 If you would like a copy of this version please contact info@davaraudiobibles.org

Surgujia New Testament, CC-BY-SA-4.0, The Love Fellowship. Surgujia New Testament Audio Bible, CC-BY-SA-4.0, Davar Partners International, The Love Fellowship, 2023.

Surgujia New Testament

SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.

ओ समय चवथाई देश कर राजा हेरोदेस अंतिपास हर यीशु कर बारे मे सुनिस। अउ अपन कमिया मन ला कहिस, एहर यूहन्ना बपतिस्मा देहे बाला है, ओहर मरल मन ले जिन्दा होईस है। एकरे बर ओकर से सामर्थ्य कर बुता परगट होथे।

काबर कि राजा हेरोदेस हर अपन भाई फिलिप्पुस कर घरदारिन हेरोदियास कर कारन, यूहन्ना ला धईर के बांधे रहिस, अउ जेलखाना मे डाएल देहे रहिस। काबर कि यूहन्ना हर ओकर ले कहे रहिस कि एला रखे बर उचित नी है। अउ ओहर ओला माएर देहे बर चाहत रहिस। लेकिन लोग मन ले डरत रहिस काबर कि ओहर ओला अगमजानी मानत रहिस।
पर जब राजा हेरोदेस कर जनम दिन अईस, त हेरोदियास कर बेटी हर खुशी मे नाएच के देखईस, अउ हेरोदेस ला खुश करिस। एकरे बर ओहर कसम खाए के बचन देहिस, जे कुछ ला तय मांगबे त, मैहर तोला देहू। ओहर अपन दाई कर फुसलाल बात ला कहिस, “यूहन्ना बपतिस्मा देहे बाला कर मूड़ ला छीपा मे एहिच ला मोला मंगवाए दे।” राजा हेरोदेस हर दुखी होईस, लेकिन अपन कसम के कारन अउ संग बईठोईया मन कर कारन, हुकूम देहिस, कि दे देईहा। अउ राजा हेरोदेस हर जेलखाना मे सिपाही मन ला भेज के यूहन्ना कर मूड़ ला कटवाए देहिस। अउ यूहन्ना कर मूड़ ला छीपा मे लानल गईस, अउ नोनी ला दे देहिन; अउ ओहर ओला अपन दाई जग ले गईस। अउ यूहन्ना कर चेला मन हर आए के यूहन्ना कर लाश ला ले जाए के गाएड़ देहिन अउ जाए के यीशु ला समाचार देहिन।


जब यीशु हर एला सुनिस, त यीशु हर डोंगा मे चईड़ के हुवा ले कोनो सुनसान जगहा मे एकेच झन चईल देहिस। अउ लोग मन एला सुईन के नगर-नगर ले रेंगत ही ओकर पाछू होए लेहिन। ओहर हिकेल के एक बड़खा भीड़ ला देखिस, अउ ओमन मन पर तरस खईस, अउ ओहर ओमन मन कर बिमारी मन ला चंगा करिस।
जब सांझ होईस त यीशु कर चेला मन हर ओकर लिघे आए के कहिन, एहर त सुनसान जगहा है, अउ देरी होवत है, लोग मन ला बिदा कईर दे, कि लोग मन गाव मे जाए के अपन बर भात खरीद लेही। यीशु हर ओमन मन ले कहिस, ओमन मन के जाए कर जरूरत नी है। तुमन मन ही एमन मन ला खाए बर देवा। ओमन मन ओकर ले कहिन, “हिया हमर जग पाच रोटी अउ दुई मछरी ला छोएड़ अउ कुछ नी है।” ओहर कहिस, ओला हिया मोर लिघे ले लाना। तब ओहर लोग मन ला घास मे बईठे ले कहिस अउ ओ पाच रोटी अउ दुई मछरी ला लेहिस, अउ स्वर्ग कती ला देख के धन्यवाद करिस। अउ चेला मन लोग मन ला, अउ जब सबेच झन खाए के अघाए गिन, अउ चेला मन बाचल टुड़का मन ले भरल बारह टुकना उठईन। अउ खाए बाला महिला अउ छउवा मन ला छोएड़ के पाच हजार आदमी मन रहिन।


अउ यीशु हर तुरतेच अपन चेला मन ला डोंगा मे चड़ईस, अउ ओमन मन ओकर ले आगू पार चईल जाए, जब तक कि ओहर लोग मन ला बिदा कईर लेहिस। ओहर लोग मन ला बिदा कईर के, प्रार्थना करे बर अलग पहार मे चईड़ गईस अउ सांझ ला ओहर हुवा एकेच झन रहिस। ओ समय डोंगा हर झील कर मांझा मे लहर मन ले डगमगात रहिस, काबर कि बईहर हर आगू कती कर रहिस। अउ यीशु राएत कर चाएर पहर झील मे रेंगत ओमन मन कर लिघे अईस। चेला मन ओके ला झील मे रेंगत देख के घबराए गईन, अउ कहे लागिन, “ओहर भूत है,” अउ डर के मारे किरलाए उठिन। तब यीशु हर तुरतेच ओमन ले गोठियईस, अउ कहिस, “हिम्मत बांधा, मैहर हो, झिन डरा।” पतरस हर ओला उत्तर देहिस, “हे प्रभु, अगर तय ही हस, त मोला अपन लिघे पानी मे चईल आए कर हुकूम दे।” यीशु हर कहिस, “आव!” तब पतरस डोंगा मे ले उतेर के यीशु कर लिघे जाए बर पानी मे चले लागिस। लेकिन बईहर ला देख के डईर गईस, अउ जे घनी डूबे लागिस त किरलाए के कहिस, “हे प्रभु, मोला बचाए ले।” यीशु हर तुरतेच हाथ ला बड़हाए के पतरस ला थाम लेहिस, अउ ओकर ले कहिस, “हे आधा बिश्वासी, तय काबर शंका करे?” जब ओहर डोंगा मे चईड़ गईस, त बईहर हर थईम गईस। एकर पर जेमन डोंगा मे रहिन, ओला जोहाएर के कहिन, “सहिच मे तय हर परमेश्वर कर बेटा हस।”


ओमन मन ओ पार उतेर के गत्रेसरत परदेस मे पहुचिन। अउ हुवा कर लोग मन हर ओला पहिचाएन के आस-पास कर सबेच जगहा मे समाचार भेजिन, अउ सबेच बिमार मन ला ओकर जग लानिन। अउ ओकर ले बिनती करे लागिन, कि ओहर ओला अपन कपरा कर अचरा ही ला छुवे दे, अउ जेतेक मन ओला छुईन, ओमन मन चंगा होए गईन।

להקשיב ל मत्ती 14