Versets bibliques populaires de Maafiù 5

Partager

E kìlà wo nyùùŋ gbiŋ fè sìà è laumpò wo niŋ hòà wɔ̀ŋ pòum dìì. Wò jàa niìŋ koɓɛ̀i e laumpòɛ jaà lɛ wèè e kìɛ̀ŋ anyùùŋ nyaŋ gbiŋ e gbolòùŋ ko saaìŋ. E ɗèwè guùŋ lɛɛ̀ sùà, tɔ̀ e gbolòùŋ lɛ mùŋ do nàŋ tɔɔ̀ lɛ e nɔ̀ŋ mɛ̀iŋ niŋ mààŋ e gbòlòùŋ laumpòɛ, e mɛ̀ɛ̀ŋ anyùùŋ nyaŋ fɛɛ̀feìŋ wèè kɛ̀ aŋ yɛmɛ̀ e tòmo sìàaŋ mùŋ naŋ nyɛ̀nɛ̀ŋ lɛ, wèè kɛ̀ aŋ kìɛ̀ŋ wo Dèda mɔɔ̀ŋ e ɓɛ̀ɛ̀jàa ko àìjɛnɛ̀ŋ.

“Muàŋ nàŋ yaà e gbolòùŋ lɛ wèè anyùùŋ nyaŋ gbiŋ e ɗuunyaàŋ. E jawa gbeeɛ̀ àŋ naŋ nyɛ̀lɛ̀ wɔŋ tolòɔ dìmɛ̀ lɛ e fè ɓɛ̀nɛ̀ŋ nɔ̀ŋ kò nyɛɛnɛŋ.

“E zɔlɔ̀ yaà anyùùŋ nyaŋ kuwa maŋ jii zɛ̀nɛŋ nyàŋ. Àŋ do nàŋ yɛ̀mɛ̀ wo Dayà!

“E zɔlɔ̀ yaà anyùùŋ nyaŋ kuwa e mànaŋ gbee wèè aŋ nyɛ̀nɛ̀ŋ e tɔ̀ɔ̀nyaàaŋ wo Dayà manaŋ lɛ̀. Wo Dayà do nyiŋ nàŋ kìɛ̀ŋ ke jii fàa kɛnɛ!

Kɛɛ tɔ̀ miŋ woòiŋ naàŋ kɛ̀, mànaìŋ aŋ jooiŋ nyàŋ e kìlà niŋ zoolò wèè anyùùŋ nyaŋ nimilàìŋ nyaŋ.

“E zɔlɔ̀ yaà anyùùŋ nyaŋ naŋ pɔɔ̀ wo jinàaŋ sùà nyaŋ. Nyiŋ nàŋ kanaŋ e Kànà àìjɛnɛ̀ɛŋ!

“E zɔlɔ̀ yaà anyùùŋ nyaŋ hiàŋ ke jii fàa anyùùŋ e fèemàŋ. Wo Dayà do nyiŋ nàŋ nyààŋ aŋ jɔ̀àuŋ nyàŋ!

“E zɔlɔ̀ yaà anyùùŋ nyaŋ yaà ke nyowo sùà nyaŋ. Wo Dayà do nyiŋ nàŋ kìɛ̀ŋ ke jii fàa!

“E zɔlɔ̀ yaà anyùùŋ nyaŋ anyùùŋ àŋ jaa e keì nyìnga nyàŋ esaɓù kɛ̀ àŋ yaà anyùùŋ tɔ̀ɔ̀nyaàŋ. Nyiŋ nàŋ kanaŋ e Kànà àìjɛnɛ̀ɛŋ!

“E zɔlɔ̀ yaà anyùùŋ nyaŋ kuwa ke nyowo wèè aŋ dàwi nyiŋ nyàŋ. Wo Dayà do nyiŋ nàŋ tɔ̀ɔ̀ ke nyowo nyiŋ pɛɛ!

“E zɔlɔ̀ e nɔ̀iŋ sèè anyùùŋ aiŋ diɛ̀ŋ, aiŋ tuwò naanààŋ, e kìlà aiŋ jàà maŋ keì ɓòù e ɗì esaɓù kɛ̀ nìŋ yaà anyùùŋ màŋjɛ̀wɛ̀im. Sèè tii kaàiŋ, gèeìŋ zɔlɔ̀ yèè niŋ nɔ̀ŋ ke jii fàa sùà, esaɓù kɛ̀ wo Dayà doiŋ nàŋ kìɛ̀ŋ e jìwààjɛ̀wɛ̀ gbee ko àìjɛnɛ̀ŋ. E ɗèwè guùŋ lɛɛ̀ sùà nɔŋ anyùùŋ naŋ wa nìmìlà aŋ wɛ̀ijì nyaŋ yààìŋ wa tɛɛ nyàŋ e teenga gɔu sùà.

“E zɔlɔ̀ yaà anyùùŋ nyaŋ deeyà nyiŋ bi nyàŋ. Nyiŋ nàŋ do nàŋ kɛ̀ɛ̀nɛ̀ŋ e ɗuunyaàŋ wèè e nɔ̀ŋ e nɛ̀ŋ èdàà nyiŋ!

“Nìŋ yaà mààŋ maŋ hɛiŋ wèè anyùùŋ nyaŋ gbiŋ e ɗuunyaàŋ. Kɛɛ sèè e ɓùùyè maŋ hɛiŋ nɛ̀ e miŋ jùà, e ɗewe bà gbiŋ fè ɓɛìŋ wèè aŋ miŋ nyɛ̀nɛ̀ŋ maŋ ɓuuyè. E yèɛ nìŋ naŋ miŋ naàŋ nɔŋ ɓɛ̀nɛ̀ŋ nyìniaŋ lɛ̀ nàŋ yaà wèè naŋ miŋ wùàŋ e kìlà anyùùŋ aŋ miŋ kààìŋ diɛŋ.

Nìŋ kuwa naŋ nɔ̀ŋ anyùùŋ tɔ̀ɔ̀nyaàŋ, màànààŋ nɔŋ wo Dèdaiŋ nɔɔ̀ŋ ko àìjɛnɛ̀ŋ yaà lɛ.

Tɔ̀ e yèɛ nìŋ woà lɛ e nɔ̀ŋ ‘Èèè’ ɔ̀ɔ̀ ‘Kpele.’ Eɓìèmàŋjɛ̀wɛ̀ tɛɛ̀, e yèɛ gbiŋ nìŋ woà naàŋ lɛ è yewe wo Sɛ̀tanàŋ sìwè, wo Nyuùŋ Kɛ̀ɛ̀nɛ̀ŋ ke Kpèè naanààaŋ.

“Nàŋ kòmàŋ àŋ naŋ wa woò kɛ̀, ‘Sèè wo nyùùŋ fɔtɔ e fɛɛ̀ mɔ̀ɛ̀, maŋ fɔ̀tà e jòuŋ fɛ̀ɛ̀ɛ, yèè sèè wo nyùùŋ gòo ke sìnyaŋ mɔɛ̀ŋ, muàŋ pɛɛ mao gè ke jouŋ nɛɛ̀ŋ.’ Kɛ̀ɛ̀ tɔ̀ miŋ woòiŋ naàŋ kɛ̀, ɓɔ̀ nìŋ giiyà ànyùùŋ è kpàŋ wèè è nànàaŋ àŋ naiŋ jàà lɛ. Sèè wo nyùùŋ bà woum hàà fɛ̀ɛ̀ wɔŋ nyààŋ e kùàŋ jìka mɔɔ̀ŋ, kilà ɓɛìŋ wɔŋ nyààŋ e kùàŋ gbɔnɔŋ mɔɔ̀ŋ wuŋ pɛɛ wo haà wɔŋ fɛ̀ɛ̀.

Weètii, sèè e fɛ̀ɛ̀ kùàŋ jìka mɔ̀ɛ̀ eum nyɛ̀nɛ̀ŋ maŋ sɛ̀ɛ̀ e jùumù sùà, gè niŋ noo muŋ gò! È yaà tɛ̀ɛ̀ wèè maŋ kɛ̀ɛ̀nɛ̀ŋ e fɛ̀ɛ̀ guùŋ, e nɛ̀ɛŋ nyɛ̀nɛ̀ŋ maŋ kɛ̀ɛ̀nɛ̀ŋ e fɛ̀ɛ̀ tìyèe kpeiŋ aŋ gbìàŋ ke kpùnaŋ mɔɛ̀ŋ ko jàhamaŋ. Sèè wɔŋ kùàŋ jìka mɔɔ̀ŋ wɔum nyɛ̀nɛ̀ŋ maŋ sɛ̀ɛ̀ e jùumù sùà, kɛɛ̀ wuŋ noo muŋ gò! È yaà tɛ̀ɛ̀ wèè maŋ kɛ̀ɛ̀nɛ̀ŋ wɔŋ kùàŋ guùŋ maŋ kà ko àìjɛnɛ̀ŋ, e nɛ̀ɛŋ nyɛ̀nɛ̀ŋ ke kpùnaŋ mɔɛ̀ŋ gbiŋ ke kà ko jàhamaŋ.”