SAN JUAN 4
4
Sti gunaa samaritana
1Gunna Señor ma gunda diaga ca fariseu jma stale discípulu cayapa ne jma stale binni caguu nisa que Juan, 2neca cadi laabe caguu nisa be sínuque ca discípulu stibe. 3Para biree be Judea bigueta be Galilea.
4Ne napa be xidé tidi be Samaria. 5Yendá be ti guidxi sti Samaria lá Sicar ni nuu gaxha de layú ni bisaana Jacob para José xiiñi'. 6Ne raqué nuu bizé sti Jacob. Nabé ma bidxaga be tantu ma guzá be ne mayaca ganda galaa dxi ngue, para gurí be ruaa bizé que. 7Raqué zuba be beda caa ti gunaa de Samaria nisa. Para rabi be laa:
―Bisiga'de naa caadxi nisa guee'.
8Qué guinni ca discípulu stibe, ze ca ndaani guidxi, zisí ca endaró. 9Oraque na gunaa que:
―Ximodo ndi ya'. Lii nacu judíu ne naa naca samaritana ne canaba lu naa nisa gueu' la?
Uní' gunaa que zaqué purti qué raca llevar ca judíu ca samaritanu. 10Para rabi be laa:
―Pa lii ñannu xi cudii Dios binni, ne ñannu tuu nga canaba lii nisa gue la? ninaba lu laa, ne laa nudii lii nisa ni rudii enda nabani.
11Oraque na gunaa que rabi laabe:
―Señor, peru cadi neu ni cuee neu ni, ne nabé guete bizé ri'. Paraa nga nou' ricoou nisa ni rudii enda nabani ca ya'. 12Lácaxa jma nandxó' lo que bixhoze du Jacob ni bidii bizé ri laadu. Laa güe' nisa stini, ne laca güe' ca xiiñi ne ca xhiuze.
13Para rabi be laa:
―Tutiica gue nisa ri la? zati ru nisa. 14Peru tu gue nisa ni gudiee laa la? ma qué ziuu dxi gati nisa, purti de nisa que ziale nisa ni rudii enda nabani ni qué zaluxe.
15Oraque na gunaa que rabi laabe:
―Señor, dané naa nisa ni nou' ca para cadi gate rua' nisa ne ma cadi gueda caa nisa bizé ri'.
16Para rabi be laa:
―Yetidxi xheelu ti gueedu'.
17Oraque na:
―Qué gapa dia' xheela'.
―Jneza uníu', rabi be laa, ―qué gapu xheelu'. 18Purti ma gaayu xheelu gupu' ne ni nabeza neu yanna ri la? cadi xheelu'. Jneza uníu'.
19―Señor, zuluá' sia' profeta lii, na gunaa que rabi laabe. 20―Ca bixhoze gola du la? lu dani ri bisisaca ca Dios, peru laatu na tu Jerusalén nga usisaca binni Dios.
21Para rabi be laa:
―Señora, bini cre ni chi tidxe lii ri'. Zadxiña dxi nin ca lu dani ri', nin ca Jerusalén qué zusisaca cabe Dios Padre. 22Laatu rusisaca tu ni qué runibiá' tu, peru laadu rusisaca du ni runibiá' du, purti de lade ca judíu iree ni ulá. 23Zadxiña dxi, ne yanna nga laani, cani dxandí racala'dxi usisaca Dios la? naquiiñe guni ni modo racala'dxi be, ne guni ni de idubi ladxidó', purti ca nga nga cuyubi Dios, cani usisaca laa zacá. 24Dios Espíritu laa, ne tu usisaca laabe la? naquiiñe chi nanda ni jneza ne guni ni de idubi ladxidó'.
25Para na gunaa que rabi laabe:
―Nanna ziuu dxi gueeda Mesías ni rabi cabe Cristu que, ne ora gueeda be zusiene be laadu irá ni.
26Oraque rabi be laa:
―Laape be nga caní' né be lii.
27Ra cayuí' cabe diidxa que beeda ca discípulu stibe ne bidxagayaa ca cayuí' né be gunaa que diidxa', peru nin tobi de laaca qué ninaba diidxa ca laabe xi canaba diidxa be gunaa que o xi cayabi be laa. 28Oraque bisaana gunaa que rii sti' ne uyé ndaani guidxi. Ne biiya nuu caadxi hombre raqué para na:
29―Latá' gu'ya tu ti hombre ni gudxi naa de irá xixé ni huayune'. Nanna pa cadi ndi nga Cristu ya'.
30Para biree ca ndaani guidxi que uyé ca ra nuu Jesús.
31Laga ze gunaa que na ca discípulu stibe rabi laabe:
―Gudá' gou', Maistru.
32Para rabi be laaca':
―Napa ti endaró. Qué ganna tu xi laa.
33Para na caadxi discípulu rabi xcaadxi que:
―Lácaxa nuu tu gueda saana endaró para laabe.
34Peru óraque rabi be laaca':
―Endaró stinne nga gune ni na ni biseenda naa, ne gunduuxe dxiiña sti'. 35Laatu na tu riaadxa ru stapa beeu para iree guela. Peru naa rabe laatu: Laindisa lú, laguuya ca ñaa ca gu'ya tu ma nuu cani para iree cani guela. 36Ni chi ndee guela ca la? nga nga cani uchiña binni ra nuaa para icaa ca binni ca enda nabani ni qué zaluxe. Ne laabe zapa be enda nayeche' purti nga nga chi caa be saca bi'ni be dxiiña que, laabe ne ni bizulú byuí' né ca binni que stiidxa Dios. 37Rarí pe nga riaba dichu que: “Adxé tu riguu biní, ne adxé tu ribee guela.” 38Yanna naa cuseenda laatu chi ndee tu guela ra cadi laatu uluu tu biní. Adxé tu uluu biní, peru ma beda guiuu tu lú ni.
39Ne stale binni de guidxi que bini cre laabe pur ni gudxi gunaa que laaca', ra na gunaa que gudxi be laa irá ni huayuni. 40Ne ora yendá ca ra nuu be unaba ca laabe guiaana né be laaca'. Para biaana be raqué chupa gubidxa. 41Ne jma rusi stale binni bini cre laabe pur ni uní' be. 42Ne óraque rabi cabe gunaa que:
―Ma cadi pur ni gu'dxu siou' laadu runi cre du sínuque ma de ruaa pe be bina diaga du ni, ne nanna dxichi du laabe nga ni zeda ulá binni guidxilayú.
Ra bisianda Jesús xiiñi ti xpinni rey
43Gudi'di si chupa gubidxa que, biree be uyé be Galilea, 44purti laca laabe na be, que rusisaca cabe ti profeta ndaani xquidxi. 45Ne ora yendá be Galilea bichagalú ca binni Galilea laabe, purti biiya ca irá ni bi'ni be Jerusalén ra yegapa ca saa que.
46Bigueta uyé be Caná de Galilea ra bi'ni be nisa que vinu. Ne ndaani guidxi Capernaum nexhe xiiñi ti xpinni rey huará. 47Ora gunna hombre que ma bigueta be de Judea ma nuu be Galilea la? uyé ra nuu be ne gudxi laabe chiné be laa usianda be xiiñi ma cayati. 48Para rabi be laa:
―Pa qué gu'ya tu seña ne milagru la? qué zuni cre tu.
49Oraque na xpinni rey que rabi laabe:
―Chuu guiuba, Señor, ante gati xiiñe'.
50Para rabi be laa:
―Guyé, zianda xiiñi lu'.
Ne bini cre ni gudxi be laa que, ne biree ze'. 51Neza ru ze hombre que, yechagalú ca xpinni laa ne na ca':
―Ma bianda xiiñi lu'.
52Para unaba diidxa be laaca pora ti bizulú cayanda xiiñi be que. Ne óraque na ca':
―Neegue bia' la una ma qué ñuu be xindxá'.
53Oraque bietenala'dxi be bia' óraque pe nga gudxi Jesús laabe zianda xiiñi be. Ne bini cre be Jesús, laabe ne irá xixé binni lidxi be.
54Ma ne ndi rairopa milagru guni Jesús Galilea dede dxi bigueta de Judea.
Tällä hetkellä valittuna:
SAN JUAN 4: zai
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 1988, Wycliffe Bible Translators, Inc. All rights reserved.
