פסוקים פופולריים מ- Diarhebion 2

Achos yr ARGLWYDD sy’n rhoi doethineb; beth mae e’n ddweud sy’n rhoi gwybodaeth a deall.

Fy mab, os byddi di’n derbyn beth dw i’n ddweud, ac yn trysori’r hyn dw i’n ei orchymyn; os gwnei di wrando’n astud ar ddoethineb, a cheisio deall yn iawn; os byddi di’n gofyn am gyngor doeth, ac yn awyddus i ddeall yn iawn; os byddi’n ceisio doethineb fel arian ac yn chwilio amdani fel am drysor wedi’i guddio, yna byddi di’n deall sut i barchu’r ARGLWYDD a byddi’n dod i wybod am Dduw.

Mae’n rhoi llwyddiant i’r un sy’n gwneud beth sy’n iawn – ac mae fel tarian i amddiffyn y sawl sy’n byw yn onest. Mae’n gwneud yn siŵr fod cyfiawnder yn llwyddo, ac mae’n gwarchod y rhai sy’n ffyddlon iddo.

Y rhai sy’n gwneud beth sy’n iawn fydd yn byw yn y tir, y rhai sy’n byw’n onest fydd yn cael aros yno. Bydd pobl ddrwg yn cael eu gyrru i ffwrdd, a’r rhai sy’n twyllo yn cael eu rhwygo o’r tir.

Bydd yn dy achub di rhag y wraig anfoesol, yr un lac ei moesau sy’n fflyrtian drwy’r adeg, yr un sydd wedi gadael ei gŵr, a diystyru’r addewidion wnaeth hi o flaen Duw.