Maafiù 5
5
E kàà Jisɛ̀ɛ wɔŋ tolòɔ dìmɛ̀
1Nààŋ wò Jisɛ̀ naŋ wa yɛ̀mɛ̀ e faaàŋ, wò naŋ kɔ̀ wo jòwà wɔŋ toò bà dìmɛ̀ yèè wò naŋ jɛi. Anyùùŋ màŋjɛ̀wɛ̀uŋ nyàŋ nauŋ kìlìè kɔɔ, 2yèè wò naŋ nyiŋ tɔ̀ɔ̀tù kàa wààŋ,
E zɔ̀lɔ̀ tɔ̀ɔ̀nyaàŋ
(Luù 6.20-23)
3“E zɔlɔ̀ yaà anyùùŋ nyaŋ naŋ pɔɔ̀ wo jinàaŋ sùà nyaŋ. Nyiŋ nàŋ kanaŋ e Kànà àìjɛnɛ̀ɛŋ!
4“E zɔlɔ̀ yaà anyùùŋ nyaŋ yaà ke nyowo sùà nyaŋ. Wo Dayà do nyiŋ nàŋ kìɛ̀ŋ ke jii fàa!
5“E zɔlɔ̀ yaà anyùùŋ nyaŋ deeyà nyiŋ bi nyàŋ. Nyiŋ nàŋ do nàŋ kɛ̀ɛ̀nɛ̀ŋ e ɗuunyaàŋ wèè e nɔ̀ŋ e nɛ̀ŋ èdàà nyiŋ!
6“E zɔlɔ̀ yaà anyùùŋ nyaŋ kuwa e mànaŋ gbee wèè aŋ nyɛ̀nɛ̀ŋ e tɔ̀ɔ̀nyaàaŋ wo Dayà manaŋ lɛ̀. Wo Dayà do nyiŋ nàŋ kìɛ̀ŋ ke jii fàa kɛnɛ!
7“E zɔlɔ̀ yaà anyùùŋ nyaŋ kuwa ke nyowo wèè aŋ dàwi nyiŋ nyàŋ. Wo Dayà do nyiŋ nàŋ tɔ̀ɔ̀ ke nyowo nyiŋ pɛɛ!
8“E zɔlɔ̀ yaà anyùùŋ nyaŋ kuwa maŋ jii zɛ̀nɛŋ nyàŋ. Àŋ do nàŋ yɛ̀mɛ̀ wo Dayà!
9“E zɔlɔ̀ yaà anyùùŋ nyaŋ hiàŋ ke jii fàa anyùùŋ e fèemàŋ. Wo Dayà do nyiŋ nàŋ nyààŋ aŋ jɔ̀àuŋ nyàŋ!
10“E zɔlɔ̀ yaà anyùùŋ nyaŋ anyùùŋ àŋ jaa e keì nyìnga nyàŋ esaɓù kɛ̀ àŋ yaà anyùùŋ tɔ̀ɔ̀nyaàŋ. Nyiŋ nàŋ kanaŋ e Kànà àìjɛnɛ̀ɛŋ!
11“E zɔlɔ̀ e nɔ̀iŋ sèè anyùùŋ aiŋ diɛ̀ŋ, aiŋ tuwò naanààŋ, e kìlà aiŋ jàà maŋ keì ɓòù e ɗì esaɓù kɛ̀ nìŋ yaà anyùùŋ màŋjɛ̀wɛ̀im. 12Sèè tii kaàiŋ, gèeìŋ zɔlɔ̀ yèè niŋ nɔ̀ŋ ke jii fàa sùà, esaɓù kɛ̀ wo Dayà doiŋ nàŋ kìɛ̀ŋ e jìwààjɛ̀wɛ̀ gbee ko àìjɛnɛ̀ŋ. E ɗèwè guùŋ lɛɛ̀ sùà nɔŋ anyùùŋ naŋ wa nìmìlà aŋ wɛ̀ijì nyaŋ yààìŋ wa tɛɛ nyàŋ e teenga gɔu sùà.
Maŋ hɛiŋ yaà e gbolòùŋ
(Mài 9.50; Luù 14.34, 35)
13“Nìŋ yaà mààŋ maŋ hɛiŋ wèè anyùùŋ nyaŋ gbiŋ e ɗuunyaàŋ. Kɛɛ sèè e ɓùùyè maŋ hɛiŋ nɛ̀ e miŋ jùà, e ɗewe bà gbiŋ fè ɓɛìŋ wèè aŋ miŋ nyɛ̀nɛ̀ŋ maŋ ɓuuyè. E yèɛ nìŋ naŋ miŋ naàŋ nɔŋ ɓɛ̀nɛ̀ŋ nyìniaŋ lɛ̀ nàŋ yaà wèè naŋ miŋ wùàŋ e kìlà anyùùŋ aŋ miŋ kààìŋ diɛŋ.
14“Muàŋ nàŋ yaà e gbolòùŋ lɛ wèè anyùùŋ nyaŋ gbiŋ e ɗuunyaàŋ. E jawa gbeeɛ̀ àŋ naŋ nyɛ̀lɛ̀ wɔŋ tolòɔ dìmɛ̀ lɛ e fè ɓɛ̀nɛ̀ŋ nɔ̀ŋ kò nyɛɛnɛŋ. 15E kìlà wo nyùùŋ gbiŋ fè sìà è laumpò wo niŋ hòà wɔ̀ŋ pòum dìì. Wò jàa niìŋ koɓɛ̀i e laumpòɛ jaà lɛ wèè e kìɛ̀ŋ anyùùŋ nyaŋ gbiŋ e gbolòùŋ ko saaìŋ. 16E ɗèwè guùŋ lɛɛ̀ sùà, tɔ̀ e gbolòùŋ lɛ mùŋ do nàŋ tɔɔ̀ lɛ e nɔ̀ŋ mɛ̀iŋ niŋ mààŋ e gbòlòùŋ laumpòɛ, e mɛ̀ɛ̀ŋ anyùùŋ nyaŋ fɛɛ̀feìŋ wèè kɛ̀ aŋ yɛmɛ̀ e tòmo sìàaŋ mùŋ naŋ nyɛ̀nɛ̀ŋ lɛ, wèè kɛ̀ aŋ kìɛ̀ŋ wo Dèda mɔɔ̀ŋ e ɓɛ̀ɛ̀jàa ko àìjɛnɛ̀ŋ.
Wo Jisɛ̀ naŋ kàà maŋ Sàwà Dayà maŋ anyùùŋ
17“Ɓɔ̀ nìŋ gongò kɛ̀ mìŋ naŋ hnè wèè ka jàà maŋ Sàwà Dayà maŋ yèè maŋ mìè gbìàŋ aŋ wɛ̀ijì nyaŋ ɓula. Miŋ gò hnàŋ wèè ka miŋ noo gè, kɛɛ mìŋ naŋ hnè wèè ka tɔ̀ɔ̀ e fàsai kɛnɛ miŋ nɛ̀ e hɛɛnɛ̀ŋ. 18Tɔɔɓaa kɛ̀ɛ̀nɛìŋ jii jàa kɛ̀, ko àìjɛnɛ̀ŋ yaà e ɗuunyaàŋ e wa nàwèè wɛ̀i ɓɛ̀nɛ̀ŋ hàì ko dìa. Kɛɛ e pɛɛ nɔ̀ŋ ke tomi jɔa yèè wɔŋ kɔmɔŋ miaŋ maŋ Sàwà maŋ sùà, ke naàŋ nɔ̀ŋ dao ge nyiŋ. E nɛ̀ɛŋ gbiŋ è yaà sìnga niŋ maŋ Sàwà maŋ sùà lɛ kuwa e hɛɛnɛ̀ŋ. 19Weètii, wo nyùnɔ̀ɔŋ gbiŋ naŋ gè maŋhɛɛ wèè wo nyɛ̀nɛ̀ŋ e yèɛ ke sàwàa naŋ pɛɛ tèènè wɔŋ kɔmɔŋ miaŋ naŋ woò lɛ, yèè wo nyɛ̀nɛ̀ŋ anyuùŋ joo bà aŋ nyɛ̀nɛ̀ŋ e kèì guùŋ bi, wò do naŋ nɔ̀ŋ mààŋ wɔŋ kɔmɔŋ miaŋ e Kànà àìjɛnɛ̀ɛŋ sùà. Kɛɛ wo nyùnɔ̀ɔŋ do nàŋ nyɛ̀nɛ̀ŋ e yèɛ maŋ sàwà maŋ naŋ woò lɛ e kìlà wò niŋ kàà anyùùŋ wèè aŋ nyɛ̀nɛ̀ŋ e kèì guùŋ bi, wò do wa nàwèè nàŋ kɛ̀ɛ̀nɛ̀ŋ ko jɛ̀i kɛnɛ e Kànà àìjɛnɛ̀ɛŋ sùà. 20Sɔɔ̀ naŋ jɔ̀ɔ̀lɔ̀ màŋ Sàwà Dayà maŋ dìì tɛ̀ɛ̀ e nìàŋ anyùùŋ nyaŋ àŋ nyaaŋ aŋ Fɛlosiì nyaŋ yèè e ɗeweɛ̀ aŋ kààmɔ̀ɔ̀ŋ maŋ Sàwà Dayà nyaŋ jɔɔlɔ̀ mìŋ dìì lɛ. Tɔ̀ miŋ woòiŋ, sèè nìŋ go miŋ jɔ̀ɔ̀lɔ̀ dìì è tɔ̀ɔ̀nyaàŋ sùà, niŋ naàŋ wa nàwèè kɔ̀ è Kànà kò àìjɛnɛ̀ɛŋ sùà.
Wo Jisɛ̀ naŋ kaà e nyaàiŋ dè anyùùŋ nyaŋ manaŋ kèè tùu nyàŋ
21“Nàŋ wa kòmàŋ kɛ̀ wo Dayà naŋ wa wòò aŋ nèwàènèwe wi nyàŋ wààŋ, ‘Ɓɔ̀ nìŋ jìwà nyùùŋ. Kɛɛ wo nyùnɔ̀ɔŋ gbiŋ jiwe wo nyùùŋ wɔ, àŋ douŋ nàŋ hìɛ̀ŋ ko fɛ̀ɛ̀fèìŋ anyuùŋ gbàì kè sàwà nyaŋ wèè auŋ gbaì.’ 22Kɛɛ tɔ̀ miŋ woòiŋ naàŋ kɛ̀, sèè maŋ tùù wo dàwi mɔɔ̀ŋ sìwè wèè foo, àŋ doum nàŋ hìɛ̀ŋ ke sàwà fɛɛ̀feìŋ. E kìlà sèè maŋ wòò wo nyùùŋ gbiŋ mààŋ, ‘Wò siaŋ nɔŋ wèè foo!’ Àŋ doum nàŋ kɔ̀ɔ̀ ko sààŋ sàwà. Yèè sèè maŋ wòò wo nyùùŋ gbiŋ mààŋ wò yaà wo nyuùŋ kpàna, mùŋ do wa nàwèè nàŋ nɔ̀ŋ e keì nyìnga dìì e hmɔ̀ɔ̀ŋ jàhamaàŋ sùà. 23Weètii sèè mùŋ banaŋ bànàŋ wèè maŋ hàà e nɛ̀ŋ gììyà saàà mɔ̀ɛ̀ wɔŋ gbɛ̀gbɛ̀ zòòloɔ̀ diɛŋ, yèè ke jiium koo dè kɛ̀ wo wùìya mɔɔ̀ŋ kòò wò kuwa ke jii kpàaŋ e weèum, 24joà e nɛ̀ŋ saaà mɔ̀ɛ̀ wɔŋ gbɛ̀gbɛ̀ zòòloɔ̀ feìŋ. Kɔ̀à koɓɛ̀ wo wùìya mɔɔ̀ŋ niŋ banè e keì bi ke jii fàa sùà, kpeiŋ muŋ kɛɛ̀ ngàà maŋjɛ̀wɛ muŋ gè e saaà mɔ̀ɛ̀ koɓɛ̀ Dayài.
25“Sèè wo nyùùŋ wò mɔnɔŋ wèè woum gbìàŋ ke sàwà wèè e nànàaŋ mùŋ nauŋ jàà lɛ, banè e keì bi sùà fiò nyɛ̀iŋ nyùùŋ bi e teengaà nìŋ nɔ̀ɔ̀ŋ kààìŋ koɓɛ̀ guùŋ nìŋ yaà kɔ̀ɔ̀yɛ̀ ko sààŋ sàwài lɛ̀. Sèè mùŋ go niŋ nyɛ̀nɛ̀ŋ, wo nyùnɔ̀ɔŋ doum nàŋ fè koɓɛ̀ wo nyuùŋ gbàì sàwàa, kɛ̀ wo nyuùŋ gbàì sàwàa wòum kìlà koɓɛ̀ wo pòìsiàa. Kpeiŋ wo pòìsiàa doum nàŋ gbìɛ̀ŋ ko sààŋ nyìwì. 26Miŋ woòum e tɔɔɓaaà, mùŋ do nàŋ nɔ̀ŋ ko sààŋ nyìwìi e jèèsùà maŋ pààwà e kpàŋ ke kàpàà guùŋ dìàmaàŋ mùŋ kuwa kpàŋ lɛ.
Wo Jisɛ̀ wààŋ muàŋ yèè wo jàwè nyuùŋ joo ɓɔ̀ nìŋ nyɛ̀nɛ̀ŋ hmɔŋtu hawe kòɓɛ̀ guùŋ
27“Nàŋ wa kòmàŋ ke Sàwà Dayàa naŋ woò wààŋ kɛ̀, ‘Ɓɔ̀ mùŋ nyɛ̀nɛ̀ŋ hmɔŋtu.’ 28Kɛɛ tɔ̀ miŋ woòiŋ naàŋ e tɔ̀ɔ̀nyaàaŋ kɛ̀, sèè wo nyùùŋ gbiŋ wo yɛ̀mɛ̀ wo jɔùŋ maŋjɛ̀wɛ, yèè wouŋ mànàŋ ke jiiuŋ nɛɛ̀ŋ sùà wèè wo nɔ̀ŋ wo jawèuŋ, kɛ̀ wo nyùùŋ wii wò nyìnìàŋ wo jɔùŋ wii hmɔŋtu ke jiiuŋ nɛɛ̀ŋ sùà. 29Weètii, sèè e fɛ̀ɛ̀ kùàŋ jìka mɔ̀ɛ̀ eum nyɛ̀nɛ̀ŋ maŋ sɛ̀ɛ̀ e jùumù sùà, gè niŋ noo muŋ gò! È yaà tɛ̀ɛ̀ wèè maŋ kɛ̀ɛ̀nɛ̀ŋ e fɛ̀ɛ̀ guùŋ, e nɛ̀ɛŋ nyɛ̀nɛ̀ŋ maŋ kɛ̀ɛ̀nɛ̀ŋ e fɛ̀ɛ̀ tìyèe kpeiŋ aŋ gbìàŋ ke kpùnaŋ mɔɛ̀ŋ ko jàhamaŋ. 30Sèè wɔŋ kùàŋ jìka mɔɔ̀ŋ wɔum nyɛ̀nɛ̀ŋ maŋ sɛ̀ɛ̀ e jùumù sùà, kɛɛ̀ wuŋ noo muŋ gò! È yaà tɛ̀ɛ̀ wèè maŋ kɛ̀ɛ̀nɛ̀ŋ wɔŋ kùàŋ guùŋ maŋ kà ko àìjɛnɛ̀ŋ, e nɛ̀ɛŋ nyɛ̀nɛ̀ŋ ke kpùnaŋ mɔɛ̀ŋ gbiŋ ke kà ko jàhamaŋ.”
E kàa e nyaàiŋ dè e ɓààne
(Maafiù 19.9; Mài 10.11, 12; Luù 16.18)
31Wo Jisɛ̀ naŋ ɓɛìŋ woò wààŋ, “È yaà ɓɛìŋ sìnga niŋ kɛ̀, ‘Wo nyùnɔ̀ɔŋ gbiŋ mɔnɔŋ wèè wo gè wo jawèuŋ nɔɔ̀ŋ ɓie wɔ̀, sɔɔ̀ wouŋ kìɛ̀ŋ wɔŋ fɛ̀ì sìngà ke jii gbài wèè e ɓààne.’ 32Kɛɛ tɔ̀ miŋ woòiŋ naàŋ kɛ̀, wo felaaà gbiŋ naŋ gè wo jawèuŋ nɔɔ̀ŋ ɓie wèè esàɓù e keì joo bà wɔ eɓìèmàŋjɛ̀wɛ̀ e hmɔŋtu nyɛ̀nɛŋ, kɛ̀ e keì douŋ nàŋ jeè esaɓù kɛ̀ wòuŋ nyɛ̀nɛ̀ŋ wò nyɛ̀nɛ̀ŋ hmɔŋtu sèè wò ɓemàŋ ɓɛìŋ wo felaa joo. E kìlà wo felaaà douŋ nàŋ ɓemè wɔ wuŋ pɛɛ wò nyɛ̀nɛ̀ŋ hmɔŋtu.
Wo Jisɛ̀ naŋ kaà e nyaàiŋ dè e ɗààhiì ɓème
33“E kìlà àŋ naŋ wa ɓɛìŋ wòò aŋ nèwàènèwe wi nyàŋ e gɔuo sùà kɛ̀, ‘Wo nyùùŋ ɓɔ̀ wò gboonò è dèè Kanaà Dayà diɛŋ wèè è ɗààhiìɛ wò naŋ ɓemè lɛ, wèè wo nyɛ̀nɛ̀ŋ è yèɛ wò naŋ woò wèè wò nyɛ̀nɛ̀ŋ lɛ, sɔɔ̀ nɔŋ wo haawè kɛ̀ wò do niŋ nàŋ nyɛ̀nɛ̀ŋ.’ 34Kɛɛ tɔ̀ miŋ woòiŋ kɛ̀, ɓɔ̀ nìŋ gboonò sèè nìŋ woà nààŋ nìŋ manaŋ wèè naŋ nyɛ̀nɛ̀ŋ e nɛ̀ŋ bà wèè wo nyùùŋ! Ɓɔ̀ nìŋ gboonò è dèè kò àìjɛnɛ̀ɛŋ diɛŋ, esaɓù kɛ̀ kuŋ wo Dayà jaa ke kpùà kanauŋ nɛɛ̀ŋ diɛŋ. 35Ɓɔ̀ nìŋ gboonò è dèè ɗuunyaàŋ diɛŋ, esaɓù kɛ̀ kuŋ nàŋ yaà e nɛ̀ŋ dè maŋ golòuŋ màŋ. Ɓɔ̀ nìŋ gboonò è dèè kò Jùlusɛ̀làɛŋ diɛŋ, esaɓù kɛ̀ kuŋ nàŋ yaà ko jàwà gbèè wo Kana gbeeɔ̀. 36Ɓɔ̀ nìŋ gboonò è ɗìiŋ nɛ̀ diɛŋ, esaɓù kɛ̀ niŋ fè ɓɛ̀nɛ̀ŋ nyɛ̀nɛŋ wèè kè ɗì dùùm guùŋ pɛɛ kò ɗìiŋ niìŋ ke fòà ɔ̀ɔ̀ ke diiyè. 37Tɔ̀ e yèɛ nìŋ woà lɛ e nɔ̀ŋ ‘Èèè’ ɔ̀ɔ̀ ‘Kpele.’ Eɓìèmàŋjɛ̀wɛ̀ tɛɛ̀, e yèɛ gbiŋ nìŋ woà naàŋ lɛ è yewe wo Sɛ̀tanàŋ sìwè, wo Nyuùŋ Kɛ̀ɛ̀nɛ̀ŋ ke Kpèè naanààaŋ.
Wo Jisɛ̀ naŋ kaà e nyaàiŋ dè e kpàŋ keì naanààŋ gèe
(Luù 6.29, 30)
38“Nàŋ kòmàŋ àŋ naŋ wa woò kɛ̀, ‘Sèè wo nyùùŋ fɔtɔ e fɛɛ̀ mɔ̀ɛ̀, maŋ fɔ̀tà e jòuŋ fɛ̀ɛ̀ɛ, yèè sèè wo nyùùŋ gòo ke sìnyaŋ mɔɛ̀ŋ, muàŋ pɛɛ mao gè ke jouŋ nɛɛ̀ŋ.’ 39Kɛ̀ɛ̀ tɔ̀ miŋ woòiŋ naàŋ kɛ̀, ɓɔ̀ nìŋ giiyà ànyùùŋ è kpàŋ wèè è nànàaŋ àŋ naiŋ jàà lɛ. Sèè wo nyùùŋ bà woum hàà fɛ̀ɛ̀ wɔŋ nyààŋ e kùàŋ jìka mɔɔ̀ŋ, kilà ɓɛìŋ wɔŋ nyààŋ e kùàŋ gbɔnɔŋ mɔɔ̀ŋ wuŋ pɛɛ wo haà wɔŋ fɛ̀ɛ̀. 40Sèè wo nyùùŋ woum kòà ke sàwà wèè woum gbaì wèè wɔŋ kùmà mɔɔ̀ŋ, ɓèmè wɔŋ kotì mɔɔ̀ŋ wuŋ pɛɛ muŋ kiɛ̀uŋ. 41Sèè wo nyuùŋ gbee woum kùwà maŋ gaangaa wèè maŋ kòà wɔŋ nɛ̀nfoouŋ nɔɔ̀ŋ wèè e hààwà guùŋ, kòa wuŋ wèè e hààwà tìyèe. 42Sèè wo nyùùŋ bà gbiŋ wò dawàùm wèè muŋ kiɛ̀uŋ e nɛ̀ŋ bà, kìɛ̀uŋ niŋ. Sèè wo nyùùŋ wò dawàùm wèè mauŋ gbìàŋ e nɛɛnɛŋ kpàŋ, gbiàuŋ niŋ kpàŋ.
Wo Jisɛ̀ wààŋ e mànàiŋ aŋ joo wi nyàŋ
(Luù 6.27, 28, 32-36)
43“Nàŋ kòmàŋ e yèɛ àŋ naiŋ wa woò lɛ kɛ̀, ‘Niŋ mànàŋ aŋ dàwiiŋ nyàŋ yèè niŋ wùàŋ aŋ jooiŋ nyàŋ.’ 44Kɛɛ tɔ̀ miŋ woòiŋ naàŋ kɛ̀, mànaìŋ aŋ jooiŋ nyàŋ e kìlà niŋ zoolò wèè anyùùŋ nyaŋ nimilàìŋ nyaŋ. 45Kpeiŋ kɛ̀ nàŋ nɔ̀ŋ aŋ jɔ̀à koɓɛ̀ wo Dèdaiŋ nɔɔ̀ŋ ko àìjɛnɛ̀ŋ. Esaɓù kɛ̀ wò nyɛnɛŋ e gɔɛɛ dììkà anyùùŋ tɔ̀ɔ̀nyaàŋ nyaŋ yaà anyuùŋ naanààŋ nyaŋ diɛŋ, e kìlà wò nyɛnɛŋ maŋ gɔ̀à maŋ sɔ̀à anyùùŋ tɔ̀ɔ̀nyaàaŋ nyaŋ yèè anyuùŋ nyɛ̀nɛ̀ŋ maŋ tùwo naanààŋ nyaŋ diɛŋ. 46Wèè kiìŋ wo Dayà kiɛ̀ìŋ e jìwààjɛ̀wɛ̀ siaŋ sèè nìŋ mɔnɔŋ nɔŋ anyùùŋ nyaŋ mànàìŋ nyaŋ? Anyuùŋ kùwà nɛ̀ɛ̀nɛ̀ŋ fuɔŋ nyàŋ pɛɛ manaŋ aŋ dàwi nyiŋ nyàŋ. 47Sèè naŋ nɔŋ zùùmò aŋ wùìyaiŋ nyàŋ nyiŋ guùŋ, kɛ̀ nìŋ gò nyɛ̀nɛ̀ŋ è keì kɛnɛ gbiŋ è do nìàŋ è yèɛ anyùùŋ nyaŋ fè àŋ Juùù nyaŋ nyɛnɛŋ lɛ̀. Anyùùŋ nyaŋ pɛɛ gò hààwè wò Dayà nyaŋ nyɛnɛŋ e kèì guùŋ bi. 48Nìŋ kuwa naŋ nɔ̀ŋ anyùùŋ tɔ̀ɔ̀nyaàŋ, màànààŋ nɔŋ wo Dèdaiŋ nɔɔ̀ŋ ko àìjɛnɛ̀ŋ yaà lɛ.
Sélection en cours:
Maafiù 5: WFESD
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Gola New Testament Translation and Literacy Project © Bible Society in Liberia, 2019.