Lukas 5
5
Yesus napedeyi ana hakodo halole-Na kaɗihana
(Mat. 4:18-22; Mrk. 1:16-20)
1Ɗaage hadaka, Yesus nadede ta nir hoba Genesaret.#5.1 Nne Hoba hangara ʄalawe hoba Galilea. Nne Hoba ɗaage ta tana Galilea, malauge ɓakatutkawe 21 kilometerage mono gallarage ɓakatutkawe 13 kilometerage. Buta ata kaha kahhi-kahna mai rangewe lii waltai Alla. 2Yesus na etayi ɗuɗa tena ta nir hoba. Ata maʄala kaboko ɗaburɓe walta tena mono katangrana hamurrahage ʄalaɗa. 3Yesus napane ta ɗiha wu tena, ta tenanai Simon,#5.3 Simon pahangara ʄalayi, Petrus. lodoge nahalewai tularan tena hadikorau hoɗin walta nir hoba. Yesus nangoɗo lar ta tena mono nahanuwadi ata buta.
4Tabalge ɓanaɓe pahanuwadi, Nyi linage tabaranai Simon, “Ɓohei tenam ta libu mono weuwe ʄalam kamkolena kaboko.”
5Balehanai Simon, “Ama Guru, pijage gaꞌ ɓama rayi ulla walaꞌma hakolema. Tanyiɗuwe oro ɓa Yau kahalewawa, nauwa wewupi walkawe ʄala.” 6Ɓaɗaɓe harayige nna, yiɗɗa kole habutana kaboko, kamha majirrakawe ʄalaɗa. 7Oro ɓatauɗage, yiɗɗa ɗayaipai oleɗa walta tena heka ɓaɗa karai matul. Oleɗa ɗamai mono ɗahangihidi kaboko ɗuɗa tena, kamha tabulloi tenaɗa. 8Kole ɓana etawei Simon Petrus#5.8 Naɗe kangaranai Simon walekai Petrus, walekai Simon Petrus, wu kaɗuyi ata hatak. agawe kaɗaꞌ, nyi nakawoʄo ta aronai Yesus, mono linage ɓana hanewe, “Tannaga nauwa, Mori! Oroge nauwa ata doku-jalawa!”
9Simon mono tangngad ata hamarangana, ɗaɓangara oroge ɓana butayi kaboko hakoleɗa. 10Tauɗa ʄalage ole rayi ullanai Simon, raɗei Yakobus monoi Yohanis, anai Zebedeus ɗaɓangara ʄala. Malinagei Yesus tabaranai Simon, “Ilam madautawu! Wal ɓatauge yau kamɗaꞌ kaʄala ata tannam kaɗa ɗouk-Ga.”
11Simon mono olena ɗatingui tenaɗa ta pahalai, tabalgenage ɗa ijakadi tangngad harayi ullaɗa, lohho kakoɗage ɗokuni Yesus.
Yesus nahataggahai ɗiha wu ata habanna katoub
(Mat. 8:1-4; Mrk. 1:40-45)
12Ɗaage ɗiha laɗo, Yesus ɗaan ta ɗiha wu kota. Neꞌ bal ɗaan wu kaɓaani habanna katoub.#5.12 Nuthona, houk ata Yahudi naɗawe, raɗa ata katoub walena ɗaɗiꞌmawe kako ta umma hadau kangoteɗa ata Yahudi. Oroge pahangaɗaɗa ata Yahudi, waleɗa marakaꞌma ɓaɗa aroni Mori. Torrowe ta jurata Imamat 14:1-32. Ɓana etai Yesus, nyi nakawoʄo ta aro-Na mono nakaraiwe, “Ama, ɓam aukaɗiwu hataggahawa!”
13Yesus nanaton naɗa ata mono linage tabarana “Nauwag auwa, taggahawu!” Nna mema ʄala nabungai katoubna. 14Tanyiɗuwei Yesus naherin naɗa ata takwe ta ata waɗeka, malinagei Yesus, “Kakow tabara imam kana tadawe yau ɓam taggahawu. Mono tabalge neɗonage kakonage ɓana yii maaraka ɗoukge harehanai Musa, kawuwe tadage tabaraɗa ata, ɓam taggaha takka.”
15Tabolo lii tutnai Yesus namahaɓarawe tagii-gii toma mono buta ata kamai rangeyi mono nahataggahai walta kalawaraɗa. 16Loko ɓatauɗaꞌge, Yesus nadut kako habayang ta hadau kahika.
Yesus nahataggahai naɗa wu ata kalikku
(Mat. 9:1-8; Mrk. 2:1-12)
17Ɗaage ɗiha laɗo tangranai Yesus hanuwana, ɗaad ata walta kalibbo Farisi mono gurr agama ata Yahudi kangoɗo neɗo. Yiɗɗa ɗamai walta kota Yerusalem, wal tangngad hadau ta tana Galilea mono ta tana Yudea. Kawahanai Alla ɗaage tabarai Yesus tannam kahataggahai ata buta kalawara. 18Nyiwe neɗona ɗaad ata kamai ngidiyi wu ata kalikku kabaika ta pan kaleba. Yiɗɗa ɗarun-ge ngidiyi naɗa ata lar ta umma tannam kapikun ijalai ta aronai Yesus. 19Tabolo oro butana ata neꞌ bal waleɗa pikuman tama ngidiyi. Oro ɓatauɗage ɗahapanen naɗa ata ta pan kawedo. Maɗa hegarage kawedo mono ɗahabur olenage kalebana ta aronai Yesus ta jongaɗa ata buta. 20Kolei Yesus ɓana etawe ai ananage madakkage hatenaɗa, Nyi malinage tabara naɗa ata kalikku, “Oleɓai, jalam hawalɓegud.”
21Raɗa gurr agama ata Yahudi mono ata walta kalibbo Farisi halegeɗage ɓaɗa hakanuka wikna lar ta ateɗa, “Iyai naɗe ata kabaan atena paddai Alla? Dukai Alla ɗahei kahawalna doku-jalaǃ”
22Yesus natadawe nahanukaɗa. Nyiwe malina, “Ahami mam kanuka tauɗage lar ta atemi? 23Giɗahoge kalewara ɓag takwe tabara naɗa ata kalikku, ‘Doku-jalamu hawalɓegudi,’ enga walem hatenaꞌmawe oroge aim eta waina mata, nyiɗawe malugɗage, ‘Kaɗewu mono kamkakowuǃ’ 24Tannam kamtadawe, ta pan-tana, Nauwa Ana-Na Kaɗaꞌ Ata kawahage hawalna doku-jala.” Malinagei Yesus tabarana ata kalikku, “Kaɗewu, ɗeketawe kalebam mono kamhagga!”
25Hawingnage kaɗe ta aro tangngaɗa. Nakeketawe kalebana mono nahagga hagapege ɗaikayi Alla.
26Tangngaɗa ɗaɓangara hingna mono ɗahangatara maɗa ɗaikayi Alla maliɗage, “Ɓalang takkawe ha etada nehe laɗo!”
Yesus namaikani Lewi
(Mat. 9:9-13; Mrk. 2:13-17)
27Kole ɓana huunai Yesus wal neꞌ ta umma, na etai wu ata kakahha walkatak kangaranai Lewi, kangoɗo ta umma hadau kahha walkatak. Malinagei Yesus tabarana, “Ɗoukga Nauwa.” 28Lewi kaɗenage mono natannad tangngadi, maɓegge kakonage ɗokuni Yesus.
29Ɓewe neꞌnage, Lewi narayige woleka tutnai Yesus ta ummana. Buta ata kakahha walkatak mono ata heka ʄala kaɗoukna yaa ɗangadi. 30Kapirrana ata walta kalibbo Farisi mono kapirrana gurr agama walta kalibboɗa, walɗa baiꞌmage, maliɗage ɓaɗa hanewe tabaraɗa ana hakodo halolenai Yesus, “Walena dahhaꞌmawe ɓam yaa-en ɗangadi raɗa ata kakahha walkatak mono ata aika dahha.”
31Balehanai Yesus, “Ata aika kalawara walena mayegaꞌmana dotera, dukka ata kalawaraɗahe. 32Nauwa maigu, wale kamaikaꞌmaguge ata kapaɗa wikna dahha, tabolo maigu tutnage ata doku-jala tannam kaɗa ʄarra.”
Lii-hatuʄa tutge ainaɗaꞌwe ɓahayaɓoradi lii-hanuwa beir waltai Yesus mono lii-hanuwa memaɗa ata Yahudi
(Mat. 9:14-17; Mrk. 2:18-22)
33Raɗa ata ɗahanewe tabarai Yesus, “Kaɗokuni Yohanis mono kaɗokud ata walta kalibbo Farisi, dut aiɗa yaa-enu mono dut habayang. Tabolo kaɗoku-Gu engage ɓaɗa yaa mono ɓaɗa enu.”
34Yesus nabalehawe, “Naɗaꞌkaꞌwe tangngaɗa kullam ɓam halewai ai yaa-en ta til woleka ha ummana, tangrage naɗa kaɓaan kaha ummana ɓa ɗaahod olena? Ɗoukɗage waleꞌma! 35Tabolo enga ɗikge rahge kaɓaan kaha ummana ɓa ngalai wal tabaraɗa. Nyiwe neɗala aiɗa yaa-enu.”
36Maɓeggei Yesus nahalarawe tabaraɗaː raɗa ata kaɗoukɓedi lii-hanuwanai Mori kaberu, iyaɗahil ɗoukad lii-hanuwaɗa kamema. Nyi nawain wu lii-hatuʄa, kalinana, “Walaꞌma wu ata kaɗabarawe kalabbe mema waige kadipka walta kalabbe beru. Oroge ɓa hirraɗahowe kalabbe beru. Mono ɓaɗoukɗage kaba haɗabarawai kaber walna hameraꞌmawe ta kalabbe kamema. 37Tauɗa ʄalage laꞌma wu ata kahalal wee anggur kaber ta kaleku kalita kamema, oroge wee anggur kaberu, naɗaꞌ ɗangaɗalge naɗa kaleku ɓana namajirraka. Lohho wee anggur nama jokuwe mono naɗa kaleku wale hil ingtaꞌman wain. 38Wee anggur kaber halalɗahowe lar ta kaleku kaber ʄala. 39Walelaꞌma ata kabaina en anggur kaberu ɓana baꞌ dammaka enu wee anggur kamema, oroge enga linaɗage, “Wee anggur kamema atɗahoge dahhage.”
Sélection en cours:
Lukas 5: lmy
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2024 (Active), Wycliffe Bible Translators, Inc. All rights reserved.