Text: © Christian Far East Ministry, 2012 Audio: ℗ 2012 Hosanna

Ruching Palaung - 2012 Edition (Drama NT)

ดอ วี เลห เฌา เยซู โคบ แบลง ยอดาน ตึอน, น็อห พึอม เฌาพรา แฮะ โนะ แคง น็อห อัน. น็อห พึอม เฌาพรา ตี วี ซูต เฌา เยซู ฮาว แคง แปร กาฮ็อห. ดอ กอย อัน แคง แปร กาฮ็อห อาดา พวน ฆึร ซีแง, โบว กานัม ตัห โดง กอย อัน, กาซูห อัน โบง หมาบ. พวน ฆึร ซีแง ตี, อัน ตู โฮม มาเซ. โคว, อัน กาปราณ ปี ดี โฮม.
โบว กานัม ยี กาลาง โฆรห ดี อัน ต็อห, “อึย, เซ อึณ หมาน มูห แม ฆอน เฌาพรา, แตห แม กาลาง, แตห มาว นี วี แบน ปี ดี โฮม แม.”
อัน แฮะ ฮอต กาลาง ปาย ตี, เฌา เยซู วี เวียะ โฆรห ตี. อัน ต็อห, “แคง บับ เฌาพรา อึณ ต็อห, ‘เซ ดูอี มึห มี ปี ดี โฮม อู โมยว, อาว ฆลึม. อึณ ซี โลว ปอ อึณ ปัว.’”
วาย อัน ตี โบว กานัม วี ตึย เฌา เยซู, แตห อัน ฌัม โดง จา กาเซา อู โปละ, แตห อัน ยอด มาน มืง ดอน โปละ แดง กาดาย นี. โบว กานัม วี ต็อห, “แตห แม ยอด อาตี ดอน โมยว. บอ โกรวกราม ตี, บอ ปวน บอ อาพูง ดังโคว อัน, โอว ดี ดัว โตต ดี แม. ฌึร ตี ดอน โมยว, อึณ มูห โอว อี อึบ โตต. โอว บอ อึง ดี ดัว ดี อาเซ, โอว แฮะ ปึอน ดัว ดี วี ตี. เซ แม บอ กรึบ โอว, ปี ยึร แม ตี ดอน โมยว, อึณ ดี แบน โกรว แม.”
อัน แฮะ ฮอต ต็อห ปาย ตี, เฌา เยซู วี ต็อห ดี อัน, “แคง บับ เฌาพรา แฮะ แดม อูน ปาย นี. อึณ ต็อห, ‘เบ โลว กรึบ มี เฌาพรา, อี มูห เฌาพรา ปี กรึบ เบ. เบ โลว โบง ฆาน เฌาพรา อู กาดัง ตี, แกวะ กรึบ ปอ กาดัง.’”
อัน แฮะ ฮอต กาลาง ปาย ตี, โบว กานัม วี ตึย เฌา เยซู ฮาว ฌัม แคง มืง เยรูซาแลม, แตห อัน กอย แดง กาตูะ โฮว เฌาพรา. อัน บอ ต็อห ดี เฌา เยซู, “เซ แฮะ หมาน, มูห แม ฆอน เฌาพรา, แตห แม บูงบลูห บยัว โดง กอย แม นี. โคว, แคง บับ เฌาพรา อึณ แฮะ แดม อูน ต็อห,
‘เฌาพรา ดี จัร เฆ อามู อามาด อัน, แตห เฆ ลึมลา ยอด ซีคยา แม.’
ปอ อู โปละ อึณ ต็อห, ‘เฆ อามู อามาด เฌาพรา, เฆ ดี บัร ดี โจะ แม ตา แด เฆ, ตู แตห เปลา แม ตา ดูห ดี มาว.’”
เฌา เยซู วี ต็อห, “แคง บับ เฌาพรา อึณ บอ แดม อูน ปาย นี. อึณ ต็อห, ‘แกวะ เทว น็อห เฌาพรา, อี มูห เฌาพรา ปี กรึบ แม.’”
โบว กานัม แฮะ ฮอต เทว น็อห เฌา เยซู แบน โมยว แบน โมยว, อัน วี เลห ฮาว โดง กอย เฌา เยซู. อัน บอ หน็อะ บัร ดี ยอด ซีแง เหมา อัน ดี วี ปึอน ดี เทว น็อห เฌา เยซู.

วาย อัน ตี เฌา เยซู เวณ แคง อืง ฆาลีเล. อัน มืร มึห ปวน ปี ดัว น็อห พึอม เฌาพรา ดี อัน. ซาดาง ลอง ปี โบง ปี ต็อห อัน, อึณ บอ แบร ฮาว ดอน โปละ, แตห ดูอี แคง มืง บอ มืง กอ นับ ลอง อัน. เฌา เยซู ยี ฮาว แบน มืง แบน มืง, มาโนว ดูอี แคง โฌง กรึบ เฆ ดูอี อายูดา เฌาพรา. เฆ ดูอี ดอน อี บอ อืบ อัน.
ดอ อัน ตี เฌา เยซู เวณ แคง มืง นาซาเรต, มูห มืง โดง กอย อัน ซีณ ดีแตด อัน. บอ ฌัม ซีแง ดีเหลา, อัน โฮะ ดี โฌง กรึบ เฆ ดูอี อายูดา เฌาพรา แตห อึณ ปี ปี โบง อัน เซเซ. อัน บอ ยีต ตีห ทัม แคง บับ เฌาพรา. แดเจณ อี ลึมลา บับ เฌาพรา แคง โฌง ตึอน บอ อาบ บับ ดี อัน. อึณ มูห บับ ปี แดม อาอีซายัะ อี มูห ดูอี อี บยาน โฆรห เฌาพรา ดอ มึอน. เฌา เยซู วี วึห บับ ตึอน, วี เหรต บอ ยึร โปละ อี แดม อูน ปาย นี,
“น็อห พึอม เฌาพรา แฮะ อึบ โอว, แฮะ ร็อห โอว, แตห โอว กาลาง โฆรห ดี เฆ ดูอี อี หมึอม กาเว, แตห เฆ แบน น็อห ดาคึย. อัน เฌา บอ ตึย โอว ฮาว กาลาง ดี เฆ อี กอย แคง กาปึม, แตห เฆ ปึอน ดี เลห แคง กาปึม โดง กอย เฆ ตี. อัน เฌา แตห โอว กาลาง บอ ดี เฆ ดูอี งาย อับ, แตห งาย เฆ วี บลาง. เฆ ดูอี มึห น็อห ลึร, โอว บอ โลว แตห เฆ วี ดาคึย.
อัน เฌา มืร แตห โอว กาลาง ลอง อาคราว หมึอม ปี ดัว เฌาพรา ดี ดูอี, แตห เฆ เลห แคง ดูก.” แคะ ตี เฌา เยซู ตีห แคง บับ เฌาพรา ตึอน.
อัน แฮะ ฮอต ตีห, อัน บอ วี ดัว บับ ดี ดูอี อี ลึมลา บับ เฌาพรา. แฮะ ฮอต อัน วี ตูต โดง กอย อัน. เฆ ดูอี อี กอย แคง โฌง กรึบ เฆ ดูอี อายูดา เฌาพรา, เฆ ยอด ซีคยา อัน. เฌา เยซู จูห ดี กาลาง ดี เฆ. อัน ต็อห, “โฆรห เฌาพรา แปะ แฮะ โทม เบ ตี, อาตึร นี แฮะ แบน โตต ปี ต็อห เฌาพรา ดี เบ.”
เฆ ดูอี อี โทม ปี ต็อห อัน, เฆ บอ อาม ลอง โฆรห หมึอม ปี กาลาง อัน ดอน โมยว. เฆ ยี ต็อห, “ดูอี ตี มูห ฆอน อาโยวแซบ, อาว มูห?”
เฌา เยซู วี ต็อห ดี เฆ, “เบ นับ ดี กาลาง โฆรห ทูง อี ต็อห, ‘เซ แม มูห ซาราโวน, แตห แม ซีนัม โดว แม, แตห แม แกน แอ ดี อาต.’ เบ ดี บอ ต็อห, ‘เย แฮะ ยึร ลอง แม แฮะ โบง อี หมึอม อาม กาเซา แคง มืง กาเปนารึม. แตห แม โบง ปาย ตี บอ โดง กอย แม นี แคง มืง บรีม แม, แตห เย นับ, แม มูห อาเซ.’
โอว ยี ต็อห อาคัร ดี เบ, เซ ดูอี อี บยาน โฆรห เฌาพรา ตัห ฌัม แคง มืง บรีม อัน, เฆ ดูอี อี กอย แคง มืง อัน ตี, เฆ ตู โรวเซ อัน. อึณ บอ ปาย ตี. ดอ กอย ดา อาเอลียัะ ตึอน, ดอ ตู มึห อึม ฆลาย อาดา โอย ซีนัม ดี เดา มาเฆียน, เฆ ดูอี บอ เอต ปี ดี โฮม แคง มืง อีซาเรลัะ นี. ดอ อัน ตี เฆ ยา ซีปรัห แฮะ กืน แคง มืง อีซาเรลัะ. เฌาพรา ยี ตู แตห อาเอลียัะ ฮาว ฌัม โดง กอย เฆ. อัน แตห อาเอลียัะ ฮาว ฌัม โดง กอย ยา ซีปรัห อู วี อี ตู มูห ดูอี อาโมยว ยูดา, อี กอย มืง ฌาเรพัด อี กอย กาตัด มืง ซีโดน. ดอ กอย ดูอี อี บยาน โฆรห เฌาพรา อี จืร อาเอลีซา ตึอน, อึณ บอ ปาย ตี. ดอ อัน ตี เฆ ดูอี มึห เซา ดูะ แฮะ กืน แคง มืง อีซาเรลัะ. เฌาพรา ยี ตู แตห เซา ดอน อี หราย. อึณ มูห มี อาเนมาน อี ตัห มืง ซูรี, อี ตู มูห ดูอี อาโมยว ยูดา, เซา อัน อู วี ตี, เฌาพรา แฮะ แตห อึณ หราย, แตห อึณ แกน.”
เฌา เยซู แฮะ ฮอต กาลาง ปาย ตี, เฆ ดูอี อี กอย แคง โฌง กรึบ เฆ ดูอี อายูดา เฌาพรา ตึอน, เฆ แฮะ โทม ลอง อัน ตี, เฆ บอ แกร ดี รู กาเซา. เฆ บอ ยีต เหมต อัน, ซูต อัน เลห แคง มืง เฆ. เฆ วี ตึย อัน โฮะ กาแดะ นอน โดง กอย มืง เฆ. เฆ ต็อห ดี จูน บยัว อัน แดง ดาอาง จา. เฌา เยซู ยี เลห โดง กอย เฆ, วี ฮาว นา ซี ฮาว อัน.
วาย อัน ตี เฌา เยซู ฮาว ฌัม มืง กาเปนารึม แคง อืง ฆาลีเล. บอ ฌัม ซีแง ดีเหลา, เฌา เยซู บอ มาโนว เฆ ดูอี อี กอย แคง มืง ตึอน. เฆ ดูอี โทม ปี มาโนว อัน, เฆ บอ อาม กาเซา. ปี มาโนว อัน, อึณ มึห ปวน ตาง.
แคง โฌง กรึบ เฆ ดูอี อายูดา เฌาพรา ตึอน, อึณ มึห อีมาย อู วี. กานัม ฮาย แฮะ ลึบ อัน. ดูอี ตี บอ ดัด ตาง. อัน ต็อห, “อึย, แม อาเยซู, วี อี ตัห มืง นาซาเรต, มาเซ ปี โลว แม ดี เย? แม แฮะ ตัห ดี โบง แตห เย ชึม? โอว นับ, แม มูห อาเซ. แม มูห ดูอี บอด ปี ร็อห ปี ตึย เฌาพรา.”
อัน แฮะ ฮอต กาลาง ปาย ตี ดี เฌา เยซู, เฌา เยซู มืร แคร กานัม ตึอน กาลาง โฆรห. อัน ต็อห, “แกวะ โฆรห. เลห แคง โดว ดูอี ตี.” อัน แฮะ ฮอต กาลาง ปาย ตี, กานัม ฮาย วี โบง แตห ดูอี ตึอน เกห, แตห เฆ บอกาเฆลียด ปึอน ดี ยึร. อัน บอ เลห แคง โดว ดูอี ตี, ตู วี แตห อัน มึห เซา ปอ อึณ ปัว.
เฆ ดูอี บอกาเฆลียด บอ อาม อัน. เฆ ลาย กามวน ลอง อัน ตี. เฆ ต็อห, “มาเซ อึณ มูห, ปี กาลาง ดา ซารา ตี? อัน มึห ปวน ตาง กาเซา, นับ ดี จัร กานัม ฮาย เลห. แฮะ ฮอต, กานัม บอ เลห แคง โดว ดูอี ตึอน.” เฆ บอ กาลาง ลอง ปี โบง เฌา เยซู, แตห อึณ กอ แบร ดอน นา ดอน โปละ, แตห เฆ ดูอี อี กอย แคง มืง ตึอน กอ นับ โตต ลอง อัน ตี.

วาย อัน ตี เฌา เยซู เลห แคง โฌง ตึอน, ฮาว ลึบ แคง กาง อาซีโมน. ดอ อัน ตี อึณ มูห ฆึณ อาซีโมน แฮะ เซาพึร. โดว อัน แฮะ ดาด กาเซา. ดูอี อี กอย ดี ตี, เฆ บอ หมาณ, แตห เฌา เยซู จอย ยา ตี. เฌา เยซู บอ ลึบ ฮาว เครียะ โดง อีด อัน, จัร เซา อัน หราย. แฮะ ฮอต, เซา อัน มืร หราย อู เฌณ. อีบึณ ตึอน วี ยีต, แรน ปี ดี โฮม, ยอด ลึมลา เฆ.
บา ดี อับ ดอ เฆต ซีแง, เฆ ตัห ตึย ดูอี เฮา อี มึห เซา ดอน โมยว, แตห เฆ ตัห ฌัม ดี อาต เฌา เยซู. เฌา เยซู ดาง แด อัน แดง ฆีณ ดอน อี, แตห เซา เฆ หราย โตต. บอ กานัม อี ลึบ ปลึก ดูอี, เฆ บอ เลห เตา. ดอ เลห เตา เฆ, เฆ ต็อห, “แม เฌา, แม มูห ฆอน เฌาพรา.” เฆ แฮะ ฮอต ต็อห ปาย ตี, เฌา เยซู ตู ควาง เฆ กาลาง ปี นับ เฆ ลอง มูห อัน อัน เฌา ปี ร็อห ปี ตึย เฌาพรา แตห อัน คยอด ดูอี.
ปา แคหณา ซีณวัห เจว เฌา เยซู วี เลห แคง มืง ตึอน, ฮาว โดง ตู มึห ดูอี. เฆ ดูอี อี กอย แคง มืง ตึอน, เฆ ยี ฮาว เหรต อัน. แฮะ ฮอต ยึร อัน, เฆ บอ หมาณ ดี อัน, แกวะ แตห อัน วี ฮาว ปอ โปละ. เฌา เยซู ยี ต็อห ดี เฆ, “โอว บอ โลว กาลาง ลอง อาคราว ดี อึบ เฌาพรา กาดาย นี, แตห บอ เฆ ดูอี มืง เฮา กอ นับ. โคว, เฌาพรา แฮะ ตึย โอว ฌัม ดี นี, แตห โอว โบง ฆาน ฌึร ตี.” เฌา เยซู แฮะ ฮอต ต็อห ปาย ตี, อัน วี ฮาว ฌัม แคง อืง ยูดา แบน โปละ แบน โปละ, กาลาง ลอง ปี ดี โบง เฌาพรา, แตห เฆ ดูอี แคง โฌง กรึบ เฆ ดูอี อายูดา เฌาพรา ปึอน ดี โทม.

להקשיב ל ลก 4