פסוקים פופולריים מ- रोमि 1

שתפו

चिलिमेनचि इञ बुगिन खभेर एते काइञ लाजाः काना, इनाते चि उना सुबिन बिसवास कराव वनकु कथिर, पहिल दो जहुदी अरो गइर-जहुदिकु कथिर, उद्धार रआ चलते परमेसर रआ सोमोर्थ हेके।

चिलिमेनचि बुगिन खभेर रे नुवां दरसाव एकाना, परमेसर मनवां के अपन परति सतया चिलका एते बाय कुकानाय। नुवां एटेच एते मुडूः तक बिसवास एते अरो बिसवास कथिर होयुः काना जेलेका चि पबितर पोथी रे ओल्‍लेकाना, धरमी होरकु बिसवास एते जुवेत तहिनाकु।

जोब एते दुनिया रआ उपनेग रआ एटेच एते गी परमेसर रआ का नेलुः गुन मने उनी रआ जुगनजुग सोमोर्थ अरो उनी परमेसर रआ सोवाभव सफा-सफा नेलुः काना चिलिमेनचि परमेसर ता उपनेग एकाःआय उना सुबिन जिनिस एते सारी नोःवोय, इनाते सुबिन होरकु रे जहन बहना बनुःआं।

परमेसर के सारीइ कनरेहोंकु उनकु परमेसर के सुहाः लाइख बड़ाय अरो धेनयाबाद काकु एमाःदेया, मुदा उनकु रआ बिचार ता बेयार्थ एना, नोन्डो तक चि उनकु रआ निरबुधिया मोन लुबाः एना।

चिलिमेनचि उनकु ता परमेसर रआ सचाय ता बदलाव केते झुठा बाय कताकु अरो जे जिनिस परमेसर ता उपनेग एकाःआय उना उपासना अरो सेवा-सुसार हेलावेनाकु, मुदा उनी उपनेग कराव वनीः के उपासना अरो सेवा-सुसार काकु कराव, जे सोबदिन धेनयाः आय।

सोवाराग एते परमेसर रआ खिंस, उनकु मनवांकु रआ सुबिन रकम रआ अधरम कामि अरो अनेयाय कराव वनकु रे दिसतार वोःकाना, जे सचाय ता अनेयाय एते तेन ककानाकु।

इनाते परमेसर ता उनकु के घिनघिना हिछा रआ कबजा रे बगी काःकुवाय, नोन्डो तक चि उनकु रेन सुबिन एरा सोवाभिक होड़मो सोम्बोंध बगी केते असोवाभिक होड़मो सोम्बोंध दोहो हेलावेनाकु। इना लेका हेरेलकु हों एराकु लोः सोवाभिक होड़मो सोम्बोंध बागी केते अरो उनकु हेरेल-हेरेल रे कठिक हिछा कराव कथिर जलाः हेलावेनाकु, अरो हेरेल अकु-अकु गी होड़मो सोम्बोंध करावोः हेलावेनाकु, उनकु के जे कठिक कामि कराव एकाःआकु उना रआ ठिक फोल नाम्‍मेताकु। अरो जोब उनकु ता परमेसर रआ गेयान ननाम किमती काकु सोमझावेना, इनाते परमेसर तहों उनकु के कठिक मोन रे बगी काःकुवाय चि उनकु उचित बनुःआं उना कामि काकु।

उनकु खुद बुधिमान सोमझाः कनाकु मुदा नसामझ बाय्येनाकु। अरो जे काय नासोः वनीः परमेसर रआ महिमा का कराव केते नासोः मनवांकु, चेंड़ेकु, जनावारकु अरो टुंडांग वन जनावारकु रआ मुरती बाय केते नेकु के महिमा करावेःकुवाकु।