Panagnaan 4
4
Si Kayin ka si Habil
1Na song hallom, lay na battong si Hawa leꞌ si Adam. Pag maddi si Hawa, lalla. Dari yuk na, “Man tabang Tuhan anakan na ku la lalla.” Pag-anu, lay awnan na si Kayin. 2Yaꞌ gi hallom, lay na baw ya hanak balik disu lalla, yana si Habil. Pag mehe na sila, kuwan si Habil, lay dari tukang ipat bili-bili. Kuwan siyaka na si Kayin, tukang huma.
3Hallom maka hallom na, pag kattom si Kayin tinanom na, lay ya nong kasohean buwaꞌ na pa Tuhan. 4Kuwan ariꞌ na si Habil, lay numbaliꞌ disu anak sibuwa ni baanan bili-bili na, boꞌ songan na isi na ma numbul satu pa Tuhan. Dari Tuhan siꞌ tu kasulutan ni si Habil sampay ni ilooy ma bay sinongan niiya. 5Boꞌ si Kayin, yaꞌ kasulutan Tuhan niiya sampay ni ilooy ma bay songan na. Pag tabista si Kayin meꞌ looy, mandung imukka na sampay tud dugahan na ya.
Si Kayin mapatoy ariꞌ na
6Dari tilaw Tuhan ni si Kayin, “Ongoy subay na pin mandung imukka nu sampay lasu na ga ko? 7Bong siꞌ ilay ko bay katuwaꞌ, malaingkan kasulutan jaꞌ sina ku ningkau. Sugaꞌ bong ina ko yaꞌ kuhi paintong, pahap-hap ko taggahaꞌ inoyo-oyohan na pin ko meꞌ dangkiꞌ nu buwat dusa. Dusa ina meꞌ sapantun sattuwa ngagad-ngagad nabbat kau. Sangkon subay talloban nu.”
8Na disu llaw, yuk si Kayin ni si Habil, “Hongan teꞌ ku Diꞌ pilay pa huma.” Takka da ndooy, lay pinapatoy meꞌ si Kayin ariꞌ na.
9Dari tilaw Tuhan ni si Kayin, “Ninggai na ariꞌ nu?”
Iya tampung si Kayin, “Tau ta la. Saꞌ du baw bilay sukuꞌ ku nganjagahan ariꞌ ku.”
10Yuk Tuhan, “Ongoy bay taaku nu buwat meꞌ looy? Baan ta ko, lahaꞌ ariꞌ nu ilay bay tumpa taꞌ tanaꞌ, takale-kale ku na nginganan aku nohoꞌ binawsan. 11Sangkon batnaa sibuꞌ du ko ka bay sinumpaan meꞌ tanaꞌ. Batan poonan na bay katumpahan lahaꞌ ariꞌ nu, 12san du pooy meꞌ nu magtuyuꞌ-tuyuꞌ huma, yaꞌ na ko kadarihan. Maka labba man batnaa, yaꞌ na luu lumaꞌ katattogan nu. Maglunsuhan na jaꞌ ko padisu-padisu lahat halloman nu llum.”
13Yuk si Kayin siꞌ tu pa Tuhan, “Landuꞌ na baw bina bohat pidjalaꞌ naa. Yaꞌ bina la takaya ku. 14Palahi nu na bitu hati ku llaw tuu man tanaꞌ tuu sampay man diyoꞌ dakan nu! Bong meꞌ naa, pabiya nu na ku maglunsuhan na jaꞌ padisu-padisu lahat. Bong ku itu mintu tatammu meꞌ jama ma toon gulaꞌ-gariꞌ ku, mastiꞌ pinapatoy jaꞌ ku.”
15Sugaꞌ yuk Tuhan, “Niyaꞌ du baw bina. Tandaan ta sa ko supaya luu sipat njataꞌ nu man jama toon bong sila bay mapatoy kau, mastiꞌ bawsan ta jaꞌ ko. Pag bawos ku ina mintu, subay luu pituꞌ jama lakkahan ku nyawa da yana hisab ni kapatoy nu.” Pag-anu siꞌ, lay du si Kayin tinandaan meꞌ Tuhan. 16Dari siꞌ, tud lay na du lakka si Kayin man okoman Tuhan, sampay lay na ya maglayin pa lahat inawnan Nod pa mataallaw man Eden.
Ga panubuꞌ si Kayin
17Na hallom maka hallom na, ndahan na si Kayin sampay anakan na sila lalla, awon na si Idris. Song hallom, lay na baw si Kayin matangge daira. Na daira looy siꞌ, lay awnan na Idris, meꞌ awon anak na du. 18Si Idris pun lay na du ndahan sampay anakan na sila lalla, yana si Irad. Si Irad ilay yana mmaꞌ si Mehujael maka si Mehujael yana mmaꞌ si Lamek. 19Kuwan si Lamek baw siꞌ tu, ndahan duwa, yana ga si Ada ka si Silla. 20Pag hanak si Ada siꞌ tu, lalla, yana si Jabal. Iya ilay jama ma bay duhuꞌ-duhuꞌ parampong-parampong patannaꞌ ni lumaꞌ luna batan bbuwatan na ngipat siga baanan hayop. 21Danganakan na yana si Jubal, jama ma bay duhuꞌ nammu-nammu suling ka gital. 22Kuwan nda si Lamek ilooy disu, yana si Silla, anakan du disu lalla. Awon na si Tubal-Kayin. Iya ilay jama duhuꞌ-duhuꞌ bay maba bassi ka tumbagaꞌ man buwat jinisan kalangkapan. Maka luu gi disu danganakan na danda, yana si Naama.
23Na disu llaw, yuk si Lamek ni ga nda na si Ada ka si Silla, “Pakale doꞌ kam niyaku. Luu la lalla, yaꞌ gi du umuhan, bay papatoy ku. Kon ku bay monoꞌ, batan iya bay nganduhuꞌ nigad aku. 24Na pamāꞌ Tuhan bong luu bay mapatoy Boꞌ Kayin, pag bawos na, subay luu pituꞌ jama lakkahan na nyawa da. Sangkon kumpas ku, bong mintu luu bay mapatoy aku, sapatut na subay luu pitumpuꞌ-pituꞌ jama kinaddoan nyawa da.”
Boꞌ Adam ka Sitti Hawa hanak pabalik
25Beleng ta pa si Adam ka nda na, lay na baw sila anakan balik lalla. Yuk si Hawa, “Kahapan la, lay gi baw ku binuwanan meꞌ Tuhan anak lalla gantiꞌ si Habil bay pinapatoy meꞌ si Kayin.” Dari lay inawnan meꞌ na si Set. 26Pag anakan si Set baw siꞌ tu, lalla du, boꞌ lay inawnan meꞌ na si Inos. Na labba man jaman si Inos, luu na manusiyaꞌ nagnaꞌ ngisbat sampay numba Tuhan.
Sélection en cours:
Panagnaan 4: sjm
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2021, Wycliffe Bible Translators, Inc. All rights reserved.