Bambata Pai 4

Pa aKaina na Ebere

1Adama ki ini Awa ni de nga diako, ri ki du na mobara ki batika Kaina, ki ya “Mi bi kumba mbiko gu undahe nga ga Yekova.” 2Fuo ho ri ki batika taipeko nga Ebere. Ebere ki ngia babanda akandoro, ono Kaina tigako adu ni basopobino 3Si ki ta du wa gere ni gu rago re, Kaina ki ye na bete ũati ni motumo fu Yekova, 4Ebere ki ye a na bete bambata awiri rimbasa gako anya na nzemera. Bi Ebere na gako motumo angba angba bangiri Yekova, 5ono bi Kaina na gako motumo angba nga bangiriko te. Kaina ki zingi azinga gbe, kpakpuko ki du na ngbandua. 6Yekova ki ya fu Kaina, “Tipagine zingi mo ti ni? Tipagine du kpakpuro ti ni na ngbandua? 7ka mo amanga wenengaĩ, kpakpuro adú nga na ngbarago te? Ono ka mo amanga nga wenengaĩ ya, ingapai nagbura ngbadimo; gaha nyemuhe ki du koyo du mo ni, ono mo ka zoga ha.”

8Kaina ki ya fu Ebere nga wirinako, “Ani ndú ku ati yo.” Fuo gure, ho i adu ni ati yo, Kaina ki nimo kuti Ebere nangia wirinako, ki imi ko. 9Yekova ki ya fu Kaina, “Wari du Ebere ni nga wirinamo?” Ko ki ya, “Mi aina nga ho te; babanda wirinami nga mi?” 10Yekova ki ya, “Gini pai mangi mo? Kure wirinamo nakpara fere sande. 11Were mo ni tiwatiwa ro mbiko kpotosende, nga gu za ngbaha ka mbira kure wirinamo be ro. 12Ho mo ka asópa bino ni, si aida nga foro gbe te; mo adu ni miakpamiakpa boro ni yarayara ro auru kpotosende.” 13Kaina ki ya fu Yekova, “Gi mbusa si kii ki susi omere. 14Mo ngére, mo do re areme ku sa yo rogo gi sende; mi adú ni okooko re ti bangiro; mi ki du ni miakpamiakpa boro ni yarayara re auru kpotosende gu boro ka bi re ni aimo re aimo.” 15Yekova ki ya fu ko, “Wo te! gu ni ka imi Kaina, i aíra bape kuti ni bara saba.” Yekova ki moi yuguyuguhe ti Kaina, boro ka ndu ka bi ko ki zuba ko. 16Kaina ki guari bara bangiri Yekova, ki niraki rogo ringara Nodo, pati Edene ku uroyo.

Pa angbatunga Kaina

17Kaina ki ini diako ni de, ri ki du na mobara, ki batika Enoka; ko ki dua bakporo, ki yambu rimoho nga Enoka ti rimo wiriko. 18I ki batika gude fu Enoka nga Irada; Irada ki batika Meuyaere, Meuyaere ki batika Metusaere, Metusaere ki batika Remeke. 19Remeke ki rogo ade ue tipa ko; rimo gu ri sa nangia Ada, rimo gu kura ri ki ngia Sira. 20Ada ki batika Yabara; ko adu ni ba fu agu yo naraka tii bamburoko yo ki du na zogozogo anya be yo. 21Rimo wirinako nangia Yubara; ko adu ni ba fu agu yo nataka sagiru ki nivudi akpangi. 22Sira ki batika gude a nga Tubara-kaina; ko nangia pangu taka angbatunga aũsunge rogo sirigi na marã a. Dawiri Tubara-kaina nangia Nama.

23Remeke ki ya fu adiako wẽ:

“Ada na Sira, oni gí fugore;

adia Remeke, oni gí sangbare;

mi aimi kumba wa ko ahogi re,

na paranga a, wa ko amburu re.

24Ka i iri bape Kaina bara saba,

i aíra bape Remeke bara 77 ni rengo.”

Pa angbatunga Sete

25Adama ki ini diako ni de berewe, ri ki batik i gude, ki yambu rimoko nga Sete, ri ki ya, “Mbori fu kura vungu fere ku ba Ebere, bambiko wa Kaina aimi ko.” 26I ki batika kumbagude fu Sete a, ko ki yambu rimoko nga Enosa. Ni gu rago re aboro ki tona ka kpara ti rimo Yekova.

Sélection en cours:

Bambata Pai 4: ZB1978

Surbrillance

Copier