Oosana 23
23
Saraqa nammarifa kuqufanoo Abaraqaammafa akundara maqa feefauru ufafa.
1Saraqa nammarifa 127 aukuana marasee kuqinau. 2Kannaana maqa maaqaki Qeebooroona maqusaki kuqufufanoo Abaraaqaammafa mina kuqiranara soofaari marinau.
3Abaraqaammafa narí anaaqa kuqirana mafi quqasee Qeetana aiku asauku maruqoo oonureenoo maaqi qimasee iramirinoo qinau. 4Qinee moo maqannaasa inni qambaana ani maridaqa. Amanee qini maqa moo qimifaqa feefauru nimiseeqa qeeqa qinaaqa minaki akundaanauree.
5Qeetana aiku asuku irisee Abaraqaammana qimamiqa qiqau. 6Anee maasa ufa iria, maasa ani qafaunana anee afeeka rakisirafa marianafa mariananoo. Aneenna anaaqa maasa amiqira madikaki akundaa. Maasa aiqamausa mi madikanaki akundaranara asasidaqa.
7Miqi qufanoo Abaraqaammafa misa noorinni kumma ramafinoo qimanniminoo qinau. 8-9Innee eedoo qiafaqa amanee innee Eefaroona, Sooqarana amaaku iramirifanoo inni nifusaa Makapeera maqa maaqaki narí anaadoo atinni ooni aamara marina qiminaqa feefauru amiseeqee mi maqa maaqana qeeqaindi kammasee qeeqa qiku qisauku nikundee marianauree.
10Eefaroofa narí Qeetana aiku asauku faqa faandaamura kooqiki ufa suqiranaki maridanoo iriseenoo aiqamausa iramirufanoo Abaraqaammana qimaminoo qinau. 11Oo uriqararafa iria, qinee aiqama mi maqana faqa ooni aamara minaki marina faqa ani amianaura. Maaqoo qeeqa faiqi anaasee nifusaa ani amianana aneenna anaaqa minaki akundaa.
12Miqi qufanoo Abaraqaammafa Qeetana aiku asauku noorinni kumma ramafinoo Eefaroona aiqamausa iriaqeera firaaqoo qimaminoo qinau. 13Amanee qinee iramiriananee irinnaree. Qinee mi maqana atisaa aiqama feefaurianaura. Qinee feefauru amianana anee eedoo qimasee marainaqa qinee qeeqa qinaaqa miqoo akundaanaura.
14Eefaroonafa minara iriseenoo maaqi qimasee Abaraqaammana qimaminau. 15Oo uriqararafa, maqa feefauru 400 siruaa maridanoo, mi feefauruna maasa qeeqa qambaana naqa fee masee rainaanauree. Anee aneenna anaaqa kaqi minaki akundaa. 16Abaraqaammafa iriseenoo eedoo qimaseenoo sikeera maraseenoo 400 qummaara ainaina dinni quqaseenoo siruaa dinni quqasoofanoo amana kai ufanoo aminau. Eefaroonafa aiqamausa narí maqannaasa Qeetana aiku asauku nifusaa qufanoo iriseenoo miqi kai minau. Nári sikeera qummaara amana kai Eefaroona aminau.
17Miqimmasee Abaraqaammafa Eefaroona aiqama ainaina Makapeeraa maqa maaqaki suani oosana qaannai Mammareena maqusa adeedi maruna feefaurummasoofanoo Abaraqaammanaindi kinau. Mi feefaurirafa maqa faqa ooni aamara minaki maruna faqa aiqama saqariuqa mi maqana atisaa maru saqarisa faqa aiqama moodaanaki rafaaqafinau. 18Aiqama Qeetana aiku asauku miqoo suqiranaki mariusa mi maqa maaqanara Abaraqaammanaindi fee qiqau. 19Miqimmaseenoo Abaraqaammafa narí anaaqa Saraqa nammarina mi ooni aamaranaki Kannaana maqa maaqaki akundanau. 20Miqimmasoofanoo mi maqafa faqa ooni aamara minaki marufa Qeetana aiku asaukundi mariufa Abaraqaammanaindi kufanoo mi maqana nikundara maqaikaminau.
Tällä hetkellä valittuna:
Oosana 23: bjr
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2017 Wycliffe Bible Translators, Inc. All rights reserved.