Génesis 37
37
1Jacobqa tëtan täranqan Canaánllachömi tärarqan.
José suëñukunqankuna
2Këchömi qellqarëkan Jacobpaq y tsurinkunapaqpis. Chunka qanchis watayuq këkarmi üshankunata José mitsirqan Bilhachö Zilpachö kaq wawqinkunawan. Bilhawan Zilpaqa kayarqan Jacobpa wätënin kaq warminkunam. Joséqa tëtantam willaq wawqinkuna mana allikunata rurayanqanta.
3Awkinyëninchö yurikushqa kaptinmi Israelqa#37.3 Israelqa Jacobpa juk kaq shutinmi karqan. wakin tsurinkunapitapis pëta mas kuyarqan. Tsëmi kuyëllapaq allin kaq tünicata rurapurqan. 4Joséta tëtan mas kuyaptinmi wawqinkunaqa alläpa chikir piñashqalla parlapäyaqpis.
5Juk kutinam suëñukunqanta José willarqan wawqinkunata. Tsëmi wawqinkunaqa masraq chikikurkuyarqan. 6Willarmi nirqan: <<Suëñïnïta willariyashqëki. 7Chakrachömi trïguta leyëkarqunaq kantsik. Leyëkashqam tersü kikinlla shärikurkushqa. Qamkunapa tersïkikunanam shëkaq tersüman adoraqnö tumariq puktikïkuyashqa>>.
8Tsënö suëñunqanta willakuptinnam wawqinkuna masraq chikir niyarqan: <<Tsënö nirqa ¿mandayämaqnï rey këtaku yarpëkanki? ¿Y noqakunapis munënikichö kayänätaku yarpëkanki?>>
9Tsëpita yapëpis suëñunqanta wawqinkunata willarmi José nirqan: <<Suëñïnïchömi rikarqü intipis, killapis y chunka juk qoyllurkunapis noqata adorëkäyämaqta>>.
10Tsë suëñukunqanta tëtantawan wawqinkunata willaptinmi Joséta tëtan piñaparnin nirqan: <<¿Imata yarpartaq tsënö willapäyämanki? ¿Noqapis mamëkipis wawqikikunapis qamman qonqurikayämunätaku yarpëkanki?>>
11Tsënö willaptinmi wawqinkunaqa masraq chikiyarqan.#Hech. 7.9. Tëtannam yarpakachar nirqan: <<¿Imapaqraq tsurï tsëkunata suëñukushqa?>>
Joséta wawqinkuna rantikuyanqan
12Juk kutim Josépa wawqinkuna Siquem partiman ëwayarqan tëtanpa üshankunata mitsiyänanpaq. 13Tsëmi Joséta tëtan Israel nirqan: <<Siquem jirkachömi wawqikikuna üshantsikta mitsikäyan. Imanö këkäyanqantapis musyanäpaq ëwë watukaramï>>.
Tsënö niptinnam José nirqan: <<Ya, tëtë>>.
14Tëtannam nirqan: <<Wawqikikuna y wätantsikkuna imanö këkäyanqantapis shumaq rikapakaramunki. Tsëpitana kutimunki imanö këkäyanqantapis willamänëkipaq>>.
Tsënö nirmi Hebrón pampapita Siquem jirkaman Israelqa Joséta kacharqan. 15Tsëmi Siquem läduman chëkur wawqinkunata ashir pantakashqa purirqan. Tsënö purikaptinmi juk nuna Joséwan tinkurir tapurqan: <<¿Imatataq ashinki?>>
16Tsënö tapuptinmi José nirqan: <<Wawqïkunatam ashikä. ¿Manaku rikällarqunki üshakunata mëchö mitsikäyanqantapis?>>
17Tsënam nirqan: <<Pëkunaqa këpita ewkuyashqanam. <Dotán lädupa ewkushun> nir parlëkaqtam wiyarqü>>.
Tsëmi José Dotánman ëwar wawqinkunata tarirqan.
18Karuta José shamïkaqta rikëkurnam wawqinkuna yachatsinakuyarqan wanïkatsiyänanpaq. 19Tsëmi niyarqan: <<¡Suëñukuq chölum shamïkan! 20Juklla kanan wanuratsishun. Ayantana pözuman jitarkushun pipis mana tarinanpaq. Tëtantsiktaqa nishun: <Mikukuq animalkunachi mikukurkushqa> nishpam. Tsënö rurarishqa mä suëñunqankuna tinkunqakush>>.
21Tsënö yachatsinakuyanqanta wiyëkurnam wawqin Rubénqa imanöpapis tsapëta munar nirqan: <<Ama wanutsishuntsu. 22Wawqintsikpa yawarninta ramanantsikpa rantin kë chusyaqchö këkaq pözuman jitarkushun. Ama kikintsikqa wanutsishuntsu>>.
Rubénqa tsënö nirqan Joséta imëkanöpapis kawëkaqta tëtanman kutitsita munarmi.
23Tsëmi wawqinkuna kaqman José chäriptin shumaq tünicanta juklla qoturatsiyarqan. 24Tsëpitanam tsaki pözuman jitarkuyarqan. 25Tsëpitanam jamakuriyarqan mikuyänanpaq. Mikïkarninnam rikäriyarqan ismaelita nunakuna atskaq shamïkäyaqta. Pëkunam Galaadpita Egiptuchö rantikuyänanpaq camëllunkunawan cargashqa apëkäyarqan perfümikunata, balsamuta y mïrrata.
26Tsënam Judáqa wawqinkunata nirqan: <<Wawqintsikta wanuratsir mana musyaq tukunqantsikwan ¿imatataq jorqushun? 27Wanutsinantsikpa rantin taqë ismaelita negociantikunata rantikïkushun. Pëqa wawqintsik karmi yawarnintsik këkan>>.
Judá tsënö niptinnam wawqinkuna <<allim kanqa>> niyarqan.
28Madiánpita ismaelita negociantikuna tsëpa pasëkäyaptinnam pözupita jorqarir ishkë chunka (20) siclo#37.28 Juk siclo qellëqa juk killa arur ganashqannömi karqan. qellëchö rantikïkuyarqan.#Hech. 7.9. Y Josétanam tsë negociantikuna Egiptuman apakuyarqan.
29Pözuman Rubén kutïkur Joséta mana tarirnam alläpa llakikur ratashnintapis rachirqan. 30Wawqinkuna këkäyanqanman ëwëkurnam nirqan: <<¡Pözuman jitanqantsik chölu manam kantsu! Kananqa ¿imatataq rurashaq?>>
31Tsënam chiwata pishtarir tsëpa yawarninwan Josépa tünicanta pichuyarqan. 32Tsënö rurarirnam tëtanman apatsiyarqan. Apaqtanam niyarqan kënö willananpaq: <<Tsurikikunash kë tünicata chusyaqchö tariyarqunaq. Allish reqinki tsurikipa kanqanta o mana kanqantapis>>.
33Chëkur tsënö willariyaptinnam tsurinpa tünicanta reqirkur Jacob nirqan: <<¡Këqa tsurilläpa ratashnintaq! ¡Jirkachö chucaru animalkunachi mikukurkuyashqa!>>
34Tsëmi llakikurnin ratashninta rachirir lütu ratashtana yakakurqan. Tsurin wanunqanta mana qonqarmi alläpa waqakurlla purikurqan. 35Tsurinkuna warmipis ollqupis shoqayaptin masran waqar kënö nirqan: <<Wanur pëwan tinkunqäyaqmi tsurïtaqa lütushaq>>.
36Tsëyaqnam madianita negociantikunaqa Egiptuman Joséta chäratsir Faraónpa wardiankunapa capitannin Potifarman rantikïkuyarqan.
Tällä hetkellä valittuna:
Génesis 37: qwhB
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2018, Wycliffe Bible Translators, Inc. All rights reserved.