यहुन्ना 9
9
जनम रईन आंधवा द्रूष्टिदान
1जातु जातु त्यो एक मानसो काजे देख्यु जु जनम रईन आँधवु हतु। 2हेरेन चेला ओका सी पुछा, “हे गुरू, कुन पाप कर्यु हतु कि यु आँधवु जनायु, यु मानसन क ओका आवी–बासन?” 3ईशु जवाब देदु, “नी ते यु पाप कर्यु हतु, नी ओको माय बास; पुन एरकरीन हुयो क यहोव–भगवानन काम ओका प्रकट होय।” 4जु मखे मकल्यु छे, हामु हेरेन कामन दाहाड़ाम काम करनो जरूरी छे; ची रात आवनेवावी छे जीनाम कोय काम नी कर सके। 5#मत्ती 5:14; यहुन्ना 8:12जव तक हाव जगत मा छे, तव तक अमरकाय प्रकाश छे। 6यो कयीन त्यो धरती पर थूकलु, आरू तीन थूकसे धरती जारयु, आरू त्यो धरती तीन आंधवान डुवा पर लागाड़ीन 7त्यो कयो, “जा, शीलोहन ढाबरू मा धुव ले” शीलोहन मतलब मकल्यु छे। त्यो जाईन धुव्यु, आरू देखतु ओसु वापस आयु। 8तव साथेवावा आरू जा पेहल उका भीख मांगता देख्या हता, कयनो लाग्या, “काय यु त्यो नी, जु भोठि भोठिन भीख मांग्या करे हतु?” 9काहय मानसे कयो, “यु त्यो छे” दिसरा कयो, “नी, पुन ओका सारको कोय दिसरो छे।” त्यो कयो, “हाव त्योज छे।” 10तव चाँ उका पूछने लाग्या, “तार डुवा कोसा खुल गया?” 11त्यो जवाब देदु, “ईशु नावन एक व्यक्ति धरती जारयु, आरू मार डुवा पर लागाड़ीन मखे कयो, शीलोह मा जाईन धुव ले, शेवली कावा हाव गयु आरू धुव्या आरू देखने लाग्या।” 12चाँ यकाह पूछा, “त्यो क छे?” हेरेने कयो, “हाव नी जानतु।”
फरीसियान द्वारा हारगायन जाच–पड़ताल
13मानसे उका जा पेहल आंधवा हुता फरीसियान साथे ली गया। 14जीन दाहाड़े ईशु धरती जारीन हेरेन डुवा उगड़या हता, त्यो सब्तन दाहाड़ा हता। 15पछु फरीसिया ने भी उकासे पुछा कि हेरेन डुवा काहनी रीति रईन खुल गया। त्यो ओका सी कयो, “त्यो मारा डुवा पर धरती लागाड़ ्यु, पछु हाव धुव लेदु, आरू हिमी देखतु छे।” 16ओको पर काहय फरीसि कयनो लाग्या, “यु मानुस यहोवा–भगवानन तरफ से नी, काहकि यु सब्तन दाहाड़ा नी मानता।” दिसरा कयो, “पापी मानुस ओसलो सहलानी कोसो देखाड सकतु छे?” अळते: ओकामा फूट पड़ गय। 17चाँ उका आंधवा काजे पछा कयो, “हेरेने तारा डुवा खुल्या छे। तु हेरेन विषयमा काय कयता छे?” त्यो कयो, “त्यो भविष्यवक्तु छे।”
18पुन यहूदि या विश्वास नी होयु कि त्यो आँधवु हतु आरू हिमी देखतु छे, जव तव हेरेन, जीनान डुवा खुल्या गया हता, त्यो आया–बास बुलावीन 19त्यो नी पुछा, “काय यु तारू पोर्य छे, जीनाक तु कयतु छे कि त्यो आँधवु जनायु हतु? मग हिमी त्यो कोसु देखाये छे?” 20तारा माय–बास जवाब दिदा, “हामु ते जानता छे कि यु आमरो पोर्य छे, आरू आँधवो जनायु हतु; 21पुन हामु यो नी जानता छे कि हिमी कोसु देखातो छे, आरू नी यो जानता छे कि कुन तेरा डुवा उघड्या। त्यो उगाड़ ़ीयो, ओका सी पुछ लेवु; त्यो आपसा विषय मा आपसु कय देसे।” 22यी वात तेरा आय ने बास अतरान करीन कयो काहकि चे यहूदि या रईन बीहता हुता; काहकि यहूदि या एकु होय गया हता कि यदि कोय कयो कि त्यो मसीह छे, ते आराधना घर घर रईन काहड़ दिदा जासे। 23इनान कारण हेरेन आयस–बास कयो, “त्यो उगाड़लो, ओका सी पुछ लेवु।”
24तव हेकोने उका मानसो काजे जु आँधवु हतु, दिसरी वार बुलावीन उका कयो, “यहोवा–भगवानन बढ़ाई करू। हामु ते जानता छे कि त्यो मानसु पापी छे।” 25त्यो जवाब देदु, “हाव नी जानतु कि त्यो पापी छे क नी; हाव एक वात जानतु छे कि हाव आँधवु हतु आरू हिमी देखतु छे।” 26हेकोने ओका सी पछु कयो, “त्यो तार साथे काय कयो? आरू कोसो करीन तार डुवा खुल्यु?” 27त्यो ओका सी कयो, “हाव ते तुखे कय त्योक्यु, आरू तु नी सोंब्यु; आरू दिसरी वार काँ सोंबवन्यु चाहतु छे? काय तुमू भी हेरेन चेला होयन्या चाहता छे?” 28तव चाँ उका बुर–भला कयीन बुल्या, “तुच हेरेन चेलु छे, हामु ते मूसान चेला छे। 29हामु जानता छे कि यहोवा–भगवान मूसा साथे वात कर्यु; पुन इनीये मानसो काजे नी जानता कि कावावु छे।” 30त्यो ओका सी जवाब देदु, “यो ते विनछळाय वात छे कि तु नी जानतु कि त्यो कावावु छे, तौभी हेरेने मार डुवा खुल देदु। 31हामु जानता छे कि यहोवा–भगवान पापीन नी सोमवीन छे, पुन यदि कोय यहोवा–भगवानन भक्त रवे आरू हेरेन मरजी पर चालता छे, ते त्यो हेरेन सोमवीन छे। 32जगन शुरूवात रईन यो कदी सोंबवने मा नी आयो कि त्यो हमेशान आंधवान डुवा खुल गया छे। 33यदि यु मानुस यहोवा–भगवानन तरफ छे नी रोवतु, ते काहय नी कर सकतु छे।” 34त्यो उको जवाब देदु, “तु ते बिलकुल पापो मा जनायु छे, तु हामु काय सिकाड़तु छे?” आरू हेकोने उका बाहरते निकाव देदु छे।
आत्मिक आंधवा
35जव ईशु सोंब्यु कि हेको उका बाहर निकाव देदु छे, आरू जव उकासे भेंट होयी ते कयो, “काय तु यहोवा–भगवानन पोर्या पर विश्वास करे?” 36त्यो जवाब देदु, “हे पोरबु, त्यो कुन छे, कि हाव उका पर विश्वास करो?” 37ईशु उका कयो, “तु उका देख्यु भी छे, आरू जु तार साथे वात कर्यु छे त्यो त्योच छे।” 38त्यो कयो, “हे पोरबु, हाव विश्वास करे।” आरू उका पुजा कर्या। 39तव ईशु कयो, “हाव इनीये जग मा नियावन करता आयु छे, ताकि जो नी देखता चो देखे, आरू जो देखता छे चाँ आंधवा होय जाय।” 40जा फरीसि हेरेन साथे हता हेकोने यी वात सोमवीन ओका सी कयो, “काय हामु भी आंधवा छे?” 41ईशु ओका सी कयो, “यदि तुमू आंधवा रवता ते पापी नी बनतो; पुन हिमी कयता छे कि हामु देखता छे, एरकरीन तुमरू पाप बवणु रोवतु छे।”
Sélection en cours:
यहुन्ना 9: NTDii20
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
The New Testament in Dhankavi Language © The Word for the World International and Dhankavi Mandli, Khargon, Raykhed, Nandurbar, Maharashtra 2020
