yajauchin túrichuiti” tímiayi. 42Nuyá̱ Jesusan chicharuk “Amesha akupin ajasam winiasha enentáimtursata” tímiayi. 43Tutai Jesus chicharuk “Nekasan tájame, jakar shiir pujutai̱nium yamái tsawant Wiji̱a̱i̱ pujustatme” tímiayi.
Jesus jakamuri̱
(Mat. 27:45-56; Mar. 15:33-41; Jṉ. 19:28-30)
44Tutupin ai̱ ashí nuṉkanam ti kirit ajasmiayi. Tura menaintiú ura naṉkaamasu ai̱ṉ nantu nuṉkach ajassha tuke kirit ámiayi. 45Tsawái̱ nantusha mushatmarmiayi. Tura Jerusaréṉnum Yusa Uunt Je̱e̱ncha tarach ejamu aa jímiapetek ja̱a̱nakmiayi. 46Nuyá̱ Jesus untsumuk “Apawá, winia wakantrun Amiin ikiuajai” YKan. 31:5 tímiayi. Nuna tinia jakamiayi. 47Suntara uuntri̱ nu túrunamun wainiak Yusa náari̱n shiir awajeak “Ju̱sha imiá nekas péṉker áishmaṉkauyi” tímiayi.
48Tura untsurí aents pujuarmia nu, nu túrunamun wáinkiar tí kuntuts enentáimiainiak ni netsepé̱n paat awatiar waketkiarmiayi. 49Tura Jesusa amikrí̱sha tura nuwa̱ Kariréanmaya̱ Nin nemariarmia nusha íkiaṉ wajasar ii wajarmiayi.
Jesus iwiarsamu
(Mat. 27:57-61; Mar. 15:42-47; Jṉ. 19:38-42)
50Naka enentáimin péṉker áishmaṉ ámiayi ni naari̱ Jusé. Arimatéa pepru Jutanam ana nuya̱uyayi. Israer shuara Uunt Iruntai̱ri̱n páchitkiauyayi. 51Yus ju̱ nuṉkanam akupin ajasat tusa Jusé nákas pujumiayi. Tuma asa Uunt Iruntai̱niam Jesusan túrawarmia nuna nakitmiayi. 52Tuma asamtai Piratuí̱ we Jesusa aya̱shi̱n seamiayi. 53Piratu “ayu” takui̱ Jesusa aya̱shi̱n krúsnumia̱ jusa tarachji̱a̱i̱ penuar kaya táurmanum iwiarsamiayi. Nu táurmanum chíkich iwiarsachmauyayi. 54Iwiaratin tsawantai̱ ayampratin tsawant tsawa̱statuk ajasmatai túrunamiayi.
55Tura Kariréanmaya̱ nuwa̱ Jesusan nemarkiar taarmia nusha íwiarmanum pataakar aya̱shí̱n itiur ikiusara nunasha wáinkiarmiayi. 56Iisar ikiuak ni je̱e̱n waketkiarmiayi. Tura Jesusa aya̱shi̱ meje̱e̱ni̱ṉ tusar kuṉkuinian iwiararmiayi. Tura ayampratin tsawantai̱ Israer shuar akupkámun umikiar ayamprarmiayi.
Tällä hetkellä valittuna:
Ruk. 23: jiv
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
©2009 Avant Ministries in cooperation with Wycliffe Bible Translators, Inc. All rights reserved.