If you have would like a copy of this version please contact info@davarpartners.org

The Gaddi New Testament

This work is licensed under Creative Commons Attribution-ShareAlike 4.0 License.

“दोष मत ला कि तूसु पुर भी दोष ना लगाया गच्छा। क्ओकि जैस तरीकै तुसै दोष लगान्दै हिन, तैस ही तरीकै तूसु पुर भी दोष लगाया गाणा; अतै ध्याना सितै हुणा, जैस नापा सितै तुसै नापदै हिन तैस ही नापा सितै तूसु तांयें भी नापया गाणा, बल्कि तुसिओ मता ही दिणा हा।”
“तू कजो अपणै भाई री हाख्री रै द्रुबड़ा जो हेरदा, कै तिजो अपणी हाख्री मन्ज पेऊरा दुब्रड़ न हुजदा? जे तेरी अपणी हाख्री मन्ज दुब्रड़ पेऊरा, ता तू किआं अपणै भाई सितै बली सकदा कि ‘अई अऊँ तेरी हाख्री रै दुब्रड़ा कड़ी दिन्दा।’ हे कपटी, पैहलै अपणी हाख्री थऊँ दुब्रड़ा ता कड़ी लै, ता तू अपणै भाई री हाख्री रै दुब्रड़ा जो खरा करी हेरी हुणी कै कड़ी सकदा।”
“तियां मणु जो जैड़ै प्रमात्मैं रा बचन हुणना ना चाहन्दै तियां जो मत हुणा, तियां जो बचन हुणाणा ऐस तरीकै हा कि पवित्र चिजा कुत्रा अगो फैंकणा। तियां जो बचन हुणाणा मतलब अपणै मोती सूंरा अगो फैंकणा, ता ऐसा भूणा कि सो तियां पैरा थलै दरड़ी दिणै अतै पलटी करी तुसिओ ही फाड़ी खान।”


“मंगलै, ता तुसिओ मुळना; तोपलै ता तूसु पाणा; खटखटालै ता तूसु तांयें खोलणा। क्ओकि जैडा कोई मंगदा, तैसिओ मुळदा; अतै जैडा कोई तोपदा, सो पान्दा अतै जैडा खटखटान्दा, तैस तांयें खोलया गाणा।”
“तूसु मन्ज ऐसा कुण पिता भोल्ला, जैडा अपणै पुत्रा जो रोटी मंगणै पुर पत्थर देला? जे मच्छी मंगला, ता कीड़ा देला? जे तुहै बुरै भूच्ची करी, अपणी औलादा जो खरी चिजा दिणा जाणदै हिन, ता तून्दा स्वर्गीय पिता अपणै मंगणै बाळै जो खरी चिजा कजो ना देला? ऐस तरीकै जैडा कुछ तुहै चाहन्दै हिन, कि मणु तूसु सोगी करन, तुहै भी तियां मणु सोगी वैसा ही वर्ताव करा; क्ओकि मूसा री व्यवस्था अतै भविष्‍यवक्ता री शिक्षा ऐह ही हा।”


“भिड़ै रस्तै मितै प्रवेश करा, क्ओकि सो रस्ता जैडा विनाश री कनारी लेई करी गान्दा सो चौड़ा हा; अतै मतै तैस रस्तै मितै गान्दै। क्ओकि भिड़ा अतै तंग हा सो रस्ता जैडा सदा काल री जिन्दगी री कनारी पजान्दा, अतै थोड़ै हिन जैड़ै तैतिओ पान्दै हिन।”


“झूठै भविष्‍यवक्ता थऊँ बची करी रेय्आ, जैड़ै तूसु बल्लै भैड़ा रै भेषा मन्ज इन्दै हिन, पर अन्दरा थऊँ फाड़ी करी खाणैबाळै भेड़िये हिन। तंयारै कम्मा थऊँ तूसु तियां जो पछैणी लैणा। कै झिन्ड़ा थऊँ अंगुर या जरैड़ी थऊँ अंजीर त्रोड़दै हिन? ऐस तरीकै हि हरेक खरै रुख खरा फळ दिन्दै अतै बुरै रुख बुरै फळ दिन्दै। खरा रुख बुरा फळ न दी सकदा, अतै न ही बुरा रुख खरा फळ दी सकदा। जैड़ै-जैड़ै रुख खरा फळ ना दिन्दै, सो बड्डी करी अगी मन्ज फूकी गान्दै हिन। तैस तरीकै ही झूठै भविष्‍यवक्ता जो सजा दिणी हा। ता झूठै भविष्‍यवक्ता रै कम्मा थऊँ तूसु तियां जो पछैणी लैणा।”
“जैडा मिन्जो सोगी, ‘हे प्रभु! हे प्रभु!’ बलदा रैहन्दा, तियां मन्ज सबी स्वर्गा जो ना गाणा, पर सो ही जैडा मेरै स्वर्गीय पिता री इच्छा पुर चलदा हा। न्याय बाळै दिन मतै मिन्जो सोगी बलणा; ‘हे प्रभु, हे प्रभु’ कै अहै तेरै नां थऊँ भविष्‍यवाणी ना करी, अतै तेरै नां थऊँ दुष्‍टात्मा जो ना कड्‍डू, अतै तेरै नां थऊँ चमत्कार ना करै? ता मुँ तियां सितै खुलीकरी बलणा कि मैंई तुसिओ कदी भी अपणा ना जाणु, हे पाप करनै बाळैओ, मेरै नेड़ै थऊँ चली गच्छा।”


“ठेरैतांये जैडा कोई मेरी गल्ला हुणी करी मन्दा सो तैस बुद्धिमान मणु सैईऐ हा, जिनी अपणा घर चट्टान पुर बणाऊरा। अतै बरखा लगी हड़ड चली आ, अतै तूफान चलु, अतै लैहरा तैस घरा सितै टकराणा लगी, पर सो ना पैऊँ, क्ओकि तसेरी निय्आ चट्टाना पुर पाऊरी थी। पर जैडा कोई मेरी गल्ला हुणदा अतै तियां पुर ना चलदा सो तैस मूर्ख मणु सैईयें हा जिनी अपणा घर रेता पुर बणाऊ। अतै बरखा लगी, हड्ड चली आ, तूफान चली पैऊ, अतै लैहरा तैस घरा सितै टकराणा लगी अतै सो ढैई करी सत्यनाश भूच्ची गो।”
जैहणै यीशु ऐह गल्ला कणैई बैहु ता, भीड़ तसेरै उपदेश थऊँ हैरान भूई। क्ओकि सो तंयारै शास्त्री साईयें ना पर अधिकारी साईयें तियां जो उपदेश दिन्दा थू।

Écouter मत्ती 7