Nugunu - 2017 CABTAL (NT) Non-Drama

Nugunu - 2017 CABTAL (NT) Drama

Naá nnyimé hɔ́ɔlɔ́, Yésusu go ɛ́da ɛ ɛnɛnda naá Gelilée; mammana, a dɛ mbá lɛ́galɛga go ɛnɛnda naá gigísi gá cí gá Yudée, goakɛ́ bagɔ́nɔ́ɔ bá Beyúdene bá mba lɛ́ bá fúmbe go mo óna hɔ́ɔ. Hɔ́ɔlɔ́, gibíné gá Beyúdene gá bincumu gɛ́ mbaá ŋá gɛ́ ná lɛ́ mekúígíi. Bolimóní bá Yésusu go mo oyana bá amɔ́: «Úlúkíe háalá, go ɛ́da naá Yudée go goŋaá behúúní báhɔ bɔ́ɔ tɔ́nɔ bɛ́ ɛ́na buelí báhɔ bɔ́ɔbɔ o yɔgɔnɔmɔ́. Aáŋa o lɛ́galɛga goŋaá batɔ bá go íyime, o do háánánáa go bɔ́ɔsɔsɔ; bɛkɔ́nɔ́nɔ́ɔ bá moóma bɛ́ɛbɛ o ŋananamɔ́ bɛ́ɛbɛ, bɛ́ dúfényéemú naá gɛtátáná!» Mammana, bolimóní bɛ́hɛ́ bá moatɛ́ bá dɛ mbáa lɛ bá ágana odɛ́má yábɔ́ naá mɔ́ɔ. Yésusu go bó gundie a amɔ́: «Gɛcamɛna gámɛ gɛ́ gá lɛ́ gɛ́ dɛ bolá; gɛ́ɛgɛ gɛ́nyɔ́ gɛ́ lɛ́ gɔgɔ́ bese aá bese. Batɔ bá dɛ bósó bá go nyó bɛlabɛla, yɔmɔ́ɔ mɔ́ɔ bá mbɛlabɛlamɔ́, goakɛ́ táaŋona caá meŋiigíe mábɔ́ má lɛ́ bɛgáda. Bɛɛnyɔ́ɔ, ɛ́dá nɔnɔ naá gibíné. Naá bámɛ boayá cɛ ɛ́dánáa, goakɛ́ gɛcamɛna gámɛ gɛ́ gá lɛ́ gɛ́ dɛ háá.» Naá nnyimé ya dogálɔ dɛ́hɛ́ dɔ́ɔdɔ, gɛ́hɛ́ go lɔbɛnɔ naá Gelilée.

Kanɛ́ aŋa bolimóní ba mbaá biené pɛ́ go go ɛ́da naá gibíné, mɔ́ɔ tɔ́nɔ go biene pɛ́ kanɛ go bédúfie, bó mba lɛ́ aŋa naá nɛɔsɛgɔ. Naá gɛcamɛna gá gibíné, bagɔ́nɔ́ɔ bá Beyúdene go ɛ́da go mo fúmbe, bá gɔnɔ gálagala bá amɔ́: «A lɔ́mɔ́ kanɛ́ áhanɛ́ɛ o?» Naá gitúu, cuŋí sɛ́ oba sɛ́ ɔŋkɛdɔ na ufíno yɛ́hɛ́; báaba bá amɔ́: «A lɛ́ usi ba mɔtɔ», bóncodío bá amɔ́: «Caa, a belebelemú batɔ.» Akɛ́ nɔ́ɔnɔ, mɔtɔ a dɛ mbáa lɛ ba go bɛa kélemene ya go gálɛda ukelú naá mmoɛná a bana ufíno yá Yésusu, goakɛ́ bá mba lɛ́ na bofoá go bagɔ́nɔ́ɔ bá Beyúdene.
Gibíné gɛ́ mbaá ŋá gɛ́ báá go íŋenine, gɔ́ɔ Yésusu i íŋenemú naá Nnyaŋá ya Asaŋa, gɛ́hɛ́ go ɛ́da go húunenye. Beyúdene go ɛ́da go békúke, bá gálagala bá amɔ́: «Mɔtɔ kanɛ go bámagana, i íyimenemú bese bese moóma múunú nɛɛ́nɛ?» Yésusu go bó gundie a amɔ́: «Gohúunenye gámɛ gó do báá gámɛ gá moatɛ́, kanɛ́ gó lɔ́mɔ́ gá Mɔ́ɔnyɔ a mbaá tómá. Mɔtɔ mɔ́ɔnyɔ a lɛ́galɛgamɔ́ go ŋa ndɛ́ga ya Asaŋa, a gií íyímé aáŋa bó lɔ́mɔ́ gohúunenye gá Asaŋa ɛ́na a gálagalamɔ́ go gɛ́hɛ́ gá moatɛ́. Mɔtɔ mɔ́ɔnyɔ a gálagalamɔ́ go gɛ́hɛ́ gá moatɛ́, a fúmbemú mbúlugie ya mɔ́ɔ ba moatɛ́ moatɛ; goana mɔtɔ mɔ́ɔnyɔ a fúmbemú nigúmi ná mɔ́ɔnyɔ a mbaá mo dómá mɔ́ɔ o oyamɔ́ mammana, mebelébélíe má dɛ báá naá mɔ́ɔ. Ábɔ, caá Mɔ́sɛsɛ mɔ́ɔ a mbaá nyó fáá gicele o? Kanɛ́ akɛ́ ba ummue naá bɛɛnyɔ́ɔ a dɛ ŋanánáa aŋa gicele gɛ́ oyamɔ́; kanɛ́ no fúmbemú go ŋgóna goakɛ́ o?» Gitúu go mo gundie gɛ́ amɔ́: «Gɛgáda gá giliíli gímmue gɛ́ go nona! Ánɛ́ɛ a fúmbemú go go óna o?» Yésusu go gɔnɔ gɔ́lɔ dogálɔ a amɔ́ gáábɔ́ a amɔ́: «Ŋgaá ŋaáa boóma táŋɛ́ búmmue, bɔ́ no békúkemú biimée.
«Mɔ́sɛsɛ a mba nyó fáá gicele gá goancɛnana, kanɛ́ akɛ́ bó do úlénée naá mɔ́ɔ, bó ɛ́damɔ́ go úlene naá biisée bá biisée kɔ́nɔ́ɔ bɛ́cɔ́. Bɛɛnyɔ́ɔ no olimonyo go bó ŋanana go buisí bá sábadɛ. Bá amɔ́ bá anca mɔtɔ buisí bá sábadɛ kanɛ go dómbɛna gicele gá Mɔ́sɛsɛ, ɛkádɛ kanɛ́ no ɔ́bɔnɔmɔ́ mpímí namɛ aŋa ŋgéŋugiemú mɔtɔ uŋkimée uŋkimée bɛhɛ́ buisí bá sábadɛ o? Dɔmbɔ́ nɔnɔ go sómbana batɔ bɛsɛnɛ go oŋgíso, sómbáa nɔnɔ kanɛ́ naá tɛ́nɛ́ɛ.»
Batɔ bá Yolósalɛmɛ go ɛ́da go oya bá amɔ́: «Ábɔ, caá mɔtɔ mɔ́ɔnyɔ bá fúmbemú go óna múnyúu o? Mɔ́ɔ múnyúu a gálagalamɔ́ daŋɛ́daŋɛ, kanɛ goŋaá mɔtɔ a mo ŋa boóma! Bagɔ́nɔ́ɔ bá Beyúdene bá lɛncana mammana goŋaá mɔ́ɔ a lɔ́mɔ́ Mesíi o? Kanɛ́ mɔ́ɔnyɔ, bɛɛcɔ́ɔ dɛ íyimene anáa ɛ ɛ́damɔ́ go úlene; aŋa Mesíi a ŋguú úlé, mɔtɔ a dɛ ŋgí íyime anáa ɛ ɛ́damɔ́ go úlene.» Yésusu a mba lɛ́ a húunenye naá Nnyaŋá ya Asaŋa, gɛ́hɛ́ go gálɛda ukelú naá mmoɛná a amɔ́: «No ŋgíyimene, no íyimene anáa ŋgɛ́damɔ́ go úlene, asáa gɔgɔ́ cɛ mbá búúline yɔmɔ́ɔ moatɛ́. Mɔ́ɔnyɔ a mbaá tómá, a lɛ́ mammana; kanɛ́ no do bósó go mo íyimene. Yɔmɔ́ɔ mmo íyimene, goakɛ́ ŋgɛ́damɔ́ go úlene anáa a lɔ́mɔ́, mɔ́ɔ a mbaá tómá.» Gɔ́ɔ bɛ́ ɛ́damɔ́ go fúmbe goŋaá bá mo gumbene, kanɛ́ mɔtɔ a dɛ mbá mo dála ombɔ́gɔ, goakɛ́ gɛcamɛna gɛ́hɛ́ gɛ́ mbaá ŋá gɛ́ gá lɛ́ gɛ́ dɛ bolá. Batɔ degédegé naá gitúu bá mba ágá odɛ́má yábɔ́ naá mɔ́ɔ; bá gálagala bá amɔ́: «Mesíi aŋa a ŋguú úlé, a ŋga ŋanánáa bieninye bá gobékúke bɛ́ dómba bá mɔ́ɔnyɔ o?»
Bɔ́ɔbɔ batɔ bá mbaá lɛ bá gálagala kúdúkúdúu go busío bá Yésusu naá gitúu, go ɛ́da bola naá edúu yá Befelisiéŋe. Bagɔ́nɔ́ɔ bá bedúmbí bɛbáágá naá Asaŋa na Befelisiéŋe go dóma kanɛ́ bebeŋíbéŋí go go mo gumbene. Yésusu go oyɛda a amɔ́: «Ká lɛ́ nɛnyɔ́ go moɔnɔ́ ba gɛcamɛna, manɛ́ kaá ná gundé naá Mɔ́ɔnyɔ a mbaá tómá. No ŋga púúmbée kanɛ́ no do ná ŋgɛ́na, goakɛ́ anáa ka ŋgaá bɛ́ɛ́mbá, no do bósó bá go nco bola hɔ́ɔ.» Naá dogálɔ dɛ́hɛ́ dɔ́ɔdɔ, Beyúdene go ɛ́da go búúhenine bá amɔ́: «A gaá nɛ́ ɛ́dá áhanɛ́ɛ go goŋaá dɛ dɛ gɔnɔ́ mo ɛ́na o? A gaá nɛ́ ɛ́dá naá Beyúdene báaba bá mbaá sálámándá naá kadɛ́gadɛ́ɛ ya Bágɛlɛ́gɛ lí? A gɛɛ́ ɛ́dɛ́ná Bágɛlɛ́gɛ moánɛ na gohúunenye gɛ́hɛ́ gɔ́ɔgɔ lí?» «Nogálɔ nɛ́hɛ́ ná goŋaá: “No ŋga púúmbée, kanɛ́ no do ná ŋgɛ́na”, gó gunde, “Anáa ka ŋgaá bɛ́ɛ́mbá, no do bósó bá go nco bola hɔ́ɔ”, nó lɔ́mɔ́ nɛɛ́nɛ naá cí o?»

Buisí bá mesúgidinye bá gibíné, gɛkɔ́nɔ́nɔ́ɔ gá buisí, Yésusu tɛ́nɛ́ɛ go cáyɛda a amɔ́: «Aáŋa mɔtɔ a lɛ́ na inyúidi ŋgá u úle naá yɔmɔ́ɔ, a bónyo. Bó lɛ́ naá Ŋgɔ́ŋɛ́ goŋaá: “Mɔ́ɔnyɔ a ágamɔ́ odɛ́má yɛ́hɛ́ naá yɔmɔ́ɔ, ɛsaá ya miimpo má gɛɔyɔ ɛ ŋga déndélée naá odɛ́má yɛ́hɛ́.”» Naá dogálɔ dɔ́ɔdɔ, Yésusu a mbaá lɛ a gálagala go Giliíli mɔ́ɔnyɔ báaba bá áganamɔ́ odɛ́má yábɔ́ naá mɔ́ɔ bá mbaá lɛ ba go bɛa. Kanɛ́ Giliíli a mbaá ŋá a gá lɛ́ a dɛ bɛ́ɛ́mbá naá gɛcamɛna moánɛ, goakɛ́ Asaŋa a mbaá ŋá a gá lɛ́ a dɛ gɔ́lɔ́ Yésusu naá mmoɛná go go mo fáá nigúmi. Naá nnyimé ya dogálɔ dá Yésusu dɔ́ɔdɔ, nɛnamá ná batɔ naá gitúu go ɛ́da go gálagala nɛ́ amɔ́: «Mɔtɔ mɔ́ɔnyɔ a lɛ́ mammana mbúsí ya Asaŋa!» Bóncodío bá amɔ́: «Mɔ́ɔ a lɔ́mɔ́ Mesíi!» kanɛ́ bóncodío gɔnɔ́ bá amɔ́: «Mesíi a mba lɛ́ ba go ɛ́da go úle naá Gelilée o? Ábɔ, Ŋgɔ́ŋɛ́ sɛ́ dɛ oyáa sɛ́ amɔ́, Mesíi a ŋgaá bɛ́ɛ́mbá naá nogɔgɔ́ ná Défidi, gó gunde ɛ ɛ́da go úlene naá Bɛ́tɛlɛhɛ́mɛ, gɛdɔŋɔ gá mbíényée gá Défidi o?» Nɔ́ɔnɔ gɔ́ɔ gɛca gá batɔ naá gitúu gɛ́ mbaá salógáná go busío bɛ́hɛ́. Nɛnamá ná batɔ níncodío nɛ́ mba lɛ́ nɛ́ fúmbe go mo gumbene, kanɛ́ mɔtɔ a dɛ mbá mo dála ombɔ́gɔ.
Bebeŋíbéŋí go nco gunde naá bagɔ́nɔ́ɔ bá bedúmbí bɛbáágá naá Asaŋa na Befelisiéŋe, bɔ́ɔbɔ go bó úhune bá amɔ́: «No báá lɔmɔ́ no do úlé nɛhɛ́ goakɛ́ o?» Bebeŋíbéŋí go gundie bá amɔ́: «Mɔtɔ a gá báasa a dɛ gálágáláa aŋa mɔtɔ mɔ́ɔnyɔ.» Befelisiéŋe go gɔnɔ bó gundie bá amɔ́: «Bɛɛnyɔ́ɔ tɔ́nɔ, no báa bádɛ́ɛna a báá nyó belé o? Naá bagɔ́nɔ́ɔ bá gɛdɔŋɔ na naá Befelisiéŋe, ummue a lɛ́ hɔ́ɔ mɔ́ɔnyɔ a lɔ́mɔ́ ágáalú odɛ́má yɛ́hɛ́ naá mɔ́ɔ o? Kanɛ́ gitúu gá batɔ gɛ́ɛgɛ gɛ́ dɛ íyíménée gicele gá Mɔ́sɛsɛ, bɔ́ɔbɔ bá lɛ́ yɔmɛ́nɔ́ɔlú!» Ummue mɔ́ɔnyɔ naá Befelisiéŋe, Nɛkɔdɛ́mɛ mɔ́ɔnyɔ a mbɛɛ́ ɛ́dá go ɛ́na Yésusu, go gálɛda a amɔ́: «Gicele gɛ́cɔ́ gɛ́ có fáanana bogaaga bá goŋaá dɛ sómbɛna mɔtɔ gɛsɛnɛ kanɛ goŋaá a á básáágá o? Ɛ́na lí kanɛ go íyime bɔ́ɔbɔ a á ná ŋaáa o?» Gáábɔ́ go mo gundie bá amɔ́: «Maamɔ́ɔ tɔ́nɔ o lɛ́ ba Bégelilée o? Hɛnyáhɛ́nyáa bese go ɛ́na goŋaá akɛ́ mbúsí ya Asaŋa mmue ɛ dɛ bósó ba go húme naá Gelilée.» [Hɔ́ɔlɔ́, onyɔ moánɛ go bégundine naá mɔ́ nnyaŋá.

להקשיב ל Sáŋa 7