maintained by the United Bible Societies for the Baltic Romani Mission

Javélas syg Svénko Apriesnokengiro, savó khardé Patradí, i rašángire barydyrá i lylvarítka dumindle, syr te muliakirén Isusós čorahanés, pal-dová so jone darándyne manušéndyr.

Tén'ci nálačho (satana) zagijá dro Judáskiro iló, savés khardé Iskarioto i jov sys jekh dešudujé sykliaibnytkonendyr. I jov gijá i rakirdiá rašángire barydyrénca i xaladytkone barydyrénca, syr te del Isusós dre vastá lénge. I jone obradyndlepe i dyné lav te den léske lové. Juda dyjá lav te kerél davá i lyjá te rodél lačhí vakancyja (slučajo), sob (kaj) te zdel Isusós na angíl manušénde.

Javdiá Apriesnokengiro Dyvés, kiéli treindiá te čhinen Patraditkone bakrores (Patradí). I bičhadiá Isúso Petris i Ianos, phení: “Džán i kerén Patraditko Xabén vaš aménge, sob (kaj) ame te xas les.” Ne jone phučné: “Kaj kamésa, sob (kaj) ame te kerás?” Isúso ž phendiá lénge: “Ĥáda, kiéli tumé javéna te zadžán dro fóro, tedy tumen pirilela manúš, savó javéla te lydžál pirí paniésa; džán pal léste dro kher, dro savó jov zadžála, i tumé phenén kheritkoné xuláske: ‘Sykliakiribnáskiro rakírla túke: ‘Kaj javéla štúba, sob (kaj) Me Péskire sykliaibnytkonénca te xav Patradí?’ I jov sykavéla upratuny bari štúba; odój kerén skamínd vaš aménge.’” I giné sykliaibnýtka i lathné, syr lénge Isúso phendiá i kerdé Patraditko Xabén.

I kiéli javdiá mardó (časo), Isúso besciá pal skamínd khetané dešudujé Apostolenca. I phendiá Jov lénge: “Me drieván kamdjom te xav davá Patraditko Xabén tuménca angíl dová, syr Mánge te vyrikirav mén'ki. I Me phenáva tuménge, so korigedýr (pozžedýr) daléstyr Me butýr na javáva te xav davá xabén, paka davá čačunó smyslo vaš Patradí kerélape ke kónco / jagóro (spolninelape) dro Devléskiro Kralipén dro Bolybnáskiro Rajo.” Tén'ci Isúso lyjá tahtái, phendiá parikiriben Devléske i phendiá: “Len davá i rosčhuven maškír péste. I Me phenáva tuménge: Me na javáva sarésa te pjáv aplodo vinagradoskire xrustostyr, paka javéla Devléskiro Kralipén dro Bolybnáskiro Rajo.” Tén'ci Isúso lyjá maró, parikirdia Devlés (Devléske), phagirdiá les, i dyjá lénge; rakirí: ‘Ĥáda, isyn Miré Masá, savé otdenape pal tuménde; davá adiáke i tumé kerén te ripirén pal Mánde.” Adiáke-pac' i tahtáj (čaša) korigedýr, syr jone xané maró, Isúso dyjá lénge, phení: “Kadavá tahtáj isyn nevó zavieto dro Miro rat, savó čhuvélape pal tuménde. I dykhén: adáj isyn vast kodoleskiro, kon isyn Mánca pal skamínd, i savó biknela Man; i Čhavó Manušéskiro džála pe meribén, syr Devléske isyn lačhó, ne bída kodolé manušéske, savó zdela Les.” I jone lyné te dophučen jekh jekhestyr, kon davá moginéla léndyr te javél, sob (kaj) te kerél davá.

I sys phučiben maškír lénde, konéske léndyr trej te ginelpe syr naj baredýr. I Isúso phendiá lénge: “Najudengire kral'jénde isyn pravo pe lénde, i léngire baré raja, savé xulainena, rakiréna, so jone keréna lačhipén manušénge. Ne te na javén adiáke maškír tuménde: savó isyn baredýr tuméndyr, te javél ternedyr; i savó isyn šeraló, te javél dynári (sluga). Pal-dová so, kon isyn baredýr; kodová, savó isyn beštó pal skamínd, ci kodová, savó podela pe skamínd? Kodová, savó isyn beštó pal skamínd. A Me som maškír tuménde, syr kodová, savó podela pe skamínd. Ne tumé vyterdine Mánca khetané dre Miré pharipena. I Me piridava tuménge kralítko pravo, syr Miro Dad piridyja mánge, sob (kaj) tumé te xan i te p'jen pal skamínd dro Miro Kralipén, i te bešén pe trony te sendinén dešudúj Izrailjoskire ródy.”

[I phendiá Raj Devél r.s.]: “Simonie, Simonie! Dykh ža, nálačho drieván zakamdiá te propatiakirel tumen sýrby te prosieinel tumen pir sito (porizen), syr prosieinena parnó giv, ne Me mangdjompe Devléske pal túte, sob (kaj) tyró patiaibén te na tyknjol, i tu, kiéli risjosa pale ke Me, tedy podrikiresa tyré pšalén.” I Pétri otphendiá Léske: “Rajo Dévla! Me som skedynó te džav Túsa i dre štaribén, i pe meribén.” I phendiá Isúso: “Me rakiráva túke, Pétri: bašno na probagala adadyvés angíl dová, syr tu trin móly otphenesape Mándyr.”

Tén'ci Isúso phendiá lénge: “Kiéli Me bičhadjom tumen bi mujéngiro (kapšukoskiro), bi sakvakiro i bi ĥeritkonengiro, ci sys trej tuménge vari-so?” Jone otphendlé: “Nad.” Tedy Isúso i phendiá lénge: “Ne kakaná konéste isyn mujengiro (kapšuko), mek te lel les: adiáke-pac' i sakva, konéste nane kurtála, mek te biknel péskiro uribén i te kinel kurtála, paldavá Me phenáva tuménge, so dová, so isyn čhindló, trej te spolninélpe Mánca: “Jov sys čhudo maškír rozmaribnar'jende”: pal-dová so saró, so isyn pal Mánde, syg končynelape.” Sykliaibnýtka phendlé: “Rajo Dévla! Adáj isyn duj kurtaly (sabli).” Isúso otphendiá lénge: “Uhtýlla (dósi).”

I gijá Isúso foróstyr i syr Jov prisyklyja, gijá pe Olivítko bérga, i Léskire sykliaibnýtka adiáke-pac' giné pal Léste. I kiéli Jov javdiá pe štéto, tedy phendiá lénge: “Mangénpe Devléske, sob (kaj) tumé te na perén dro propatiakiriben.” I Jov otgijá léndyr pe adákicy, pe kicý dočhurdesa bar, i terdijá pe čangá, i mangdiápe Devléske dasavé lavénca: “Dádo! Kóli te javél Tyrí vólia, lýdža davá tahtáj dre rig Mándyr; – ne te javél na Mirí, a Tyrí vólia.” I Jangólo bolybnástyr sykadyjá Léske i zorjakirdia Les. Isusóste sys pharó pe iló i Jov zoralés mangdiápe Devléske. Léskiri khamlyn (poto) sys, syr rateskire kapli (čolynia), so perenas pe phuv I kiéli Jov uštyjá mangipnastyr, tedy Jov javdiá pale ke sykliaibnýtka; i lathiá, so jone sys suté péskire tugatyr I phendiá Isúso lénge: “So tumé san suté? Uštén i mangénpe Devléske, sob (kaj) tumé te na perén dro propatiakiriben.”

I kiéli Isúso iščo (inké) rakirdiá, ĥáda, sykadyne but manušá, i ake, jov, savés khardé Juda, jekh dešudujedyr sykliaibnytkonendyr, džálas angíl lénde, i jov podgíia ke Isúso te čamudel Les. Isúso phendiá Léske: “Júde! Tu biknesa Manušéskire Čhavés čamudypnasa?” I sykliaibnýtka, savé sys pašýl Léste, kiéli dykhné, ke so davá dogijá, phučné Léstyr: “Rajo Dévla! Te čhinas aménge kurtalenca?” I jekh léndyr čingirdia pisharís rašángire barydyreskires i otčingirdia léske čačó (pravo) kan. Ne Isúso phendiá: “Mekén, uhtýlla (dósi)!”, – i Jov čiladiá léskiro kan i vysastiakirdiá les. I phendiá tedy Isúso rašángire barydyrénge i khangirjákire-xaladytkone barydyrénge, godephurenge, savé javné pe Léste: “Syr pe rozmaribnariste tumé vyginé kurtalenca i kilenca (konkenca)? Kiéli Me sómas so dyvés tuménca dre Khangirí, tedy tumé naĥazdyne vastá pe Mánde; a kakaná – tumaró mardó (štúnda) javdiá i nalačhi zor léla te xulainél dro kalypén (ciamlypén).”

I jone lyné Isusós, lydžiné les krig i jandlé dro pervoné-rašángire barydyreskiro kher. I Pétri ž džálas duripnastyr. I jone kerdé jag maškír gréda (dvóro) i bešné khetané; Pétri ž besciá maškír lénde. I jekh dynárica, kiéli dykhciá les pašýl jag, pridykhciape rakhunes pe léste i phendiá: “I kadavá manúš sys Lésa.” Ne Pétri otphendiape Léstyr, phení: “Džuvlije, me na džinóm Les.” I syg javír manúš, syr dykhciá Petris, phendiá: “I tu san jekh léndyr.” Ne Pétri otphendiá: “More, me na som.” I kiéli progijá (nakhcia) pašé mardó, iščo (inké) vari-kon lyjá zorjása te dophenel: “Čačó, kadavá manúš adiáke-pac' sys Lésa, pal-dová so jov isyn adiáke-pac' Galilejanino.” Ne Pétri otphendiá: “More, me na džinóm, so tu rakirésa.” I adáj že, paka jov rakirdiá, probagandia bašno. I Raj Devél riskirdiá šeró, podykhciá pe Petriste; i priripirdia Pétri Isusóskiro lav, syr Jov phendiá Léske: “Angíl, syr probagala bašno, tu trin móly otphenesape Mándyr.” I Pétri, vygii javrí, rondiá kirkes.

I manušá, kon rikirdia Isusós, kerdé bipatyvakiro saben (zdiekindlepe) pe Léste i mardé Les; i jone phandenas Léskire jakhá, phučné Léstyr, phení: “Uĥaljov, proróko, kon pekadiá Tut?” I jone phendlé but košybnytka lavá pe Léste.

I kiéli jaciá dyvés, godephuré manušéndyr, rašángire barydyrá i lylvarítka skedynépe, i lydžiné Isusós angíl péskiro Siniedriono i phendlé: “Kóli Tu san Xristóso, phen aménge.” Jov phendiá lénge: “Kóli Me phenáva tuménge, tumé na patiána; i kóli Me phučava tuméndyr, tumé na javéna te otphenen Mánge, i na otmekena Man; ne korigedýr daléstyr Čhavó Manušéskiro javéla te bešél pir čačó vast Devléstyr.” I jone saré phendlé: “Tu, xaj, san Čhavó Devléskiro?” I jov otphendiá lénge: “Tumé rakiréna mištés, so Me som?” I jone phendlé: “Save aménge iščo (inké) akaná trej jakhítka, pal-dová so ame kokoré šundiám davá Léskire móstyr?”

להקשיב ל Luka 22