Jenesis 10
10
Ol laen blong trifala pikinini blong Noa
(1 Kronikel 1.5-23)
1Nao taem bigfala wota ya i finis, trifala pikinini ya blong Noa, we nem blong trifala, Sem, mo Ham, mo Jafet, trifala i bonem ol pikinini blong trifala. Nem blong olgeta i olsem.
2Ol pikinini boe blong Jafet, i gat Goma, mo Magog, mo Madae, mo Javan, mo Tubal, mo Mesek, mo Tiras. Mo ol laen* we oli stap karem ol nem ya oli kamaot biaen long olgeta ya.
3Mo ol pikinini boe blong Goma, i gat Askenas, mo Rifat, mo Togama. Mo ol laen we oli stap karem ol nem ya oli kamaot biaen long olgeta ya.
4Mo ol pikinini boe blong Javan, i gat Elisaha, mo Spen, mo Saepras, mo Roj. 5Ol man we naoia oli stap klosap long solwota long Gris, mo long ol narafala kantri saed i go, mo olgeta we oli stap long ol aelan klosap long ol kantri ya, olgeta oli laen blong Javan.
Hemia nao ol laen we oli kamaot biaen long Jafet ya bifo. Olgeta oli stap olbaot long ol kantri blong olgeta, folem ol laen blong olgeta, mo oli gat ol lanwis blong olgeta.
6Mo ol pikinini boe blong Ham, i gat Kus, mo Ijip, mo Libia, mo Kenan.* Mo ol man blong ol ples we oli stap karem ol nem ya oli laen blong olgeta ya.
7Ol pikinini boe blong Kus, i gat Seba, mo Havila, mo Sabtaha, mo Ramaha, mo Sabteka.
Mo ol pikinini boe blong Ramaha, i gat Seba mo Dedan. Mo ol man blong ol ples we oli stap karem ol nem ya oli laen blong olgeta ya.
8Mo Kus ya i gat wan pikinini boe blong hem we nem blong hem Nimrod, we hem i fas man long wol blong kam nambawan man blong faet, we i stap winim ol narafala kantri. 9Oltaem Hae God i stap givhan long hem, nao hem i kam wan nambawan man tu blong go lukaot anamol blong kakae, taswe kam kasem tede, ol man oli stap talem se, “Prea blong mi we Hae God bambae i mekem yu yu kam wan nambawan man blong lukaot anamol blong kakae, olsem Nimrod ya bifo.” 10Fastaem, ples we hem i stap rul long hem i kavremap tri taon ya, Babilon, mo Erek, mo Akad, we trifala i stap long kantri ya Babilonia#10.10: Babilonia ya, olfala nem blong hem bifo, Sina. 11Be biaen, hem i go long kantri ya Asiria, nao i wokem ol taon ya, Nineve, mo Rehobot, mo Kalaha, 12mo Resen. Taon ya Kalaha, hem i wan bigfala taon, mo taon ya Resen, hem i stap long medel blong taon ya mo Nineve.
13Mo olgeta we oli kamaot biaen long Ijip, i gat ol laen blong Lidia, mo ol laen blong Anam, mo ol laen blong Lehab, mo ol laen blong Naftu, 14mo ol laen blong Patrus, mo ol laen blong Kasluhu, mo ol laen blong Krit. Mo Krit ya, ol man Filistia oli kamaot biaen long hem. Mo ol man blong ol ples we oli stap karem ol nem ya oli laen blong olgeta ya.
15Mo ol pikinini boe blong Kenan, i gat Saedon we i fasbon blong hem, mo Het. Mo ol laen we oli karem nem blong tufala ya oli kamaot biaen long tufala.
16Mo ol narafala laen we Kenan i stamba blong olgeta, i gat ol laen blong Jebus, mo ol laen blong Amoro,* mo ol laen blong Gigas, 17mo ol laen blong Hivi,* mo ol laen blong Aki, mo ol laen blong Sini, 18mo ol laen blong Avad, mo ol laen blong Jemari, mo ol laen blong Hamat. Nao ol laen blong Kenan oli stap kam plante moa, mo oli stap go olbaot. 19Mo graon blong olgeta i stap kam bigwan lelebet, i go kasem taon ya Saedon long not, mo i go kasem taon ya Gerara, klosap long taon ya Gasa long saot, mo i go kasem ol taon ya Sodom, mo Gomora, mo Admaha, mo Jeboeim, klosap long Lasa, we oli stap long saed i go long is.
20Hemia nao ol laen we oli kamaot biaen long Ham ya bifo. Olgeta oli stap olbaot long ol kantri blong olgeta, folem ol laen blong olgeta, mo oli gat ol lanwis blong olgeta.
21Mo Sem, hem i fasbon pikinini boe blong Noa, mo ol laen blong Eba#10.21: Ebraham we i olfala stamba blong ol laen blong Isrel, hem i wan laen blong Eba. Biaen oli singaot ol laen blong Eba ya se ol Hibru. Yu luk tok ya HIBRU long Diksonari. oli kamaot biaen long hem. 22Ol pikinini boe blong Sem, i gat Elam, mo Asuru, mo Apaksad, mo Lud, mo Aram. Mo ol laen we oli stap karem ol nem ya oli kamaot biaen long olgeta ya.
23Mo ol pikinini boe blong Aram, i gat Uj, mo Hul, mo Geta, mo Mesek. 24Apaksad ya, hem i bonem Sela, mo Sela i bonem Eba. 25Mo Eba i bonem tu pikinini boe blong hem, mo i putum nem blong fasbon se Peleg#10.25: Peleg. Long lanwis ya Hibru, nem ya klosap i olsem wan narafala tok we i min se “Seraot”., from we long taem we hem i bon, olgeta man long wol oli seraot. Mo hem i putum nem blong sekenbon se Joktan.
26Mo ol pikinini boe blong Joktan, i gat Almodad, mo Selef, mo Hajamavet, mo Sera, 27mo Hadoram, mo Usal, mo Diklaha, 28mo Obal, mo Abimael, mo Seba, 29mo Ofiri, mo Havila, mo Jobab. Olgeta ya oli stamba blong ol laen we oli kamaot biaen long Joktan, 30mo ples blong olgeta i stap long saed i go long is, long medel blong ol hil, i stat long Mesaha, i go kasem Sefa.
31Hemia nao ol laen blong Sem. Ol man ya oli stap olbaot long ol kantri blong olgeta, folem ol laen blong olgeta, mo oli gat ol lanwis blong olgeta.
32Hemia nao ol laen blong Noa. Lis ya i soemaot ol laen we oli kamaot biaen long hem, wetem ol kantri blong olgeta we oli stap long hem. Biaen long taem blong bigfala wota ya, ol man blong olgeta ples long wol oli kamaot biaen long trifala pikinini ya blong Noa.
Sélection en cours:
Jenesis 10: BBR
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Bislama Revised Bible © Bible Society of the South Pacific, 2012.