SAN JUAN 1
1
Beda gaca Xiiñi Dios binni guidxilayú
1Dxi bizulú Dios bizá' guidxilayú ne ibá' maca nuu tobi ni rabi cabe Diidxa', ne uyuu Diidxa que ra nuu Dios, ne Diidxa que Dios laa. 2Dxi bizulú guidxilayú ne ibá' maca nuu né Diidxa que Dios. 3Pur laabe uca irá xixé cosa ne pa sin laabe qué ñaca gasti de ni ma uca ca. 4Lu ná be nuu enda nabani, ne naca enda nabani que biaani para irá binni. 5Ruzaani biaani que lu guelacahui, ne qué huayanda utaagu guelacahui ni.
6Uyuu tobi ni biseenda Dios, lá Juan. 7Beda güi né binni stiidxa stobi ni nexhe gueeda, ni gueda gaca biaani para irá binni guidxilayú. Beda güi be stiidxa ngue para guni cre binni laa dxi gueeda. 8Cadi laadi be nga biaani que, sínuque beda güi né si be binni stiidxa biaani que, 9dxa biaani nexhe gueeda ndaani guidxilayú que para uzaani irá binni. Ne biaani que nga Cristu.
10Beeda be ndaani guidxilayú ni bizá' be, peru qué ñunibiá' binni guidxilayú laabe. 11Beeda be xquidxi pe be, peru qué nulabi ca binni xquidxi be laabe. 12Peru irá cani bilabi laabe ne bini cre laabe la? bi'ni be laaca xiiñi Dios. 13Ne para guca cabe xiiñi Dios la? qué ñale cabe de gunaa ne hombre casi rale binni guidxilayú, o nin purti uyuula'dxi hombre gaca ni, sínuque zeeda ni de Dios.
14Beda gaca dxa Diidxa que binni, ne uleza be lade du. Ne bidu'ya du enda nandxó' stibe. Nandxó' be purti laabe nga tobi lucha Xiiñi Dios Padre. Uca be nacha'hui ne binni, ne bi'ni be puru si ni jneza. 15Byui' né Juan binni stiidxa be. Ne bicaa ridxi na rabi laacabe:
―Ndi nga ni huayabe laatu nanda atrá de naa que, ni gudxe laatu jma risaca que naa, purti maca nuu be ante chuaa'.
16Nacha'hui be ne binni ne qué riaana dxí be de cu' be ndaaya laanu. 17Purti bidii Dios ley Moisés para udii ni binni, peru ra beeda Jesucristu uca Dios nacha'hui ne binni, ne bihuinni xii nga ni dxandí'. 18Iruti binni guidxilayú qué huayuuya Dios sínuque tobi lucha si Xiiñi be ni nuu né laabe tobi si, laa beda usiene binni ximodo laabe.
Ra unaba diidxa cabe Juan tu laa
(Mt. 3.11-12; Mr. 1.7-8; Lc. 3.15-17)
19Ti dxi biseenda ca judíu de Jerusalén chupa chonna sacerdote ne levita ra nuu Juan, para yenaba diidxa ca Juan tu laa. 20Ne óraque bisiá stiidxa' ne qué nucaachi gasti' sínuque gudxi laacabe cadi Cristu laa. 21Para na ca rabi ca laabe:
―Entonce tu lii pue. Ñee lii nga Elías la?
Oraque na be:
―Co', cadi Elías di naa.
Bigueta na ca':
―O lii nga dxa profeta ni gueeda que la?
―Lácaca co', na be.
22Oraque na ca':
―Gudxi laadu tu lii pue ti gapa du xi gabi du cani biseenda laadu. Xi zanda ga'bu laadu de lii.
23Para na be:
―Naa nga ni cucaa ridxi ndaani gui'xhi': “Lauxhele ladxidó' to para Señor, casi ñaca cuxhele tu ti neza tidi be”, casi bizeete profeta Isaías ni chiqué.
24Laca nuu caadxi fariseu lade cani yenaba diidxa que. 25Para rabi ca laabe:
―Pa cadi Cristu lii nin Elías nin dxa profeta que la? xiñee caguu nisa lu ya'.
26Para rabi be laaca':
―Naa la? caguaa ni'sa', peru nuu tobi lade tu ni ca'ru gunibiá' tu. 27Laabe nga ni gudxe laatu zeeda atrá de naa que, peru naa qué risaca dia' nin para cuee guela guidi ñee be.
28Dxi uca nga la? nuu Juan ndaani guidxi Betábara, cherica guiigu Jordán ra caguu nisa.
Dendxu huiini sti Dios
29Sti dxi que biiya Juan zeeda Jesús ra nuu, para na:
―Laguuya', ndi nga Dendxu huiini sti Dios ni ribee xpecadu binni guidxilayú. 30Ndi nga dxa hombre ni huayabe laatu zeeda atrá de naa ni jma risaca que naa purti ante chuaa maca nuu. 31Chiqué nin naa qué ñunebia'ya laabe, peru para ulué binni Israel tu laabe la? nga runi beda nduaa ni'sa'.
32Ne gudxi Juan laacabe xi bi'ya', na:
―Biiya zeda yete Espíritu Santu de ibá' casi ti paloma ne biaana dxí luguiá be. 33Ca'ru gunebia'ya laabe, peru ni biseenda naa gueda nduaa ni'sa', ngue gudxi naa ora guuya guiete Espíritu Santu ne guiaana dxí luguiá ti hombre la? ngue nga ni chi udii Espíritu Santu binni. 34Naa biiya laabe ne ma gudxe binni deque laabe nga Xiiñi Dios.
Cani bizulú yenanda Jesús
35Bigueta sti dxi que, zuhuaa né Juan chupa de cani canazá né laa 36ora zidi'di Jesús neza que, para biiya dxí Juan laabe ne na:
―Laguuya', ndi nga Dendxu huiini sti Dios.
37Ne bina diaga iropa cabe ni uní' Juan, para yenanda cabe laabe. 38Ora bidxigueta lú be biiya be zeda nanda ca laabe, gunaba diidxa be laaca', na be:
―Xi ruyubi tu.
Para na ca':
―Maistru, tu ralidxi biete lu'.
39Para rabi be laaca':
―Latá' gu'ya tu.
Oraque yeguuya ca paraa biete be. Ne biaana né ca laabe dxi que purti ma huadxí ngue, bia' las cuatro.
40Tobi de ca discípulu ni bina diaga ni uní' Juan ne yenanda Jesús que la? lá Andrés bi'chi Simón Pedru. 41Nirudó' yeyubi be Simón bi'chi be ne rabi be laa:
―Ma bidxela du Mesías ni rabi cabe Cristu ni ulí Dios que.
42Ne yené be laa ra nuu Jesús. Oraque biiya dxí Jesús laa ne na:
―Lii nga Simón, xiiñi Jonás nja', peru ma chi iree lá lu Cefas (didxazá la? ñabi be laa Pedru).
Ra guridxi Jesús Felipe ne Natanael
43Sti dxi que na Jesús che Galilea, ne ra ze be que bidxaaga be Felipe para rabi be laa:
―Dananda naa.
44Felipe laca binni Betsaida laa, xquidxi Andrés ne Pedru. 45Yeyubi Felipe Natanael, ne ora bidxela be laa rabi be laa:
―Ma bidxela du dxa hombre de ni bicaa Moisés lu gui'chi ra cá ca ley ne ni bizeete ca profeta que, ne laabe nga Jesús xiiñi José de Nazaret.
46Para na Natanael rabi laabe:
―Zanda xa iree ni iquiiñe de Nazaret.
―Gudá' gu'yu', rabi be laa.
47Ora bi'ya Jesús zidxiña Natanael laa na:
―Laguuya ndi nga tobi ni dxandí pe naca binni Israel, laabe qué rusiguii be.
48Oraque na Natanael rabi Jesús:
―Paraa binibiá' lu naa ya'.
Para na Jesús rabi laa:
―Ante cuidxi Felipe lii, ora nuu lu xa'na yaga du'ga que, maca biiya lii.
49Oraque na Natanael rabi laabe:
―Maistru, lii nga Xiiñi Dios. Lii nga Rey sti binni Israel.
50Para rabi be laa:
―Purti si gudxe lii biiya lii xa'na yaga du'ga ma bini cre lu la? Chi guuya rou' cosa ni jma nandxó' que nga.
51Ne na be:
―Gabe ca' laatu de ca yanadxí zuuya tu zuxele ibá', ne ca ángel sti Dios cagui'ba ca ne cayete ca xa ique Hombre Biseenda Dios.
Tällä hetkellä valittuna:
SAN JUAN 1: zai
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 1988, Wycliffe Bible Translators, Inc. All rights reserved.
