Yuh 7
7
Kwalaghuta zwana ma ni ta zlghaftá Yesu
1Tahula tsa, mbaɗa *Yesu ka ra haɗika Galili. Va a ta dzaʼa ta haɗika Zudiya wu, kabga ta ɗakwatsay ɗakwatsay maliha ta ghəŋa la *Yahuda hada ŋa dzata. 2Tsaw ndusak ndusa fitika skala dumbi da la Yahuda. 3« Sliʼaf sliʼa gha ka dzaʼa ka ta haɗika Zudiya kada nghaŋta duhwalha gha guli ta slna ta mag ka, 4haɗ mndu ta kuma maraŋtá ghəŋa ni ta ɗifa ghəŋa ni wa. Ya wya mamu skwiha ta mag ka ya, maraŋ mara ta ghəŋa gha baŋluwa ŋa nghaŋta inda mnduha ta kagha, » ka zwana ma ni nda tsi. 5Tsaw ta zlghaf a zwana ma ni ta tsatsi wa. 6Ka Yesu nda həŋ mantsa: « Ta sagha a fitika ɗa wa. Ŋa kaghuni ya ná, dər ta wati luwa tsi, nda maga fitik, ka kaghuni. 7Haɗ kaghuni ta husaŋtá mnduha wa. Iʼi ná, husaŋ husa yu ta mnduha, kabga ta mnanaŋ mna yu ta slna taŋ kul ɗinaku ta həŋ. 8Lawa la kaghuni! La a iʼi wu, kabga ta kɗa a sagha fitika ɗa karaku wu, » ka Yesu nda həŋ. 9Tahula mnanata ni ta tsa gwaɗa ya ta həŋ, ka nzaghutá tsatsi ma Galili.
10Manda laghwa zwana ma ni da vla skalu, ka sliʼaftá tsatsi ka ghəŋa ni ka lafi ma ɗifa ma ɗifa, kul maraŋtá ghəŋa ni baŋluwa.
Taghay Yesu ta skwi ma həga Lazglafta
11Ka la *Yahuda mantsa: « Ga tsatsi tama! » ka həŋ ka zba *Yesu ma vla skalu. 12Ka sliʼavaftá zlərɗutawi ka ŋɗaŋɗa ta ghəŋa tsatsi mataba mnduha kazlay: Ŋərma mndu ya, ka sanlaha, mnduha ta zaɗiŋta tsi, ka sanlaha. 13Ma va tsaya ná, haɗ mndu ta klaŋtá lwi ka gwaɗa ta ghəŋa Yesu wu, kabga zləŋa la mali ta ghəŋa la Yahuda.
14Dəgatá tsa fitikha ŋa skalu ya ka gragra ya ná, ka sliʼaftá Yesu ka lam da həga Lazglafta. Ka taghə tsi ta skwi ŋa mnduha mida. 15Ka la Yahuda mantsa: « Taghaf ga na mndu na ta na ŋa ni ma skwi na na? Ya wya ta lagha a da vla taghaftá skwi wu, waká a snaŋtá skwi ma gwaɗa Lazglafta manda na na? » ka həŋ ka ndərmimay. 16Ka Yesu nda həŋ mantsa: « Ta sagha da mndu ta ghunigihatá skwi ta tagh yu, ta sab da iʼi a wa. 17Ka fa fa mndu ta ghəŋa ni ka maga skwi ta kum Lazglafta, dzaʼa nda sna ka ta sagha da Lazglafta na skwi ta tagh yu na tsi, ka ta klaʼata ma ghəŋa ɗa a yu. 18Mndu ta mna gwaɗa ta ghəŋa ghəŋa ni ná, ghəŋa ni ta ghubu tsi. Mndu ta zba vlaŋtá glaku ta mndu ya taghunafta, vərɗa mndu tsa mndu ya, ghwaɗaka mndu a wa. 19Musa a ta vlaghunata zlahu wu ra? haɗ ya mataba ghuni ta maga slna nda tsa zlahu ya wa. Ta zbə ŋaw kuni ta iʼi ŋa dzata tama? » ka Yesu nda həŋ. 20Ka həŋ mantsa: « Nda ksa ka da halaway, wa ta zba kagha ŋa dzata na? » ka həŋ nda tsi.
21Ka Yesu nda həŋ mantsa: « Turtuktuk yeya slna magaŋ yu, ka ndərmim kuni nda ndərmima demdem. 22Vlaghuna vla Musa ta zlahu ŋa ɗatsa fafaɗ, aŋ mndani Musa a ta zlrafta wa. Daga ta dzidzí ta zlrafta lu. Ta ɗatsay a kuni ta fafaɗa zwani baɗu Sabat rke? 23Ka si laviŋ lava kuni ta tsa fafaɗa zwaŋ baɗu *Sabat, kabga yaha lu da ɓlanaptá zlaha Musa ya ní, kabgawu ta ɓasa kuni ta ŋuɗuf ta ghəŋa iʼi, kabga vəl mbanafta ɗa ta mndu dzahumaʼ baɗu Sabat tama? 24Ma tsə kuni ta guma wa iri, tsawa tsa ta guma manda ya ta raku, » ka Yesu nda həŋ.
Kristi ná, Almasihu ya
25Ka sanlaha ma mnduha la Ursalima mantsa: « Nana mndu na a ta zbə həŋ ŋa dzata kay ra? ka həŋ. 26Ngha ɓa ta platá vgha ni ta gwaɗa, gwaɗanaf a lu wa. Ari tsatsaf tsatsa a maliha mu kazlay: *Kristi na mndu na kəʼa Kana? 27Aŋ mndani nda sna mu ta vli sab tsi. Wya ka sagha sa Kristi tani ná, haɗ mndu nda sna ta vli dzaʼa sab tsi wu, » ka sanlaha ma mnduha la Ursalima guli.
28Ma tsa tagha skwi ta tagh *Yesu ma daɓa həga Lazglafta ya, ka klaŋtá tsi ta lwi dagala dagala. Kaʼa mantsa: « Nda sna kaghuni ta iʼi nda vli sab yu dardar guli ra? Gaghəŋ gaghəŋa ɗa a sagha yu wa. Vərɗa mndu tsa mndu ta ghunɗikta ya. Tsaw sna a kaghuni tama ta tsa mndu ya wa. 29Iʼi, nda sna yu, kabga sagha da tsatsi iʼi. Tsatsi ta ghunɗikta, » ka Yesu. 30Kamkamkam, ka sanlaha ka kuma ksay. Sew haɗ ya ta faftá dzvu tida wu, kabga ta sagha a fitika ni karaku wa. 31« Baɗu saghar Kristi ní, dzaʼa magay ta mazəmzəm ka malaghutá ŋa na mndu na ri? » ka ndəghata sanlaha ma mnduha mataba tsa dəmga ya.
Ghunafta la Farisa ta mnduha ŋa ksaftá Yesu
32Ka sniŋtá la *Farisa ta tsa skwi ta mnə mnduha makɗekmakɗek ta ghəŋa *Yesu ya. Ka ghunaftá la mali ta ghəŋa gwal dra skwi ŋa Lazglafta, nda la Farisa ta gwal ngha həga Lazglafta da ksa Yesu. 33Ka Yesu mantsa: « Ta tekeʼa nzɗa ɗa kwitikw da kaghuni, kada vra yu da mndu ta ghunɗikta. 34Dzaʼa zbay kuni ta iʼi, slafta a kuni ta iʼi wu, laviŋta a kuni ta ɓhata ma vli ta dzaʼa yu guli wu, » ka Yesu nda həŋ. 35Ka la *Yahuda mantsa: « Dzaʼa laghu diga ŋa kwala mu kul slanaghata na? Dzaʼa laghu da taba la Yahuda ta wiɗamtá vgha ma səla la *Grek, ka tagha skwi ŋa la Grek rki na? 36Dzaʼa zbay kuni ta iʼi, slaɗighata a kuni wu, laviŋta a kuni ta ɓhata da vli ta dzaʼa yu guli wu, kaʼa ná, nu klatá ghəŋa tsa gwaɗa ni ya na? » ka həŋ ta ghəŋa ni.
Mnay Yesu ta gwaɗa ta Sulkum nda ghuɓa
37Baɗu kɗavakta fitika tsa skalu ta nzakway ka mghama fitik ya, ka sliʼaftá *Yesu ka sladata, ka gwaɗata nda lwi dagala. Kaʼa mantsa: « Ka ta kuzlaŋ kuzla ndala ta mndu, ka sawi tsi da iʼi da sa imi. 38“Ka zlghaf zlgha mndu ta iʼi katsi, dzaʼa mbəzagap mbəza dzuɓay ma ŋuɗufa ni.” Tsa imi ya ta vla hafu. Mantsa ya vindata ni ma gwaɗa Lazglafta, » ka Yesu. 39Tsaya ná, ta gwaɗ ta ghəŋa Sulkum dzaʼa tsuʼu gwal dzaʼa zlghaftá tsatsi ta tsa gwaɗa ya. Ta vla a lu ta Sulkum karaku ma tsa fitik ya wu, kabga ta kapanaf a lu karaku ta Yesu ma glakwa ni wa.
Kwala Yesu kul haɗ ma fəlma mnduha
40Ka sanlaha mataba tsa dəmga ya snaŋər həŋ ta tsa gwaɗa ya mantsa: « Vərɗa anabi na mndu na, » ka həŋ. 41« Kristi ya, » ka sanlaha. « Tsaw ma Galili dzaʼa saba *Kristi rki? 42“Ma zivira Dawuda ma luwa Betʼlehem ta nzakway ka luwa Dawuda#7:42 Ngha ta 2Samuyel 7:12, Zabura 89:4-5, Yirməya 23:5, Mika 5:1.” a dzaʼa saba Kristi, ka vindata ni ma gwaɗa Lazglafta kay ra? » ka sanlaha. 43Kidaghi gamndər ka tsa ndəghata mnduha ya dagavapta ta ghəŋa gwaɗa ta *Yesu. 44Kamkamkam, ka sanlaha ka kuma ksafta, sew haɗ ya ta faftá dzvu tida wa.
Ga rgha maliha la Yahuda
45Ka vraghutá tsa gwal ngha həga Lazglafta ya da slanaghatá tsa la mali ta ghəŋa gwal dra skwi ŋa Lazglafta nda la *Farisa ya. Ka həŋ mantsa: « Nya kwal kuni ksakta na? » ka tsaha ya nda həŋ. 46Ka həŋ mantsa: « Kay! Haɗ mndu ta kəɗ walaŋtá gwaɗaftá mndərga tsa gwaɗa ta gwaɗ tsa mndu ya wu, » ka həŋ nda tsa la Farisa ya. 47Ka la Farisa mantsa: « Nu! Nanaf nana lu ta kaghuni guli ɓa? 48Mamu mndu dər turtuk mataba la mali mali, nda ya mataba la Farisa ta zlghaftá tsa mndu ya ta nghə kaghuni ra? 49Tsa ndəghata mnduha ta zlghafta ta nghə kaghuni ya ná, sna a həŋ ta zlaha Musa wu, gwal nda ksiʼa həŋ! » ka la Farisa nda həŋ.
50Ka Nikwademu ta nzakway mataba taŋ si ta sliʼafta girviɗik ka lagha slanaghatá *Yesu ya kay nda həŋ mantsa: 51« Ka ta ɗawap a lu ta gwaɗa da mndu, ka snaŋtá skwi maga tsi wu ná, ta gi tsanagha tsa zlaha mu ta guma ta ghəŋa ni ra? » kaʼa. 52Ka həŋ mantsa: « Tekw kagha mataba la Galili guli ra? Dzaŋa ta gwaɗa Lazglafta ɓa ka ngha ka, ka dzaʼa slanagha sla ka ta vli ta mna saba anabi ma Galili, » ka həŋ nda tsi. [53Tahula tsa, ka gazlaghutá həŋ dzagha taŋ.]
© Wycliffe Bible Translators, Inc. All rights reserved.
Yuh 7
7
Kwalaghuta zwana ma ni ta zlghaftá Yesu
1Tahula tsa, mbaɗa *Yesu ka ra haɗika Galili. Va a ta dzaʼa ta haɗika Zudiya wu, kabga ta ɗakwatsay ɗakwatsay maliha ta ghəŋa la *Yahuda hada ŋa dzata. 2Tsaw ndusak ndusa fitika skala dumbi da la Yahuda. 3« Sliʼaf sliʼa gha ka dzaʼa ka ta haɗika Zudiya kada nghaŋta duhwalha gha guli ta slna ta mag ka, 4haɗ mndu ta kuma maraŋtá ghəŋa ni ta ɗifa ghəŋa ni wa. Ya wya mamu skwiha ta mag ka ya, maraŋ mara ta ghəŋa gha baŋluwa ŋa nghaŋta inda mnduha ta kagha, » ka zwana ma ni nda tsi. 5Tsaw ta zlghaf a zwana ma ni ta tsatsi wa. 6Ka Yesu nda həŋ mantsa: « Ta sagha a fitika ɗa wa. Ŋa kaghuni ya ná, dər ta wati luwa tsi, nda maga fitik, ka kaghuni. 7Haɗ kaghuni ta husaŋtá mnduha wa. Iʼi ná, husaŋ husa yu ta mnduha, kabga ta mnanaŋ mna yu ta slna taŋ kul ɗinaku ta həŋ. 8Lawa la kaghuni! La a iʼi wu, kabga ta kɗa a sagha fitika ɗa karaku wu, » ka Yesu nda həŋ. 9Tahula mnanata ni ta tsa gwaɗa ya ta həŋ, ka nzaghutá tsatsi ma Galili.
10Manda laghwa zwana ma ni da vla skalu, ka sliʼaftá tsatsi ka ghəŋa ni ka lafi ma ɗifa ma ɗifa, kul maraŋtá ghəŋa ni baŋluwa.
Taghay Yesu ta skwi ma həga Lazglafta
11Ka la *Yahuda mantsa: « Ga tsatsi tama! » ka həŋ ka zba *Yesu ma vla skalu. 12Ka sliʼavaftá zlərɗutawi ka ŋɗaŋɗa ta ghəŋa tsatsi mataba mnduha kazlay: Ŋərma mndu ya, ka sanlaha, mnduha ta zaɗiŋta tsi, ka sanlaha. 13Ma va tsaya ná, haɗ mndu ta klaŋtá lwi ka gwaɗa ta ghəŋa Yesu wu, kabga zləŋa la mali ta ghəŋa la Yahuda.
14Dəgatá tsa fitikha ŋa skalu ya ka gragra ya ná, ka sliʼaftá Yesu ka lam da həga Lazglafta. Ka taghə tsi ta skwi ŋa mnduha mida. 15Ka la Yahuda mantsa: « Taghaf ga na mndu na ta na ŋa ni ma skwi na na? Ya wya ta lagha a da vla taghaftá skwi wu, waká a snaŋtá skwi ma gwaɗa Lazglafta manda na na? » ka həŋ ka ndərmimay. 16Ka Yesu nda həŋ mantsa: « Ta sagha da mndu ta ghunigihatá skwi ta tagh yu, ta sab da iʼi a wa. 17Ka fa fa mndu ta ghəŋa ni ka maga skwi ta kum Lazglafta, dzaʼa nda sna ka ta sagha da Lazglafta na skwi ta tagh yu na tsi, ka ta klaʼata ma ghəŋa ɗa a yu. 18Mndu ta mna gwaɗa ta ghəŋa ghəŋa ni ná, ghəŋa ni ta ghubu tsi. Mndu ta zba vlaŋtá glaku ta mndu ya taghunafta, vərɗa mndu tsa mndu ya, ghwaɗaka mndu a wa. 19Musa a ta vlaghunata zlahu wu ra? haɗ ya mataba ghuni ta maga slna nda tsa zlahu ya wa. Ta zbə ŋaw kuni ta iʼi ŋa dzata tama? » ka Yesu nda həŋ. 20Ka həŋ mantsa: « Nda ksa ka da halaway, wa ta zba kagha ŋa dzata na? » ka həŋ nda tsi.
21Ka Yesu nda həŋ mantsa: « Turtuktuk yeya slna magaŋ yu, ka ndərmim kuni nda ndərmima demdem. 22Vlaghuna vla Musa ta zlahu ŋa ɗatsa fafaɗ, aŋ mndani Musa a ta zlrafta wa. Daga ta dzidzí ta zlrafta lu. Ta ɗatsay a kuni ta fafaɗa zwani baɗu Sabat rke? 23Ka si laviŋ lava kuni ta tsa fafaɗa zwaŋ baɗu *Sabat, kabga yaha lu da ɓlanaptá zlaha Musa ya ní, kabgawu ta ɓasa kuni ta ŋuɗuf ta ghəŋa iʼi, kabga vəl mbanafta ɗa ta mndu dzahumaʼ baɗu Sabat tama? 24Ma tsə kuni ta guma wa iri, tsawa tsa ta guma manda ya ta raku, » ka Yesu nda həŋ.
Kristi ná, Almasihu ya
25Ka sanlaha ma mnduha la Ursalima mantsa: « Nana mndu na a ta zbə həŋ ŋa dzata kay ra? ka həŋ. 26Ngha ɓa ta platá vgha ni ta gwaɗa, gwaɗanaf a lu wa. Ari tsatsaf tsatsa a maliha mu kazlay: *Kristi na mndu na kəʼa Kana? 27Aŋ mndani nda sna mu ta vli sab tsi. Wya ka sagha sa Kristi tani ná, haɗ mndu nda sna ta vli dzaʼa sab tsi wu, » ka sanlaha ma mnduha la Ursalima guli.
28Ma tsa tagha skwi ta tagh *Yesu ma daɓa həga Lazglafta ya, ka klaŋtá tsi ta lwi dagala dagala. Kaʼa mantsa: « Nda sna kaghuni ta iʼi nda vli sab yu dardar guli ra? Gaghəŋ gaghəŋa ɗa a sagha yu wa. Vərɗa mndu tsa mndu ta ghunɗikta ya. Tsaw sna a kaghuni tama ta tsa mndu ya wa. 29Iʼi, nda sna yu, kabga sagha da tsatsi iʼi. Tsatsi ta ghunɗikta, » ka Yesu. 30Kamkamkam, ka sanlaha ka kuma ksay. Sew haɗ ya ta faftá dzvu tida wu, kabga ta sagha a fitika ni karaku wa. 31« Baɗu saghar Kristi ní, dzaʼa magay ta mazəmzəm ka malaghutá ŋa na mndu na ri? » ka ndəghata sanlaha ma mnduha mataba tsa dəmga ya.
Ghunafta la Farisa ta mnduha ŋa ksaftá Yesu
32Ka sniŋtá la *Farisa ta tsa skwi ta mnə mnduha makɗekmakɗek ta ghəŋa *Yesu ya. Ka ghunaftá la mali ta ghəŋa gwal dra skwi ŋa Lazglafta, nda la Farisa ta gwal ngha həga Lazglafta da ksa Yesu. 33Ka Yesu mantsa: « Ta tekeʼa nzɗa ɗa kwitikw da kaghuni, kada vra yu da mndu ta ghunɗikta. 34Dzaʼa zbay kuni ta iʼi, slafta a kuni ta iʼi wu, laviŋta a kuni ta ɓhata ma vli ta dzaʼa yu guli wu, » ka Yesu nda həŋ. 35Ka la *Yahuda mantsa: « Dzaʼa laghu diga ŋa kwala mu kul slanaghata na? Dzaʼa laghu da taba la Yahuda ta wiɗamtá vgha ma səla la *Grek, ka tagha skwi ŋa la Grek rki na? 36Dzaʼa zbay kuni ta iʼi, slaɗighata a kuni wu, laviŋta a kuni ta ɓhata da vli ta dzaʼa yu guli wu, kaʼa ná, nu klatá ghəŋa tsa gwaɗa ni ya na? » ka həŋ ta ghəŋa ni.
Mnay Yesu ta gwaɗa ta Sulkum nda ghuɓa
37Baɗu kɗavakta fitika tsa skalu ta nzakway ka mghama fitik ya, ka sliʼaftá *Yesu ka sladata, ka gwaɗata nda lwi dagala. Kaʼa mantsa: « Ka ta kuzlaŋ kuzla ndala ta mndu, ka sawi tsi da iʼi da sa imi. 38“Ka zlghaf zlgha mndu ta iʼi katsi, dzaʼa mbəzagap mbəza dzuɓay ma ŋuɗufa ni.” Tsa imi ya ta vla hafu. Mantsa ya vindata ni ma gwaɗa Lazglafta, » ka Yesu. 39Tsaya ná, ta gwaɗ ta ghəŋa Sulkum dzaʼa tsuʼu gwal dzaʼa zlghaftá tsatsi ta tsa gwaɗa ya. Ta vla a lu ta Sulkum karaku ma tsa fitik ya wu, kabga ta kapanaf a lu karaku ta Yesu ma glakwa ni wa.
Kwala Yesu kul haɗ ma fəlma mnduha
40Ka sanlaha mataba tsa dəmga ya snaŋər həŋ ta tsa gwaɗa ya mantsa: « Vərɗa anabi na mndu na, » ka həŋ. 41« Kristi ya, » ka sanlaha. « Tsaw ma Galili dzaʼa saba *Kristi rki? 42“Ma zivira Dawuda ma luwa Betʼlehem ta nzakway ka luwa Dawuda#7:42 Ngha ta 2Samuyel 7:12, Zabura 89:4-5, Yirməya 23:5, Mika 5:1.” a dzaʼa saba Kristi, ka vindata ni ma gwaɗa Lazglafta kay ra? » ka sanlaha. 43Kidaghi gamndər ka tsa ndəghata mnduha ya dagavapta ta ghəŋa gwaɗa ta *Yesu. 44Kamkamkam, ka sanlaha ka kuma ksafta, sew haɗ ya ta faftá dzvu tida wa.
Ga rgha maliha la Yahuda
45Ka vraghutá tsa gwal ngha həga Lazglafta ya da slanaghatá tsa la mali ta ghəŋa gwal dra skwi ŋa Lazglafta nda la *Farisa ya. Ka həŋ mantsa: « Nya kwal kuni ksakta na? » ka tsaha ya nda həŋ. 46Ka həŋ mantsa: « Kay! Haɗ mndu ta kəɗ walaŋtá gwaɗaftá mndərga tsa gwaɗa ta gwaɗ tsa mndu ya wu, » ka həŋ nda tsa la Farisa ya. 47Ka la Farisa mantsa: « Nu! Nanaf nana lu ta kaghuni guli ɓa? 48Mamu mndu dər turtuk mataba la mali mali, nda ya mataba la Farisa ta zlghaftá tsa mndu ya ta nghə kaghuni ra? 49Tsa ndəghata mnduha ta zlghafta ta nghə kaghuni ya ná, sna a həŋ ta zlaha Musa wu, gwal nda ksiʼa həŋ! » ka la Farisa nda həŋ.
50Ka Nikwademu ta nzakway mataba taŋ si ta sliʼafta girviɗik ka lagha slanaghatá *Yesu ya kay nda həŋ mantsa: 51« Ka ta ɗawap a lu ta gwaɗa da mndu, ka snaŋtá skwi maga tsi wu ná, ta gi tsanagha tsa zlaha mu ta guma ta ghəŋa ni ra? » kaʼa. 52Ka həŋ mantsa: « Tekw kagha mataba la Galili guli ra? Dzaŋa ta gwaɗa Lazglafta ɓa ka ngha ka, ka dzaʼa slanagha sla ka ta vli ta mna saba anabi ma Galili, » ka həŋ nda tsi. [53Tahula tsa, ka gazlaghutá həŋ dzagha taŋ.]
© Wycliffe Bible Translators, Inc. All rights reserved.