Altai, Southern - 2013 Edition (NT)

Элдеҥ озо Сӧс болгон, Сӧс Кудайда болгон, Сӧс Кудай болгон. Ол элдеҥ озо Кудайда болгон. Ончозы Оноҥ бӱдӱп, јӱрӱп јат, Ол јогынаҥ не де бӱтпеген. Оныҥ Бойында јӱрӱм болгон, ол јӱрӱм улуска јарык болгон. Јарык караҥуйда јарыйт, караҥуй оны бӱркеп болбогон.
Кудайдаҥ ийилген кижи табылган, оныҥ ады-јолы Иоанн. Ончозы ол ажыра Ого бӱтсин деп, ол керелеерге, Јарыктыҥ керечизи болорго келген. Ол бойы јарык болбогон, је Јарыктыҥ керечизи болорго келген. Бу јер-телекейге келип турган кажы ла кижини јарыдар чын Јарык болгон. Ол телекейде јӱрген, телекей Оноҥ бӱткен, је бу телекейдиҥ улузы Оны таныбаган. Бойыныҥ улузына келген, је улузы Оны јуутпаган. Оны јуудып, Ого бӱткен улуска дезе Кудайдыҥ балдары болор јаҥ берген. Олор каннаҥ туулган эмес, эт-канныҥ кӱӱнинеҥ эмес, эр кижиниҥ кӱӱнинеҥ эмес, Кудайдаҥ туулгандар.
Ол Сӧс кижи болуп калды, ортобыста јӱрди. Бис Оныҥ магын кӧрдибис, бу макты Ол Аданыҥ сок јаҥыс Уулы болуп алган. Ол јакшылыкла, чындыкла толо болгон. Иоанн Оны керелеп, јарлаган: «„Кийнимнеҥ келип јатканы мениҥ алдымда болуп калды, нениҥ учун дезе менеҥ озо бар болгон“ деп айтканым бу». Оныҥ толозынаҥ ончобыс јакшылыкка ӱзеери јакшылык алдыбыс. Јасак Моисейдеҥ берилген, јакшылык ла чындык дезе Иисус Христостоҥ болды. Кудайды кем де, качан да кӧрбӧгӧн. Оны биске Аданыҥ ӧзӧгинде јӱреечи сок јаҥыс Уулы ачкан.


Бат, Иоанныҥ керези.
Иоанн кем болгонын сурап уксын деп, иудейлер Иерусалимнеҥ абыстарды ла левиттерди ийерде, ол ачыгынча јарлаарынаҥ мойнобой,
– Мен Христос эмезим – деп јарлаган.
– Айдарда, сен кем? Илия ба? – деп сурагандар.
Ол «јок» – деген.
– Јарлыкчы ба? – дешкендер.
Ол «јок» – деген.
– Сен кем болорыҥ? – деп, ойто сурагандар. – Бисти ийген улуска бис каруу берер учурлу. Бойыҥды бойыҥ кем деп адайдыҥ?
Ол айткан:
– Исаия јарлыкчыныҥ айтканыла, мен – «Кайраканга јол тӱзедип салыгар!» деп, куба чӧлдӧ кыйгырганныҥ ӱни.
Ийилген улус дезе фарисейлердеҥ болгон. Олор оноҥ сурагандар:
– Сен Христос эмес болзоҥ, Илия да, јарлыкчы да эмезиҥде, улусты не крестейдиҥ?
– Мен суула крестеп јадым – деп, Иоанн каруу јандырган. – Је ортогордо Турганы бар, Оны слер билбезигер. Ол кийнимнеҥ де келип јаткан болзо, мен Оныҥ ӧдӱгиниҥ буузын да чечерге турбазым.
Бу керек Вифанияда, Иордан ары јанында болгон. Анда Иоанн улусты крестеп јӱрген.
Эртезинде Иоанн ого базып келеткен Иисусты кӧрӧлӧ, айтты:
– Бу телекейдиҥ улузыныҥ кинчегин кедери алып јаткан Кудайдыҥ Курааны бу. «Кийнимнеҥ Эр кижи келедири, Ол мениҥ алдыма турар болды, нениҥ учун дезе Ол менеҥ озо бар болгон» деп, байа айтканым бу. Мен Оны билбегем, је Израильге Ол ачылзын деп, улусты суула крестеерге келген эдим.
Иоанн керелеп, айтты:
– Теҥеридеҥ кӱӱле чилеп тӱжӱп келеле, Оныҥ ӱстинде јӱрген Тынды кӧргӧм. Мен Оны билбес болгом, је суула кресте деп, мени ийгени Бойы меге мынайда айткан: «Кемге Тын тӱжӱп, Оныҥ ӱстине туруп калганын кӧрӧр болзоҥ, Агару Тынла крестеечи Ол». Мен кӧрдим, Ол Кудайдыҥ Уулы деп кереледим.

Эртезинде Иоанн база ла анда турган, ӱренчиктериниҥ экӱзи кожо болгон. Базып отурган Иисусты кӧрӧлӧ, ол айтты:
– Кӧригер, бу Кудайдыҥ Курааны!
Эки ӱренчик оныҥ сӧзин угала, Иисустыҥ кийнинеҥ бардылар. Иисус дезе кайра баштанып, олордыҥ келип јатканын кӧрӧлӧ, айтты:
– Слерге не керек?
Олор:
– Равви! – дедилер. (Равви дегени, Ӱредӱчи дегени.) – Јадып турган јериҥ кайда эди?
Ол:
– Барып кӧригер – деди.
Олор барып, јадып турган јерин кӧрӧлӧ, ол кӱн Оныла кожо болдылар. Тӧрт саат кирези тӱш болгон.
Иоанныҥ айтканын угуп, Иисусла кожо барган экӱниҥ бирӱзи Симон-Петрдыҥ карындажы Андрей болгон. Ол Симон агазын озо табала, ого айтты:
– Бис Мессияны таптыс.
(Мессия дегени, Христос дегени.) Ол Симонды Иисуска экелди. Иисус дезе, Симон јаар кӧрӧлӧ, айтты:
– Сен – Симон, Ионаныҥ уулы. Эмди Кифа деп адаларыҥ. Кифа дегени «Таш» (Петр) дегени.
Эртезинде Иисус Галилей јерине барар деп шӱӱди. Филиппти табала, ого айтты:
– Мени ээчий бас.
Филипп дезе Андрей ле Петр јаткан Вифсаида деп каладаҥ болгон. Ол Нафанаилди табала, айтты:
– Моисей Јасакта бичигенди ле јарлыкчылар бичигенди таптыбыс. Ол Иисус, Назарет јеринеҥ Иосифтиҥ уулы.
Је Нафанаил ого айтты:
– Назареттеҥ јакшы чыгар беди?
Филипп:
– Барып кӧр – деди.
Иисус, Бойы јаар базып келеткен Нафанаилди кӧрӧлӧ, ол керегинде айтты:
– Израильдиҥ чын кижизи бу, ондо меке јок.
– Сен мени кайдаҥ билериҥ? – деп, Нафанаил сурады.
– Сени Филипп кычыргалакта, смоква агаштыҥ алдында турганыҥды кӧргӧм – деп, Иисус каруу јандырды.
Нафанаил айтты:
– Равви! Сен – Кудайдыҥ Уулы, Сен – Израильдиҥ Кааны!
Иисус:
– Сени смоква агаштыҥ алдында турганыҥды кӧргӧм деп, сеге айтканым учун бӱдӱп јадыҥ. Мынаҥ артыкты кӧрӧриҥ – дейле, айтты: – Чынын, чынын айдадым слерге: эмдидеҥ ала теҥериниҥ ачылганын, Кудайдыҥ ангелдери Кижи Уулына кӧдӱрилип, тӱжӱп јатканын кӧрӧригер.

להקשיב ל Иоанн 1