Pupuꞌ 3
3
Aadama Dua'aru'na'
1Ookara kapoo' avutevu' biikoori Kumponinge nkovuru'nanka-koo boru' bakei aa'na' toreearo'. Teie tee teni manikuma aa'puu', “Kumponinge ee masika' ookara anau-koo koi'nanka-koong sinang maa'koo orokoruresing?” 2Ee'noko tenie maku'uma aa'puu' tee boru', “Nee'ke aa' ookara koi'nanka-kooning sinang anau-kooning maa'koo makosi. 3Teka Kumponinge aa'puing, ‘Koi'navari anau-koo meu'ke otoinavari-koong deeko' dee'ke sinang maa'ereauka', aa'noko tamung kompereauka' tevari, doore'neenga.’”
4Nka teie boru'ke aa'puu' teni manikuma, “A, dee' bakei doorearoo'naang. 5Dee'ke tee sinang teu'koong maa'ereta deeko' dee' tee noru' daate'daree'naang kapoo' tampara ee'noko kapoo' orara noru'koo, ee'noko dee' tee Kumponing-pina' nari' otoree'naang. Kumponinge tee' noru'ui dee' tee' orokoruresing.”
6Ee'noko tenang tenie manikumai tee teu'koong sinang oovuko onou ee' oro' tavo'kuu', “Bakei aung sinang maa'koo tampara, oro'oro'noo' tampa' oro'ke, ee'noko maa'anko norukasi' deeng-antamupeu'.” Tee ninka noru' ninka tee-koo sinang-koo nkavura maa'kuu', ee'noko nii'ning napo' tenie tee ba'ung nari' otoretu'nung avuio' maa'uu'. 7Ee'noko tenang tee noru' ookaanka-koong daate'aretu', ee'noko tenang noru'aretu' tenaanka tee simpenoi'ka, ee'noko tenang koi' piiki'koong para'noo' naro'ka pate'ureta duaana nkosiiretu'.
8Teketa tenang kamunoo'nang boimpuio' tenaankai tee Ovoring Kumponing teke mintoonge nanuko taaravuretu', ee'noko koi'nanka-koo meu' baku'aretu'. 9Teka teie Ovoringe Kumponinge Aadama bokuvuma aa'puu', “Da' are' otomang?” 10Ee'noko teie aa'puu', “Ninge da'koong aurong mintoonge naniko taararamira amoromira simpenoi' deemarama oome'neeng-koo baku'maring.”
11Ee'noko Kumponinge aa'puu', “Da' baie simpenoi' otoing nauruing? Ai' tee koi'koong sinang orokorantu'navari-koong maa'ei?” 12Ee'noko teie aa'puu', “Tenie anie manikumai dake ni'ninka nari' o'noree'naang ameu'nanie tee-koo koi'koong-koo sinang-koo amuio' maa'kansing.”
13Teketa teie Ovoringe Kumponinge teni manikuma aa'puu', “Dake tee aming-koo tee' nkoveing?” Ee'noko tenie manikumai aa'puu', “Boru'ke tosimuio' tee' ninge maa'ansing.”
14Teketa Ovoringe Kumponinge tee boru' aa'puu', “Dake tee tee' oro' kapoo' nkoveing-koo dakaang barakosi' tee dau basi ookara kau'karenaumo-nanka bau'naananka-koo ee'noko pora'koonanka-koo. Da' tee ke'dei nanimatoaing otoainaroong-koo tee nankanankara maa'ema. 15Ee'noko ninge tee dee'naanka da' ee'noko ani manikuma karenaanka deeng-antarampeaing ee'noko napo' teing dee'ke deurukaa' tee'ke kare-nupoong otoromaatoaing. Teni baurukaa'koo narunge#3:15 Aung tee Kumponinge Teroita Pako'pari'nii' nantoong domaang moo'urira tarevuriaing. Tee-koo nauvurema Kumponinge Aadamararing tee doorenang tampara nauvuretu'. da' bore'koo puuturuaing ee'noko dake tee kanko'bo-koo kakieai.”
16Napo' teni manikuma aa'puu' Kumponinge, “Ninge tee da' pankaing sisikeera arompaing tenang parema mantompemaatoaing. Sisikeera ninka parematoaing. Nka tee, da'ung-koo pia otoi otoaing, ee'noko bakaang pia siompemaatoai.”
17Ee'noko napo' Aadama-koo aa'puu', “Dake teni da'aang bakaang kara taaravera tee koi'koong sinang orokoantu'nung maa'eing-koo, ninge tee kansi' taamang keentoma barakosi'ansing taamananka tampa' nkoarava' otoainge, ee'noko da' pore'doma deeko' tee-koo kansi'koo taamanimatoaing ookara batei da' otoaining-koo. 18Ee'noko kansi'keta koi'nanka too'murintaa'po'nanka dupuai, napo' baa'nanka orananka dupuai, ee'noko dake maa'koo pora'kooning baa'nanka maa'emaatoai. 19Ee'noko iontakaanang mintoontarama taamanimatoai, bera doora kansi'koo tororaravainoo'ke basi, te' ee'noo' da' nkorantu'noo', ai' da' tee da'mong, napo' da'mong-koo doonko tororaravaing.”
20Ee'noko Aadamai teni ba'aang miring Iivi#3:20 Iiburu-nupoong biikaang kara-koo miring “Iivi” tee “Bioko” miru'ari otong. tampuu', ai' teni teni ookara nantoong amutemurii' bioko.
21Ee'noko Kumponinge Ovoringe kau'karenaumo-nanka-koong dopa'koo mononopa' nkovura Aadama ee'noko teni Iivi avuretu' kurumparee'naang.
22Teketa Kumponinge Ovoringe aa'puu', “Aung tee naning nii'pina' oro'paring aa'noing kapoo' tampara ee'noko orara noru'ui. Emu' tee koi' domang isikung avu'navari-koo due' be'koo taura'pampiauka', tevari-koong sinang maa'ura napo' domampari oto'neenga.” 23Tee'pura Ovoringe Kumponinge tenau-eta Iideni'nau-eta bata'uu' tamung pora'ke mintoomparaa'naang, tee naning kansi'ketaing kansi' nenke'uma. 24Tenang Kumponinge tering bata'ureta, tee-koo tenau-koo Iideni'nau-koo duaa' pomanoo'aapenameng-koo koosinunanka purinto'nanka donkong-antavuru', tee tevung taung koi' domang-anta-aape be'navung para'ai otoromaatoo'naang, bainatu nta'pina' urung kompai eevaavaama.
Sélection en cours:
Pupuꞌ 3: nasNTpo
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 1994, Wycliffe Bible Translators, Inc. All rights reserved.