Versets bibliques populaires de 1. Mose 1

Partager

Oun o Devel penas: “Kanna krah menshen. Yon venn yaake har mer. Yon hi ray pral i mačende an o baro pani oun pral i čirklende an o bolepen, pral i divye firhende oun pral kolende, kay gar divye hi, ninna pral i tikne firhende, hoy djan pral i phoub.” Oun o Devel kras i menshen yaake har yob hi. Ava, yaake har yob hi, kras lo len: o morshes oun i djouvyat.

Oun o Devel rakras lače laba pral lende vin oun penas: “Anenn boud čaven ap i phoub, te vell i phoub t'mendar pherdo! Oun avenn ray pral i phoub! Avenn ray pral i mačende an o baro pani, pral i čirklende an o bolepen, oun pral hake firhende, hoy ap i phoub hi!”

Glan i rah rah tsiro kras o Devel o bolepen oun i phoub.

Har i phoub kerdo vas, his či koy pre. Kek djipen his koy. His rati oun zorelo pani his pral halauter. Oun o Debleskro dourho his pral o pani.

Oun o Devel penas: “Mou vell dives!” Koy vas dives.

Oun o Devel dikas halauter, hoy yob kras, oun čačepah halauter his mishto. Oun vas rati oun pale taysarlakro. Kova his o shobto dives.

O Devel dikas, kay ko dives mishto hi. Oun o Devel das yek tsiro o diveske oun yek tsiro i ratsyake.

Oun o Devel penas: “Shounenn, t'mer nay rhan halauterestar, hoy vell baro ap i phoub oun an koleste tikno djob hi. Ninna i tsele roukengre, kay tikno djob an lende hi, dau t'men te rhal.

Oun o Devel das o dives ko lab dives oun ap i rati penas yob rati. Yaake vas rati oun pale taysarlakro. Kova his o ersto dives.

Oun o Devel penas, te vell o bolepen, oun pani koy pral oun pani koy tel. Oun yaake vas kova.

I tsele firhen, kay djivenn ap i phoub, ninna i tsele čirklen oun tikne firhen dau me o tselo zenlepen te rhal.” Oun yaake vas kova.

Oun o Devel penas, te venn momlia an o bolepen, hoy sikrenna: Kanna hi dives, oun kanna hi rati. Kolla sikrenna ninna: Kanna vell niyal, kanna vell o vend. Kanna vell i baro dives, kanna i nevo bersh.

Oun o Devel penas: “Mou vell hako zenlepen dran i phoub vin, an koleste hi tikno djob dren, yaake te vell lestar pale nevo zenlepen. Mou venna ninna rouka dran i phoub vin, kolendar hakeno peskre roukengre hidjrella. An kolende hi tikno djob, yaake te vell lendar pale neve rouka baro.” Oun yaake vas kova.

O Devel kras o bolepen. Oun pani his koy pral, oun pani his koy tel ap i phoub.

Oun dran i phoub vas zenlepen vin. Hako zenlepen moukas peskro tikno djob bares te vell, yaake te vell lestar pale nevo zenlepen. Ninna rouka van baro. Hako rouk hidjras peskre roukengre, an kolende tikno djob hi, yaake te venn lendar pale neve rouka baro. Oun o Devel dikas, kay kova mishto hi.

Oun o Devel kras kol douy bare momlia: o kham, te vell lo ray pral o dives, oun o čon, te vell lo ray pral i rat, oun ninna i vavar bolepangre momlia.

Oun o Devel penas, te vell ko pani ap i phoub khetne ap yek rig, te vell o trouk them diklo. Oun yaake vas kova. Oun o Devel penas: “Ko trouk them kharella phoub.” Oun kova, kay o pani khetne hi, kharas lo baro pani. Oun o Devel dikas, kay kova mishto hi.

Oun o Devel rakras lače laba pral lende vin oun penas: “Lenn boud terne, te venn boud t'mendar an o baro pani oun boud čirkle an o bolepen.”

Oun o Devel penas, te dell i phoub hake firhenge o djipen: i divye firhenge oun kolenge, kay gar divye hi, ninna i tsele tikne firhe. Oun yaake vas kova.

Oun o Devel penas, te venn boud firhe an o pani oun boud čirkle an o bolepen.

Oun o Devel kras hake divye firhen oun hake firhen, kay gar divye hi, ninna i tsele tikne firhen ap i phoub. Oun yob dikas, kay kova mishto hi.