Omáfú kú ɔ̄kā kú ipú ɔkpá ā
Ɔdā nēé tá tū ipú ɔkpá nyā ā wɛ ɛ́gɛ́nɛ̄ é yá ɛcɛ mɛ́mla aɔ́dá dóódu nēe bá ipū nū ā. É klla kɛlā lɛyíkwu ohútu kú ɔlɛɛcɛ mɛ́mla ɛ́gɛ́nɛ̄ ó gbɔɔ́ ō bīyíne lɛ ā mɛ́mla ɛ́gɛ́nɛ̄ ó gbɔɔ́ ō móōwē ipú ɛcɛ nyā lɛ ā. É klla kɛlā lɛyíkwu ɔwɛ nɛ̄ Ɔwɔicō gē yá mɛ́mla ɔlɛɛcɛ lɛ ā. É lɔfú kɔ̄ ɔkpá kú Ohūtū nyā ɛga ɛpa kpɔ́cíkpɔ́cí.
Ɛyí áflɛ́yí ga ɛyí igwóléyi (1-11) ā kɔ̄kā kú ɛ́gɛ́nɛ̄ Ɔwɔicō yá ɛcɛ mɛ́mla ɛ́gɛ́nɛ̄ alɛɛcɛ gbo ɔ́ lɛ ā. Alɛɛcɛ gbo ɔ́ ŋmá Ádām mɛ́mla Íifu, Ukéni mɛ́mla Ébɛ̄lu. É kɔ̄kā kú Unówa mɛ́mla éŋkpɔ̄ nōo kpó ɛcɛ mɛ́mla Inɔɔ̄da nɛ̄hi kú Ubábīlɔn ā.
Ɛyí igwɛ́ɛpa ga ɛyí ofɛpa cigwó (12-50) ā kɔ̄kā kú ígblé kú aádáádā kú Ísrɛ̄lu. Ó gbɔɔ́ ŋmá Ébrahām, nēé jé ɔ́ kóō wɛ ɔ̄cɛ nōo kpɔtūce Ɔwɔicō klla ī lɛyítáajɛ lɛ ɔ́ ā. Jāā ga ɔ̄kā kú ɔyí nū Áyísīki mɛ́mla ɔyí kú ɔyí nū nēé hī ka Ujékɔ̄pu ā mɛ́mla ayí kú Ujékɔ̄pu igwɛ́ɛpa āa. É kɛlā Lɛyíkwu āhɔ̄ kú Ujósɛ̄fu, ɔyí kú Ujékɔ̄pu, nōo bī Ujékɔ̄pu mɛ́mla ayí nū ɔhá ā mɛ́mla ipɔ́nū kú uwā ga ajɛ kú Íjīpiti ā.
É kɔ̄kā ipú ɔkpá nyā lɛyíkwu alɛɛcɛ ā, amáŋ ofíyɛ́ dúú ā, é kɔ̄kā lɛyíkwu ɔdā nɛ́ Ɔwɔicō yá ā dúú. É gbɔɔ́ yɔ̄ ī ka ka Ɔwɔicō ɔ́ɔ yá ɛcɛ á, é ŋmó ɔ̄ ɛyí ipū okónu nɛ̄ Ɔwɔicō ce ka anúɔ géē leyīkwu ācɛ ɔlɛ́ nū. Ɔwɔicō kwɛcɛ kpɔ́cíí ipú ɔ̄kā kú ɔ́kpá nyāá. Anú gē hɛ́ɛpɔ̄ klla ī yá ācɛ, nēe ī yá ɔdōbɔ̄bí italā á. Anú gē bī ācɛ ɔlɛ́ nū jé ɔwɛ, klla gē tú uwā abɔ̄ á. Anú klla gē miya ɔdā nōo ī yá uwā á. É tá ɔkpá íkííkée nyā kéē tá ɔ̄kā kú ɛ́gɛ́nɛ̄ ācɛ éyi kpɔ́tūce Ɔwɔicō, mɛ́mla ɛ́gɛ́nɛ̄ ɔtū okpóce ɔ́ɔmā géē ga ɔbɔ́ɔbū ā.
Okwɔgba kú ɔ̄kā kú ɔkpá ā
Ɔwɔicō le ɛcɛ mɛ́mla ɔlɛɛcɛ yá 1.1—2.25
Oōgbɔɔ́ kú ínoōbīya mɛ́mla ōwē 3.1-24
O ŋmá Ádām ga Unówa 4.1—5.32
Unówa mɛ́mla éŋkpɔ̄ nōo kpó ɛcɛ ā 6.1—10.32
Inɔɔ̄da nɛ̄hi kú Ubábɛlu 11.1-9
O ŋmá Ussɛ́m gaá kwu Ébram 11.10-32
Ébrahām mɛ́mla Áyísīki mɛ́mla Ujékɔ̄pu 12.1—35.29
Ayááyí kú Ísɔ 36.1-43
Ujósɛ̄fu mɛ́mla ayínɛ́ nū 37.1—45.28
Ācɛ Ísrɛ̄lu bá ajɛ kú Íjīpiti 46.1—50.26

Écouter OHÚTU Omáfú kú ɔ̄kā kú ipú ɔkpá ā