Mateo 3
3
Juan Xaa Nchubnis nzho naz wen
(Mr. 1:1-8; Lc. 3:1-9, 15-17; Jn. 1:19-28)
1Re mbizh zee lee Juan Xaa Nchubnis re myet, mbid mzaa kwent cheen Dios naz wen cheen Judea. 2Nu nzhé xaa:
—¡Blaa gu naletra gu kwaan nawent nu wii gu lo Dios nel mbizh kwaan nabeyy Dios mzhin gaxla!
3Juan nak xaa mzaa Chay kwent leezha nzhé xaa:
Tub xaa nzho naz wen nii dublegan:
“Bdexkwaa gu xnaz Xaa Nabeyy;
bxal gu tub naz nali ze xaa”. [Is. 40:3]
4Nu xab Juan nak yichled kamey, nu nzii tub yed lextoo Juan. Nu lee kwaan nzhaw Juan nak mbeso nu kwaan nzho Juan nak mzhin wen. 5Re myet xaa Jerusalén, nu re myet xaa re yezh cheen Judea, nu re myet xaa nzho dub welt roo yuu Jordán, ngwa nguyon kwaan mzaa Juan kwent. 6Ngunii xaa lo Juan re jwalt cheen xaa kwaan mle xaa, zee mchubnis Juan xaa leen yuu Jordán.
7Per gorna ngune Juan zyen doo xaa fariseo nu xaa saduceo nzha rubnis, zee nzhé Juan lo re xaa ba:
—¡Gu nak mod dii cheen mball wiz! ¿Cho né lo re gu xonn gu lo yalnayii kwaan né Dios yaad? 8Blu gu mod xaa mlaa naz nawent kwaan nzha gu nu wlipa wii gu lo Dios, kwaan gak mod xle cheen tub yag. 9Nu natot gu yalxwa nu yé gu: “Lee be nak dii cheen Abraham”; nel wlipa na nii na lo gu, Dios nzho mod le axta noka re ke ne gaka dii cheen Abraham. 10Lee yibyag nzobla cho lox re yag kwaan nanzaat xle wen, zee choog xaaya nu koo xaaya lo ki. 11Wlipa na nii na, na nchubnis re gu kwaan nis zee laa gu kwaan nawent kwaan kale gu nu wii gu lo Dios, per lee tich na nze stub xaa chubnis re gu kwaan Mbi Naban nu kwaan ki. Lee xaa nonra lo na, kwaanzee nanzhaalt xek na tich xkyelyed xaa, nel nanont na. 12Nzho garot yaa xaa koo paj lo nzhobxtil, nu kozhaw xaa nzhobxtil pa ngozhaw xaa re xob xaa, nu lee paj cheen nzhobxtil zek xaa lo ki kwaan tira nanyuyyt.
Jesús mrubnis
(Mr. 1:9-11; Lc. 3:21-22)
13Jesús ngwa roo yuu Jordán yizhyo cheen Galilea pa nzo Juan kachubnis re myet. 14Per Juan nanzheklat chubnis Jesús zee nzhé Juan lo xaa:
—Na nzhaal rubnis lo lu, ¿chozhiin leel lu nze lo na?
15Jesús mkeb nzhé:
—Nkin chubnis lu na, nel be nkin le kwaan né Dios. Juan mbin wdizh ne nu mchubnis xaa Jesús.
16Nu leeka gorna ngulo mrubnis Jesús, lee yiba mxal nu myun Mbi Naban cheen Dios lo Jesús nyaadla naz leen yiba mod tub palom. 17Zee mbin xaa tub bos kwaan nze naz yiba kwaan nzhé:
—Xaa ne nak xgaan na, xaa nkedoola na, xaa nyakdoo lextoo na wii na lo.
Sélection en cours:
Mateo 3: zpo
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2002, Wycliffe Bible Translators, Inc. All rights reserved.