Versets bibliques populaires de Matío 7

Partager

«Pɛ enáŋa ndɔ́ɔ, Ndém a eyá á mbū pɛ. Pɛ enáŋa efāʼa, Ndém a eghʉ̄, pɛ ejʉ́ɔ. Pɛ enáŋa ŋkwáʼtɛ nchu ŋgyā, Ndém a etsɔ́ʼ á mbū pɛ.

Awíɛ a lɔ́ɔ azō á mbū Ndém, mbɔ a a yá á mbū yí. Awíɛ á faʼa azō, mbɔ Ndém a a ghʉ a ejʉ́ɔ azō mɛ́t. Awíɛ a kwáʼtɛ nchu ŋgyā, mbɔ Ndém a a tsɔ́ʼ ŋgyā, a ekó éwú.

«Ŋiŋ ntsem yīi, a á júʼ ashuŋne zīi meŋ á shúŋ, ŋ́kúʼte á mbɔŋɔ́, a á páʼ ŋgaŋ azhɛ̄‑anu yīi, a ke gē ekwɛ́t ŋgyā zi, ńnɔ̄ŋ atseŋ ánɛ tɔ́ ntʉʉ́.

«Ajūɔ tsem zīi, pɛ é si ŋkɔ̄ŋɔ ŋ́gɛ, epuɔ menɔŋ e eghʉ̄ á mbū pɛ, pɛ méŋwɛ̄t azɛ́, e eghʉ̄ azō mɛ́t á mbū pɔ́p. Á páʼa ŋgɔ́ anu zīi, lepé Mɔɔ́sɛ, mbɔɔ anu zīi metswi‑ŋke Ndém é le tíī, á ziʼneé.

Táʼ, nchu ajʉʼ yīi mɛ́ piŋɛ nzápa éwú tɛ́ ntswɛ́tɛ, é swɛ́ne tɛʼ. Nzhɛ zīi mɛ́ zápa éwú tɛ́ ntswɛ́tɛ, é kʉɔ́k tɛʼ. Epuɔ pīi pɔ́ zi nzápa éwú, é piŋ te zá.

«Pɛ etɔ́k ánɛ nchu ajʉʼ yīi, é swɛ́nne swɛnné, tɛ́ ntswɛ́t. Nchu ajʉʼ yīi é faáŋ tɛʼ, é gʉɔ̄ mé alāʼ mmók. Mía mɛnzhɛ yīi a tsoʼneé éwú, á zeéŋ ŋgʉɔ azí mé éwú. Lelʉɛ epuɔ é piŋ nnɔ̄ŋ nzápa éwú.

Pɛ pīi pɛ é epuɔ tepɔŋ ejʉɔ ntií, pɛ ké nzhɛ́ ajūɔ mbɔŋ, tɛ́ ŋgyá á mbū ewɔŋkhʉ̄ pɛ́, tɛ ŋgʉɔ shɔ́ʼɔ́, ánɛ Mɔʼɔ́ wɛ Ndém yīi, a á lephū ú? A gɔ le néŋ té yá etsō mbɔŋ, á mbū ŋiŋ yīi, a á lɔ́ á yí í.

Yɛɛ́so á zéŋ ndé ŋ́gɛ: «Ndɛ́ʼ ŋiŋ á thú alɔ́ʼ ŋiŋ tɛ mbā á yí, tɛ́ Ndém a eláʼ le azí thú, melaʼ mīi, Ndém a fhoó ánɛ ntií zīi, o ó lɔk nthú alɔ́ʼ ŋiŋ, tɛ́ nthú ajú. Efʉʼ zīi pɛ lɔkɔ efʉ̄ʼɛ azō, tɛ́ ŋgyáa á mbū ŋiŋ, Ndém a a shʉʼ elɔk efʉʼ mɛ́t, tɛ́ efʉʼ azɛ́.

Ŋiŋ ntsem yīi, a á piŋ njúʼ ashuŋne zīi meŋ á shúŋ, a te kúʼte, a á páʼ atsetseŋ zīi, a ke gē ekwɛ́t ŋgyā zi, ńnɔ̄ŋ atseŋ ánɛ asaŋasáŋá.

O gɔ egaá, akem awɛ á fɔ́ne á lezēk wu, o ó le jʉ́ɔ, ḿbiŋ nnɔ̄ŋ njʉ́ɔ lenɔŋ ntsɔʼ tsīi, é kó á lezēk méŋ mɔ́ wu ū? Ŋ́ké te épúp ɔ́, mbɔ akem awɛ á fɔ́nɛ á lezēk wu, o epīiŋ ŋgā ndé á mbū méŋ mɔ́ wu ŋ́gɛ, a ecʉ́ʼ, o efók lenɔŋ ntsɔʼ tsīi, é lezēk yí í?

«Pɛ epá epuɔ pīi pɔ́ é si ŋ́gɛ, pɔ́ é metswi‑ŋke Ndém, ńdɔkɔ ntáŋa mela. Pɔ́ gē eshʉʼ á mbū pɛ, ńzwík ŋgup njʉnjhʉ, ḿbiŋ ŋgɔ́ á ntē éwú, ŋ́gɔ́ áa kwaʼ metsho. Pɛ e shʉʼ efhó ánɛ mefʉʉ́ʼ menu mɔ́p, tɛ́ ezhɛ́ á wɔ́p. Mɛ́ gɛ te ŋkápa shʉ́shhʉ́ ánɛ athʉ́ menzɔ̄ŋ ɔ́, ḿbiŋɛ te ŋkápa levho ánɛ athʉ́ mɛfúʼ ɔ́.

Púp, athʉ́ ntsem zīi mɛ́ gɛ njhʉ́ɛ, á zeém áa ntá zīi mɛ́ gɔ ejhʉ́. Athʉ́ zīi mɛ́ gɛ te njhʉ́ɛ ɛ́, á piŋ nzém áa ntá zīi mɛ́ gɔ le jhʉ́.

Athʉ́ zīi mɛ́ gɛ njhʉ́ɛ, á gɔ le zém ntá zīi, mɛ́ gɔ le jhʉ́ ɛ́. Athʉ́ zīi mɛ́ gɛ te njhʉ́ɛ ɛ́, á pīŋ le zém ntá zīi mɛ́ gɔ jhʉ́ ɛ́.

Athʉ́ ntsem zīi á ka ntá mbɔŋ zém ɛ́, mɛ́ pɔŋteé á lekʉɔ̄ʼ ntɔ̄ á mmók.