Pulim 5
5
Ko zege Adam ne se ko yi Noah
1Poponem dento bere Adam dwi dem na dɛ tetei maama to mo.
Wɛ déem na ke nabiina dɛ delo ne to, o déem ke-ba se ba taa nye de o tete mo. 2O déem ma ke-ba se ba taa ye baaro de kaane. O ma swɛ ba swolim, ye o daare o jege-ba o bwoi we ‘nabiina’. 3Adam déem na yi bena bi dedaane fintɔ (130) to mo o loge bu pa se o nye de wonto tete. Bu wom maa jege o tete kamɔgɔ. O ma bwoŋi bu wom yere we ‘Sɛfi’. 4Sɛfi lora kam kwaga ne, Adam déem daa ta ma na bena bia nana (800). O déem ma lo bia badwonna o woli da, bakeiri dedaane busankane. 5Adam bena yam maama ná ke daane, ya ye bena bia nogo dedaane fintɔ (930) mo, ye o laam te.
6Sɛfi na yi bena bi de yanu (105) to mo o loge Enosi. 7Enosi lora kam kwaga ne, Sɛfi daa ta ma na bena bia nana de yarepɛ (807). O déem ma lo bia badwonna o woli da, bakeiri dedaane busankane. 8Sɛfi bena yam maama ná ke daane, ya ye bena bia nogo de fuga-yalei (912) mo, ye o laam te.
9Enosi na yi bena funogo (90) to mo o loge Kenan. 10Kenan lora kam kwaga ne, Enosi daa ta ma na bena bia nana de fuga-yanu (815). O déem ma lo bia badwonna o woli da, bakeiri dedaane busankane. 11Enosi bena yam maama déem ná ke daane, ya ye bena bia nogo dedaane yanu (905) mo, ye o laam te.
12Kenan déem na yi bena fuserepɛ (70) to mo o loge Mahalaleli. 13Mahalaleli lora kam kwaga ne, Kenan daa ta ma na bena bia nana de finna (840). O déem ma lo bia badwonna o woli da, bakeiri dedaane busankane. 14Kenan bena yam maama déem ná ke daane, ya ye bena bia nogo de fuga (910) mo, ye o laam te.
15Mahalaleli déem na yi bena fuseredo-yanu (65) to mo o loge Jaredi. 16Jaredi lora kam kwaga ne, Mahalaleli daa ta ma na bena bia nana de fintɔ (830). O déem ta ma lo bia badwonna o woli da, bakeiri dedaane busankane. 17Mahalaleli bena yam maama déem ná ke daane, ya ye bena bia nana de funogo-yanu (895) mo, ye o laam te.
18Jaredi na yi bena bi dedaane fuseredo-yalei (162) to mo o loge Enoki. 19Enoki lora kam kwaga ne, Jaredi daa ta ma na bena bia nana. O déem ta ma lo bia badwonna o woli da, bakeiri dedaane busankane. 20Jaredi bena yam maama déem ná ke daane, ya ye bena bia nogo de fuseredo-yalei (962) mo, ye o laam te.
21Enoki déem na yi bena fuseredo-yanu (65) to mo o loge Metusela. 22Metusela lora kam kwaga ne to, Enoki de Baŋa Wɛ ma tiini ba me daane bena bia yatɔ (300) maama wone. O déem ta ma lo bia badwonna o woli da, bakeiri dedaane busankane. 23Enoki bena yam maama déem ná ke daane, ya ye bena bia yatɔ de fuseredo-yanu (365) mo. 24Enoki de Wɛ na vei daane to, o déem ma ba o tera, bɛŋwaane Wɛ déem mo kwei‑o o ja o kɛ.#Hiburu 11:5
25Metusela na yi bena bi de funɔnɔ-yarepɛ (187) to mo o loge Lameke. 26Lameke lora kam kwaga ne, Metusela daa ta ma na bena bia yarepɛ dedaane funɔnɔ-yalei (782). O déem ta ma lo bia badwonna o woli da, bakeiri dedaane busankane. 27Metusela bena yam maama déem ná ke daane, ya ye bena bia nogo dedaane fuseredo-nogo (969) mo, ye o laam te.
28Lameke déem na yi bena bi dedaane funɔnɔ-yalei (182) to mo o loge bu. 29O ma ta o we, “Baŋa Wɛ na sɔɔle lwarem o yage tega kam baŋa ne to, ka totoŋa tiini ya damma mo ya pa debam pa se dé yɔɔre dé yaara. Wonto nam mo lage o pa se debam bochare zuri.” Konto ŋwaane mo o pɛ bu wom yere we ‘Noah’.#5:29 Noah kuri nye de ka-zuri-bochare. 30Noah lora kam kwaga ne, Lameke daa ta ma na bena bia yanu de funogo-yanu (595). O déem ta ma lo bia badwonna o woli da, bakeiri dedaane busankane. 31Lameke bena yam maama déem ná ke daane, ya ye bena bia yarepɛ de fuserepɛ-yarepɛ (777) mo, ye o laam te.
32Noah déem na yi bena bia yanu to mo o loge bu-baara batɔ ye o pa ba yera we Sɛm, de Ham, dedaane Jafete.
Sélection en cours:
Pulim 5: KBG
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2020, Ghana Institute of Linguistics, Literacy and Bible Translation (GILLBT)