San Juan 5
5
Jesús miliyak tu xa' gakt win zhë kwa'n nile' rë men Israel diskans
1Or milox ngok rë kure', nguio tu lani che'n rë men Israel, kuze' nzha Jesús yezh Jerusalén. 2No yezh Jerusalén ze', nikë tu tank nits gax laka plo lë Puert che'n mbëkxi'l; tank re' lë Betzata kun widi'zh che'n men hebreo, mbaino kinui gai' corredor. 3Ro' rë corredor ze' nzhin nayax men nzhakne, men nikal-lo, no men ko'j, mbaino rë men mibizh tu plo; ze' nax bixa' kimbëz bixa' or win nits le'n tank ze', 4porke kad pok nilali tu ganj che'n Dios par nikwin ganj ze' nits kwa'n nzho le'n tank, no men galo laka ño dub niwin nits, ñak xa' wanei cho yalyizh nizak xa'. 5No ze' nax tu miyi' nzhakne nzhala galbichi' bixon li'n. 6Or une Jesús nax xa' ze', lë' Jesús nane la, dox nzhala nzhakne xa', orze' nzhab Jesús lo xa':
―¿Chi nzhaklal yakal?
7Orze' nkab xa':
―Lë' go, yent cho gaknu da yo'n le'n tank or niwin nits, kad or nzhaklan yo'n, xtu xa' ño galo lon.
8Orze' nzhab Jesús:
―Waxche, gulits kwa'n naxal lo, no bizë.
9Orze' lwega' miak miyi' ze', ngulits xa' kwa'n ngo't xa' lo, no nguzublo nguzë xa', mbaino zhë ze', zhë kwa'n nayi' kë men Israel zhi'n. 10Orze' nzhab pla men Israel lo miyi' miak re':
―Nalzhë, zhë nile' met diskans, kuze' gat ñalt wei'yal kwa'n ngo'tal lo ba'.
11Orze' nzhab miyi' ze' lo bixa':
―Xa' miliyak da, ne lon: “Gulits kwa'n naxal lo ba', no bizë.”
12Orze' mina'bdi'zh bixa':
―¿Cho xa' ne lol: “Gulits kwa'n ngo'tal lo ba', no bizë”?
13Per miyi' re' nanet xa' cho miliyak xa', porke lwega' nguzë'b Jesús xid rë men nzhin ze'. 14Guzhëla ze', mizhë'l Jesús miyi' re' le'n yado', orze' nzhab Jesús lo xa':
―Biwi', lë'l miak la nal, nale'tra'l kwa'n gat lë' lo Dios, par nazakal xtu kwa'n más nazhe'b.
15Orze' ña miyi' ze', no ngwayab xa'i lo rë men xa' nzo lo rë men Israel, lë' Jesús miliyak xa'. 16No por kuze', ngokla bixa' ngazen bixa' Me, por miliyak Me men zhë kwa'n nile' rë men Israel diskans, 17per nzhab Jesús lo bixa':
―Lë' Xuza nu zhë re' nikë Me zhi'n, kuze' nu da nikë zhi'n zhë re'.
18Por kwa'n nzhab Jesús re', más ngokla rë men Israel ze', ngagal bixa' Me, gat lë't nab por nikë Me zhi'n zhë kwa'n nile' rë men Israel diskanse, sino ke nu por nzhab Me: “Lë' Dios nak Xuza”, mbaino nu Me nile' rë kwa'n nile' Dios.
Xga'n Dios nile' mandad nela Xuz Me ga'
19Orze' nzhab Jesús:
―Walika kwa'n nin lo go, nagakt le' Xga'n Dios ni tu kwa'n xigab yek, nab tsa nile' Me rë kwa'n niwi' Me nile' Xuz Me, no rë kwa'n nile' Xuz Me nile' Me. 20Lë' Xuz Me nazhi' Me, kuze' rë kwa'n nile' Xuz Me, nilu' Xuz Me lo Me, mbaino lë' Xuz Me laore lu' kwa'n más nazhon lo Me, kwa'n le' ya'n xe go tuli, 21no nela nile' Xuz Me niruban rë men, par niza' Dios yalnaban ka' bixa', se'ska niza' Xga'n Dios yalnaban ka' men, xa' nzhakla Me za' Mei, 22no Xuz Me nagabt kwan ñal rë men por kwa'n nzë'b xki bixa', sino ke lo Xga'n Me mila' Me kure', par lë' Xga'n Me gab kwan gak kun tu ga' rë men por kwa'n nzë'b xki bixa', 23nes par rë men gap kwent kwa'n nidi'zh Xga'n Dios nela xmod nzhap men kwent yub pa' Dios, Me mixë'l Me re'. No xa' nazo'b di'zh kwa'n nidi'zh Xga'n Dios, gat lë't kun Xga'n Dios mile' xa' kure' sino ke kun yub pa' Diose.
24No nzhab Jesús:
—Dox wali kwa'n nin, xa' gon kwa'n nidizha, mbaino yila xa' Me mixë'l da, por kure' ban xa' kun Dios par dubta'. No nana'btra' Dios kwent lo xa' por kwa'n mile' xa'. No nale'tra' xa' kwa'n gat lë' par nalox xa' lo Dios, sino ke zublo ban xa' kun Dios. 25Pwes walika kwa'n nin lo go, lë' zhë zhin, mbaino lë' zhë ze' mizhin la, lë' rë men xa' nzo zit lo Dios, lë' bixa' gon widi'zh che'n Xga'n Dios, no rë xa' yila widi'zh che'n Xga'n Me re', por kure' lë' bixa' ban par dubta' kun Dios. 26Nela xmod kinu Dios yalnazhon par niza' Me yalnaban ka' men par dubta', se'ska miza' Dios yalnazhon re' ka' Xga'n Me, par nile' Xga'n Me ban men dubta' kun Dios. 27Mbaino nu mizo Dios Xga'n Me par na'b Xga'n Dios kwent lo rë men yizhyuo por rë kwa'n nzë'b xki bixa', no nu por nak Xga'n Dios tu men yizhyuo. 28Nawi't go lon xe por rë kwa'n kidizha lo go re', porke lë' zhë zhin, lë' rë xa' nzho le'n ba' gon widi'zh che'n Xga'n Dios, 29orze' ruban bixa', no rë xa' mile' kwa'n wen, lë' bixa' ban par dubta' kun Dios; per rë xa' mile' kwa'n gat lë', lë' bixa' ruban par dubta' zakzi bixa'.
Walika Dios mixë'l Krist
30No nzhab Jesús:
―Nagakt len ni tu kwa'n xigab yeka, nab tsa nilen nela xmod ne Xuza lon. Kuze' nali nigobe'n xmod nak men, porke gat nile'ta' kwa'n nzhaklan, sino kwa'n nzhakla Xuza, Me mixë'l da, kuze' nilen. 31Chi por xigab yeka nidizha, pues gat walit kwa'n nidizha orze', 32per nzho xtu Me nidi'zh por na, mbaino nanen, walika rë kwa'n nidi'zh Me por da. 33Lë' go mixë'l men par ngwana'bdi'zh bixa' lo Juan, no walika kwa'n midi'zh Juan por da. 34Per na gat naki'nt da di'zh men cho da; nin cho da lo go par ro' go lo rë kwa'n nazhe'b nzho go. 35Rë widi'zh kwa'n milu' Juan lo go ngok nela tu ki kwa'n nizini lo nakao ga'; mbaino por kwa'n milu' Juan lo go re', che'ptsa mizak laxto' go mile'i. 36Per na kinu kwa'n más nilu' cho da, mbaino más tsake lo rë kwa'n milu' Juan: Rë zhi'n nazhon kwa'n nilen, tutsa nake kun rë zhi'n nazhon kwa'n mika'b Xuza len. Kure' nilu', Xuzka mixë'l da. 37No Xuza Me mixë'l da, lë' Me midi'zh la cho da, no ter naga gon go chi Me, no ni naga ne go Me. 38Kun ro' go nidi'zh go ñila go Dios, per gat niguchao't go widi'zh che'n Me laxto' go, porke gat ñilat go da, mbaino lë' Me mixë'l dax. 39Lë' go niwi' laka go kwa'n nzho'l go lo Widi'zh che'n Dios, nes par gab go, sa' yazhël go xmod ban go dubta' kun Dios, mbaino rë kwa'n nzho'l go ze', na ka nize'te; 40per nanet go yila go da par len ban go dubta' kun Dios. 41Par na, yent kwan tsak di'zh men wen da, 42per por nilibe'n go, wenawen nanen, gat nazhi't go Dios. 43Mbaino Me re' nak Xuza, Me mixë'l da lo go, per nanet go yila go da; lë'la cho la xtu ñila go, xa' nidi'zh kwa'n xigab yek xa' lo go. 44¡Kuze' ka, gat ñila go dax!, porke dox ño laxto' go di'zh men lë' go wen; per gat nikwa'nt go xmod ya'n go wen kun Dios, ter lë'gaka nab Me nak Dios. 45Nagabt go nal, na gap lo Xuza rë kwa'n nak go. Per yub Muisés gab kwan nak go, ter nile' go xigab, Muisés ko' go lo rë de kwa'n nzadkë tich go. 46Chi walika ngayila go kwa'n mizobni' Muisés, orze' nu ska da ngayila go, porke na nize't kwa'n mizobni' Muisés, 47per por gat wali ñila go kwa'n mizobni' Muisés, kuze' nu da, gat ñilat go kwa'n nidizha.
Tällä hetkellä valittuna:
San Juan 5: zca
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2013, Wycliffe Bible Translators, Inc. All rights reserved.
