創世記 11
11
巴別塔
1一開始，天下人个口音共樣，講共樣个話。 2佢等在東片徙來徙去，在巴比倫尋到平原，就住在該位。 3佢等共下參詳講：「來噢！𫣆等來做磚仔，將磚仔燒硬。」佢等就拿磚仔準石頭，又用馬膠準黏灰。 4佢等講：「𫣆來起一座城，底背愛有高到堵天个塔，來傳揚𫣆等个名，免得𫣆等分散到世界各地。」
5上主下來，愛看世間人所起个城㧯塔。 6上主講：「看哪！佢等係共一個民族，講共樣个話；這下佢等開始做這事，以後佢等想做个事就無麼介做毋到个。 7來啊！𫣆等下來去，在該位變亂佢等个口音，俾佢等無法度互相溝通。」 8恁樣，上主將佢等對該位分散到全世界；佢等就停工無起該城了。 9因為上主在該位打亂人類个口音，將佢等分散到世界各地，所以這座城喊做巴別#11:9 「巴別」抑係譯做「巴比倫」，有「變亂」个意思。。
閃个後代
(歷代志上 1:24-27)
10以下係閃个後代。大水後第二年，閃一百歲个時𫱔亞法撒。 11閃𫱔亞法撒以後，還在世五百年，又生養子女。
12 亞法撒三十五歲个時𫱔沙拉。 13亞法撒𫱔沙拉以後，還在世四百零三年，又生養子女。
14 沙拉三十歲个時𫱔希伯。 15沙拉𫱔希伯以後，還在世四百零三年，又生養子女。
16 希伯三十四歲个時𫱔法勒。 17希伯𫱔法勒以後，還在世四百三十年，又生養子女。
18 法勒三十歲个時𫱔拉吳。 19法勒𫱔拉吳以後，還在世兩百零九年，又生養子女。
20 拉吳三十二歲个時𫱔西鹿。 21拉吳𫱔西鹿以後，還在世兩百零七年，又生養子女。
22 西鹿三十歲个時𫱔拿鶴。 23西鹿𫱔拿鶴以後，還在世兩百年，又生養子女。
24 拿鶴二十九歲个時𫱔他拉。 25拿鶴𫱔他拉以後，還在世一百十九年，又生養子女。
26 他拉七十歲个時，已經做亞伯蘭、拿鶴、哈蘭个阿爸。
他拉个後代
27以下係他拉个後代。他拉𫱔亞伯蘭、拿鶴、哈蘭。哈蘭𫱔羅得。 28哈蘭死在故鄉巴比倫个吾珥个時，厥爸他拉還在。 29亞伯蘭㧯拿鶴攏討𡜵娘；亞伯蘭个𡜵娘名喊莎萊；拿鶴个𡜵娘名喊密迦，係哈蘭个妹仔；哈蘭係密迦㧯亦迦个阿爸。 30莎萊毋會𫱔，無細人仔。
31 他拉帶等孻仔亞伯蘭，㧯厥孫仔羅得、就係哈蘭个孻仔，並厥心舅莎萊、就係亞伯蘭个𡜵娘，離開巴比倫个吾珥，愛去迦南地。佢等到哈蘭就住在該位。 32他拉兩百零五歲个時，在哈蘭過身。
Sélection en cours:
創世記 11: THV12Hdb
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© The Bible Society in Taiwan, 2012
All rights reserved
© 台灣聖經公會版權所有 2012