Maale - 2007 Edition (NT) Drama

Maale New Testament © Bible Society of Ethiopia, 2007.

ዬሱሴ ሃሣ ኬኤዛዖ፦ «ፆኦሲ ዒንሢዳ ዎጉዋጉዲ ዖናኣ ‹ዒ ፑርታኬ› ጌይ ዎጊፖቴ፤ ዒንሢ ዎጌ ጎይፆማ ዒንሢም ዎጊንታንዳኔ፤ ዒንሢ ማኬ''ማና ዒንሢም ማኪ''ንታንዳኔ። ኔ ዓኣፖይዳ ዓኣ ዼኤፖ ቡኡሮ ዴንቁዋዖ ኔ ላጋሢኮ ዓኣፖይዳ ዓኣ ዻኮ'' ቡኡሮማ ዓይጋ ኔ ዛጋይ? ኔ ዓኣፖይዳ ዼኤፒ ቡኡራ ዓኣንቴ፥ ‹ኔኤኮ ዓኣፓፓ ዻኮ'' ቡኡሮማ ታ ኬሶ''ም› ዎይቲ ኔ ጋዓኒ ዳንዳዓይ? ሃይ ኔ ሄርሺንታሢ ሃይ! ቤርታዺ ኔኤኮ ዓኣፓ ዓኣ ዼኤፖ ቡኡሮ ኬሴ''፤ ዬካፓ ኔ ላጋሢኮ ዓኣፓ ዓኣ ዻኮ'' ቡኡሮማ ኔ ዴንቂ ኬሳ''ንዳኔ። ፆኦሲም ዱማዼ፥ ጌኤዦ ባኮ ካናቶም ዓጊፖቴ፤ ሃሣ ሚዛጶ ሹጮ ጉዱንፆ ቤርታ ኬኤሪፖቴ፤ ዓይጎሮ ጌዔቶ ጉዱንፃ ዬያ ሚዛጶ ሹጮ ቶኪና ሄ'ርቃንዳኔ፤ ካናታ ሃሣ ጊንሣ ሺሪ ዒንሢ ዻዓንዳኔ» ጌዔኔ።


ዬሱሴ ሃሣ ኬኤዛዖ፦ «‹ሺኢቁዋቴ ዒንሢም ዒንጊንታንዳኔ፤ ኮዑዋቴ ዒንሢ ዴንቃንዳኔ፤ ካራ'' ዔቂ ዔኤሉ''ዋቴ ካራ'' ዒንሢም ቡሊ''ንታንዳኔ። ሺኢቃሢም ቢያ ዒንጊንታንዳኔ፤ ኮዓሢያ ዴንቃንዳኔ፤ ካራ'' ዔቂ ዔኤላ''ሢማኣ ካራ'' ቡሊ''ንታንዳኔ።› ‹ዒንሢ ባኣካ''ፓ ናዓ ካሣ ሺኢቃዛ ሹቺ ዒንጋ ዓዴ ዓኣ? ሃሣ ጊንሣ ዓሽኪ ሺኢቃዛ ሾኦሺ ዒንጋይ ዓኣ? ዓካሪ ዒንሢ ፑርታታዖ ዒንሢ ናኣቶ''ም ኮሺ ባኣዚ'' ዒንጊ ዔራቶ፥ ዒንሢኮ ጫሪንጮይዳ ዓኣ ዓዳሢ ዒዛ ሺኢቃዞንሢም ኮሺ ባኣዚ'' ዒንጋንዳሢ ባሼና ዔራኔ። ሜሌ'' ዓሳ ዒንሢም ማዻንዳጉዲ ዒንሢ ኮዓ ባኮ ዒንሢያ ዔያቶም ማዹዋቴ፤ ሙሴ ዎጎና ፆኦሲ ማሊፆ ኬኤዛ ዓሶናኮ ዔርዚፃ ያዺ ጋዓኔ› » ጌዔኔ።


ዬሱሴ ሃሣ ኬኤዛዖ፦ «ኩንዖ ካሬ''ሎና ጌሉዋቴ፤ ዓይጎሮ ጌዔቶ ባይሲንቶ ባንሢ ጌልዛ ካራ'' ዳልጊ፥ ዔኪ ዓኣዻ ጎይፃኣ ዳልጊኬ። ዬኖ ባንሢ ጌላንዳ ዓሳ ሚርጌኬ። ናንጊ ባንሢ ጌልዛ ካራ'' ጋዓንቴ ኩንዔ፥ ጎይፃኣ ሜታሳያኬ፤ ዬያሮ ዬኖ ጎይፄሎና ጌላንዳ ዓሳ ዻካ''ኬ» ጌዔኔ።


ዬሱሴ ሃሣ ኬኤዛዖ፦ «ጋሮና ሙዓ ያኣዮታዖ፥ ማራይ ጉፓሌ ማይንቲ ዒንሢ ባኣኮ'' ጌሊ ዒንሢ ባይዛኒ ማላ ሉኡቂ ‹ፆኦሲ ማሊፆ ኬኤዛኔ› ጋዓዞንሢዳፓ ካፒንቱዋቴ። ዒንሢ ዔያቶኮ ማዾ'' ዓኣፖይዳፓ ዔራንዳኔ፤ ጋውዲዳፓ ኩሩንቱሼ፤ ሓሣ ጋኣላንሣይዳፓ ሻኣቢ ማንፂንታ? ዬያጉዲ ኮሺ ሚሢ ቢያ ኮሺ ዓኣፒ፥ ፑርታ ሚሢ ሃሣ ፑርታ ዓኣፒ ዓኣፓኔ። ኮሺ ሚሢ ፑርታ ዓኣፒ፥ ፑርታ ሚሢ ኮሺ ዓኣፒ ዓኣፓኒ ዳንዳዑዋሴ። ኮሺ ዓኣፒ ዓኣፑዋ ሚሢ ቢያ ቲቂንቲ ታሚዳ ዓጊንታንዳኔ። ዬያሮ ሉኡቂ ፆኦሲ ማሊፆ ኬኤዛኔ ጋዓ ዓሶኮ ማዾ'' ዓኣፖይዳፓ ዒንሢ ዔራንዳኔ።
«ጫሪንጫ ዓኣ ታ ዓዶ ማሊፆ ኩንሡዋዖ ‹ጎዳሢዮ፥ ጎዳሢዮ› ጋዓሢ ቢያ ጫሪንጮ ካኣቱሞይዳ ጌላዓኬ። ዓጮ''ይዳ ፆኦሲ ዎጋ ኬሎ'' ሚርጌሢ ‹ጎዳሢዮ! ጎዳሢዮ! ኔ ሱ'ንፆና ፆኦሲ ማሊሢ ኑ ኬኤዚባኣዓዳ? ኔ ሱ'ንፆና ፑርታ ዓያና ዓሶይዳፓ ኑ ኬሲ''ባኣዓዳ? ኔ ሱ'ንፆና ማዺንታ ሚርጌ ዓኪ ባኣዚ'' ኑ ማዺባኣዓዳ?› ጋዓንዳኔ። ዬኖ ዎዶ''ና ‹ፔቴ''ታዖ ታ ዒንሢ ዔሩዋሴ፥ ዒንሢ ፑርቶ ዓሳ ታ ኮይላ''ፓ ሺኢኩዋቴ!› ጌዒ ፔጌና ታ ዔያቶም ኬኤዛንዳኔ» ጌዔኔ።


ዬሱሴ ሃሣ ኬኤዛዖ፦ «ዓካሪ ሃያ ታኣኮ ቃኣሎ'' ዋይዚ ማዻ ዓሢ ማኣሮ ዶዲ ቤስካ ዶዲሺ ማዤ ጪንጫ ዓሲ ማላኔ። ዼኤፒ ዒርዚ ዋርቄም ዲጳ ኩሚ''፥ ዢባሬያ ዢባርሼኔ፤ ጋዓንቴ ዬይ ማኣራሢ ዶዲ ቤሲዳ ማዢንቴሢሮ ዶዒባኣሴ።
«ሓያ ታኣኮ ቃኣሎ'' ዋይዚ ማዹዋኣሢ ጋዓንቴ ማኣሮ ማኣሻላይዳ ማዤ ቦኦዛ ዓሲ ማላኔ። ዼኤፒ ዒርዚ ዋርቄም፥ ዲጳ ኩሚ'' ዢባሬያ ዢባርሻዛ ዬና ማኣሬላ ቤዞና ጋፒ ዶዔኔ» ጌዔኔ።
ዬሱሴ ዬያ ባኮ ኬኤዚ ጋፒሳዛ ዴራ'' ዒዛኮ ዔርዚፆና ዲቃቲ ሄርሼኔ። ዓይጎሮ ጌዔቶ ዒዚ ዔያቶኮ ዎጎ ዔርዛ ዓሶጉዲቱዋንቴ ዼኤፒ ቢታንቶና ዔርዛሢሮኬ።

להקשיב ל ማቲዎሴ 7