MAT 3

येशु ख्रिस्तद गालील प्रांतलोनदी सेवा — 3:1—18:35

योहान बाप्तिस्मा इच्चेतोनदी संदेश

1काही यंडलु आयनेंका बाप्तिस्मा शेशेतोड योहान, यहुदीया प्रांतलोन मरु भुमीला#3:1 मरु भुमीला यंदु येमीच उगायाद, बंजर भुमी वच्ची इल्ला घोषणा शेशेदेंक आंट्या की, 2“मना पापलाकेल परमेश्वर तीकुड तिरगुना, येनटीक की स्वर्गद राज्य देगार वच्चीनाद.”

3येनटीक की यशया संदेष्ट्यान तीकेल योहान बद्दल इल्ला शप्पीनेद उंड्या की,

“मरु भुमीला घोषणा शेशेतोनदी आवाज आय्या;

‘परमेश्वरदी दावा तैयार शेयना,’

वानदी ‘दावा सरळ शेयना.’”#3:3 येनटीक की यशया संदेष्ट्यान तीकेल योहान बद्दल इल्ला शप्पीनेद उंड्या की, “मरु भुमीला घोषणा शेशेतोनदी आवाज आय्या; ‘परमेश्वरदी दावा तैयार शेयना,’ वानदी ‘दावा सरळ शेयना.’” मत्तय यशयाड आनीने माटलान राशीनाड दिनिचांग की परमेश्वरदी राज्य वच्चेदेंक मंदीक तैयार निलचेद आवश्यक उंडाद वारकी पश्चात्ताप शेशेद इंगा परमेश्वरकी वच्चेदेंक मनाद अंतकरण इंगा जीवननी तैयार फेट्टेद आवश्यक उंड्या, यशयाड दिनदी बराबरी प्रभुन प्राप्त शेशेदेंक दावा शिंगार शेशेदेंक शेशा.#यशया 40:3.

4इ योहानी बट्टाल वंट्या यंडकाली उंड्या, वान नडमुलाक तोलुद पट्टा उंड्या. वानदी आन्नाम मिडताल इंगा आडवी तेन्या उंड्या. 5आप्पुड यरुशलेम शहर, यहुदीया प्रांत इंगा यार्देन वंका देगाटोर आंता प्रदेशलोन मंदी वान देगार वानदी संदेश इनेदेंक वच्चीर. 6वार वारी पापलु कबुल शेशी, यार्देन वंकाला वान शेयता बाप्तिस्मा तिस्कुनीर.

7पण यप्पुड योहान बाप्तिस्मा इद्‍दु शेंगेम परुशी#3:7 परुशी परुशी वगाट यहुदी धार्मिक समुह उंड्या वार फाता करारलोन नियमलाद काळजीता पालन शेयदुर इंगा इंगोगो नियमलु पण जोडशीर वारदी यहुदी मंदीला धार्मिक समुह उंड्या इंगा बाकीचे यहुदी मंदी वारदी शेंगेम सन्मान शेयदुर इंगा सदुकी#3:7 सदुकी सदुकी इदी इंगोगोट यहुदी धार्मिक समुह उंड्या वार फाता करारलोनी फक्त नियमलु पाळायदुर इंगा वार इंगोगोय याईच नियमलु जोडवालेव पण वार परमेश्वर दुतलु, आत्माल इंगा सच्चीनोर लोन्केल लेशीन दिंटल्या विश्वास फेट्टा कुंदुर, वार काही ग्रीक विचारलाद पण स्वीकार शेशीर वार वगाट शिन्ना समुह उंडीर पण वार देगार शेंगेम राजनैतिक शक्ती उंड्या, वार शेंगेम श्रीमंत उंडीर. मंदी आदी सुशेदेंक वच्चेताप्पुड सुशी वाड वारनी आन्या, “हे जहरी फाम फिल्लालाला, वच्चे शिट्ट तीकेल फारेदेंक मिमलान यवार चेतावनी इच्चीर? 8तर पश्चात्तापकी योग्य इल्ला फळ इंडा; 9इंगा अब्राहाम तर ‘मा आब्बाड उंडाड’, इल्ला वगार-मेगारनी आनेद विचार मी मनला शेयाकुंडा ; येनटीक की निन मिक शपतान, परमेश्वर इ राळाता अब्राहाम इचांग बिळ्ळु तैयार शेशेदेंक समर्थ उंडाड. 10इंगा शट्‍टु बोड्याक गोडली फेट्टीनेद उंडाद; याद शट्‍टु शिंगार फळ इयाद आदी प्रत्येक शट्‍टु तेम्पेदेंक वच्ची इंगा आग्गीला येशेदेंक वच्ची.

11निन मिद बाप्तिस्मा पापलाकेल परमेश्वर तिकुड तिरगेदेंक नेळाता शेस्तुनान; पण ना यंकाटेल वच्चेतोड उंडाड वाड ना काना महान उंडाड इंगा वानी बुटलु येत्ते लायकीक पण निन लेन; वाड मिद बाप्तिस्मा पवित्र आत्माता इंगा आग्गीता शेशी. 12वान शेतल्या वानदी शाटा उंडाद, वाड वानदी शेन एकदम स्वच्छ शेशी इंगा वानी गोदमाल गाद्याला जमा शेशी; पण भुसा आराक फोई इल्लोन आग्गीला कालचेस काडी.”

येशुनदी बाप्तिस्मा

13आ दिनमुलाला येशुड गालील प्रांतकेल यार्देन वंका देगार योहान शेयता बाप्तिस्मा#3:13 बाप्तिस्मा वगा मनशीन नेळाला मुंचेद धार्मिक फनी तिस्कुना वान देगार वच्या; 14पण योहान वान थांबायमती आन्या, नाक नी शेयता बाप्तिस्मा तिस्कुनेद गरज उंडाद, तर नु ना देगार येनटीक वच्चीनाव? 15पण येशुड वानकी उत्तर इच्या, “इप्पुड इल्ले कानी; येनटीक की परमेश्वरदी येम इच्छा उंडाद आद्दे मनाम शेयाला इदी योग्य उंडाद.” दिनिचांग योहान वानकी बाप्तिस्मा इच्चेदेंक सहमत आय्या. 16मंग येशुनदी बाप्तिस्मा आयनेंका, येशुड नेळा लोन्केल बैटीक वच्या इंगा सुडना, मोडाम उघडाशा; आप्पुड परमेश्वरदी पवित्र आत्मान कबुतर लेका दिगेताप्पुड इंगा वान मिंदा वच्चेताप्पुड सुशा, 17इंगा स्वर्ग लोन्केल आवाज वच्या की, “इड ना प्रिय ‘कोडकु’ उंडाड, इन बद्दल निन शेंगेम आनंदीत उंडान.”#स्तोत्रसंहिता 2:7.

Sélection en cours:

MAT 3: WNT

Surbrillance

Copier

Comparer