នាវ​ឞោក​អ៝ន់​ឞូ​គឹត​ល៝រ
នើម​អី​ញចីស​ឆ៝ម់បុត​អ្យា ឞូ​មឹន​លាស​ជេង​ មោឆេ (នវ ៣១:៩, ២៤; មក ៧:១០)។ ឞូ​មឹន​លាស​ពាង់​ញចីស​ឆ៝ម់បុត​អី​អ្យា នោក​ផូង​ អីឆ្រាអែល ​ឞ្រោៈ​រ៝ៈ​ឞ្រី​រាទាស ក្លាប់​លាស​តា​នាម់ ១៤៤៦-១៤០៦ អេ​ល៝រ​មា​ ឞ្រាស​យេឆូ ​ទែស។ នាវ​ងើយ​អើម​តា​ឆ៝ម់បុត​អ្យា​ជេង​នាវ​ងើយ​ ហេឞ្រើ កើត​មា​ឞើយ​ទឹង​លែៈ​នាវ​តា​នាវ​តឹម​រាង្លាប់​អើម។
ឆ៝ម់បុត​នាវ​នតើម​តា​នាវ​កោរាញ​ឞ្រាស​ងើយ មឞើស​ងក៝ច​នតើម​ញជេង​ត្រោក​ញជេង​នែស​នតូ នតើម​គែស​ឞូនុយ្ស​តា​នែស​នតូ នទ្រែល​មា​នតើម​គែស​ផូង​ប៝ន​លាន​ អីឆ្រាអែល ​អី​ប៝ន​លាន​កោរាញ​ឞ្រាស​នើម។ ឆ៝ម់បុត​អ្យា​មឞើស​ងក៝ច​មា​នតើម​គែស​នាវ​តីស​តា​ឞូនុយ្ស នទ្រែល​មា​នាវ​មឞើស​ងក៝ច​មា​កោរាញ​ឞ្រាស​នតើម​ច្វាយ​ឞូនុយ្ស​ឞើស​នាវ​តេៈ​ទោយ្ស​យ៝រ​មា​នាវ​តីស​ខាន់​ពាង់​ជាន។
នាវ​នតី​អាបាៈ​តា​ឆ៝ម់បុត​អ្យា
ឆ៝ម់បុត​នាវ​នតើម​អ្យា​លែវ​ឞូនុយ្ស​អ៝ន់​គឹត​នាល់​នាវ​ទាង់​នាវ​ទើយ​កោរាញ​ឞ្រាស​នើម។ ឞើស​នតើម​ឆាអើម​ឆាអាម ពាង់​លែៈ​ញជេង​ត្រោក ញជេង​នែស​នតូ នទ្រែល​មា​អ៝ន់​គែស​ទឹង​លែៈ​នទើ​តា​នែស​នតូ​អ្យា ជេសរី​ទឹង​លែៈ​នតីល​នទើ​តា​នែស​នតូ​អ្យា​គុ​តា​ន៝ម់​នាវ​ទើយ​កោរាញ​ឞ្រាស​នើម។ តីស​មា​ឞូនុយ្ស​ត៝ល់​ង្វាយ​មោ​អ្យាត់​នាវ​ដាៈ​កោរាញ​ឞ្រាស​នើម​(នន ៣:១-៦) នទ្រី​ទឹង​គែស​នាវ​តីស​តឺប​ទឹង​លែៈ​ឞូនុយ្ស​តា​នែស​នតូ​អ្យា។ ជេស​រី​កោរាញ​ឞ្រាស​ដាៈ​ឞូនុយ្ស​អ៝ន់​ជាន​ឞ្រាស​ងខឹត​មពោមពា គៃ​មា​ច្វាយ​ខាន់​ពាង់​ឞើស​នាវ​តេៈ​ទោយ្ស​ងខឹត​ខាន់​ពាង់​យ៝រ​មា​នាវ​តីស​អី​នៃ ជេសរី​កោរាញ​ឞ្រាស​ជាន​នាវ​តឹម​រាង្លាប់​នទ្រែល​មា​ឞូនុយ្ស​អាបាៈ។ កោរាញ​ឞ្រាស​ជាន​នាវ​តឹម​រាង្លាប់​នៃ​ដាស​ អាដាម់ (នន ១:២៦-៣០; ២:១៥-១៧; ៣:១៥) ដាស​ នោអេ (នន ៩:១១) នអ៝ប់​មា​ដាស​ អាឞ្រាហាម់ (នន ១២:១-៣)។ នាវ​តឹម​រាង្លាប់​ដាស​ អាដាម់ នទ្រែល​មា​នាវ​តឹម​រាង្លាប់​ដាស​ នោអេ ជេង​នាវ​តឹម​រាង្លាប់​ដាស​មា​ទឹង​លែៈ​ឞូនុយ្ស​ជឹត​នាប់​តៃ។ តា​នាវ​តឹម​រាង្លាប់​ដាស​ អាឞ្រាហាម់ ​អី​នៃ កោរាញ​ឞ្រាស​ត៝ន​មា​ពាង់ អ៝ន់​នាវ​គែស​ជេង​មា​ពាង់ អ៝ន់​ពាង់​ជេង​ទូ​ផូង​ក្វ៝ង់ នទ្រែល​មា​អ៝ន់​គែស​នាវ​គែស​ជេង​មា​ទឹង​លែៈ​ផូង​ឞូនុយ្ស​តា​នែស​នតូ​អ្យា​តាៈ​ឞើស​ពាង់។ តាៈ​ឞើស​ងកោៈ ១២ តា​ឆ៝ម់បុត​អ្យា​មឞើស​ងក៝ច​មា​រានាក់​វ៝ល់​ អាឞ្រាហាម់ នទ្រែល​មា​ក៝ន​ឆៅ​ពាង់។ ត៝ត់​អា​កើយ​នាវ​ត៝ន​អី​នៃ​គែស​ងាន់​តា​ ឞ្រាស​យេឆូ​ក្រីស ​អី​រាន៝យ​ទែស​ អាឞ្រាហាម់ ជេសរី​ទឹង​លែៈ​ឞូនុយ្ស​អី​ញឆីង​មា​ ឞ្រាស​យេឆូ​ក្រីស ​គែស​នាវ​គែស​ជេង​តាៈ​ឞើស​កោរាញ​ឞ្រាស។ កេង​លោច​ឆ៝ម់បុត​អ្យា​ផូង​ក៝ន​ឆៅ​ អាឞ្រាហាម់ ​អេ​ហ៝ៈ​អោស​ជេង​ទូ​ផូង​ក្វ៝ង់ យើន​មា​តា​ឆ៝ម់បុត​នាវ​ងលោស នាវ​ត៝ន​អ្យា​លែៈ​គែស​ងាន់។
នាវ​នតី​អាបាៈ​ជឹត​តា​ឆ៝ម់បុត​អ្យា នតី​មា​នាវ​កោរាញ​ឞ្រាស​ទុត​គែស​នាវ​ទើយ នាវ​រ៝ង់​ពាង់​មា​ផូង​ឞូនុយ្ស នាវ​គែស​នាវ​អុច​នត្រ៝ង់​ពាង់​មា​ផូង​ឞូនុយ្ស នាវ​រាប់​ជាប់ នាវ​ឆ៝ង់​ពាង់ នទ្រែល​មា​នាវ​ពាង់​តេៈ​ទោយ្ស​មា​ឞូនុយ្ស​ជាន​តីស ជេសរី​រាក្លាយ្ស​ឞូនុយ្ស​ឞើស​នាវ​តេៈ​ទោយ្ស​យ៝រ​មា​នាវ​យោៈ​នអាច​ពាង់។
មឞើស​នាវ​ខ្លៃ​តា​ងកោៈ​តា​ឆ៝ម់បុត​អ្យា
១:១—១១:៣២ នាវ​នតើម​ត្រោក នទ្រែល​មា​នែស​នតូ
១:១—២:៣ នាវ​ញជេង​ត្រោក នទ្រែល​មា​នែស​នតូ
២:៤—៤:២៦ នាវ​ងក៝ច​មា​ អាដាម់ នទ្រែល​មា​ អេវា នាវ​តីស​ត៝ល់​ង្វាយ នាវ​ងក៝ច​មា​ កាអីន នទ្រែល​មា​ អេបិល
៥:១—១០:៣២ នាវ​ងក៝ច​មា​ នោអេ នទ្រែល​មា​នាវ​ទាក​លេង​ទាក​ទើង
១១:១—១១:៣២ នាវ​ងក៝ច​មា​ប៝ន​ បាបិល
១២:១—៥០:២៦ នាវ​ងក៝ច​កោរាញ​ឞ្រាស​ក្វាល់​អូ​ចែ​ផូង​ អីឆ្រាអែល ​អ៝ន់​គឹត​នាល់ នទ្រែល​មា​យើក​មឞាស​មា​ពាង់។
១២:១—២៥:១៨ នាវ​ងក៝ច​មា​ អាឞ្រាហាម់
២១:១—៣៥:២៩ នាវ​ងក៝ច​មា​ អីឆាក់ ​អី​ក៝ន​ អាឞ្រាហាម់
២៥:១៩—៣៧:១ នាវ​ងក៝ច​មា​ យាកោប ​អី​ឆៅ​ អាឞ្រាហាម់ ទឹង​គែស​តេៈ​រាញា « អីឆ្រាអែល »។ យាកោប ​គែស ១២ នុយ្ស​ក៝ន​ឞូ​ក្លោ អី​នៃ​ជេង​គែស ១២ រាន៝យ​មពោល​តា​ផូង​ អីឆ្រាអែល ។
៣៧:២—៥០:២៦ នាវ​ងក៝ច​មា​ យោឆែប ជេង​ទូ​ហ្វេ​តា ១២ នុយ្ស​ក៝ន​ យាកោប ​នៃ។

להקשיב ל នាវ​នតើម នាវ​ឞោក​អ៝ន់​ឞូ​គឹត​ល៝រ

להקשיב ל នាវនតើម នាវឞោកអ៝ន់ឞូគឹតល៝រ