Matayi 4
4
Ukulingwa kwa Yesu mulugwa
1-11: Mal. 1,12-13. Luk. 4,1-13.
1IlelʼuMupepo ahamusogozyʼuYesu mulwugwa ukuti alingwaje numukwalanzi. 2Ilelo lwʼadiliyʼamandʼamashumi gane vusitakulya naṿimo nashamusanya nashavusiku, pʼihamulumʼinzala. 3Pʼuwa kumulinga ahapalamila kukwakwe ahayanga nawo ahati: Inga nalyoli we Mwana wa Mulungu iwe, pʼuyanje kumavwʼiga gayipelajʼukuvʼuvugali. 4Uwenʼahamula ahati: Lisimṿilwe lye likuti:
Umuntu vutakumupʼuvulanzi vwe vugali vweka,
nkandi amazwi ge gakufuma mwilomu lya Mulungu,
gugo ge gakumupʼuvulanzʼumuntu.
5Pʼumukwalanzi ahasogola nawo munkayʼimfinjile, mwʼahamuviha pamwanya patempeli, 6ahamuvuzya ahati: Inga nalyoli we Mwana wa Mulungu, pʼudomoshe pansi pala, she lisimṿilwe lye likuti:
Alikuhomelezezyagʼavahavizya vakwe,
ve vahanyatula mumahono gavo,
ukutʼutapunule pivwʼishinama shaho.
7UwenʼuYesu ahamuvuzya ahati: Havili lyope lisimṿilwe lye likuti:
UtalingajʼuMwene uMulungu waho.
8Havilʼumukwalanzi ahasogola nawo pigambʼitali nkani, pʼahamulanganizyʼinsi zya vamwene vonti munsʼumu nuvwinza vwakwe, 9ahamuvuzya ahati: Ṿwe nkukupa ṿwonti ṿiniṿi ingʼukusugamila pansi, nukuputa kukwane. 10PʼuYesu ahamuvuzya ahati: Yepaga panapa we Setano iwe, she lisimṿilwe lye likuti:
Putaga kwa Mwene uMulungu waho,
wʼumuvombele wuyo weka.
11Pʼumukwalanzi ahamuleha, navahavizya vahaloleha vakwinza ukumuvombela.
UYesu akutendama mu-Kapelinahumu ya mu-Galilayi
12-17: Mal. 1,14-15. Luk. 4,14-15.
12IlelʼuYesu lwʼayiṿuyʼukuti uYohani vamulemile, pʼahashimbila mu-Galilayi. 13Ahepa mu-Nazaleti ahavalʼukudila mu-Kapelinahumu kushipuma sha sumbi munsi ya Zabuloni niya Nafutali; 14mwe mumwo zilunjisile zizyo zyʼayanzilʼuYesaya umukuvwi wʼatili:
15Ninsi ya Zabuloni ninsi ya Nafutali,
zye zipalamine nusumbi, niya mwisyila lila
lya Yolidani, Galilayi ya vakunzi,
16avantu ve vatendime mushisi vawenyʼuluhozyʼulupiti,
vope nave vatendime namunsi namwizyungululu lya
vufwe luvatukuliyʼuluhozyo.
UYesu akwandʼukukumusya
17Pʼahanda pupʼuYesu ukukumusya ukuti: Simupindushe, she vwinzilʼuvumwene vwa kumwanya, vuli papipi.
Akwita avasundikwa vakwʼavalanzi
18-22: Mal. 1,16-20. Luk. 5,1-11.
18IlelʼuYesu lwʼakujenda kushipuma sha sumbi wa muGalilayi pʼahagʼavanamuntu vavili, nuSimoni we vakumutaha ilya Peteli, numuzuna wakwe uAndeleya, ahaga vakutajilʼulwelo lwavo mwa sumbi she vali vaṿuṿi. 19Pʼahavavuzya ahati: Simundandate mwisinda, shinishi nkuvapela ukuva mwe vaṿuṿi va vantu. 20Avene pe vahaleha pupʼinyelo zyavo luvilo luvilo, vahamulandata. 21Ilelo lwafumile pupo lwʼakujenda, pʼahagʼavamwavo avanamuntu vavili, nuYakobu umwana-Zebedayi nuYohani umuzuna wakwe, ahaga vakusopʼinyelo zyavo mwivoti nuyise uZebedayi. Vope ahavita. 22Avene luvilo luvilo vahaleha pupʼivoti lyavo nuyise, vahamulandata wuyo.
Akuzyungula mu-Galilayi nukuvombʼimbombo
23UwenʼuYesu ahajenda ahamalilizya iGalilayi yonti, ahasambilizya mumasinagogi gavo, ahakumusyʼintumʼinyinza ya vumwene, nimpungo zyonti ahazikantula nuvupotwe vwonti. 24Ahakumuha mwonti mu-Sili. Vahamutwalila vonti ve vavinilʼimpungo, nave vapositwʼuvupotwe, nave vahavavwaga amavili, nave vali nimpepʼimbivi, nave vali nishinzilisi navashulu, vontʼahavazuzuvushizya. 25Vahamulandatʼavantʼimpugʼimpiti ve vafumile mu-Galilayi namu-Dekapoli namu-Yelusalemu namu-Yudayi namwisyila lila ilya Yolidani.
Sélection en cours:
Matayi 4: NYi1965
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Nyiha New Testament © British and Foreign Bible Society, 1965.