No̰ Kuwə Ndoo 2
2
1E ri ə ra ne ə!
Lokɨ wongɨ ra Ɓaɓe,
Ɨlə lo kɨ ndul kururu dɔ ɓe-bo Sɨyo̰ tɨ.
Ɓaɓe ɨsɨ dɔra̰ tɨ taa nu,
Ɨgə tɔ-ɓa lə Isɨrayəl ɨlə dɔnangɨ tɨ kɔ.
Lokɨ wongɨ ndu sie,
Mee oy dɔ tɨ kadɨ kəte ɓe-bo Sɨyo̰ e kɨmbər kɨndə jae.
2Ɓaɓe dɨbɨ gɨn ɓe lə Jakobɨ gɨn nangɨ tɨ
Kɨ kanjɨ koo kəm-to-ndoo lie.
Wongɨ tɔle
Adɨ tujɨ kɨ ɓe-bo je kɨ Jude tɨ sukɨ sukɨ;
Sur-de tɨlə-de nangɨ,
Təl ɓeko̰ kɨ Jude tɨ kɨ njé ko̰ɓe je kɨ me tɨ
Nḛ tɨ kɨ dəw oo toe al.
3Me wongɨ tɨ lie kɨ atɨ bangɨ,
Ɓaɓe budɨ sɨngə Isɨrayəl mur mur.
MBatɨ kaw rɔ lie lokɨ nje ba̰ re rɔ dɔe tɨ.
Nɨngə ulə por adɨ o̰ lo je pətɨ kɨ gugɨ dɔ ɓe lə Jakobɨ kɔ. 4Ɓaɓe təl nje ba̰, un kundɨru, adɨ ji ko̰e e dɔ tɨ ɓasi kadɨ ra nḛ. Ɓaɓe ɔjɨ rɔne kadɨ e nje ba̰ ləje, tujɨ dɨje pətɨ kɨ jɨ ra ta ləde ngay. Ɓukɨ wongɨ ləne tə por be dɔ kəy kaw-naa tɨ lie kɨ me ɓe-bo Sɨyo̰ tɨ. 5Ɓaɓe ra rɔne nje ba̰ tɨ, tujɨ Isɨrayəl kɨ kəy je lie kɨ majɨ majɨ kɔ; tujɨ ndogɨ bɔr je kɨ gəi gɨde kɔ. Adɨ ndɨngə rɔ kɨ no̰ yo sɨngə kɨ lo ngur ngur. 6Ɓaɓe budɨ gongɨ kɨ dɔ ndɔr tɨ, aw budɨ-n kəlo kɨ jɨ kaw-naa tɨ kɨ tɔe. Ra adɨ me ɓe-bo Sɨyo̰ oy dɔ ndɔ ra nay je tɨ kɨ ndɔ taa kə̰ə̰. Me wongɨ tɨ lie kɨ katɨ bangɨ, adɨ ngar je kɨ njé kɨjə nḛ məsɨ je təli nḛ ndam kare. 7Ɓaɓe mbatɨ lo kɨ dɨje ɨsɨ ɨləi kadɨ kare tɨ adi-e, taa tu gɨdɨne adɨ kəy kɨ tɔe ɓa dɔ tɨ tɔ. Adɨ njé ba̰ je tɔi ndogɨ bɔr je kɨ dɔ kəy je tɨ ləde kɨ majɨ majɨ, bɨləde ɓa ngur ngur gɨn kəy kaw-naa tɨ təkɨ ndɔ ra nay tɨ be. 8Ɓaɓe un ndune, budɨ ndogɨ bɔr je kɨ gə gɨdɨ ɓe-bo Sɨyo̰ mur mur nangɨ; ndɔr-e kɨ kanjɨ kun jine ta nangɨ tɨ adɨ toe tɨlə lɔ. Budɨ ndɔgɨ bɔr je kɨ gɨdɨ-naa tɨ joo adɨ ɔsi dɔde naa tɨ tə njé no̰ yo be, ɨndəi nangɨ rapɨ. 9Ta kəy je kɨ utɨ ta ndogɨ bɔr, nangɨ tɨbɨ dɔde tɨ pɨnɨm, nɨngə bəngɨrə je kɨ ta tɨ, Ɓaɓe tətɨ-de nɔsɨ nɔsɨ. NGar kɨ Jorɨjaləm kɨ njé ko̰ɓe je kɨ gɨne tɨ təli ɓəə dɔnangɨ tɨ kɨ rangɨ, dəw kɨ kadɨ tɨdə ndu kun lə Luwə goto; njé kəl ta je kɨ ta Luwə tɨ ka Ɓaɓe tḛḛ kɨ dɔ nḛ madɨ adɨ-de al. 10NGatɔgɨ je kɨ ɓe-bo Sɨyo̰ tɨ ɨsi nangɨ babur tɨ kɨ tade kɨ mbə. Ɔyi bu kɨ dɔde tɨ, ɨləi kɨbɨ kuwə sɨrə rɔde tɨ. NGa mandɨ je kɨ Sɨyo̰ ɨləi dɔde nangɨ.
11Man no̰ tɔ kəm;
Mem ur made;
Sɨngəm ur wɔkɨ
Mbata ko̰ kɨ osɨ dɔ dɨje tɨ ləm, ngo mandɨ Sɨyo̰.
NGan je kɨ du kɨ ngan kasɨ je,
Awi kɨmə yode ta mbalo je tɨ.
12Dəji ko̰de je əi nə:
«Nḛ kuso kɨ man ka̰y to ra be ə?»
Lokɨ ɨsɨ awi kɨmə yode ta mbalo je tɨ
Tə dɨje kɨ ɨngəi tujɨ kam be.
Kə̰ə̰de tḛḛ ji ko̰de je tɨ.
13Ɓe-bo Jorɨjaləm,
Ta ri ə m-a m-əli ə?
Na ə m-a m-un-e tə m-ɔjii ə?
Na ə ko̰ lie asɨ-naa kɨ ya̰i kadɨ tə m-sɔl-n mei ə?
NGon mandɨ Sɨyo̰!
Ko̰ ləi ətɨ ɓəl ngay.
Dəw kɨ kadɨ a təl ɨndə gɨni rangɨ goto.
14NJé kəl kə nə n-əi njé kəl ta kɨ ta Luwə tɨ kadi,
Əli-ni nḛ je kɨ ngom, ta je kɨ ndae goto.
Tḛḛi gɨn majal je ləi kɨ taga al;
Adɨ lo kadɨ ɨtəl dɔ rəbɨ tɨ goto.
Ta je kɨ əli-ni
E ta kɨ ngom kɨ ta kɨ ndae goto.
15NJé də taa dɔ rəbɨ tɨ
Ɨndəi jide rakɨ rakɨ dɔ tujɨ tɨ kɨ ɨngəi;
Kɔli ngoyo dɔi tɨ
Ə tɨgəi dɔde roke roke ɨbəi-ni kogii ḭ Jorɨjaləm
Əi nə: «Se e ɓe-bo ka kɨ ɓari-e
“Majɨ kɨ ɔr man dɔ tɨ” kɨ “Rɔnəl kɨ taa dɔnangɨ” ka am a?
16NJé ba̰ je ləi pətɨ ɓuki tade kɨ dɔi tɨ;»
Kɔli ngoyo, əli-ni ta kɨ ngɔy ngangɨde tɨ əli əi nə: «Dəw ka jɨ tɨbe mbɨyə̰! NDɔ kɨ j-ɨsɨ jɨ sangɨ ka e ɓone kɨn, e ə jɨ re jɨ tḛḛ tɨ kɨn, j-o kɨ kəmje ɓone.» 17Ɓaɓe ra nḛ kɨ ɔjɨ kəte kadɨ n-ra, tɔl kon nḛ kɨ un ndune dɔ tɨ dɔkagɨlo tɨ kɨ kəte ma̰y nu; tujɨ nḛ je sukɨ sukɨ kɨ kanjɨ koo kəm-to-ndoo. Ra adɨ nje ba̰ ra rɔnəl dɔi tɨ, njé ba̰ je ɨngəi tɔgɨ dɔi tɨ. 18Kɨ me kɨ kare, Jorɨjaləm un ndune kɨ taa no̰ dɔ Ɓaɓe tɨ. NDogɨ bɔr kɨ Sɨyo̰, ɨno̰ ko̰ndɔ je kɨ kada je adɨ man kəmi pal tə man mbo be. Ono̰i kɨyə ta no̰, adɨ man no̰ ii kəmi tɨ al. 19Ḭ taa, ɨndə wuy ko̰ndɔ kɨ go-naa go-naa; ɨtḛḛ nga̰ mei adɨ Ɓaɓe! Ɔy ji taa ta kəme tɨ, ɨno̰ dɔe tɨ mbata lə ngani je kɨ ɓo ɨsɨ taa tɔgɨde tagajɨ rəbɨ je tɨ kɨn. 20Ɓaɓe, ɨgo̰ dəw kɨ ɨsɨ rae kɨn majɨ o, kadɨ tə dəne je usoi ngan tide je a? NGan je kɨ ko̰de je rai tade bore be kɨn! Kadɨ tə njé kɨjə nḛ məsɨ je kɨ njé kəl ta kɨ tai tɨ je, dɨje tɔli-de gɨn kəy tɨ ləi a?
21Basa je kɨ ngatɔgɨ je
Toi nangɨ ba bur tɨ kɨ tagajɨ rəbɨ je,
Rɔ tɔl nganm je kɨ basa je kɨ kɨ mandɨ je.
Lokɨ wongɨ rai,
Ɨtɨjə mɨndɨde kɨ kanjɨ koo kəm-to-ndoo;
22Ɨkaw njé ba̰ je kɨ gəi gɨdɨm kɨ dɔm tɨ dɔm tɨ,
Təkɨ dɨje ɨsɨ kawii-naa ndɔ ra nay tɨ be.
Lokɨ wongɨ ndu səi,
NJe tḛḛ ta nɨngə tɨ goto,
Dəw kɨ kadɨ nai to lo tɨ goto.
Sélection en cours:
No̰ Kuwə Ndoo 2: bjvDBL
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi