Éxodo 3
3
Moisésta Teyta Dios qayanqan
1Moisésqa suegrun Jetrupa#3.1a Jetrupa juk kaq shutinmi karqan Reuel. Tsëta musyanëkipaq leyinki Éxo. 2.16. üshankunata y chiwankunatam mitsikuq. Jetruqa madianita nunakunapa sacerdötinmi karqan. Juk kutinam Moisésqa mitsikuq ëwarqan chusyaq jirkapa. Tsë ëwarmi Teyta Dioswan tinkuna Horeb jirkaman charqan.#3.1b Horeb jirkapa juk kaq shutinmi Sinaí. 2Tsëchömi Teyta Diospa angelnin shiraka#3.2 Wakin nunakunaqa shira niyanmi. rawrëkaqchö Moisésta yuripurqan. Shiraka kasha rawraqta rikararmi Moisés käyirqan rawrarpis shirakaqa mana rupashqanta. 3Tsëmi yarpakachar nirqan: <<¡Imaraq taqë! Mä ëwëkushaq rikänäpaq. ¡Imanirtaq nina rawrëkaptinpis shirakaqa kashqanlla kakïkan!>>
4Moisés rikaq witikaptinmi nina rawrëkaqpita Teyta Dios nimurqan: <<¡Moisés, Moisés!>>
Tsënam Moisés yaskirqan: <<¿Imallatataq, Teyta?>>
5Tsëmi Teyta Dios nirqan: <<Ama witimïtsu. Kë shëkashqëki patsaqa alläpa sagrädum. Tsëmi llanqikita qotukï>>.
6Jina kënöpis nirqanmi: <<Unë castëkikuna Abrahampa, Isaacpa y Jacobpa Diosninmi kä>>.
Niptinnam Diosta rikëta mantsakurnin Moisésqa qaqllanta tsapakurqan.
7Tsënam Teyta Diosqa nirqan: <<Noqa rikarqümi Egiptuchö kuyanqä nunakuna alläpa jipar kawëkäyanqanta. Tsënöllam wiyarqü capatazninkuna jipatsiptin llakikur mañakayämanqanta. Musyämi alläpa jipayanqanta. 8Tsëmi noqa shamurqü Egipto nunakunapa makinpita jorqamunäpaq. Jorqaramurmi pushashaq alläpa shumaq jatun läduman. Tsëchöqa lichipis mielpis yakunöran atska këkan. Tsë markakunachömi tëkäyan cananeo nunakuna, heteo nunakuna, amorreo nunakuna, ferezeo nunakuna, heveo nunakuna y jebuseo nunakunapis. 9Noqa wiyarqümi Israel nunakuna mañakëkäyämanqanta. Tsënöllam rikarqü pëkunata Egipto nunakuna alläpa jipatsiyanqanta. 10Tsëmi Faraón kaqman kanan kachashqëki kuyanqä Israel nunakunata Egiptupita jorqamunëkipaq>>.#Hech. 7.30-34.
11Tsënö niptinnam Teyta Diosta Moisés nirqan: <<Noqa manam valorätsu Faraón kaqman ëwëta ni Israel nunakunata Egiptupita jorqamïta, Teyta>>.
12Tsëmi Teyta Dios nirqan: <<Noqam qamwan këkäshaq. Egiptupiq Israel nunakunata jorqaramurmi kë jirkaman shamur adorayämanki. Tsëmi qamwan këkanqäta musyanki>>.#Hech. 7.7.
13Tsënö niptinmi Moisés nirqan: <<Egiptuman chëkurmi Israel mayïkunata kënö nishaq: <Unë castantsikkuna creyikuyanqan Teyta Diosmi qamkunaman kachamashqa>#Éxo. 6.2-3.. Tsënö nir willaptïmi pëkuna: <¿Imataq pëpa shutin?> niyämanqa. Tsënö tapuyämaptin ¿imataq nishaq?>>
14Tsënam Teyta Dios nirqan: <<Noqaqa: <Noqam Kä>.#Juan 8.24, 58; 18.5-6, 8. Tsëmi Israel nunakunata ninki: <Noqam Kä niqmi qamkunaman mandamashqa> >>.
15Jina kënöpis Moisésta Teyta Dios nirqam: <<Israel nunakunata ninki: <Yahwehmi mandamashqa. Pëqa unë castantsik Abrahampa, Isaacpa y Jacobpa Diosninmi> >>.
Jina Teyta Dios nirqanmi: <<Noqapa shutïqa imëyaqpis Yahwehmi kanqa>>.
Israel nunakunata jorqamunanpaq Moisésta käyitsinqan
16<<Egiptuman chëkur precisaq Israel nunakunata ëllïkur ninki: <Unë castantsik Abraham, Isaac y Jacob creyikuyanqan Teyta Diosmi yuripïkamar nimashqa: <<Noqa rikëkämi Israel nunakunata Egipto nunakuna alläpa jipatsiyanqanta>>.
17<< <Tsënöllam nimashqa jipayanqëkipita jorquyäshurniki cananeo nunakuna, heteo nunakuna, amorreo nunakuna, ferezeo nunakuna, heveo nunakuna y jebuseo nunakuna täräyanqan nacionman pushayäshunëkipaq kanqanta. Tsëchöqa lichipis mielpis yakunöran atska këkan>.
18<<Tsënö niptikiqa precisaq Israel nunakuna wiyayäshunkim. Tsënam pëkunawanna ëwanki Egipto nacionpa reyninwan parlanëkipaq. Chëkurna kënö ninki: <Hebreo nunakunapa#3.18 Hebreo nunakunaqa Israel nunakunam karqan. Tsëmi Moiséspis Hebreo nuna karqan. Teyta Diosninmi yuripuyämashqa. Tsëmi chusyaq jirkaman kima junaq ëwëta munayä sacrificiuta kayar pëta adorayänäpaq>.
19<<Tsënö niptikipis Egipto nacionpa reynin manam jaqiyäshunkitsu shayämunëkita. Alläpa jipatsiptïran jaqiyäshunki. 20Tsëmi Egipto nunakunataqa poderyuq kanqäta musyatsishaq espantëpaq castïgukunawan. Tsënöparan Faraón jaqiyäshunki yarqayämunëkipaq.
21<<Yarqayämuptikim Egipto nunakuna imatapis qarayäshunëkipaq shonqunkunata noqa yatashaq. Tsënöpam jinëllaqa yarqayämunkitsu. 22Tsëmi warmikunapis vecïnankunata y vecïnanchö täraq warmi mayinkunata mañakuyanqa imapis qellëpita rurashqata qoripita rurashqata qarayänanpaq. Tsënöllam wawankunata yakatsiyänanpaq ratashninkunapis mañakuyanqa. Tsënöpam Egipto nunakunapa imëkantapis apayanki>>.#Éxo. 12.35-36.
Tällä hetkellä valittuna:
Éxodo 3: qwhB
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2018, Wycliffe Bible Translators, Inc. All rights reserved.