Madiu 1
1
Yesu Keliso tubunao
(Luke 3:23-38)
1Lele bewa To'abihetena Yesu tubunao nugenugetadi weyahidi. Yesu tubuna hauhauna Debida, ma tubuna nugenugetana Ebalahamo. 2Weyahina bewa gide: Ebalahamoina natuna Aisake, ma Aisake natuna Yakobo, ma Yakobo natunao Yuda matasinao. 3Yudaina natunao Pelesi ma Dela, sinadiu sanina Temali, Pelesi natuna Esiloni, ma Esiloni natuna Elama, 4ma Elama natuna Aminadaba, ma Aminadaba natuna Nasoni, ma Nasoni natuna Salimoni, 5ma Salimoni mwanena Leyabi ma natudiu Bwasa, ma Bwasa mwanena Ludi, ma Bwasa ma Ludi natudiu Obedi, ma Obedi natuna Yese.
6Yese natuna Debida tauna kini, ma Debidaina Ulaiya mwanena 'ihematabaleya ma 'ihaiya ta natudiu Solomoni. 7Solomoni natuna Lehoboama, ma Lehoboama natuna Ebaya, ma Ebaya natuna Esa, 8ma Esa natuna Yosepata, ma Yosepata natuna Yolama, ma Yolama natuna Usaya, 9Usaya natuna Yotama, ma Yotama natuna Eyasi, ma Eyasi natuna Hesakaya. 10Hesakaya natuna Manasa, ma Manasa natuna Amoni, ma Amoni natuna Yosaya. 11Yosaya natunao Yekonaya matasinao, ma 'idi tutaina meBabiloni sinaoma ma meYudiya si'abiyahidiya ta sitauyediya 'idi tupwa Babiloni 'oina.
12Tutaina Babiloni 'oina simiyamiya. Yekonaya natuna Siyalitiyeli, ma Siyalitiyeli natuna Selubabela. 13Selubabela natuna Ebiyuda, ma Ebiyuda natuna Ilaiyakimi, ma Ilaiyakimi natuna Esoli. 14Esoli natuna Sadoka, ma Sadoka natuna Ekimi, ma Ekimi natuna Eliyuda. 15Eliyuda natuna Eliyesa, Eliyesa natuna Madani, ma Madani natuna Yakobo.
16Yakobo natuna Yosepa, tauna Meli mwanena, ma Meliina natuna Yesu. Yesu tauna sihesaniyeya To'abihetena.
17Yesu tubunaowedi sanidi 'adi baibaiwa potitu. Ceguma Ebalahamo 'oinega tahasili ma Debida 'oina, beno 'adi baibaiwa potini. Ma 'eguma Debida 'oinega tahasila ee tutaina meBabiloni meYudiya sitauyediya Babiloni 'oina, beno 'adi baibaiwa potini. Ma 'idi tuta Babiloni 'oina 'oinega ma Yesu 'ina tuta 'oina 'adi baibaiwa wete potini.
To'abihetena Yesu 'ina li'u
(Luke 2:1-7)
18Bewa gide To'abihetena Yesu 'ina li'u. Yesu sinana Meli silosonaneya Yosepa ba'idana, ta 'abwa geya simiyaluwa ma Meli 'igamwa, ma 'ina gamwaina Yaluyaluwa Tabuna 'oinega. 19Ma Yosepaina 'inuwagala Meli 'ina gamwa weyahina. Tauna loheya bwebwe'ana, ta geya nuwana ma Meli 'igihemwadine, ma 'inuwatuhu 'abehega 'ilogwahata gahuwe.
20Ma Yosepa 'ina nuwatuhu 'abwa 'ipaipaihowa, ta 'ina tuta 'enowa nihiyega Yehoba 'ina anelose 'aigeda 'ihegwaeya, 'igwae, “Yosepa, 'owa Debida tubuna, sahena 'unuwanuwagala Meli 'ina gamwa weyahina, beno Yaluyaluwa Tabuna 'oinega, tuwa 'eguma 'utoe mwaneu. 21Ma 'abwa natuna meloheyana 'ihenatune, ma 'uhesaniye sanina Yesu, weyahina tauna 'ina tomotaiyao 'idi pui 'oidiyega 'abwa 'i'abihetedi.”
22Ginauledi silatulatu weyahina mwalohene palopita 'aigeda 'ina gwae 'ihepwaila nugetediya ta Buki Tabu 'oina 'ilelediya 'igwae,
23“Gumalaulauna geya 'ilogwali ma 'igamwa ma natuna meloheyana 'ihenatune, ma sanina sida hesaniye Imanuweli.” (Ma saniina 'ana bui Yehoba ba'idadai.)
24Ma Yosepa 'eno'enowega 'itoholowa ta aneloseina 'ina gwae 'ihematamataneya, ma Meli 'ihaiya, 25ma geya 'wapina 'i'iabitoho ma 'ana siga 'ihenatuna, ma Yosepa gwamaina 'ihesaniyeya Yesu.
Sélection en cours:
Madiu 1: bddNT
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 1991, Wycliffe Bible Translators, Inc. All rights reserved.