यहुन्ना 3
3
ईसू अन निकेदुमस
1वटे फरीसियाँ में निकेदुस नाम को एक मनक हो। वो यहूदी मनकाँ को नेतो हो। 2वो एक दन राते ईसू का नके आन क्यो, “हो गरुजी, माँ जाणा हाँ के, थाँ गरुजी हो अन थाँ परमेसर का आड़ीऊँ खन्दाया तका हो, काँके अस्या परच्या, जी थाँ बतावो हो, यद्याँ परमेसर वाँका हाते ने वेवे, तो वो ने बता सके हे।”
3ईसू वींने जवाब दिदो के, “मूँ थाँराऊँ सई केवूँ हूँ, यद्याँ थूँ पाछो जनम ने लेवे, तो परमेसर का राज ने देक ने सकी।”
4निकेदुमस वाँकाऊँ क्यो, “मनक जद्याँ डोकरो वे जावे हे, तो वो कणी तरियाऊँ जनम ले सके हे? कई वो आपणी माँ का पेट में दूजी दाण जान जनम ले सके हे?”
5ईसू वींने जवाब दिदो के, “मूँ थाँकाऊँ हाचेई केवूँ हूँ, जद्याँ तईं कुई मनक पाणी अन पुवितर आत्माऊँ ने जनमे तो वो परमेसर का राज में ने जा सकी। 6मनक देहऊँ देह ने जनम देवे हे पण वाँ पुवितर आत्माइस हे ज्या आत्मिक रूप में जनमे देवे हे। 7अचम्बो मती कर, काँके मूँ थाँकाऊँ केरियो हूँ के, ‘थाँने नुवी रितऊँ जनम लेणो जरूरी हे।’ 8बायरो जटे छावे वटे चाले हे, अन थाँ वाँकाणी अवाज हुण सको हो, पण ने जाणो हो के, वो कटेऊँ आरियो हे अन कटने जारियो हे। ज्यो कुई पुवितर आत्माऊँ जनमे हे, वो भी अस्यानीस हे।”
9निकेदुमस वाँने जवाब दिदो के, “ओ कस्यान वे सके हे?”
10ओ हुणन ईसू वणीऊँ क्यो, “थूँ इजराएली मनकाँ को नेतो वेन, कई यो भी ने जाणे हे? 11मूँ थाँकाऊँ हाँची केवूँ हूँ के, ज्यो माँ जाणा हाँ, वोईस केबा हाँ, अन ज्यो देक्यो हे, वींकी गवई देवा हा, पण थाँ लोग माँकी गवईने ने मानो हो। 12जद्याँ में थाँने धरती की बाताँ बतई, अन थाँ विस्वास ने किदो हो। तो यद्याँ मूँ थाँने हरग की बाताँ कूँ, तो थाँ कस्यान विस्वास करो? 13अन कुई भी हरग में ने ग्यो, बेस वो मनक को पूत ज्यो हरगऊँ उतरियो हे।
14“जीं तरिया मूसे काकड़ में पीतळ का हाँप ने ऊसो उटायो हो, वणीस रितीऊँ जरूरी हे के, मनक को पूत भी ऊसो उटायो जाई। 15अणीऊँ ज्यो कुई वींपे विस्वास करी वो अनंत जीवन पाई। 16काँके परमेसर जगतऊँ अस्यान परेम किदो, वणा आपणाँ एकाएक पूत ने दे दिदो, ताँके ज्यो कुई वींपे विस्वास करे, वी नास ने वेई, पण अनंत जीवन पाई। 17परमेसर आपणाँ पूत ने दनियाँ में ईं वाते ने खन्दायो के, वो दनियाँ का मनकाँ ने दण्ड देवे। पण ईं वाते खन्दायो के, दनियाँ का मनकाँ ने बंचा सके।
18“ज्यो कुई वींपे विस्वास करे, वाँने माप किदा जावे हे, पण ज्यो वाँका पे विस्वास ने करे, वीं दण्ड का भोगी वेग्या हे, काँके वणा परमेसर का एकाएक पूत पे विस्वास ने किदो। 19अन दण्ड को कारण ओ हे के, उजितो जगत में आयो। अन मनक अंदारा ने उजिताऊँ घणो रुपाळो जाण्यो, काँके वाँका काम बुरा हा। 20ज्यो कुई बुरई करे हे, वो उजिताऊँ रिस्याँ बळे हे अन उजिता का नके ने आवे हे, काँके वो ने छावे के, वींका काम हाराई जाणे। 21पण ज्यो हाँच पे चाले हे, वो उजिता का नके आवे हे, ताँके वींका काम परगट वे के, ज्यो कई वणा किदो, वो परमेसर छावता हा।”
बतिस्मा देबावाळो यहुन्नो अन ईसू
22ईंका केड़े ईसू अन वाँका चेला यरूसलेम नगरऊँ यहूदियाँ परदेस का रेटला इलाका में आया, अन वीं वटे वाँका लारेरियो अन मनकाँ ने बतिस्मो देबा लागो। 23अन यहुन्नो भी सालेम नगर का भडे़ एनोन नाम जगाँ में बतिस्मो देतो हो, काँके वटे नरोई पाणी हो अन लोग-बाग आन बतिस्मो लेता हा। 24#मत्ती 14:3; मर 6:17; लूका 3:19,20यहुन्नो वीं टेम तईं जेल में बंदी ने बणायो ग्यो हो।
25वटे यहुन्ना का चेला अन एक यहूदी मनक के हाते यहूदियाँ का साप-सपई का रिवाज का बारा में वाद-विवाद व्यो हो। 26अन वणा चेले यहुन्ना का नके आन वणीऊँ क्यो, “हो गरुजी, ज्यो मनक यरदन नंदी का पेली पार थाँका लारे हो अन जिंकी थाँ गवई दिदी ही, अबे वो मनकाँ ने बतिस्मो देरियो हे, अन हाराई मनक वींका नके जारिया हे।”
27यहुन्ने वाँने जवाब दिदो, “जद्याँ तईं परमेसर ने देवे तद्याँ तईं कुई कई ने पा सके हे। 28#यहु 1:20थाँ खुद हाराई मारा गवा हो जणी दाण में क्यो हो, ‘मूँ मसी ने हूँ। पण मूँ तो वींके आगे खन्दायो ग्यो हूँ।’ 29वोईस बींद हे, जिंकी लाड़ी हे, पण बींद को यार ज्यो ऊबो रेन वींकी हुणे अन वो बींद की वाणीऊँ घणो राजी वेवे हे। अस्यानीस मारो आणन्द पूरो व्यो हे। 30अबे अस्यान वेवे के, मनकाँ में मारो मान घटे अन ईसू को वदे।
वो ज्यो हरगऊँ उतरियो
31“ज्यो ऊपरेऊँ आवे हे वो हाराऊँ मोटो हे। ज्यो धरतीऊँ आवे हे वो धरती को हे अन वो धरती किइस बाताँ करे हे। ज्यो हरगऊँ आवे हे, वो हाराई का ऊपरे हे। 32ज्यो कई वणी देक्यो अन हुण्यो हे, वींका बारा में बतावे हे, पण कुई भी मनक वींकी ने माने हे। 33जणी भी वाँकी बात मान लिदी, वणी वाँकी बात ने मान लिदी हे के, परमेसर हाँचो हे। 34काँके जिंने परमेसर खन्दायो हे, वो परमेसर की बाताँ केवे हे, काँके परमेसर वींने आपणी आत्माऊँ भरपूर किदो हे। 35#मत्ती 11:27; लूका 10:22परमेसर आपणाँ बेटाऊँ लाड़ राके हे, अन वणा हारी चिजाँ वींका हात में हूँपी हे। 36ज्यो बेटा ऊपरे विस्वास करे हे, वो अनंत जीवन पावे हे, पण ज्यो बेटा की ने माने हे, वो जीवन ने कोयने पावे, पण वींपे परमेसर को कोप वेतो रेवे हे।”
Sélection en cours:
यहुन्ना 3: एम टी आर
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
(c) 2010-2017, New Life Computer Institute. All rights reserved
