Gola - 2019 LIB (NT) Drama

Gola New Testament Translation and Literacy Project © Bible Society in Liberia, 2019.

E teenga lii sùà wo Kanaà Hɛɛlɔ̀, wo kànà wɔŋ fùɔ̀ŋ Galaliìɔ, naŋ kòmò ebò Jisɛ̀ɛ. Wo Hɛɛlɔ̀ naŋ wòò aŋ ɓɔìjɔ̀àuŋ nyàŋ wààŋ, “Wo Jɔ̀ɔŋ Gùà Nyùnɔ̀ɔŋ wo, wò yèwà e fàaà dìì wɔŋ nyiiŋ gèeɔ̀ sùà, tiŋ nàŋ kanaŋ maŋ kèè mèè maŋ wò yaà nyinie màŋ.”
Wo kanaà Hɛɛlɔ̀ wuŋ bi naŋ wa kìɛ̀ŋ e gààaŋ wèè aŋ kùwà Jɔ̀ɔŋ, yèè wò naŋ nyɛ̀nɛ̀ŋ auŋ dèkà yèè àŋ nauŋ gbìɛ̀ŋ ko sààŋ nyìwìi. Wò naŋ wa tɛɛ̀ nyɛ̀nɛ̀ŋ esàɓù wo nìeɔ̀ àŋ nyaaŋ wa wo Hɛ̀lolìà wɔ, wo jàwè wùìyauŋ nɔɔ̀ŋ Felè, wo yèɔ wo kanaà Hɛɛlɔ̀ naŋ wa naàŋ ɓemè wèè wo nɔ̀ŋ wo jawèuŋ wɔ̀. Tɛɛ̀ wo Jɔ̀ɔŋ Gùà Nyùnɔ̀ɔŋ hewa wòò wo kanaà Hɛɛlɔ̀ wààŋ, “E fè tɔ̀ɔ̀nyaàŋ wèè maŋ ɓèmè wò Hɛ̀lolìà, wò jàwè wùìya mɔɔ̀ŋ Felè wèè wò do nɔ̀ŋ wò jawèum, e teengaà wo wùìya mɔɔ̀ŋ yaà wɔŋ nyiiŋ gèeɔ̀ sùà lɛ.” Wo Hɛɛlɔ̀ manaŋ wa wo jìwà wo Jɔ̀ɔŋ, kɛɛ wò duɔŋ wa aŋ Juùù nyaŋ, esaɓù kɛ̀ anyùùŋ nyaŋ naŋ wa ɓèmè wo Jɔ̀ɔŋ wèè wo nɔ̀ŋ wo wɛ̀ijì.
Kɛɛ nààŋ ke ɗɔ̀ɔ̀ kòmàŋ Hɛɛlɔ̀ɛ naŋ wa haì, wo jɔ̀àjɔ̀ùŋ Hɛ̀lolìàa naŋ hnè yèè wò naŋ yèwè ko fɛ̀ɛ̀fèìŋ anyùùŋ nyaŋ gbiŋ, yèè ke jìì wo Kanaà Hɛɛlɔ̀ naŋ wa fɔ̀, yèè wò naŋ ɓèmè maŋ kààmgbɛ̀ nyìnga ko nɛ̀ɛ̀uŋ niìŋ wààŋ, “Kà gboonò kpo mìŋ doum nàŋ kìɛ̀ŋ e nɛ̀ɛŋ gbiŋ mùŋ manaŋ lɛ̀.”
Kpeiŋ wo jɔùŋjɔaà wo nààŋ nauŋ woò wààŋ kɔ̀à muŋ dawèuŋ mààŋ, “Mìŋ manaŋ e ɗì Jɔ̀ɔŋ Gùà Nyùnɔ̀ɔŋ wɔŋ tɛnyɛ̀ì sùà.”
Ke mìè yɛɛ̀ naŋ wa nyɛ̀nɛ̀ŋ wo kanaà wo nɔ̀ŋ jɔ̀ùŋ e kɔɔuŋ nɛ̀ sùà, kɛɛ wo fè wa ɓɛìŋ ɓɛ̀nɛ̀ŋ màŋhɛɛ gèe esàɓù maŋ kààmgbɛ̀ nyìnga màŋ wò naŋ wa ɓemè maŋ aŋ dàwiuŋ nyàŋ gbiŋ ko fɛɛ̀feìŋ. Kpeiŋ wò naŋ tùɔ̀ŋ wo kààlò guùŋ wèè wo hiàŋ e ɗì Jɔ̀ɔɛ̀ŋ fiò. Wo kaaloɔ̀ naŋ kɔ̀ ko sààŋ nyìwìi yèè wò naŋ kɛ̀ɛ̀ wo Jɔ̀ɔŋ e ɗì kpo. Yèè wò naŋ hìɛ̀ŋ e ɗì Jɔ̀ɔɛ̀ŋ, è jaa ko tɛnyɛ̀i yèè wò naŋ niŋ kìɛ̀ŋ wo jɔùŋjɔaà, yèè wo jɔùŋjɔaà naŋ niŋ kɔ̀ɔ̀ koɓɛ̀ wo yèyeuŋ nɔɔ̀ŋ. Anyùùŋ màŋjɛ̀wɛ̀ Jɔ̀ɔŋ nyàŋ naŋ hnè aŋ ɓèmè e dieuŋ nɛ̀, yèè àŋ naŋ niŋ kɔɔ̀ aŋ niŋ sìà. Yèè àŋ naŋ kɔ̀ aŋ niŋ wòò wo Jisɛ̀.


Nààŋ wo Jisɛ̀ naŋ wa kòmò ebò lɛɛ̀ e nyaàiŋ dè Jɔ̀ɔŋ, wò naŋ sɛ̀ɛ̀ wɔŋ gɔ bà sùà yaà anyùùŋ màŋjɛ̀wɛ̀uŋ nyàŋ yèè àŋ naŋ kɔ̀ koɓɛ̀ bà su nyiŋ wouwòù. Anyùùŋ nyaŋ naŋ wa kòmò e bòuŋ, yèè aŋ naŋ yèwè maŋ jawa nyiŋ màŋ gbiŋ sùà aŋ kààìŋ dìì auŋ dè maŋjɛ̀wɛ. Nààŋ wo Jisɛ̀ naŋ wa fòlò wɔŋ gɔɔ̀ sùà wò naŋ dè, wò naŋ mɛ̀ɛ̀ŋ e faaŋ gbee lɛɛ̀ sia koɓɛ̀i, ke nyowoɛ̀ nauŋ nyɛ̀nɛ̀ŋ weè nyiŋ, yèè wò naŋ sùngò anyuùŋ sàaŋ nyiŋ nyàŋ.
E koya gɔɛɛ lii, anyùùŋ màŋjɛ̀wɛ̀uŋ nyàŋ naŋ hnè ko nɛ̀ɛ̀uŋ niìŋ yèè àŋ nauŋ woò nyààŋ, “E gɔɛɛ̀ naàŋ hàmèè mààŋ, yèè koɓɛ̀ yaà kò yaà su. Weètii tuàŋ anyùùŋ nyɛɛ̀ŋ maŋ vàa màŋ sùà wèè aŋ dènàŋ e nɛ̀ŋje wèè nyiŋ bi.”
Wo Jisɛ̀ naŋ nyiŋ woò wààŋ, “Esaɓù bà e fè wèè aŋ ka, nyɛ̀iŋ bi kàmeìŋ e nɛ̀ŋje niŋ kiɛ̀ŋ nyiŋ aŋ jè.”
Yèè àŋ naŋ wòò wo Jisɛ̀ nyààŋ, “Maŋ gbɔ̀ù fàà nɔɔnɔŋ yaà aŋ kɛ̀ì tìyèe è kùwàìŋ kià.”
Kpeiŋ wo Jisɛ̀ naŋ wòò anyùùŋ màŋjɛ̀wɛ̀uŋ nyàŋ wààŋ, “Hìaìŋ kià e nɛ̀ŋjeɛ̀ ko nɛ̀ɛ̀ŋ miìŋ.” Yèè wo Jisɛ̀ naŋ wòò anyùùŋ nyaŋ wààŋ aŋ jɛi maŋ dɛɛ màŋ diɛŋ. Kpeiŋ wo Jisɛ̀ naŋ ɓèmè e gbɔ̀ù nɔɔnɔɛ̀ŋ yaà aŋ kɛ̀ì tìyèe nyàŋ, yèè wò naŋ yɛ̀mɛ̀ ko fùùiŋ wò naŋ gè wo Dayà esɛ̀. Wò naŋ nyìmè nyìmè e gbɔ̀uɛ̀ yèè wò naŋ niŋ kìɛ̀ŋ anyùùŋ màŋjɛ̀wɛ̀uŋ nyàŋ wèè aŋ goonò niŋ aŋ nyùùŋ nyaŋ fèemàŋ. Anyùùŋ màŋjɛ̀wɛ̀uŋ nyàŋ naŋ gòònò e nɛ̀ŋjeɛ̀ anyùùŋ nyaŋ fèemàŋ. Wo nyùùŋ gbiŋ naŋ wa gbìlè wo dià. Yèè anyùùŋ màŋjɛ̀wɛ̀uŋ nyàŋ naŋ gbònògbònò e nɛ̀ŋje gbànaàŋ naŋ wa joo lɛ̀ e dìà maŋ pòùm gbèègbèè zììyà jɛ̀wɛ̀ tìyèe. Aŋ kpàkòò nyaŋ kinɛiŋ naŋ wa jè nɛ̀ŋjeɛ̀ nyaŋ yaà wa sɔ̀ngɔ̀ anyuùŋ tààsùùŋ nɔɔnɔŋ (5,000), e gòiŋ kpɛ̀nɛ̀ŋ àŋ jɔùŋ yèè àŋ jɔ̀àkàiŋ jɔa.


Kpeiŋ wo Jisɛ̀ naŋ nyɛ̀nɛ̀ŋ anyùùŋ màŋjɛ̀wɛ̀uŋ nyàŋ aŋ sɛ̀ɛ̀ wɔŋ gɔɔ̀ sùà aŋ kà ko feìŋ, wɔŋ juwoɔ̀ wɔŋ fààa bàa, nààŋ wò yaà wa nyɛ̀nɛ̀ŋ sùà anyùùŋ nyaŋ wèè aŋ kɛɛ̀ maŋ jawa nyiŋ màŋ sùà. Nààŋ wò naŋ kpɛ̀ɛ̀yɛ̀ aŋ nyùùŋ nyaŋ dìàmaŋ, wò naŋ kɔ̀ wɔŋ toò bà dìmɛ̀ wuŋ guùŋ wèè wo zoolò. E koya gɔɛɛ lii, wɔŋ gɔɔ̀ yaà wa naàŋ e wùìyèɛ tɛɛ, wo Jisɛ̀ wuŋ guùŋ naŋ wa jòò ko tiwiì. E teenga lɛɛ̀ sùà wɔŋ gɔɔ̀ wa naàŋ yèwà ko tiwiì wɔ̀ŋ naàŋ hàì e wùìyèɛ tɛɛ, wɔ̀ŋ yaà kùwìè e keì nyìnga esaɓù kɛ̀ wɔŋ fòìɔ yaà wuùŋ wa dè sùà gààŋ e wùìyèɛ diɛŋ.
Kpeiŋ e teenga bà sùà e fèèmàŋ wɔŋ fòìnìlì yaà wɔŋ niìsìaà, wo Jisɛ̀ naŋ hnè koɓɛ̀ anyùùŋ màŋjɛ̀wɛ̀uŋ nyàŋ wò yaà kààìŋ e wùìyèɛ diɛŋ. Kɛɛ nààŋ anyùùŋ màŋjɛ̀wɛ̀uŋ nyàŋ nauŋ wa yɛmɛ̀ wò yaà kaaiŋ e wùìyèɛ diɛŋ wò yaà hinie, e jùù naŋ nyiŋ nyɛ̀nɛ̀ŋ. Yèè àŋ naŋ kpààŋ nyààŋ, “Wo jinàŋ wo!”
Wo Jisɛ̀ naŋ nyiŋ gbòò e kɔɔ fiò wààŋ, “Kɛ̀ɛ̀nɛìŋ maŋ jii nyingè! Miàŋ wo, e jùù ɓɔ̀ nyɛ̀nɛ̀iŋ!” Kpeiŋ wo Pììlɛ naŋ gbòò yèè wò naŋ woò wààŋ, “Kanaà, sèè mààŋ muàŋ wo tɔɔɓaa, kɛ̀ wòòim miŋ hnàŋ ko nɛ̀ɛ̀ŋ muìŋ e wùìyèɛ diɛŋ.”
Wo Jisɛ̀ nauŋ woò wààŋ, “Hnaàŋ.” Wo Pììlɛ naŋ fòlò ko gɔì yèè wò naŋ tɔ̀ɔ̀tù kààìŋ e wùìyèɛ diɛŋ wò yaà kɔ̀ɔ̀yɛ̀ koɓɛ̀ Jisɛ̀i. Kɛɛ nààŋ wo Pììlɛ naŋ wa yɛ̀mɛ̀ e ɗeweɛ̀ wɔŋ fòìɔ yaà wa màaŋ sùà lɛ, e jùù nauŋ wa nyɛ̀nɛ̀ŋ yèè wò naŋ tɔ̀ɔ̀tù hɔ̀wɛ e wùìyèɛ dìì. Wo Pììlɛ naŋ kpààŋ wààŋ, “Jòèyèim, Kanaà.”
Wo Jisɛ̀ naŋ kɔ̀ wò nauŋ kùwò fiò yèè wò nauŋ dawè wààŋ, “Felaa kùwìè hààwe jɔa wɛɛ̀! Wèè kiìŋ mùŋ naŋ hàà e hààwe mɔ̀ɛ̀ ɓula?”
Nyiŋ tìyèe naŋ sɛ̀ɛ̀ wɔŋ gɔɔ̀ sùà yèè wɔŋ fòìɔ naŋ gɔ̀àì dìì. Kpeiŋ anyùùŋ màŋjɛ̀wɛ̀ nyaŋ wɔŋ gɔɔ̀ sùà naŋ gbùwò wo Jisɛ̀ ko gòlòò dìì e ɓɛ̀ɛ̀jàa sùà, yèè àŋ naŋ woò nyààŋ, “Tɔɔɓaa muàŋ nàŋ yaà wo Jɔ̀àfèlàà Dayàa.”


Àŋ naŋ nìe e wùìyèɛ yèè àŋ naŋ tùlò ko tiwiì ko gɔ̀jè Gɛ̀nisalɛ̀i, yèè àŋ nao dìkìyè wɔŋ gɔɔ̀, anyùùŋ nyaŋ naŋ wa jàà wo Jisɛ̀ jii fiò. Esàɓù tii anyùùŋ nyaŋ maŋ kpàlàùŋ kpàlàùŋ miiŋ sùà kinɛiŋ naŋ tùɔ̀ŋ wèè anyuùŋ sàaŋ nyàŋ yèè àŋ naŋ nyiŋ hìɛ̀ŋ koɓɛ̀ Jisɛ̀i. Anyùùŋ nyaŋ nauŋ wa pɔwɔ̀ wèè anyuùŋ sàaŋ nyiŋ nyàŋ aŋ mɛ̀nlɛ̀ɛ̀ŋ wɔŋ kùmàuŋ nɔɔ̀ŋ e gòlòò dììɛ, yèè wo nyùùŋ gbiŋ naŋ wuŋ wa mɛŋlɛ̀ɛ̀ŋ, wò naŋ wa jòèyè.

Écouter Maafiù 14