Génesis 31
31
Labánpita Jacob safanqan
1Tsëpitam Jacob wiyarqan Labánpa tsurinkuna wasan rimar kënö nikäyanqanta: <<Jacobqa tëtantsikpa kaqllawanmi rïcuyashqa>>.
2Tsënöllam Jacob käyirqan suegrun Labánpis piñashqa purikanqanta y nöpanönatsu manana kanqanta. 3Tsëpitanam Jacobta Teyta Dios nirqan: <<Tëtëki y castëkikuna këkäyanqanman kutikï. Qamwanmi imëpis këkäshaq>>.
4Teyta Dios tsënö niptinmi Raqueltawan Leata Jacob qayatsirqan mitsinqan jirkaman. 5Pëkuna chäriyaptinmi nirqan: <<Tëtëki noqapita piñashqa purikanqantam käyirqü. Tsënö kaptinpis tëtä creyikunqan Dios manam jaqimashqatsu. 6Musyayanqëkinöpis tëtëkita llapan voluntänïwanmi uryaparqü. 7Tsënö uryapëkaptïpis pëqa ulipämashqam. Atska kutim uryapanqäpitapis parlayashqänöqa pagamashqatsu. Tsënö rurëkämaptinpis Teyta Diosqa yanapamashqam. 8Tsëmi <uryapämanqëkipita kananqa pagashqëki pintash pintash üshakunawanmi> nimaptin llapan achkaskunapis pintash pintashllana yurikuyaq. Tsënöllam <bandush bandush yuriqkunawan pagashqëki> nimaptin llapan achkaskunapis bandush bandushllana yuriyaq. 9Tsënöpam tëtëkipa üshankunata Teyta Dios qoykamashqa.
10<<Wätakuna ashikuyanqan witsanmi suëñïnïchö rikarqü bandush bandush chiwakuna, pintash pintash chiwakuna y yulaqyuq chiwakuna ashikïkäyaqta. 11Tsë suëñïnïchömi Teyta Diospa angelnin <¡Jacob!> nir qayamarqan. Qayamaptinmi <¿imallatataq, Teyta?> nir yaskirqä.
12<<Tsëmi Diospa angelnin nimarqan: <Noqaqa rikëkämi Labán imanö jipatsishunqëkita. Tsëmi permitirqä llapan yayankuna bandush bandushlla, pintash pintashlla y yulaqyuqlla kayänanpaq. Tsëta rikar shumaq käyikï. 13Noqam kä Bet-elchö yuripushuqniki Dios. Tsëchömi rumita jawïkur aceitita jichapur nimarqëki sirwimänëkipaq.#Gén. 28.18-22. Kananqa yurinqëki Canaánman kutikï> >>.
14Tsënö niptinmi Raquelwan Leaqa niyarqan: <<Noqakunataqa tëtä ima herenciatapis manam rakiyämanqatsu. 15Tsënöllam forastërutanö churarayämar rantikayämashqa. Noqakunapaq uryanqëkitapis mana rakiyämashpam ushakurkushqa. 16Tëtäpa üshankunata Teyta Dios makikiman churamunqanqa noqantsikpaqwan wamrantsikkunapaqmi këkan. Kananqa Teyta Dios nishunqëkinölla llapantapis rurë>>.
17-18Tsëmi Jacob alistakurqan tëtan Isaac täranqan Canaánman kutikunanpaq. Llapan imëkantapis cargakurkurmi tsurinkunatawan warminkunata camëlluman montarkatsir Padan-aramchö uryanqanpita tarinqan wätakunatapis qatikurkur ewkurqan. 19Suegrun Labán millwa rutuq ëwashqanyaqmi Jacob ewkurqan. Raquelnam tëtanpa ïdulunkunata suwarkur apakurqan. 20Tsënömi suegrun Labánta mana willashpa Arampita Jacob ewkurqan. 21Kikinpa kaqtaqa llapantapis aparkurmi safar ewkurqan. Tsënö ewkurmi Éufrates mayuta pasar Galaad jirkakunapa ewkurqan.
Jacobta Labán qatipanqan
22Tsëpita kima junaqtam Labán musyarirqan Jacob safar ewkunqanta. 23Tsëmi castankunata pusharkur Jacobta qatipayarqan. Y qanchis junaqtaran taripäyarqan Galaad jirkakunachö. 24Taripänan paqasmi suëñïninchö Labánta Teyta Dios nirqan: <<Paqtam lluta shimikipa Jacobta imatapis nikankiman>>.
25Galaad jirkakunachö Jacob quedakushqa këkaptinmi Labán tariparqan. Tsëchömi Labánpis castankunawan quedakuyarqan. 26Jacobwan tinkurirnam Labánqa nirqan: <<¿Imatataq rurarqunki? ¿Imanirtaq mana willamashpa ewkamurqunki? ¿Imanirtaq tsurïkunata prisionërukunatanö apakamurqunki? 27¿Imanirtaq upällalla safar shamurqunki? Ewkamunëkipaq willamaptikiqa fiestata rurarmi panderëtakunatapis arpakunatapis tocar kushishqa despachamuqman karqan. 28Tsurïkunata willkäkunata mutsar despidikunällapaqpis manam willëkamarqunkitsu. ¡Tsënö rurarqa upa cuentam rurarqunki! 29Tsënö piñatsimanqëkipita imatapis rurëkuqmanmi karqan. Tsënö kaptinpis tëtëki creyikunqan Diosmi nimashqa: <Paqtam lluta shimikipa Jacobta imatapis nikankiman>. 30Tëtëkipa wayinman kutikurpis ¿imapaqtaq diosnïkunata suwakamurqunki?>>
31Tsënö niptinmi Jacobqa nirqan: <<Tsurikikunata qochimänëkita mantsakurmi mana willashnikipa ewkayämurqü. 32Diosnikikunataqa manam suwakamurqütsu. Mëqanpis diosnikita apamushqa kaqqa wanutsun. Castantsikkuna rikëkaptin ashipuyämë. Qampa kaqta imatapis taripuyämarqa kutitsikï>>.
Jacobqa manam musyarqantsu diosninkunata Raquel suwakamunqanta.
33Tsënö niptinmi Labánqa Jacobpa toldun rurinman yëkurqan diosninkunata ashinanpaq. Tsëchö mana tarirmi yëkurqan tsurin Leapa toldunmanpis. Tsëpitanam ishkaq sirwiqnin warmikunapa toldunkunamanpis yëkurqan. Y tsëchöpis manam tarirqantsu. Tsëpitanam Raquelpa toldunmanna ashinanpaq ëwarqan. 34Raquelnam tsë dioskunata camëllukunapa sillan rurinman pakëkur tsë janaqman täkïkurqan. Tsëmi Labánqa tsë tolduta kuchupita kuchuyaq ashirpis tarirqantsu.
35Tsënam Raquel nirqan tëtanta: <<Tëtë, yawarnïmi ratëkäman y ama piñakïtsu tëkanqäpita mana sharkuptï>>.
Tsëmi imanöpa ashirpis ïdulunkunata Labán tarirqantsu.
36Tsënö ashirpis mana tariptinmi Jacob piñakur Labánta kënö nirqan: <<¿Imatataq mana allita rurarqü? ¿Ima jutsatataq rurarqü tsëläya piñashqa qatipëkamänëkipaq? 37Llapan imëkätapis tikwëkuryanmi ashirqunki. Tsënö ashirpis ¿imatataq qampa kaqta tarirqunki? Tarishqa karqa këman churamï castantsikkuna rikäyänanpaq. Pëkunam nimäshun mëqantsikpis rasun kaqta parlëkanqantsikta.
38<<Ishkë chunka (20) watam wätëkikunata qatirarqü, üshëkikuna y chiwëkikuna manam ni jukllëllapis shullushqatsu. Tsënöllam ni juk üshallatapis mikurqütsu. 39Manam imëpis ëtsa mikuq animalkunapa katunta apamurqütsu. Tsënö pasakuptinpis rantinta kikïmi churaq kä. Wätëkikunata paqaspa o junaqpa suwakuna apayaptinpis llapanpitam cobramarqëki.
40<<Wätëkikunata mitsir alläpam jiparqü junaqpa achachëwan y paqaspana alalëwan. Punïtapis manam tarirqütsu. 41Chunka chusku watam ishkan tsurikikunapaq uryaparquq, wätëkikunapaqnam joqta wata mas. Tsëmi ishkë chunka (20) wata makikichö karqü. Atska kutim mitsipanqaqpita parlanqantsiknöqa pagamarqunkitsu. 42Awilü Abrahamwan tëtä Isaac creyikunqan Teyta Dios mana yanapamaptinqa jinëllatam qarqaramankiman karqan. Alläpa jipar uryapanqaqpitam Teyta Dios yanapamashqa. Tsëmi qanyan paqaspis suëñïnikichö piñapäshurqunki>>.
Labánwan Jacob äninakuyanqan
43Jacob tsënö niptinmi Labán nirqan: <<Kë warmikunaqa tsurïkunam. Kë wamrakunapis willkäkunam. Llapan wätakunapis noqapa wätäkunapa wawanmi këkäyan. Llapan këchö rikanqëkiqa noqalläpam këkan. Tsënö këkaptinpis tsurïkunatawan willkäkunata manam ni ima mana allita rurayashqëkitsu. 44Pactuta kanan rurashun qampis noqapis cumplinantsikpaq>>.
45Tsëmi wanka rumita señalpaq Jacob jawirqan. 46Tsëpitanam llapan castankunata nirqan: <<Ëlluyämï rumikunata>>.
Tsëmi rumikunata jukllaman choquyarqan. Tsë choqu nöpanchönam mikuyarqan. 47Tsëpitam Labánqa kikinpa idiömanchö tsë sitiuta shutitsirqan Jegar Sahaduta nir. Jacobnam jina idiömanchö shutitsirqan Galaad nir.#31.47 Tsë shutikunaqa testïgu choqu ninanmi.
48Tsëmi Labán nirqan: <<Kanan kë choqunqantsik rumikunam señal kanqa äninakunqantsikta imëpis cumplinantsikpaq>>.
Tsëpita patsam tsë sitiupa shutin karqan Galaad.
49Tsënömi juk kaq shutintapis churarqan Mizpa kananpaq.#31.49 Mizpa ninanqa rikachakuna törri ninanmi. Tsë shutita churarqan Labán kënö ninqanpitam: <<Kananpita manana rikänakushqapis Teyta Diosmi rikämäshun imanö kanqantsiktapis. 50Tsurïkunata maqaptiki o pëkuna jananman juk warmita ashiptiki mana musyaptïpis Teyta Diosmi juzgashunki>>.
51Mastapis Labán nirqam: <<Këchömi këkan rumikunata choqunqantsikwan jawinqantsik wanka rumipis. 52Tsëkunam señal kanqa kanan äninakunqantsikta imëpis cumplinantsikpaq. Kananpitaqa qampis ni noqapis ama kë mojunpita pasashuntsu ni imatapis ama yatapänakushuntsu. 53Äninakunqantsikta mana cumplishqaqa awilïki Abraham y awilü Nacor creyikuyanqan Diosmi juzgamäshun>>.
Tsëmi Jacobpis tëtan Isaac adoranqan Teyta Diospa shutinchö änirqan tsë parlayanqanta cumplinanpaq.
54Tsëpitanam Jacobqa wätakunata pishtarkur wiranta Teyta Diospaq kayarqan. Ëtsantanam llapan castankunawan mikuyarqan. Tsëpitanam tsë jirkallachö punukuyarqan.
55 55 (32.1) Patsa waräriptinnam Labánqa llapan willkankunatawan tsurinkunata ewkunanpaq mutsëkurqan. Tsëpitanam pëkuna alli kawayänanpaq bendisïkur markanpa kutikurqan.
Tällä hetkellä valittuna:
Génesis 31: qwhB
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2018, Wycliffe Bible Translators, Inc. All rights reserved.